Capítulo 40

Cabez dje Colebra ta machicá

Vision 14—Revelacion 20:1-10

Tema: Satanás tirá den abismo, e Reino di mil aña, e prueba final di humanidad, i e destruccion di Satanás

Tempo di cumplimento: Desde fin dje tribulacion grandi te na destruccion di Satanás

 1. Con cumplimento dje promé profecía di Bijbel a sigi?

BO TA corda e promé profecía di Bijbel? Jehova Dios a declaré ora el a bisa e Colebra: “Lo mi pone enemistad entre bo i e muher i entre bo simía i su simía. Lo e machica bo cabez i lo bo machica su hilchi.” (Génesis 3:15) Awor cumplimento dje profecía ta yega su culminacion! Nos a sigi e historia dje gera di Satanás contra e organizacion celestial di Jehova semehante di su esposa. (Revelacion 12:1, 9) E simía terrenal dje Colebra, cu su religion, político, i negoshi grandi, a montona persecucion cruel riba Jesucristo, e simía dje muher, i su 144.000 sigidor ungí aki riba tera. (Juan 8:37, 44; Galatio 3:16, 29) Satanás a causa e morto di Jesús den agonía. Pero esei a resulta di ser manera un herida den e hilchi, pasobra Dios a resusita su fiel Yiu dia tres.—Echo 10:38-40.

 2. Con e Colebra ta ser aplastá, i kico ta sosode e simía terrenal dje Colebra?

² Kico dje Colebra i di su simía? Rond di aña 56 EC apóstol Pablo a skirbi un carta largu pa cristian den Roma. Den e conclusion di dje, el a animánan bisando: “Di su parti, e Dios cu ta duna paz lo machica Satanás bao di boso pia pronto.” (Romano 16:20) Esei ta mas cu un machicamento superficial. Satanás lo ser aplastá! Pablo a usa un palabra griego, syn·trí·bo, cu kier men machica te na manteca, trapa, destrui totalmente cu aplastamento. En cuanto e simía humano dje Colebra, esei lo experimenta berdadero plaga den e dia di Señor, culminando den e tribulacion grandi ora Babilonia e Grandi i sistema político di mundo, hunto cu nan compinche financiero i militar ta ser machicá completamente. (Revelacion, capítulo 18 i 19) Asina Jehova Dios ta hiba na culminacion e enemistad entre e dos simía. E Simía dje esposa di Dios ta triunfa riba e simía terrenal dje Colebra, i e simía no ta existi mas!

Satanás tirá den abismo

 3. Segun Juan, kico lo sosode Satanás?

³ Anto, kico ta spera Satanás mes i su demoño? Juan ta bísanos: “I mi a mira un angel baha foi cielo cu e yabi dje abismo i un cadena grandi den su man. I el a coge e dragón, e colebra original, cu ta e Diabel i Satanás, i a maré pa mil aña. I el a tiré den abismo i a ceré i a seyé riba dje, pe no gaña e nacionan mas te cu e mil aña termina. Despues di esei e tin cu ser gelos pa un poco tempo.”—Revelacion 20:1-3.

 4. Ken ta e angel cu tin e yabi dje abismo, i con nos sa?

⁴ Ken ta e angel? E mester tin poder tremendo pe por dispone dje enemigo principal di Jehova. E tin e “yabi dje abismo i un cadena grandi.” Esei ta hácinos corda un vision di antes? Wel, sí, e rey di sprinkhan ta ser yamá “angel dje abismo”! (Revelacion 9:11) Pues, aki di nobo nos ta mira e Vindicador Principal di Jehova, Jesucristo glorificá na accion. E arcangel cu a saca Satanás for di cielo, cu a huzga Babilonia e Grandi, i cu a dispone di “rey di tera i nan ehército” na Armagedón siguramente no ta hala un banda i laga un angel menor dal e golpi maestro di tira Satanás den e abismo!—Revelacion 12:7-9; 18:1, 2; 19:11-21.

 5. Con e angel dje abismo ta trata cu Satanás e Diabel, i pakico?

⁵ Ora e dragón grandi di color di candela tabata sacá for di cielo, e tabata yamá “e colebra original, esun yamá Diabel i Satanás, cu ta gaña tur e tera habitá.” (Revelacion 12:3, 9) Awor ne tempo di cogé i tiré den abismo, e ta ser yamá di nobo cu su nomber completo “e dragón, e colebra original, cu ta Diabel i Satanás.” E devorador, gañador, calumniador, i opositor baho ta ser cadená i tirá “den abismo,” cu ta wordu cerá i seyá bon, “pe no gaña e nacionan mas.” Satanás ta keda den e abismo pa mil aña, durante cua tempo su influencia riba humanidad lo no ta mas cu esei di un prisionero den un calabozo profundo. E angel dje abismo ta kita Satanás completamente for di tur contacto cu e Reino di husticia. Ki un alivio pa humanidad!

 6. (a) Cua evidencia tin di cu demoño també ta baha den abismo? (b) Kico por cuminza awor, i pakico?

⁶ Kico ta sosode e demoñonan? Nan també a ser “reserbá pa huzgamento.” (2 Pedro 2:4) Satanás ta ser yamá “Beelzebub, e gobernante di demoño.” (Lucas 11:15, 18; Mateo 10:25) Den bista dje largu colaboracion di demoño cu Satanás, nan no tin cu haya e mesun huicio? E abismo pa mashá tempo ta un lugar spantoso pa demoño; na un ocasion ora Jesús a confrontánan, nan a “sigi supliqué pa no mándanan bai na abismo.” (Lucas 8:31) Pero ora Satanás ta tirá den abismo, su angelnan siguramente ta ser tirá den abismo hunto cuné. (Compara cu Isaías 24:21, 22.) Despues di tiramento di Satanás i su demoño den abismo, e Reino di mil aña di Jesucristo por cuminza.

 7. (a) Satanás i su demoñonan lo ser den cua estado durante cu nan ta den e abismo, i con nos sa? (b) Hades i abismo ta mescos? (Mira nota.)

⁷ Satanás i su demoño lo ta activo den e abismo? Wel, corda cu e bestia salbahe cu siete cabez di color scarlata “tabata, pero no tá, i toch ta cla pa subi for di abismo.” (Revelacion 17:8) Durante cu e tabata den e abismo, e ‘no tabata.’ E no tabata funciona, tabata inmobilizá, en realidad tabata morto. Di igual manera, mencionando Jesús, apóstol Pablo a bisa: “‘Ken lo baha den abismo?’ esta, pa lanta Cristo for di morto.” (Romano 10:7) Durante cu Jesús tabata den abismo, e tabata morto.a Ta razonabel pa conclui, anto, cu Satanás i su demoñonan lo ta den un estado di inactividad semehante di morto durante e mil aña cu nan ta den e abismo. Ki bon noticia pa amante di husticia!

Huez pa mil aña

8, 9. Kico Juan ta bísanos awor tocante esnan cu ta sinta riba trono, i ken ta eseinan?

⁸ Despues di mil aña, Satanás ta ser gelos for di abismo pa poco tempo. Pakico? Promé cu Juan a contestá, el a bolbe hala nos atencion ne principio dje mil aña. Nos ta leza: “I mi a mira trono, i tabatin esnan cu a sinta riba nan, i nan tabata duná poder di huzga.” (Revelacion 20:4a) Ken tabata esnan sintá riba trono i reinando den cielo hunto cu Jesús glorificá?

⁹ Nan ta e “santonan” cu Daniel a detayá como reinando den e Reino hunto cu Esun “manera un yiu di hende.” (Daniel 7:13, 14, 18) Nan ta mescos cu e 24 anciano cu ta sinta riba trono celestial den e presencia di Jehova mes. (Revelacion 4:4) Nan ta inclui e 12 apóstol, na ken Jesús a duna e promesa: “Den e re-creacion, ora e Yiu di hende ta sinta riba su trono glorioso, boso cu a sigími també lo sinta riba diesdos trono, huzgando e diesdos tribu di Israel.” (Mateo 19:28) Nan també ta inclui Pablo, i cristian corintio cu a keda fiel. (1 Corintio 4:8; 6:2, 3) Nan ta inclui, també, miembro dje congregacion di Laodicea cu a vence.—Revelacion 3:21.

10. (a) Con Juan ta pinta e 144.000 rey awor? (b) Segun loke Juan a bísanos caba, e 144.000 rey ta inclui ken?

¹⁰ Trono—144.000 di nan—ta ser prepará pa tal vencedor ungí cu ta ser “cumprá for di den humanidad como e promé fruta pa Dios i pe Lamchi.” (Revelacion 14:1, 4) Juan a sigi: “Sí, mi a mira alma di esnan ehecutá cu hacha pe testimonio cu nan a duna di Jesús i pa nan papiamento tocante Dios, i esnan cu no a adora ni e bestia salbahe ni su imagen i cu no a recibi e marca riba nan frenta ni riba nan man.” (Revelacion 20:4b) Entre tal rey, anto, ta martir cristian ungí cu na antes, na habrimento di seyo di cinco, a puntra Jehova pa cuanto tempo mas e ta spera pa vinga nan sanger. Ne tempo ei, nan tabata duná un mantel blancu i bisá pa spera poco tempo mas. Pero awor, nan a ser vingá cu e destruccion di Babilonia e Grandi, e destruccion dje nacionan bao dje Rey di reynan i Señor di señornan, i e tiramento di Satanás den abismo.—Revelacion 6:9-11; 17:16; 19:15, 16.

11. (a) Con nos tin cu comprende e expresion “matá cu hacha”? (b) Pakico nos por bisa cu e 144.000 ta muri un morto sacrificial?

¹¹ Tur e 144.000 huez real tabata “ehecuta cu hacha” físicamente? Probablemente mashá poco di nan tabata matá asina literalmente. Pero tal expresion sin duda tin intencion di inclui tur cristian ungí cu a muri como martir di un manera of otro.b (Mateo 10:22, 28) Siguramente, Satanás kier mata nan tur cu hacha, pero, realmente, tur ruman ungí di Jesús no ta muri como martir. Hopi di nan ta muri di maleza of di behez. Sin embargo, eseinan també ta pertenece ne grupo cu Juan a mira awor. E morto di nan tur, den un sentido, ta sacrificial. (Romano 6:3-5) Además, ningun di nan ta parti di mundo. P’sei, mundo ta odia nan tur, i en efecto, nan ta morto den bista di mundo. (Juan 15:19; 1 Corintio 4:13) Ningun di nan ta adora e bestia salbahe ni su imagen, i ora nan muri, ningun di nan tin e marca dje bestia. Nan tur ta muri como vencedor.—1 Juan 5:4; Revelacion 2:7; 3:12; 12:11.

12. Kico Juan a informa tocante e 144.000 rey, i na ki tempo nan ta yega di biba?

¹² Awor tal vencedor ta biba di nobo! Juan a bisa: “I nan a yega di biba i reina como rey cu Cristo pa mil aña.” (Revelacion 20:4c) Esei kier men cu tal huez no ta ser resusitá te cu e destruccion dje nacionan i e tiramento di Satanás i su demoño den abismo? No. E mayor parti di nan ta mashá bibo caba, desde cu nan ta corre riba cabai cu Jesús contra e nacionan na Armagedón. (Revelacion 2:26, 27; 19:14) En berdad, Pablo a indica cu nan resureccion ta cuminza pronto despues dje principio dje presencia di Jesús na 1914 i cu algun ta ser resusitá promé cu e otronan. (1 Corintio 15:51-54; 1 Tesalonicense 4:15-17) P’sei, e yegamento di nan na bida ta extende pa algun tempo ora nan individualmente ta recibi e don di bida inmortal den cielo.—2 Tesalonicense 1:7; 2 Pedro 3:11-14.

13. (a) Con nos tin cu considera e mil aña durante locual e 144.000 ta goberna, i pakico? (b) Con Papías di Hierápolis a considera e mil aña? (Mira nota.)

¹³ Nan ta reina i ta huzga pa mil aña. Esei ta mil aña mes, of nos mester considerá esei como simbólico, como un periodo di tempo largu i indefiní? “Miles” por nifica un gran cantidad indefiní, tal como den 1 Samuel 21:11. Pero aki e “mil aña” ta literal, siendo cu e ta pará skirbí tres bez den Revelacion 20:5-7 como “e mil aña.” Pablo a yama tal tempo di huicio “un dia” ora el a bisa: “[Dios] a fiha un dia den locual e tin e propósito di huzga e tera habitá den husticia.” (Echo 17:31) Siendo cu Pedro ta bísanos cu un dia cu Jehova ta manera mil aña, ta apropiado pe Dia di Huicio ser mil aña mes.c—2 Pedro 3:8.

E otro mortonan

14. (a) Cua declaracion Juan a hinca tocante “e otro mortonan”? (b) Con expresion di apóstol Pablo ta tira luz riba e expresion “yega di biba”?

¹⁴ Ken, anto, tal rey lo huzga si ta manera e palabra cu apóstol Juan a hinca eiden, “(e otro mortonan lo no yega di biba te cu e mil aña ta termina)”? (Revelacion 20:5a) Atrobé, nos tin cu comprende e frase “yega di biba” na armonía cu e contexto. E frase por tin varios nificacion den varios circunstancia. Por ehempel, Pablo a bisa tocante otro cristian ungí: “Ta boso cu Dios a haci biba aunque boso tabata morto den boso ofensa i picánan.” (Efesio 2:1) Sí, cristian ungí cu e spiritu tabata “haci biba,” asta den e promé siglo, siendo declará husto riba base di nan fe den e sacrificio di Jesús.—Romano 3:23, 24.

15. (a) Testigo di Jehova antes di Cristo a disfruta di cua posicion dilanti Dios? (b) Con e otro carnénan ta “yega di biba,” i na ki tempo nan lo tene e tera den nan poder den e sentido di mas completo?

¹⁵ Di igual manera, Testigo di Jehova promé cu Cristo tabata declará husto debí na nan amistad cu Dios; i Abraham, Isaac, i Jacob tabata mencioná como “bibo” aunque nan tabata físicamente morto. (Mateo 22:31, 32; Santiago 2:21, 23) Sin embargo, eseinan i tur otro cu ta ser resusitá, incluyendo e multitud grandi di fiel otro carnénan cu ta sobrebiba Armagedón i cualkier yiu cu por nace di nan den e mundo nobo, tin cu ser hizá ainda na perfeccion humano. Cristo i rey i sacerdote asociado di dje lo haci esei durante e Dia di Huicio di mil aña, riba e base dje sacrificio di rescate di Jesús. Ne fin dje Dia, “e otro mortonan” lo “yega di biba” den e sentido di cu nan lo ser hende perfecto. Manera nos ta bai mira, nan tin cu pasa e prueba final ainda, pero nan lo enfrenta e prueba como hende perfecto. Despues di pasa e prueba, Dios lo declaránan digno di biba pa semper, husto den e sentido di mas completo. Nan lo experimenta realizacion completo dje promesa: “E hustonan mes lo tene e tera den nan poder, i nan lo biba riba dje pa semper.” (Salmo 37:29) Ki un futuro gozoso ta spera humanidad obediente!

E promé resureccion

16. Con Juan a detaya e resureccion cu esnan cu ta reina como rey cu Cristo ta experimenta, i pakico?

¹⁶ Bolbiendo awor na esnan cu ta “yega di biba i reina como rey cu Cristo,” Juan a skirbi: “Esei ta e promé resureccion.” (Revelacion 20:5b) Di ki manera esei ta promé? Esei ta e “promé resureccion” en cuanto tempo, pasobra hende resusitá asina ta e “promé fruta pa Dios i pe Lamchi.” (Revelacion 14:4) També esei ta e promé den importancia, siendo cu esnan cu ta participa den dje ta bira co-gobernante cu Jesús den su Reino celestial i ta huzga e resto di humanidad. Finalmente, esei ta promé en cuanto calidad. Fuera di Jesucristo mes, esnan lantá den e promé resureccion ta e úniconan mencioná den e Bijbel cu ta recibi inmortalidad.—1 Corintio 15:53; 1 Timoteo 6:16.

17. (a) Con Juan a detaya e bendita speranza di cristian ungí? (b) Kico ta e “segundo morto,” i pakico e no tin “autoridad” riba e 144.000 vencedor?

¹⁷ Ki bendita speranza pe ungínan! Manera Juan a bisa: “Feliz i santo ta ken cu ta tene parti den e promé resureccion; e segundo morto no tin ningun autoridad riba nan.” (Revelacion 20:6a) Manera Jesús a priminti hende cristian den Smirna, vencedor cu ta tene parti den e “promé resureccion” lo no ta den peliger di recibi daño dje “segundo morto,” cu kier men exterminacion, destruccion sin speranza di un resureccion. (Revelacion 2:11; 20:14) E segundo morto no tin “autoridad” riba tal vencedor, pasobra nan ta bisti incorrupcion i inmortalidad.—1 Corintio 15:53.

18. Kico Juan a bisa awor di gobernante nobo dje tera, i kico nan lo logra?

¹⁸ Esei lo ta ki diferente cu gobernacion di rey di mundo bao di mando di Satanás! Nan ta manda alomas pa simplemente 50 of 60 aña, i e mayoría grandi ta goberna pa poco aña so. Hopi di nan ta oprimi humanidad. Di tur manera, ki beneficio permanente e nacionan por recibi bao di cambio constante di gobernante i nan ley? Na contraste, Juan a bisa di gobernante nobo dje tera: “Ma nan lo ta sacerdote di Dios i di Cristo, i lo reina como rey cuné pe mil aña.” (Revelacion 20:6b) Hunto cu Jesús, nan lo forma e solo gobierno pe mil aña. Nan sirbishi como sacerdote aplicando e mérito dje sacrificio humano perfecto di Jesús lo hiza hende obediente te na perfeccion spiritual, moral i fisical. Nan sirbishi como rey lo resulta den e edificacion di un arreglo social mundial pa humanidad cu ta refleha e husticia i santidad di Jehova. Como huez pa mil aña, nan, hunto cu Jesús, lo guia amorosamente hende cooperativo ne meta di bida eterna.—Juan 3:16.

E prueba final

19. E tera i humanidad lo ta den ki estado ne fin dje Reino di mil aña, i kico Jesús ta haci e ora ei?

¹⁹ Ne fin dje Reino di mil aña, tur e tera lo parce Eden original. E lo ta un paradijs mes. Humanidad perfecto lo no tin mester di un sumosacerdote mas pa boga pa nan dilanti Dios, siendo cu tur mancha dje picá di Adam lo ser kitá i e último enemigo, morto, lo no existi mas. E Reino di Cristo ta cumpli cu e propósito di Dios di crea un solo mundo cu un solo gobierno. Ne tempo ei, Jesús “ta entrega e reino na su Dios i Tata.”—1 Corintio 15:22-26; Romano 15:12.

20. Juan ta bísanos cu kico lo sosode ne tempo dje prueba final?

²⁰ Anto ta yega e tempo pe prueba final. E mundo di humanidad perfeccioná, na contraste cu e promé hendenan den Eden, por para firme den nan integridad? Juan ta bísanos loke lo pasa: “Awor, asina cu e mil aña ta termina, Satanás lo ser gelós for di su prisón, i ta sali pa gaña e nacionan ne cuater skina dje tera, Gog i Magog, pa reunínan pe gera. I e cantidad di nan ta manera santo di lamá. I nan ta avanza riba e hanchura dje tera i ta rondoná e campamento dje santonan i e stad stimá.”—Revelacion 20:7-9a.

21. Kico Satanás ta haci den su último esfuerzo, i pakico no mester sorprendénos cu algun lo sigi Satanás asta despues dje Reino di mil aña?

²¹ Kico lo pasa e último esfuerzo di Satanás? E ta gaña “e nacionan ne cuater skina dje tera, Gog i Magog,” i ta guíanan “ne gera.” Ken posiblemente por tuma parti di Satanás despues di mil aña di gobernacion teocrático gozoso i edificante? Wel, no lubida cu Satanás por a gaña Adam i Eva perfecto ora nan tabata disfruta di bida den e Paradijs di Eden. I e por a desvia angel di cielo cu a mira e mal resultado dje rebelion original. (2 Pedro 2:4; Hudas 6) Pues, no mester sorprendénos cu algun hende perfecto lo ser tentá pa sigi Satanás despues di un mil aña gozoso di gobernacion dje Reino di Dios.

22. (a) Kico e expresion “e nacionan ne cuater skina dje tera” ta indica? (b) Pakico e rebeldenan ta ser yamá “Gog di Magog”?

²² E Bijbel ta yama tal rebelde “e nacionan ne cuater skina dje tera.” Esei no kier men cu humanidad lo ser partí di nobo den gobierno nacional independiente di otro. Esei simplemente ta indica cu nan lo separánan for di esnan husto i leal di Jehova Dios, i lo manifesta e mesun spiritu malu cu e nacionan ta desplega awe. Nan lo “inventa complot dañoso,” mescos cu Gog di Magog dje profecía di Ezekiel, afin di destrui e gobierno teocrático riba tera. (Ezekiel 38:3, 10-12) P’sei, nan ta ser yamá “Gog di Magog.”

23. Kico ta ser indicá pe echo cu e cantidad di rebelde ta “manera santo di lamá”?

²³ E cantidad di esnan cu ta unínan cu Satanás den su rebelion ta “manera santo di lamá.” Cuanto lo tin? No tin un cantidad predestiná. (Compara cu Hosué 11:4; Huez 7:12.) E cantidad total final dje rebeldenan lo depende di con cada un ta reacciona ne gañamento di Satanás. Pero, sin duda esei lo ta basta hopi, siendo cu nan ta síntinan suficientemente fuerte pa triunfa riba e “campamento dje santonan i e stad stimá.”

24. (a) Cua ta e “stad stimá,” i con nan por rondoné? (b) Kico e “campamento dje santonan” ta representa?

²⁴ “E stad stimá” mester ta e stad cu Jesucristo glorificá a mencioná na su sigidornan den Revelacion 3:12 i cu el a yama “e stad di mi Dios, Jerusalem nobo cu ta baha foi cielo foi mi Dios.” Siendo cu esei ta un organizacion celestial, con ehército terrenal por ‘rondoné’? Pasobra nan ta rondoná “e campamento dje santonan.” Campamento no ta den un stad; pues, e “campamento dje santonan” mester representa hende riba tera cu no ta den e sitio celestial di Jerusalem Nobo, cuanan ta apoya lealmente e arreglo gobernamental di Jehova Dios. Ora hende rebelde bao di Satanás ta ataca tal hende fiel, Señor Jesús ta considera esei como un atake riba dje. (Mateo 25:40, 45) “E nacionan” lo purba di destrui tur loke Jerusalem Nobo celestial a logra haciendo e tera un paradijs. Pues, ora nan ta ataca e “campamento dje santonan,” nan ta ataca també e “stad stimá.”

E tanki di candela i swafel

25. Con Juan a detaya e resultado dje atake dje rebeldenan contra e “campamento dje santonan,” i kico esei lo nifica pa Satanás?

²⁵ Tal esfuerzo final di Satanás lo triunfa? Di ningun manera, no mas cu e atake cu Gog di Magog ta haci contra Israel spiritual lo triunfa den nos dia! (Ezekiel 38:18-23) Juan a duna detaye bibo dje resultado: “Pero candela a baha foi cielo i a devoránan. I e Diabel cu a gáñanan tabata tirá den e tanki di candela i swafel, unda tanto e bestia salbahe como e profeta falso tabata caba.” (Revelacion 20:9b-10a) En bez di simplemente ser tirá den e abismo, awor Satanás, e colebra original realmente ta ser aplasta pe no existi mas, garná, completamente exterminá como si fuera cu candela.

26. Pakico e “tanki di candela i swafel” no por ta un lugar di tormento literal?

²⁶ Nos a ripara caba cu e “tanki di candela i swafel” no por ta un lugar literal di tormento. (Revelacion 19:20) Si Satanás tin cu sufri tormento di agonía ei pa tur eternidad, Jehova lo tin cu conserbele bibo. Pero, bida ta un don, i no ta un castigo. Morto ta e castigo pa picá, i segun e Bijbel, hende morto no ta sinti dolor. (Romano 6:23; Eclesiastés 9:5, 10) Además, nos ta leza despues cu morto mes, hunto cu Hades, ta ser tirá den e mesun tanki di candela i swafel. Siguramente, morto i Hades no por sufri dolor!—Revelacion 20:14.

27. Con loke a pasa Sodoma i Gomorra ta yúdanos comprende e frase “tanki di candela i swafel”?

²⁷ Tur esei ta reforza e punto di bista di cu e tanki di candela i swafel ta simbólico. Además, tal mencion di candela i swafel ta hácinos corda loke a pasa Sodoma i Gomorra di antigua cu Dios a destrui pa motibo di nan maldad grosero. Ora e tempo a yega, “Jehova a haci yobe swafel i candela foi Jehova, foi cielo, riba Sodoma i Gomorra.” (Génesis 19:24) Loke a pasa e dos stad ta ser yamá “e castigo hudicial di candela eterno.” (Hudas 7) Sin embargo, e dos stad no a sufri tormento eterno. Mas bien, nan tabata exterminá, destruí pa semper, hunto cu nan habitante perverso. E dos stad no ta existi awe, i ningun hende por bisa exactamente unda nan tabata situá.

28. Kico ta e tanki di candela i swafel, i con e ta distinto di morto, Hades, i e abismo?

²⁸ Na armonía cu esei, e Bijbel mes ta splica e nificacion dje tanki di candela i swafel: “Esei ta nifica e segundo morto, e tanki di candela.” (Revelacion 20:14) Ta claro cu esei ta mescos cu Gehena cu Jesús a menciona, un lugar unda hende malbado ta ser destruí pa semper i no tormentá. (Mateo 10:28) Esei ta destruccion total i completo sin e speranza di un resureccion. Pues, aunque tin un yabi pa morto, Hades, i e abismo, no tin mencion di un yabi pa habri e tanki di candela i swafel. (Revelacion 1:18; 20:1) Catibo di dje nunca ta sali.—Compara cu Marco 9:43-47.

Tormentá dia i anochi pa semper

29, 30. Kico Juan a bisa tocante e Diabel i també tocante e bestia salbahe i profeta falso, i con nos tin cu comprende esei?

²⁹ Cu referencia ne Diabel i també ne bestia salbahe i profeta falso, Juan ta bísanos awor: “I nan lo ser tormentá dia i anochi pa semper hamás.” (Revelacion 20:10b) Kico esei kier men? Manera nos a menciona caba, no ta lógico pa bisa cu símbolo tal como e bestia salbahe, e profeta falso, i també morto i Hades, por sufri tormento di manera literal. P’sei, nos no tin motibo pa kere cu Satanás lo sufri pa tur eternidad. E ta ser exterminá.

³⁰ E palabra griego usá ei pa “tormenta,” ba·sa·ní·zo, kier men primeramente “purba (metal) cu piedra di toque.” E segundo nificacion ta di “Investigá aplicando tortura.” (The New Thayer’s Greek-English Lexicon of the New Testament) Den su contexto, uso dje palabra griego ta indica cu loke ta sosode Satanás lo sirbi, pa tur eternidad, como un piedra di toque riba e cuestion di lo correcto i lo husto dje gobernacion di Jehova Dios. E cuestion di gobernacion soberano ta keda resuelto una bez i pa semper. Nunca mas un desafío dje soberanía di Jehova Dios tin cu ser probá durante un espacio largu di tempo pa duna prueba cu e ta fout.—Compara cu Salmo 92:1, 15.

31. Con e dos palabra griego relacioná cu e nificacion di “tormento” ta yúdanos comprende e castigo duná na Satanás e Diabel?

³¹ Además, e palabra relacioná ba·sa·ni·stés, “tormentador,” ta ser usá den e Bijbel pa nifica “carcelero.” (Mateo 18:34, Kingdom Interlinear) Na armonía cu esei, Satanás lo ser encarcelá den e tanki di candela pa semper; pa no sali nunca. Finalmente, den e traduccion griego di Los Setenta, cu Juan a conoce bon, e palabra relacioná bá·sa·nos ta ser usá pa referi na humiliacion cu ta resulta den morto. (Ezekiel 32:24, 30) Esei ta yúdanos mira cu e castigo cu Satanás ta haya ta un morto humiyante eterno den e tanki di candela i swafel. Su obranan ta muri hunto cuné.—1 Juan 3:8.

32. Demoño ta duná cua castigo, i con nos sa?

³² Atrobé, e demoñonan no ta ser mencioná den e versículo aki. Nan lo sali hunto cu Satanás na fin dje mil aña, anto recibi e castigo di morto eterno hunto cuné? Evidencia ta contestá cu sí. Den e comparacion di carné i cabrito, Jesús a bisa cu cabrito lo bai den “candela eterno prepará pe Diabel i su angelnan.” (Mateo 25:41) E expresion “candela eterno” tin cu referi ne tanki di candela i swafel unda Satanás lo ser tirá. Angel di Diabel tabata sacá for di cielo hunto cuné. Evidentemente nan a baha den abismo cuné na principio dje Reino di mil aña. Pues, anto, nan també lo ser destruí hunto cuné den e tanki di candela i swafel.—Mateo 8:29.

33. Cua detaye final di Génesis 3:15 lo ser cumplí e ora ei, i e spiritu di Jehova a hala e atencion di Juan na cua asunto?

³³ Dje manera ei, e detaye final dje profecía skirbí den Génesis 3:15 ta ser cumplí. Ora Satanás ta ser tirá den e tanki di candela, lo e ser tanto morto como un colebra cu ta haya su cabez aplastá bao di hilchi di heru. E i su demoñonan lo desparce pa semper. No tin mas mencion di nan den e buki di Revelacion. Awor, ya cu el a caba cu nan proféticamente, e spiritu di Jehova ta hala atencion ne asunto di interés urgente di hende cu tin e speranza di biba riba tera: Kico lo ta e resultado pa humanidad dje gobernacion celestial dje “Rey di reynan” i di “esnan yamá i scogí i fiel hunto cuné”? (Revelacion 17:14) Pa contesta, Juan ta híbanos di nobo ne comienzo dje Reino di mil aña.

[Nota]

[Plachi na página 293]

Lamá Morto. E posible sitio di Sodoma i Gomorra

[Plachi na página 294]

“Lo mi pone enemistad entre bo i e muher i entre bo simía i su simía. Lo e machica bo cabez i lo bo machica su hilchi”