Sigui Cana cu Dios

“Sigui cana pa medio di spiritu i boso lo no cumpli cu ningun deseo carnal.”—GALATIONAN 5:16.

 1. (a) Meimei di ki condicionnan i pa cuantu tempu Enoc a cana cu Dios? (b) Pa cuantu tempu Noe a cana cu Dios, i ki responsabilidadnan pisá e tabatin?

BIJBEL ta bisa nos cu Enoc “a sigui cana cu e Dios berdadero.” Apesar dje abla escandaloso i conducta malbado di hende rond di dje, el a persistí den cana cu Dios te n’e fin di su bida na edad di 365 aña. (Génesis 5:23, 24; Hudas 14, 15) Noe tambe “a cana cu e Dios berdadero.” El a haci esei miéntras el a lanta su famia, miéntras el a lucha cu un mundu bou di influencia di angelnan rebelde i nan yunan violento, i miéntras el a percurá pa tur e detayenan cu tabata enbolbí den construí un arca inmenso cu tabata mas grandi cu cualkier barcu di laman di tempu antiguo. El a sigui cana cu Dios despues dje Diluvio, asta ora rebelion contra Jehova a lanta cabes atrobe na Babel. Sí, Noe a sigui cana cu Dios te na su morto na edad di 950 aña.—Génesis 6:9; 9:29.

 2. Kico kier men “cana cu Dios”?

² Ora Bijbel bisa cu e hombernan di fe aki a “cana” cu Dios, e ta papiando den sentido figurativo. E ta nificá cu Enoc i Noe a comportá nan mes den un manera cu a duna evidencia di fe fuerte den Dios. Nan a haci loke Jehova a manda nan haci i a regulá nan bida na armonia cu loke nan tabata sa tocante dje for di su trato cu humanidad. (Compará cu 2 Crónicanan 7:17.) Nan no solamente a expresá den pensamentu cu nan tabata di acuerdo cu loke Dios a bisa i haci, sino tambe nan a actua conforme cu tur loke el a rekerí—no djis algun cos sino conforme cu tur cos, te n’e grado cu tabata posibel pa nan como hende imperfecto. P’esei Noe, por ehempel, a haci exactamente loke Dios a mand’é. (Génesis 6:22) Noe no a haci cosnan fuera dje instruccionnan cu Dios a dun’é, ni e no tabata negligente. Como un persona cu tabatin un relacion íntimo cu Jehova, cu a sinti su mes liber pa haci oracion na Dios i cu a apreciá direccion divino, el a cana cu Dios. Abo ta haci esei?

Un Curso di Bida Consistente

 3. Kico ta di importancia vital pa tur esnan cu ta sirbidó dedicá i bautisá di Dios?

³ Ta emocionante pa observá hende cuminsá cana cu Dios. Segun cu nan ta dal pasonan positivo na armonia cu Jehova su boluntad, nan ta duna evidencia di fe, sin cua ningun por hende agradá Dios. (Hebreonan 11:6) Cuantu nos ta alegrá cu tur aña, como promedio p’e último cincu añanan, mas cu 320.000 persona a dedicá nan mes na Jehova i a presentá nan mes pa bautismo bou di awa! Pero ta importante tambe pa nan i pa nos tur sigui cana cu Dios.—Mateo 24:13; Revelacion 2:10.

 4. Aunke nan a demostrá un poco fe, pakico mayoria dje israelitanan cu a sali for di Egipto no a drenta e Tera Primintí?

⁴ Den tempu di Moises, fe tabata necesario pa un famia israelita celebrá e Pascu den Egipto i sprengu sanger riba kozijnnan i e parti ariba di nan porta di entrada di cas. (Exodo 12:1-28) Sin embargo, e fe di hopi israelita a vacilá ora nan a mira ehército di fárao pegá nan tras na Laman Corá. (Exodo 14:9-12) Salmo 106:12 ta mustra cu ora nan a crusa sano i salbo riba e fondo secu di laman i a mira e awanan agitá destruí e ehército egipcio, atrobe nan “tabatin fe den [Jehova] su palabra.” Sin embargo, poco tempu despues den desierto, e israelitanan a cuminsá keha tocante awa pa bebe, cuminda i esnan na cabes. E informe negativo di 10 dje 12 spionnan cu a regresá for dje Tera Primintí a yena nan cu miedu. Bou dje circunstancianan ei, manera Salmo 106:24 ta bisa: “Nan no tabatin fe den [Dios] su palabra.” Nan kier a bai Egipto bek. (Númeronan 14:1-4) Solamente ora nan a mira despliegue extraordinario di poder divino, e poco fe cu nan tabatin a sali na cla. Nan no a sigui cana cu Dios. Como resultado, e israelitanan ei no a drenta e Tera Primintí.—Salmo 95:10, 11.

 5. Con 2 Corintionan 13:5 i Proverbionan 3:5, 6 ta relacioná cu canamentu cu Dios?

⁵ Bijbel ta spierta nos: “Sigui pone boso mes na prueba pa mira si boso ta den e fe, sigui duna prueba di loke boso mes ta.” (2 Corintionan 13:5) Ser “den e fe” ta nificá pega n’e totalidad dje creencianan cristian. Esaki ta vital si nos kier logra éxito den cana cu Dios tur e dianan di nos bida. Pa cana cu Dios, nos tin cu ehercé tambe e cualidad di fe, confiando plenamente den Jehova. (Proverbionan 3:5, 6) Esnan cu no ta haci esei por cai den cantidad di trampa i dificultad cu tin. Kico ta algun di esakinan?

Evitá e Trampa di Confia den Bo Mes

 6. Kico tur cristian sa tocante fornicacion i adulterio, i con nan ta sinti tocante e picánan aki?

⁶ Tur hende cu a studia Bijbel, a dedicá nan bida na Jehova, i cu a bautisá sa cu e Palabra di Dios ta condená fornicacion i adulterio. (1 Tesalonicensenan 4:1-3; Hebreonan 13:4) Hende asina ta di acuerdo cu esaki ta corecto. Nan kier biba na armonia cu esei. Tog, inmoralidad sexual ta sigui ser un dje trampanan mas eficas di Satanas. Pakico?

 7. Riba e Yanuranan di Moab, con e hombernan israelita a haña nan enbolbí den conducta cu nan tabata sa cu tabata robes?

⁷ Na promé instante, esnan cu ta haña nan enbolbí den conducta inmoral asina kisas no ta planea pa haci esei. Tal bes esei tabata e caso tambe cu e israelitanan riba e Yanuranan di Moab. Pa hombernan israelita cu tabata cansá di bida den e desierto, na principio e muhernan moabita i madianita cu a tenta nan, por tabata parce amigabel i hospitalario. Pero kico a sosodé ora e israelitanan a aceptá invitacion pa asociá cu hende cu a sirbi Baal i no Jehova, hende cu a permití nan yu muhernan hóben (asta for di famianan prominente) tene relacion sexual cu hombernan cu nan no tabata casá cuné? Ora e hombernan dje campamentu di Israel a cuminsá mira e asociacion ei como algu deseabel, nan a ser tentá pa haci cosnan cu nan tabata sa cu tabata robes, i esaki a costa nan nan bida.—Númeronan 22:1; 25:1-15; 31:16; Revelacion 2:14.

 8. Den nos tempu, kico por hiba un cristian na cometé inmoralidad sexual?

⁸ Kico por causa cu un persona ta cai den un trampa similar den nos tempu? Aunke tal bes e ta na haltura dje seriedad di inmoralidad sexual, si e no ta reconocé tambe e peliger di confia den bo mes, e por permití su mes di haña su mes den un situacion caminda e tentacion pa cometé malecho ta aplastá su sano huicio.—Proverbionan 7:6-9, 21, 22; 14:16.

 9. Ki spiertamentunan bíblico por protehá nos for di inmoralidad?

⁹ Den un manera franco e Palabra di Dios ta spierta nos pa no gaña nos mes pensando cu nos ta asina fuerte cu mal asociacion lo no corumpí nos. Esei ta incluí wakmentu di programanan di television cu ta presentá bida di hende inmoral i wakmentu di revistanan cu ta stimulá deseonan inmoral. (1 Corintionan 10:11, 12; 15:33) Asta asociacion cu compañeronan creyente bou di circunstancianan robes por hiba na problemanan serio. E atraccion entre e sexonan ta fuerte. P’esei cu interes amoroso Jehova su organisacion a spierta nos contra di ta so i for di bista público cu un persona dje sexo opuesto cu no ta nos casá of cu no ta miembro di nos famia. Pa por sigui cana cu Dios, nos tin cu evitá e trampa di confia den nos mes i haci caso dje conseho spiertador cu e ta duna nos.—Salmo 85:8.

No Laga Miedu di Hende Dominá Bo

10. Con “temblamentu pa motibu di hende” ta pone un trampa?

¹⁰ Un otro peliger ta ser identificá na Proverbionan 29:25, cu ta bisa: “Temblamentu pa motibu di hende, esei ta pone un trampa.” Trampa di un yagdó hopi biaha ta enbolbé un las cu ta hala cera duru rond di garganta of cabuyanan cu ta gara pia di un animal. (Job 18:8-11) Di manera similar, tembla pa motibu di hende por sofocá un persona su abilidad di papia libremente i di comportá su mes den un manera cu ta agradá Dios. E deseo di agradá otronan ta normal, i un falta di respet grosero pa loke otro hende ta pensa no ta cristian. Pero balansa ta necesario. Ora preocupacion tocante posibel reaccion di otro hende ta pone un persona haci loke Dios ta prohibí of abstené di haci loke e Palabra di Dios ta manda, e individuo ei a cai den trampa.

11. (a) Kico ta protehá un persona pa miedu di hende no domin’é? (b) Con Jehova a yuda su sirbidónan cu tabata lucha cu miedu di hende?

¹¹ E proteccion contra un trampa asina ta sinta, no den un persona su caracter natural, sino den “confia den Jehova.” (Proverbionan 29:25b) Cu confiansa den Dios, asta un persona cu ta tímido di naturalesa por resultá di tin curashi i firmesa. Tanten cu nos ta rondoná p’e presionnan dje sistema di cosnan satánico aki, nos lo tin cu vigilá contra e miedu di hende cu ta cogé bo den trampa. Aunke profeta Elías tabatin un registro excelente di sirbishi yen di curashi, ora Jezabel a menasá di laga mat’é, el a hui yen di miedu. (1 Reynan 19:2-18) Bou di presion, apostel Pedro yen di miedu a nenga di tabata conocé Jesucristo, i añanan despues el a permití miedu pon’é comportá su mes den un manera contrario n’e fe. (Marco 14:66-71; Galationan 2:11, 12) Sin embargo, tantu Elías como Pedro a aceptá yudansa spiritual i, cu confiansa den Jehova, nan a sigui sirbi Dios aceptablemente.

12. Ki ehempelnan di tempu moderno ta mustra con individuonan a ser yudá pa evitá di laga miedu pone nan keda sin agradá Dios?

¹² Hopi sirbidó di Jehova den nos tempu tambe a siña con pa vence miedu cu ta coge hende den trampa. Un Testigo tiener na Guyana a admití: “E lucha pa resistí presion di mi pareunan na scol ta fuerte.” Pero el a agregá: “Mi fe den Jehova ta mes fuerte.” Ora su maestro a tene bofon di dje dilanti henter e klas pa motibu di su fe, den silencio el a haci oracion na Jehova. Despues, den privá, cu tacto el a duna un testimonio n’e maestro. Durante un bishita na su pueblo natal na Benin, un yoncuman cu tabata siñando e rekisitonan di Jehova a dicidí di deshací di un imágen cu su tata a traha p’e. E yoncuman tabata sa cu e imágen tabata sin bida, i e no tabatin miedu di dje, pero e tabata conciente tambe cu habitantenan furioso lo por a purba mat’é. El a haci oracion na Jehova, i despues anochi el a hiba e imágen den mondi i a deshací di dje. (Compará cu Huesnan 6:27-31.) Ora un señora na República Dominicana a cuminsá sirbi Jehova, su esposo a exigí p’e scoge entre e i Jehova. E homber a menas’é cu divorcio. Miedu lo a pon’é bandoná su fe? El a contestá: “Si tabata pa motibu di infieldad, lo mi tabatin bergwensa, pero mi no tin bergwensa di sirbi Jehova Dios!” El a sigui cana cu Dios, i cu tempu su esposo a djoin e den haci Jehova su boluntad. Cu pleno confiansa den nos Tata celestial, nos tambe por evitá di permití miedu di hende pone nos keda sin haci loke nos sa cu lo agradá Jehova.

Evitá di Minimisá e Importancia di Conseho

13. Contra cua trampa 1 Timoteo 6:9 ta spierta nos?

¹³ Aunke algun trampa cu yagdónan ta usa ta diseñá pa captura cualkier animal cu pa casualidad ta pasa na un cierto lugá, otro trampanan ta lok animalnan pa medio di un as engañosamente atractivo. Asina rikesa ta pa hopi hende. (Mateo 13:22) Na 1 Timoteo 6:8, 9, Bijbel ta animá nos pa keda contentu cu loke nos tin pa come i pa bisti. Anto e ta spierta nos: “Esnan cu ta determiná di bira ricu ta cai den tentacion i un trampa i hopi deseo insensato i perhudicial, cu ta tira hende den destruccion i ruina.”

14. (a) Kico por stroba un persona di tuma na pechu e conseho pa keda contentu cu loke e tin pa come i pa bisti? (b) Con un definicion robes di rikesa por pone un persona minimisá e spiertamentu registrá na 1 Timoteo 6:9? (c) Den ki manera “e deseo di wowo” por haci algun hende ciegu n’e trampa cu ta spera nan?

¹⁴ Apesar dje spiertamentu aki, hopi hende ta cai den trampa pasobra nan no ta aplicá e conseho na nan mes. Pakico? Por ta cu orguyo ta impulsá nan pa insistí pa pega na un estilo di bida cu ta exigí mas cu e ‘cuminda i paña’ cu Bijbel ta urgi nos pa keda contentu cuné? Kisas nan ta minimisá e spiertamentu di Bijbel debí cu pa nan rikesa ta loke hende hopi ricu ta poseé? Bijbel simplemente ta pone e determinacion pa ser ricu na contraste cu keda contentu cu loke bo tin pa come i pa bisti. (Compará cu Hebreonan 13:5.) E “deseo di wowo”—e deseo di poseé cosnan cu nan ta mira, asta sacrificando empeñonan spiritual—ta pone nan manda e interesnan di adoracion berdadero na di dos lugá? (1 Juan 2:15-17; Ageo 1:2-8) Cuantu mas felis ta esnan cu berdaderamente ta tuma e conseho di Bijbel na pechu i ta cana cu Dios dor di haci e sirbishi di Jehova e punto central den nan bida!

Enfrentá Ansiedadnan di Bida Exitosamente

15. Ki situacionnan comprendiblemente ta causa ansiedad na hopi sirbidó di Jehova, i pa ki trampa nos mester ta alerto ora nos ta bou di un presion asina?

¹⁵ Preocupacion ansioso pa obtené e necesidadnan di bida ta mas comun cu e determinacion pa bira ricu. Hopi sirbidó di Jehova ta biba cu solamente e mínimo na posesionnan. Nan ta traha duru pa hopi ora pa nan por tin sikiera paña básico, un lugá pa nan famia drumi anochi, i por lo ménos algun cuminda p’e dia. Otronan ta lucha cu problemanan di enfermedad of behes di nan mes of di miembronan di famia. Ki fácil lo ta pa permití circunstancianan asina sofocá interesnan spiritual for di nan bida!—Mateo 13:22.

16. Con Jehova ta yuda nos trata cu presionnan di bida cu éxito?

¹⁶ Amorosamente, Jehova ta bisa nos tocante e alivio cu hende lo experenciá bou dje Reino Mesiánico. (Salmo 72:1-4, 16; Isaías 25:7, 8) Tambe e ta yuda nos trata cu e presionnan di bida awor dor di duna nos conseho riba con pa tene nos prioridadnan den e órden corecto. (Mateo 4:4; 6:25-34) Jehova ta trankilisá nos pa medio dje registro di e manera cu el a yuda su sirbidónan den pasado. (Jeremías 37:21; Santiago 5:11) E ta fortificá nos cu e conocimentu di cu, sin importá ki adversidad bini riba nos, su amor pa su sirbidónan leal ta keda constante. (Romanonan 8:35-39) Pa esnan cu ta pone nan confiansa den Jehova, e ta declará: “Lo mi no bandoná bo di ningun manera ni desampará bo di ningun manera.”—Hebreonan 13:5.

17. Duna ehempelnan di e manera cu individuonan cu a pasa den contratempu pisá por a sigui cana cu Dios.

¹⁷ Fortalecí dor dje conocimentu aki, cristiannan berdadero ta sigui cana cu Dios en bes di desviá bai den camindanan di mundu. Un filosofia mundano comun entre hende pober den hopi pais ta cu si bo coge algu for di un persona cu tin mas cu bo pa bo por alimentá bo famia, no ta ladronicia. Pero esnan cu ta cana pa fe ta rechasá e punto di bista ei. Pa nan, Dios su aprobacion tin mas balor cu tur otro cos i nan ta acudí na dje pa recompensá nan conducta onesto. (Proverbionan 30:8, 9; 1 Corintionan 10:13; Hebreonan 13:18) Un biuda na India a haña cu boluntad pa traha combiná cu ingeniosidad a yud’é manehá e situacion. En bes di carga rencor tocante su situacion den bida, e tabata conciente cu si e pone e Reino di Dios i su husticia na promé lugá den su bida, Jehova lo bendicioná su esfuersonan pa obtené e necesidadnan pa su mes i pa su yu homber. (Mateo 6:33, 34) Hopi miles di hende rond mundu ta demostrá cu, sea cual sea e contratempu cu nan por experenciá, Jehova ta nan refugio i fortalesa. (Salmo 91:2) Esei ta e caso cu bo?

18. Kico ta e clave pa evitá e trampanan dje mundu di Satanas?

¹⁸ Tanten cu nos ta biba den e sistema actual di cosnan, lo tin trampanan cu nos tin cu evitá. (1 Juan 5:19) Bijbel ta identificá esakinan i ta mustra nos con pa evitá nan. Esnan cu berdaderamente ta stima Jehova i tin un temor saludabel di desagrad’é por trata cu éxito cu trampanan asina. Si nan “sigui cana pa medio di spiritu,” nan lo no sucumbí pa camindanan mundano. (Galationan 5:16-25) Pa tur esnan cu berdaderamente ta edificá nan bida rond di nan relacion cu Jehova, tin e prospecto magnífico di cana cu Dios, disfrutando di un relacion íntimo cuné pa semper.—Salmo 25:14.

Kico Ta Bo Comentario?

◻ Con confiansa den bo mes por ta un trampa?

◻ Kico por protehá nos pa miedu di hende no dominá nos?

◻ Kico por pone nos keda sin aplicá conseho relacioná cu e peliger di sigui tras di rikesa?

◻ Kico por yuda nos evitá di laga ansiedadnan di bida coge nos den trampa?

[Plachi na página 16, 17]

Hopi ta sigui cana cu Dios durante henter nan bida