E Famia di Jehova Ta Disfruta di Unidad Precioso
“Mira! Ki bon i ki agradabel ta pa rumannan biba huntu den unidad!”—SALMO 133:1.
1. Den ki condicion hopi famia ta awe?
FAMIANAN ta den crísis awe. Den hopi famia, lasonan matrimonial ta na punto di kibra. Divorcio ta birando mas i mas comun, i hopi yu di parehanan divorciá ta pasando den hopi tristesa. Miyones di famia ta infelis i desuní. Sin embargo, tin un famia cu sa kico ta berdadero goso i berdadero unidad. Esei ta e famia universal di Jehova Dios. Den dje, miriada di angelnan invisibel ta cumpli cu nan tareanan asigná na armonia cu e boluntad divino. (Salmo 103:20, 21) Pero tin un famia riba tera cu ta disfrutá di tal unidad?
2, 3. (a) Ken awor ta parti dje famia universal di Dios, i cu kico nos por compará tur Testigo di Jehova awe? (b) Ki preguntanan nos lo considerá?
2 Apostel Pablo a skirbi: “Mi ta dobla mi rudianan n’e Tata, na ken tur famia den shelu i riba tera ta debe nan nomber.” (Efesionan 3:14, 15) Tur desendencia di famia riba tera ta debe nan nomber na Dios pasobra e ta e Creador. Aunke no tin famia humano den shelu, den sentido figurativo Dios ta casá cu su organisacion celestial, i un bruid spiritual lo uni cu Jesus den shelu. (Isaías 54:5; Lucas 20:34, 35; 1 Corintionan 15:50; 2 Corintionan 11:2) Awor e fiel ungínan riba tera ta parti dje famia universal di Dios, i e “otro carnénan” di Jesus, cu speransa terenal, ta su miembronan prospectivo. (Juan 10:16; Romanonan 8:14-17; E Toren di Vigilancia, 15 di januari, 1996, página 31) Sin embargo, por compará tur Testigo di Jehova awe cu un famia mundial uní.
3 Abo ta parti dje maraviyoso famia internacional di sirbidornan di Dios? Si ta asina, bo ta disfrutá di un dje mayor bendicionnan cu cualkier hende por tin. Miyones di persona lo testiguá cu Jehova su famia mundial—su organisacion visibel—ta un oásis di pas i unidad den un desierto mundano di pleitu i desunion. Con nos por describí e unidad di Jehova su famia mundial? I ki factornan ta promové tal unidad?
Ki Bon i ki Agradabel!
4. Den bo propio palabranan, con lo bo expresá loke Salmo 133 ta bisa tocante unidad fraternal?
4 E salmista David a apreciá unidad fraternal profundamente. El a asta ser inspirá pa canta tocante dje! Imaginá David cu su arpa segun cu el a canta: “Mira! Ki bon i ki agradabel ta pa rumannan biba huntu den unidad! Esei ta manera e bon zeta riba cabes, cu ta core riba e barba, e barba di Aron, cu ta core te n’e kol di su paña. E ta manera e serena di Hérmon cu ta baha riba e cerunan di Síon. Pasobra ei Jehova a ordená p’e bendicion ta, asta bida pa tempu indefiní.”—Salmo 133:1-3.
5. A base di Salmo 133:1, 2, ki comparacion nos por haci entre e israelitanan i Dios su sirbidornan actual?
5 E palabranan ei a aplicá n’e unidad fraternal cu e pueblo antiguo di Dios, e israelitanan, a disfrutá di dje. Ora nan tabata na Jerusalem pa nan tres fiestanan anual, nan en berdad a biba huntu den unidad. Aunke nan a bini for di vários tribu, nan tabata un solo famia. E echo cu nan tabata huntu tabatin un efecto saludabel riba nan, mescos cu zeta di ungimentu refrescante cu un aroma agradabel. Ora e zeta ei a ser bashá riba cabes di Aron, el a core riba su barba te n’e kol di su paña. P’e israelitanan, e echo cu nan tabata huntu tabatin un bon influencia cu a plama den e pueblo reuní den su totalidad. Malcomprendimentunan a ser resolvé, i unidad a ser promové. Un unidad similar ta existí den Jehova su famia mundial awe. Asociacion regular tin un efecto spiritual saludabel riba su miembronan. Cualkier malcomprendimentu of dificultad ta ser eliminá segun cu e conseho dje Palabra di Dios ta ser aplicá. (Mateo 5:23, 24; 18:15-17) Jehova su pueblo ta apreciá mashá e estímulo mutuo cu ta resultá for di nan unidad fraternal.
6, 7. Con e unidad di Israel tabata manera serena dje Ceru di Hérmon, i unda nos por haña e bendicion di Dios awe?
6 Den ki sentido Israel su bibamentu huntu den unidad tabata tambe manera e serena dje Ceru di Hérmon? Wel, siendo cu e punta dje ceru aki ta mas cu 2.800 meter riba nivel di laman, e tin un capa di sneu casi henter aña. E punta di Hérmon yen di sneu ta haci e vapor di anochi condensá i ta producí asina e serena abundante cu ta conserbá vegetacion durante e temporada largu di secura. Coriente di aire friu for dje cordiyera di Hérmon por hiba tal vapor te parti sur den e área di Jerusalem, unda e ta condensá como serena. Di manera cu e salmista corectamente a papia di ‘e serena di Hérmon cu ta baha riba Ceru di Síon.’ Ki un recordatorio excelente dje influencia refrescante cu ta promové e unidad dje famia di adoradornan di Jehova!
7 Promé cu e congregacion cristian a ser establecí, Síon, of Jerusalem, tabata e centro di adoracion berdadero. P’esei, tabata ei cu Dios a ordená p’e bendicion ta. Siendo cu e Fuente di tur bendicion a biba representativamente n’e santuario den Jerusalem, bendicionnan lo a originá for di ei. Sin embargo, debí cu adoracion berdadero no ta limitá mas na un solo sitio, e bendicion, amor i unidad dje sirbidornan di Dios por ser hañá na tur parti dje tera awe. (Juan 13:34, 35) Cua ta algun factor cu ta promové e unidad aki?
Factornan cu Ta Promové Unidad
8. Kico nos ta siña tocante unidad na Juan 17:20, 21?
8 E unidad di Jehova su adoradornan ta basá riba obedencia n’e Palabra di Dios, comprendé corectamente, incluyendo e siñansanan di Jesucristo. Dor cu Jehova a manda su Yu na mundu pa duna testimonio dje berdad i pa muri un morto sacrificial, e caminda a habri p’e formacion dje congregacion cristian uní. (Juan 3:16; 18:37) Cu mester tabatin berdadero unidad entre su miembronan a ser hací claro ora Jesus a pidi den oracion: “Mi ta haci peticion, no en cuanto esakinan so, sino tambe en cuanto esnan cu ta pone fe den mi mediante nan palabra; pa nan tur por ta un, mescos cu abo, Tata, ta den union cu mi i ami ta den union cu bo, pa nan tambe por ta den union cu nos, pa e mundu por kere cu ta abo a mandá mi.” (Juan 17:20, 21) Jesus su siguidornan en berdad a alcansá un unidad similar na esun cu a existí entre Dios i su Yu. Esaki a sosodé pasobra nan a cumpli cu e Palabra di Dios i cu Jesus su siñansanan. E mésun actitud ta un factor principal den e unidad di Jehova su famia mundial awe.
9. Ki papel e spiritu santu ta hunga den e unidad di Jehova su pueblo?
9 Un otro factor cu ta unificá e pueblo di Jehova ta cu nos tin e spiritu santu, of forsa activo, di Dios. E ta permití nos comprendé e berdad revelá di Jehova su Palabra i asina sirbié unidamente. (Juan 16:12, 13) E spiritu ta yuda nos evitá obranan carnal cu ta causa desunion manera pleitu, yalursheid, atake di rabia i contencion. Mas bien, e spiritu di Dios ta producí den nos e fruta unificador di amor, goso, pas, gran pacenshi, amabilidad, bondad, fe, suavedad i dominio propio.—Galationan 5:19-23.
10. (a) Ki paralelo nos por establecé entre e amor cu ta existí den un famia humano uní i e amor cu ta evidente entre esnan dedicá na Jehova? (b) Con un miembro dje Cuerpo Gobernante a expresá su sintimentunan tocante reunimentu cu su rumannan spiritual?
10 Miembronan di un famia uní ta stima otro i ta contentu di por ta huntu. Di manera similar, esnan den e famia uní di Jehova su adoradornan ta stim’é, ta stima su Yu i compañeronan creyente. (Marco 12:30; Juan 21:15-17; 1 Juan 4:21) Mescos cu un famia natural amoroso ta disfrutá di come huntu, esnan dedicá na Dios ta encantá di por ta presente na reunionnan cristian, asambleanan i congresonan pa saca beneficio for di un dushi asociacion i excelente alimento spiritual. (Mateo 24:45-47; Hebreonan 10:24, 25) Un miembro dje Cuerpo Gobernante di Testigonan di Jehova a bisa un biaha: “Pa mi, reuní cu e rumannan ta un dje placernan mas grandi di bida i un fuente di animacion. Mi ta gusta pa ta entre e proménan pa yega Salon di Reino, i pa ta entre e últimonan pa bai fo’i djei, si ta posibel. Mi ta sinti un goso di paden ora mi ta papia cu esnan dje pueblo di Dios. Ora mi ta entre nan mi ta sintí mi na cas cu mi famia.” Ta asina abo ta sinti?—Salmo 27:4.
11. Den ki trabou specialmente Testigonan di Jehova ta haña felicidad, i kico ta e resultado di haci e sirbishi di Dios e punto focal di nos bida?
11 Un famia uní ta haña felicidad den haci cosnan huntu. Igualmente, esnan den e famia di Jehova su adoradornan ta haña goso den haci unidamente nan trabou di predicá e Reino i haci disipel. (Mateo 24:14; 28:19, 20) Participacion regular den dje ta hala nos mas cerca otro Testigonan di Jehova. Haciendo e sirbishi di Dios e punto focal di nos bida i apoyando tur e actividadnan di su pueblo tambe ta promové e spiritu di famia entre nos.
Ordu Teocrático Ta Esencial
12. Kico ta e característicanan di un famia felis i uní, i ki areglo a promové unidad den e congregacionnan cristian di promé siglo?
12 Un famia cu ta ser guiá den un manera firme pero amoroso i cu ta ordená probablemente lo ta uní i felis. (Efesionan 5:22, 33; 6:1) Jehova ta un Dios di ordu pacífico, i tur esnan den su famia ta consider’é como “E Supremo.” (Daniel 7:18, 22, 25, 27; 1 Corintionan 14:33) Tambe nan ta reconocé cu el a nombra su Yu, Jesucristo, e heredero di tur cos i a delegá na dje tur autoridad den shelu i riba tera. (Mateo 28:18; Hebreonan 1:1, 2) Cu Cristo como su Cabes, e congregacion cristian ta un organisacion ordená i uní. (Efesionan 5:23) Pa supervisá e actividadnan dje congregacionnan di promé siglo, tabatin un cuerpo gobernante consistiendo dje apostelnan i otro “ancianonan” spiritualmente maduro. Congregacionnan individual tabatin superintendentenan, of ancianonan, i sirbidornan ministerial nombrá. (Echonan 15:6; Filipensenan 1:1) Obedeciendo esnan cu a hiba delantera a promové unidad.—Hebreonan 13:17.
13. Con Jehova ta atraé hende, i na kico esaki ta hiba?
13 Pero tur e ordu aki ta indicá cu e unidad di Jehova su adoradornan por ser atribuí na hefatura firme i impersonal? Siguramente cu no! Ni Dios ni su organisacion no tin nada cu ta falta amor. Jehova ta atraé hende dor di mustra amor, i tur aña cientos di miles di persona boluntariamente i gososamente ta bira parti di Jehova su organisacion dor di ser bautisá como símbolo di nan dedicacion di henter curason na Dios. Nan actitud mental ta manera esun di Hosué, kende a urgi co-israelitanan: “Scoge pa boso mes awe ken boso lo sirbi . . . Pero en cuanto ami i mi cas, nos lo sirbi Jehova.”—Hosué 24:15.
14. Pakico nos por bisa cu e organisacion di Jehova ta teocrático?
14 Como parti di Jehova su famia, nos no ta solamente gososo sino tambe protehá. Esaki ta asina pasobra su organisacion ta teocrático. E Reino di Dios ta un teocracia (for di griego, the·osʹ, dios, i kraʹtos, un gobernacion). E ta un gobernacion dor di Dios, decretá i establecí dor di dje. Jehova su “nacion santu” ungí ta sumiso na su gobernacion i p’esei ta tambe teocrático. (1 Pedro 2:9) Cu e Gran Teócrata, Jehova, como nos Hues, Dunador di Statuto, i Rey, nos tin tur motibu pa sinti nos protehá. (Isaías 33:22) Sin embargo, kico pa haci si surgi algun disputa cu ta menasá nos goso, siguridad i unidad?
Cuerpo Gobernante Ta Tuma Accion
15, 16. Ki disputa a lanta den e promé siglo, i pakico?
15 Pa conserbá e unidad di un famia, de bes en cuando lo mester resolvé un disputa. Suponé, anto, cu un problema spiritual mester a ser resolvé pa conserbá e unidad di Dios su famia di adoradornan den e promé siglo E.C. Kico mester a ser hací e ora ei? E cuerpo gobernante a tuma accion, tumando decision riba asuntunan spiritual. Nos tin un registro bíblico di un accion asina.
16 Rond di aña 49 E.C., e cuerpo gobernante a reuní na Jerusalem pa resolvé un problema serio i asina conserbá e unidad di “e famia di Dios.” (Efesionan 2:19) Rond di 13 aña mas promé, apostel Pedro a predicá na Cornelio, i e promé gentilnan, of hendenan dje nacionnan, a bira creyentenan bautisá. (Echonan, capítulo 10) Durante Pablo su promé biahe di misionero, hopi gentil a aceptá cristianismo. (Echonan 13:1–14:28) De facto, un congregacion di cristiannan gentil a ser establecí na Antiokia, Siria. Algun hudiu cristian a haña cu e gentilnan cu a combertí mester a ser circuncidá i warda e Ley di Moises, pero otronan no tabata di acuerdo. (Echonan 15:1-5) E disputa aki por a hiba na desunion completo, asta n’e formacion di congregacionnan separá di hudiu i gentil. P’esei e cuerpo gobernante a tuma accion mesora pa conserbá e unidad cristian.
17. Ki procedura teocrático armonioso ta ser describí den Echonan capítulo 15?
17 Di acuerdo cu Echonan 15:6-22, “e apostelnan i e ancianonan a reuní huntu pa considerá e asuntu aki.” Tambe tabatin otronan presente, incluyendo un delegacion di Antiokia. Pedro a splica promé cu ‘pa medio di su boca hende dje nacionnan a tende e bon nobo i a kere.’ Despues “henter e multitud” a scucha segun cu Barnabas i Pablo a relatá “e hopi señalnan i indicacionnan profético cu Dios a haci mediante nan entre e nacionnan,” of gentilnan. Siguientemente Santiago a sugerí con e cuestion por a ser resolvé. Despues cu e cuerpo gobernante a tuma un decision, Bijbel ta bisa nos: “A parce bon n’e apostelnan i n’e ancianonan huntu cu henter e congregacion pa manda hombernan scogí for di entre nan pa Antiokia huntu cu Pablo i Barnabas.” E “hombernan scogí” ei—Hudas i Sílas—tabatin huntu cu nan un carta animador pa compañeronan creyente.
18. E cuerpo gobernante a tuma ki decision cu a enbolbé e Ley di Moises, i con esaki a afectá e cristiannan hudiu i gentil?
18 E carta cu a anunciá e decision dje cuerpo gobernante a cuminsá cu e palabranan: “E apostelnan i e ancianonan, rumannan, na e rumannan di Antiokia i Siria i Cilicia cu ta dje nacionnan: Saludo!” Otro rumannan a asistí n’e reunion histórico aki, pero aparentemente e cuerpo gobernante tabata consistí di “e apostelnan i e ancianonan.” E spiritu di Dios a guia nan, pasobra e carta ta declará: “A parce bon n’e spiritu santu i na nos mes pa no agregá ningun carga mas riba boso, excepto e cosnan necesario aki, pa sigui abstené boso di cosnan sacrificá na ídolonan i di sanger i di cosnan strangulá i di fornicacion.” (Echonan 15:23-29) No tabata necesario pa cristiannan ser circuncidá ni warda e Ley di Moises. E decision aki a yuda cristiannan hudiu i gentil pa actua i papia den unidad. E congregacionnan a alegrá, i unidad precioso a continuá, net manera ta sosodé den Dios su famia mundial awe bou dje guia spiritual dje Cuerpo Gobernante di Testigonan di Jehova.—Echonan 15:30-35.
Sirbi den Unidad Teocrático
19. Pakico unidad a florecé den e famia di Jehova su adoradornan?
19 Unidad ta florecé ora miembronan di un famia ta cooperá un cu otro. Mescos ta cierto den e famia di Jehova su adoradornan. Siendo teocrático, e ancianonan i otronan den e congregacion di promé siglo a sirbi Dios den pleno cooperacion cu e cuerpo gobernante i a aceptá su decisionnan. Cu e yudansa dje cuerpo gobernante, e ancianonan ‘a predicá e palabra’ i miembronan dje congregacionnan en general ‘a papia di acuerdo cu otro.’ (2 Timoteo 4:1, 2; 1 Corintionan 1:10) Pues e mésun berdadnan bíblico a ser presentá den e ministerio i na reunionnan cristian, sea tabata na Jerusalem, Antiokia, Roma, Corinto, of cualkier otro caminda. Un unidad teocrático asina ta existí awe.
20. Pa conserbá nos unidad cristian, kico nos mester haci?
20 Pa conserbá nos unidad, nos tur cu ta parti di Jehova su famia mundial mester haci esfuerso pa desplegá amor teocrático. (1 Juan 4:16) Nos tin cu someté nos n’e boluntad di Dios i mustra respet profundo p’e “esclabo fiel” i e Cuerpo Gobernante. Mescos cu nos dedicacion na Dios, nos obedencia, naturalmente, ta boluntario i gososo. (1 Juan 5:3) Ki apropiadamente e salmista a relacioná goso cu obedencia! El a canta: “Boso, alabá Jah! Felis ta e homber cu ta teme Jehova, den kende su mandamentunan el a deleitá masha tantu.”—Salmo 112:1.
21. Con nos por demostrá cu nos ta teocrático?
21 Jesus, Cabes dje congregacion, ta completamente teocrático i semper ta haci e boluntad di su Tata. (Juan 5:30) P’esei, laga nos sigui nos Modelo haciendo e boluntad di Jehova teocráticamente i unidamente den pleno cooperacion cu Su organisacion. Anto cu goso i gratitud di curason, nos por resoná e cantica dje salmista: “Mira! Ki bon i ki agradabel ta pa rumannan biba huntu den unidad!”
Con Lo Bo Contestá?
◻ Con nos por relacioná nos unidad cristian cu Salmo 133?
◻ Mencioná algun factor cu ta promové unidad.
◻ Pakico ordu teocrático ta esencial p’e unidad dje pueblo di Dios?
◻ Con e cuerpo gobernante dje promé siglo a actua pa conserbá unidad?
◻ Kico sirbi den unidad teocrático ta nificá pa bo?
[Plachi na página 13]
E cuerpo gobernante a actua pa conserbá unidad