No Laga Ansiedad Vence Bo

“NUNCA sea anshá tocante e siguiente dia, pasobra e dia siguiente lo tin su mes ansiedadnan. Cada dia tin suficiente di su mes maldad.” (Mateo 6:34) E conseho ei di Jesucristo, sigur-sigur ta práctico pa nos tur cu ta biba den e sociedad djawe cu ta yen di stres i unda tur cos tin ansha.

Pero, si nos ta realístico, ta posibel pa nos keda sin ansha tocante nos problema, decision, obligacion i responsabilidadnan? Miyones di hende ta sinti nan deprimí, anshá i cargá. P’esei mes, e negoshi di trankilisante i sedante ta unu di multi miyon dollar.

Unda pa Hala e Liña

Nos tin cu planea i prepará pa por cumpli cu obligacion, asignacion i decisionnan cu nos a tuma i pa enfrentá nos problemanan, sea cu nan ta urgente of no. Bijbel ta animá nos pa ‘sinta i calculá e gastu’ promé cu nos cuminsá cualkier proyecto importante. (Lucas 14:28-30) Esaki ta encerá evaluá e posibilidadnan, analisá e posibel efectonan dje resultado, i calculá cuantu e ta bai costa bo na tempu, energia i cen.

Aunke un persona mester pensa cuidadosamente riba loke eventualmente lo por sosodé, no ta posibel ni saludabel pa purba pensa riba tur eventualidad. Por ehempel, pa bienestar di bo famia su siguridad, kisas bo ta pensa kico pa haci den caso cu bo cas pega candela. Lo bo por cumpra i instalá aparatonan pa detectá huma i esnan pa paga candela. Kisas bo ta planea i ensayá rutanan di escape for di diferente parti dje cas. Pero ki ora planeamentu razonabel i práctico ta caba i ansiedad di mas i sin base ta cuminsá? E clase di ansiedad ei ta cuminsá ora abo cuminsá tormentá bo mes cu un gran cantidad di situacion hipotético, di cua mayoria ta producto di un imaginacion grandi. Pensamentunan cu ta kita bo trankilidad por poderá di bo asina tantu cu nan lo convencé bo cu bo mester a pasa por alto di algu of cu bo no a haci suficiente pa protehá bo famia. E angustia aki cu abo mes ta causa bo mes por molestiá bo asina tantu, cu bo por keda anochinan sin drumi.

Moises Dilanti di Fárao

Jehova Dios a duna su profeta Moises un asignacion difícil. Na promé lugá, Moises mester a aparecé dilanti e israelitanan i convencé nan cu Jehova a asigná e como nan guia pa saca nan for di Egipto. Despues, Moises mester a aparecé dilanti fárao i pidié pa laga e israelitanan bai. Finalmente, Moises mester a guia un multitud di miyones di persona atrabes dje desierto i hiba nan den un tera di cua e habitantenan tabata hostil. (Exodo 3:1-10) Tur e esakinan tabata cosnan cu por a duna Moises hopi miedu, pero el a permití su responsabilidad yena su mente cu indebido ansiedad?

Ta obvio cu tabatin un cantidad di asuntu cu a preocupá Moises. El a puntra Jehova: “Suponé cu mi ta yega awor cerca e yunan di Israel i mi ta bisa nan: ‘E Dios di boso antepasadonan a manda mi cerca boso’ i nan bisa mi: ‘Con ta su nomber?’ Kico lo mi bisa nan?” Jehova a dun’é contesta. (Exodo 3:13, 14) Moises tabata preocupá tambe pa loke lo pasa si fárao a nenga di ker’é. Atrobe, Jehova a contestá e profeta. Como último problema, Moises a admití cu e no tabata “un orador vlot.” Ki solucion tabatin pa esaki? Jehova a nombra Aron como bocero di Moises.—Exodo 4:1-5, 10-16.

Prepará cu contesta pa su preguntanan i cu fe den Dios, Moises a procedé na haci manera Jehova a manda. En bes di tormentá su mes cu pensamentunan spantoso di loke lo por a pasa ora e confrontá fárao, Moises “a haci precisamente asina.” (Exodo 7:6) Si el a permití ansiedad venc’é, esaki lo por a debilitá su fe i curashi cu e tabatin mester pa cumpli cu su asignacion.

E manera balansá cu Moises a trata cu su asignacion ta un ehempel di loke apostel Pablo a yama “sano huicio.” (2 Timoteo 1:7; Tito 2:2-6) Si Moises no a demostrá sano huicio, fácilmente lo e por a keda asina aplastá dor dje peso di su asignacion, cu probablemente lo e no a acept’é.

Con pa Ehercé Dominio Riba Bo Pensamentunan

Con bo ta reaccioná ora den bida diario bo confrontá prueba of ora bo fe ta ser poné na prueba? Bo sa haña miedu dor di djis pensa so riba e posibel obstáculo i desafionan cu ta menasá? Of bo ta considerá nan na un manera balansá? Manera algun hende lo bisa: ‘No crusa e brug promé cu bo yegu’é.’ Kisas na final, bo no tin cu crusa e brug imaginario ei mes! P’esei, pakico tormentá bo mes cu algu cu kisas nunca lo sosodé? Bijbel ta bisa: “Preocupacion ansioso den curason di un hende ta loke lo hacié dobla.” (Proverbionan 12:25) Hopi bes esei ta pone cu un persona ta keda sin tuma decision, i posponé asuntunan te cu ta demasiado lat.

Loke ta haci e asuntu mas serio ta e daño spiritual cu indebido ansiedad por causa. Jesucristo a mustra cu e poder engañoso di rikesa i “e ansiedad dje sistema di cosnan aki” por sofocá aprecio pa “e palabra dje reino” completamente. (Mateo 13:19, 22) Mescos cu sumpiña por stroba mata chikitu di crece i duna fruta, asina ansiedad descontrolá por stroba nos di haci progreso spiritual i producí fruta p’e alabansa di Dios. E angustia destructivo cu abo ta causa bo mes asta a stroba algun hende di dedicá nan mes na Jehova. Nan preocupacion ta: ‘Kico lo sosodé si mi no por cumpli cu mi dedicacion?’

Apostel Pablo a bisa cu den nos lucha spiritual nos tin cu haci esfuerso “pa trece tur pensamentu bou di control pa hacié obediente na e Cristo.” (2 Corintionan 10:5) Nos enemigu principal, Satanas e Diabel, lo ta masha contentu pa probechá di nos preocupacionnan pa asina desanimá nos i debilitá nos físicamente, emocionalmente i spiritualmente. E ta experto den usa duda pa coge esun cu no vigilá, den trampa. P’esei tambe Pablo a spierta cristiannan pa “no permití lugá p’e Diabel.” (Efesionan 4:27) Como “e dios dje sistema di cosnan aki,” Satanas tabatin éxito den “ciega mente dje incrédulonan.” (2 Corintionan 4:4) Laga nos nunca permitié controlá nos mente!

Tin Yudansa Disponibel

Ora un yu ta confrontá problema, e por bai cerca su tata amoroso i e ta haña guia i consuelo. Mescos tambe, nos por acudí na nos Tata celestial, Jehova, cu nos problemanan. En realidad, Jehova ta invitá nos pa tira nos carga i ansiedadnan riba dje. (Salmo 55:22) Mescos cu un mucha kende su problemanan no ta preocup’é mas despues cu el a ricibí confiansa cerca su tata, nos no solamente mester tira nos carga riba Jehova, sino tambe lagu’é cu nan.—Santiago 1:6.

Con nos ta tira nos ansiedadnan riba Jehova? Filipensenan 4:6, 7 ta contestá: “No sea ansioso riba nada, sino den tur cos mediante oracion i súplica huntu cu gradicimentu, laga boso peticionnan bira conocí na Dios; i e pas di Dios cu ta surpasá tur pensamentu lo warda boso curason i boso facultad mental pa medio di Cristo Jesus.” Sí, Jehova por contestá nos oracion i súplicanan continuo, dor di duna nos un trankilidad interno cu ta protehá nos mente pa ansiedad innecesario no perturb’é.—Jeremías 17:7, 8; Mateo 6:25-34.

Sin embargo, pa nos actua na armonia cu nos oracionnan, nos no mester isolá nos mes ni físicamente ni mentalmente. (Proverbionan 18:1) Mas bien, ta bon pa nos considerá principio i instruccionnan bíblico relacioná cu nos problema, asina evitá di dependé riba nos mes comprendimentu. (Proverbionan 3:5, 6) Tantu hóben como bieu por acudí na Bijbel i publicacionnan di Sociedad Watch Tower i nan lo haña un abundancia di informacion tocante con pa tuma decision i trata cu problema. Ademas, nos ta bendicioná dor cu den e congregacion cristian, nos tin ancianonan sabí i experenciá, i otro cristiannan maduro cu semper ta cla pa combersá cu nos. (Proverbionan 11:14; 15:22) Personanan cu no ta emocionalmente enbolbí i cu tin e punto di bista di Dios riba un asuntu, hopi bes por yuda nos mira nos problema for di un otro perspectiva. I aunke nan lo no tuma decision pa nos, nan por ta un gran fuente di animacion i apoyo.

“Spera Riba Dios”

Ningun hende no por nenga cu trata cu nos problemanan real di tur dia ta trece suficiente stres cuné, sin cu nos agregá preocupacion tocante problemanan imaginario. Ora ansiedad pa loke lo por pasa ta haci nos intrankil i yena nos cu miedu, laga nos acudí na Jehova haciendo oracion i súplica. Busca direccion, sabiduria i sano huicio den su Palabra i su organisacion. Nos lo ripará cu pa cualkier problema cu por surgi, tin yudansa disponibel pa trata cuné.

Cu un curason cargá i agitá, e salmista a canta: “O mi alma, pakico bo ta desesperá, i pakico bo ta reboltá den mi? Spera riba Jehova, pasobra lo mi elogi’é ainda como e gran salbacion di mi persona i como mi Dios.” (Salmo 42:11) Laga nos sintimentunan ta mescos.

Sí, planea pa loke ta razonabel pa spera, i laga cosnan inesperá den man di Jehova. “Tira tur boso ansiedad riba dje, pasobra e ta interesá den boso.”—1 Pedro 5:7.

[Plachi na página 23]

Abo ta tira bo carga i ansiedadnan riba Jehova, mescos cu David a haci?