Capítulo 29

Cantando e cantica nobo di victoria

Vision 9—Revelacion 14:1-20

Tema: E 144.000 ta cu e Lamchi riba e Ceru di Sion; hende ta tende declaracion di angel den tur e tera; cosecha ta cosechá

Tempo di cumplimento: desde 1914 te ne tribulacion grandi

 1. Kico nos a siña caba tocante Revelacion capítulo 7, 12, i 13, i kico nos lo siña awor?

TA KI refrescante pa considera e sigiente vision di Juan! Na contraste cu e organizacion bestial mahós dje dragón, awor nos ta mira sirbidor leal di Jehova Dios i nan actividad durante e dia di Señor. (Revelacion 1:10) Ya caba Revelacion 7:1, 3 a mústranos cu e cuater bientu di destruccion ta ser wantá te cu tur 144.000 di esclabo ungí ta wordu seyá. Revelacion 12:17 a duna di conoce cu e “resto dje simía [dje muher]” ta bira un punto di atake special di Satanás, e dragón, durante e tempo ei. I Revelacion capítulo 13 a pinta di manera bibo e organizacion político cu Satanás a lanta den mundo pa pone presion intenso i persecucion cruel riba fiel sirbidor di Jehova Dios. Pero e enemigo principal no por stroba e propósito di Dios! Awor nos ta bai siña cu apesar di actividad perverso di Satanás, tur 144.000 ta ser recogí den triunfo.

 2. Ki bista di antemano di un final feliz Juan ta dúnanos den Revelacion 14:1, i ken ta e Lamchi?

² Juan, i hunto cuné e grupo djawe cu Juan a simboliza, ta ser duná un bista di antemano dje resultado feliz: “I mi a wak, i, mira! e Lamchi pará riba e Ceru di Sion, i cuné e cient’i cuarenticuater mil teniendo su nomber i e nomber di su Tata skirbí den nan frenta.” (Revelacion 14:1) Manera nos a mira caba, e Lamchi ta e mesun persona cu e Miguel cu a haci cielo limpi, sacando e Diabel i su demoñonan. Esei ta Miguel cu Daniel a mencioná como “defensor dje yiunan dje pueblo [di Dios]” cla pa “lanta riba su pia” pa ehecuta e huicio husto di Jehova. (Daniel 12:1; Revelacion 12:7, 9) Desde 1914 e Lamchi di Dios cu a haci sacrificio propio a para riba e Ceru di Sion como Rey Mesiánico.

 3. Kico ta e “Ceru di Sion” riba locual e Lamchi i e 144.000 ta “para”?

³ Ta net manera Jehova a profetiza: “Ami, sí ami, a instala mi rey riba Sion, mi ceru santo.” (Salmo 2:6; 110:2) Esei no ta referi mas ne Ceru di Sion terrenal, e sitio geográfico di Jerusalem terrenal, den cua stad rey humano den e desendencia di David tabata reina. (1 Crónica 11:4-7; 2 Crónica 5:2) No, pasobra Jesús, despues di su morto i resureccion na aña 33 EC, tabata instalá como piedra di fundeshi riba Ceru di Sion celestial, e sitio celestial unda Jehova a determina di pone e “stad di e Dios bibo, Jerusalem celestial.” P’sei, e “Ceru di Sion” ta representa e puesto halto di Jesús i co-heredero di dje, cu ta compone Jerusalem celestial, cu ta e Reino. (Hebreo 12:22, 28; Efesio 3:6) Esei ta e situacion glorioso real na locual Jehova ta hálzanan durante e dia di Señor. Através dje siglonan, cristian ungí, como “piedra bibo,” a anhela di para riba Ceru di Sion celestial, uní cu Señor Jesucristo glorificá den su Reino mahestuoso.—1 Pedro 2:4-6; Lucas 22:28-30; Juan 14:2, 3.

 4. Di ki manera tur e 144.000 ta pará riba e Ceru di Sion?

⁴ Juan no a mira Jesús so sino e cuerpo completo di 144.000 co-heredero dje Reino celestial pará riba e Ceru di Sion. Ne tempo cu e vision a representá, hopi, pero no tur, dje 144.000 tabata den cielo caba. Despues den e mesun vision, Juan a mira cu algun dje santonan ainda tin cu wanta i muri fielmente. (Revelacion 14:12, 13) Pues, ta parce cu algun dje 144.000 ta riba tera ainda. Anto di ki manera Juan a mira nan tur pará cu Jesús riba e Ceru di Sion?a Pasobra como miembro dje congregacion di cristian ungí, eseinan awor “a yega cerca un Ceru di Sion i un stad di e Dios bibo, Jerusalem celestial.” (Hebreo 12:22) Mescos cu Pablo ora e tabata riba tera ainda—den un sentido spiritual—nan a ser halzá pa nan ser den union cu Cristo Jesús den lugar celestial. (Efesio 2:5, 6) Además, na 1919 nan a responde ne invitacion, “Subi aki,” i di manera simbólico nan “a subi na cielo den e nubia.” (Revelacion 11:12) Den bista di texto asina, nos por mira cu tur 144.000—den un sentido spiritual—ta situá riba e Ceru di Sion cu Jesucristo.

 5. E nomber di ken ta skirbí riba frenta dje 144.000, i ki significacion cada nomber tini?

⁵ E 144.000 no tin nada cu ber cu adorador dje bestia salbahe, cu ta ser marcá cu e número simbólico 666. (Revelacion 13:15-18) Na contraste, tal hende leal tin e nomber di Dios i dje Lamchi skirbí riba nan frenta. Sin duda, Juan, un hudío, a mira e nomber di Dios skirbí cu letter hebreo, יהוה.b Hayando e nomber dje Tata di Jesús skirbí simbólicamente riba nan frenta, esnan seyá ta duna di conoce na tur cu nan ta testigo di Jehova, esclabo di Dje. (Revelacion 3:12) Hayando e nomber di Jesús desplegá també riba nan frenta ta indica cu nan ta reconoce cu e ta nan Doño. E ta comprometí como nan “esposo,” i nan ta su “bruid” prospectivo, “un creacion nobo” sirbiendo Dios cu bida celestial na bista. (Efesio 5:22-24; Revelacion 21:2, 9; 2 Corintio 5:17) Nan relacion íntimo cu Jehova Dios i Jesucristo ta afecta tur nan pensamento i accion.

Cantando como si fuera un cantica nobo

 6. Juan a tende cua cantamento, i con el a detayé?

⁶ Na armonía cu esei, Juan a informa: “I mi a tende un sonido bini di cielo manera e sonido di hopi awa i e sonido di donder fuerte; i e sonido cu mi a tende tabata como si fuera di cantante cu ta compaña nan mes cu arpa tocando nan arpa. I nan ta canta como si fuera un cantica nobo dilanti dje trono i dilanti dje cuater criatura bibiente i dje ancianonan; i ningun hende por a domina e cantica sino e cient’i cuarenticuater mil, cu a ser cumprá for di tera.” (Revelacion 14:2, 3) No ta straño, anto, cu Juan, ora el a tende e 144.000 boz uni den un solo coro melodioso, a corda sonido di catarata borotando i donder fuerte. Ki agradabel tabata e tocamento zuiver cu a compañánan manera arpa! (Salmo 81:2) Cua coro riba tera hamás por alcanza e grandeza dje coro magnífico?

 7. (a) Cua ta e cantica nobo di Revelacion 14:3? (b) Di ki manera e cantica di Salmo 149:1 ta nobo den nos dia?

⁷ I cua “cantica nobo” esei tá? Manera nos a ripara den e consideracion di Revelacion 5:9, 10, e cantica tin cu ber cu e propósito dje Reino di Jehova i su percuracion maraviyoso, mediante Jesucristo, pa haci Israel spiritual “un reino i sacerdote pa nos Dios.” Esei ta un cantica di alabanza pa Jehova, publicando cosnan nobo cu el a logra usando Israel di Dios i pe bienestar di dje. (Galatio 6:16) Miembro di Israel spiritual ta responde ne invitacion dje salmista: “Alaba Jah! Canta pa Jehova un cantica nobo, su alabanza den e congregacion di esnan cu ta leal. Laga Israel alegra den su gran Creador, e yiunan di Sion—sea gozoso den nan Rey.” (Salmo 149:1, 2) Ta cierto cu tal palabra tabata skirbí siglonan den pasado, pero den nos dia, nan ta ser cantá cu un comprendimento nobo. Na 1914 e Reino mesiánico a nace. (Revelacion 12:10) Na 1919 e pueblo di Jehova Dios riba tera a cuminza anuncia “e palabra dje reino” cu celo renobá. (Mateo 13:19) Estimulá pe texto di aña di 1919 (Isaías 54:17) i animá pa nan restoracion ne paradijs spiritual, nan a cuminza na 1919 di ‘canta pa Jehova cu música den nan curazón.’—Efesio 5:19.

 8. Pakico e 144.000 so por siña e cantica nobo di Revelacion 14:3?

⁸ Pero, pakico ta e 144.000 so cu por siña e cantica mencioná den Revelacion 14:3? Pasobra esei tin cu ber cu nan experencia como heredero escogí dje Reino di Dios. Nan so ta ser adoptá como yiu di Dios i ungí cu e spiritu santo. Nan so ta cumprá for di tera pa bira parti dje Reino celestial, i nan so “lo ser sacerdote . . . i lo reina como rey” cu Jesucristo pe mil aña pa restora humanidad na perfeccion. Nan so ta ser mirá como “cantando como si fuera un cantica nobo” den e presencia mes di Jehova.c Tal experencia i prospecto único ta dúnanan un aprecio special dje Reino i ta haci posibel pa nan canta tocante dje manera ningun otro hende por.—Revelacion 20:6; Colosense 1:13; 1 Tesalonicense 2:11, 12.

 9. Con e multitud grandi a responde ne cantamento di esnan ungí, i nan ta cumpli cu cua conseho asina?

⁹ No obstante, otronan ta scucha i ta responde na nan cantamento. Desde 1935 un multitud grandi aumentante di otro carné a tende nan cantica di triunfo i a keda conmoví pa uni cu nan publicando e Reino di Dios. (Juan 10:16; Revelacion 7:9) Ta cierto cu tal hende nobo no por siña canta exactamente e mesun cantica nobo cu futuro gobernante dje Reino di Dios ta canta. Pero nan també ta canta como un coro melodioso di alabanza pa Jehova cu ta un himno alabando Jehova pe cosnan nobo cu e ta haci. Asina nan ta cumpli cu e conseho dje salmista: “Canta pa Jehova un cantica nobo. Canta pa Jehova, tur e pueblo dje tera. Canta pa Jehova, bendiciona su nomber. Dia tras dia anuncia e bon nobo di salbacion di dje. Declara den e nacionan su gloria, den tur e pueblo su obranan maraviyoso. Atribui na Jehova, O famía di pueblo, atribui na Jehova gloria i fortaleza. Bisa den e nacionan: ‘Jehova mes a bira rey.’”—Salmo 96:1-3, 7, 10; 98:1-9.

10. Con ta posibel pe 144.000 canta “dilanti” dje 24 anciano simbólico?

¹⁰ Con e 144.000 por canta “dilanti” dje ancianonan, ya cu e 24 anciano ta e 144.000 den nan puesto celestial glorioso? Tempran den e dia di Señor, esnan “morto den union cu Cristo” tabata resusitá como persona spiritual. Pues, fiel cristian ungí cu a triunfa i ta den cielo awor, ta cumpli simbólicamente cu e funcion comparable cu funcion dje 24 grupo di anciano sacerdotal. Nan ta ser incluí den e vision dje organizacion celestial di Jehova. (1 Tesalonicense 4:15, 16; 1 Crónica 24:1-18; Revelacion 4:4; 6:11) Pues, e resto dje 144.000 cu ta riba tera ainda ta canta e cantica nobo dilanti, of den bista di, nan rumanan resusitá den cielo.

11. Pakico vencedor ungí ta ser mencioná como 24 anciano i també como 144.000?

¹¹ Ne momento aki nos por puntra també: Pakico tal vencedor ungí ta ser mencioná como 24 anciano simbólico i també como e 144.000? Ta asina pasobra Revelacion ta considera e solo grupo desde dos diferente punto di bista. E 24 anciano semper ta ser pintá den nan puesto final rond dje trono di Jehova, instalá como rey i sacerdote den cielo. Nan ta simboliza e grupo completo di 144.000 den nan puesto celestial, aunque actualmente un resto chikito di nan ta riba tera ainda. (Revelacion 4:4, 10; 5:5-14; 7:11-13; 11:16-18) Sin embargo, Revelacion capítulo 7 ta enfoca riba e 144.000 como sacá for di humanidad, i ta enfatiza e gran propósito di Jehova di seya e cantidad completo di israelita spiritual individual i pa duna salbacion na un multitud grandi incontable. Revelacion capítulo 14 ta duna un cuadro cu ta confirma cu e grupo completo dje Reino di 144.000 vencedor individual lo ser reuní cu e Lamchi riba e Ceru di Sion. També e ta duna di conoce requisito cu hende tin cu satisface pa nan ser contá hunto cu e 144.000, manera nos ta bai mira awor.d

Sigidor dje Lamchi

12. (a) Con Juan a sigi duna detaye dje 144.000? (b) Den ki sentido e 144.000 ta ser mencioná como birgen?

¹² Dunando mas detaye dje 144.000 cu ta “cumprá for di tera,” Juan ta bísanos: “Eseinan ta hende cu no a contaminánan cu muher; realmente, nan ta birgen. Eseinan ta hende cu ta bai sigiendo e Lamchi no ta importa unda e ta bai. Eseinan tabata cumprá for di den humanidad como e promé fruta pa Dios i pe Lamchi, i falsedad no tabata hayá den nan boca; nan ta sin defecto.” (Revelacion 14:4, 5) E echo cu e 144.000 ta “birgen” no kier men cu miembro dje grupo necesariamente ta hende cu no a casa. Apóstol Pablo a skirbi hende cristian cu tabatin e yamada celestial cu, aunque soltería cristian tin bentaha, casamento ta preferible den cierto circunstancia. (1 Corintio 7:1, 2, 36, 37) Loke ta caracterizá e grupo ta nan birginidad spiritual. Nan a evita di comete adulterio spiritual cu político di mundo i cu religion falso. (Santiago 4:4; Revelacion 17:5) Como e bruid comprometí na Cristo, nan a mantenénan puro, “sin defecto den un generacion trocí i corcobá.”—Filipense 2:15.

13. Pakico e 144.000 ta un bruid apropiado pa Jesucristo, i di ki manera nan ta “bai sigiendo e Lamchi no ta importa unda e ta bai”?

¹³ Además, ningun “falsedad tabata hayá den nan boca.” Dje manera ei, nan ta mescos cu nan Rey, Jesucristo. Como un hende perfecto, “e no a comete picá, ni engaño no tabata hayá den su boca.” (1 Pedro 2:21, 22) Siendo cu e 144.000 ta sin defecto i berdadero també, nan ta prepará como un birgen puro pe gran Sumosacerdote di Jehova. Ora Jesús tabata riba tera, el a invita hende di curazón recto pa sigié. (Marco 8:34; 10:21; Juan 1:43) Esnan cu a acepta, a imita su moda di biba i a obedece su siñanza. Pues, durante nan bida terrenal, nan “ta bai sigiendo e Lamchi no ta importa unda e ta bai” mientras cu e ta guíanan door dje mundo di Satanás.

14. (a) Di ki manera e 144.000 ta e “promé fruta di Dios i dje Lamchi”? (b) Den ki sentido e multitud grandi també ta promé fruta?

¹⁴ E 144.000 ta “cumprá for di tera,” “cumprá for di den humanidad.” Nan ta ser adoptá como yiu di Dios, i despues di nan resureccion, nan lo no ta simplemente hende di carni i sanger mas. Manera versículo 4 ta bisa, nan ta bira e “promé fruta pa Dios i pe Lamchi.” Ta cierto cu ayá den e promé siglo, Jesús tabata e “promé fruta di esnan cu a bai drumi den morto.” (1 Corintio 15:20, 23) Pero e 144.000 ta e “cierto promé fruta” di humanidad imperfecto, cu e sacrificio di Jesús a cumpra. (Santiago 1:18) No obstante, e recogimento dje fruta di humanidad no ta termina cu eseinan. E buki di Revelacion a siñala caba ne cosecha di un multitud grandi sin número cu ta grita cu boz fuerte: “Salbacion nos ta debe na nos Dios, cu ta sintá riba e trono i ne Lamchi.” E multitud grandi lo sobrebiba e tribulacion grandi, i mientras cu nan ta sigi refrescánan bebiendo dje “fontein di awa di bida,” nan lo ser hizá te na perfeccion humano riba tera. Na un tempo despues dje tribulacion grandi, Hades lo bira bashí, i miyones di otro hende incontable lo ser resusitá i tene oportunidad di bebe dje mesun awa di bida. Teniendo esei presente, ta correcto pa yama e multitud grandi e promé fruta dje otro carnénan—nan ta e proménan pa ‘laba nan mantel i hácinan blancu den e sanger dje Lamchi’ cu e speranza di biba pa semper riba tera.—Revelacion 7:9, 10, 14, 17; 20:12, 13.

15. Con e tres diferente promé fruta i fiesta cu nan a celebra bao di Ley di Moisés ta corresponde?

¹⁵ E tres promé fruta (Jesucristo, e 144.000, i e multitud grandi) tin paralelo interesante den fiesta celebrá conforme cu e Ley di Moisés di antigua. Dia 16 di Nisán, durante e fiesta di pan sin zuurdeeg, nan a ofrece un bundel dje promé fruta dje cosecha di cebada na Jehova. (Levítico 23:6-14) Dia 16 di Nisán tabata e dia cu Jesús tabata resusitá for di morto. Cincuenta dia despues di 16 di Nisán, den e tercer luna, israelita a celebra e fiesta di cosecha dje promé fruta hecho dje cosecha di trigo. (Exodo 23:16; Levítico 23:15, 16) E fiesta a yega di ser yamá Pentecoste (segun e palabra griego cu kier men “di cincuenta”), i tabata na Pentecoste di aña 33 EC cu e promé miembronan dje 144.000 tabata ungí cu spiritu santo. Finalmente, den luna di siete ora e cosecha completo tabata cosechá, tabatin e fiesta di tent, un tempo di agradicimento gozoso ora israelita a biba pa un siman den tent trahá di, entre otro cosnan, rama di palmita. (Levítico 23:33-43) Correspondientemente, e multitud grandi, cu ta parti dje recogimento grandi, ta duna agradicimento dilanti dje trono cu “rama di palmita den nan man.”—Revelacion 7:9.

Declarando e bon nobo eterno

16, 17. (a) Juan a mira un angel bula na unda, i e angel a haci cua proclamacion? (b) Ken ta enbolbí den e trabao di predica, i cua experencia ta indica esei?

¹⁶ Juan a sigi skirbi: “I mi a mira un otro angel bulando den centro di cielo, i e tabatin bon nobo eterno pa declara como noticia alegre pa hende cu ta biba riba tera, i pa tur nacion i tribu i lenga i pueblo, bisando cu boz fuerte: ‘Teme Dios i duné gloria, pasobra e ora di huicio di dje a yega, i p’sei, adora Esun cu a traha cielo i tera i lamá i fontein di awa.’” (Revelacion 14:6, 7) E angel a bula den “centro di cielo,” unda páhara ta bula. (Compara cu Revelacion 19:17.) P’sei, hende por tende su boz rond di mundo. E proclamacion mundial dje angel tin hopi mas alcance cu cualkier boletín di television!

¹⁷ Tur hende ta ser animá pa teme, no e bestia salbahe i su imagen, sino Jehova Dios cu ta incomparablemente mas fuerte cu cualkier bestia simbólico controlá pa Satanás. Sí, Jehova a crea cielo i tera, i awor e tempo a yega pe huzga e tera! (Compara cu Génesis 1:1; Revelacion 11:18.) Ora Jesús tabata riba tera, el a profetiza tocante nos dia: “I e bon nobo di reino lo ser predicá den tur e tera habitá como testimonio pa tur nacion; anto e fin lo yega.” (Mateo 24:14) E congregacion di cristian ungí ta cumpli cu e comision. (1 Corintio 9:16; Efesio 6:15) Aki Revelacion ta mustra cu angel invisibel també ta enbolbí den e trabao di predica. Cuanto bez guiamento di angel a keda bisto guiando un Testigo di Jehova ne cas unda un alma den angustia tabata anhela, asta pidiendo, yudanza spiritual!

18. Segun e angel cu a bula den centro di cielo, e ora di kico a yega, i ken lo haci otro anuncio?

¹⁸ Segun cu e angel bulando den centro di cielo a declara, e ora di huicio a yega. Cua huzgamento Dios ta haci awor? Orea ta klink cu anuncio cu angel di dos, tres, cuater, i cinco ta haci awor.—Jeremías 19:3.

[Nota]

[Plachi na página 202, 203]

144.000

24 anciano

Co-heredero dje Lamchi, Cristo Jesús, mirá desde dos diferente punto di bista