“Sigui e Caminda di Hospitalidad”

“Compartí cu e santunan conforme cu nan necesidadnan. Sigui e caminda di hospitalidad.”—ROMANONAN 12:13.

 1. Kico ta un necesidad básico humano, i con e ta ser manifestá?

CANA den un caya solitario den un becindario straño anochi lat por ta un experencia tormentador awendia. Pero ora bo ta den un multitud di hende sin cu bo conocé ningun of sin ser reconocé por causa mes tantu tension. En berdad, un parti integral di naturalesa humano ta e necesidad pa otronan interesá den bo, kier bo i stimá bo. Ningun hende ta gusta pa nan ser tratá manera un hende straño.

 2. Con Jehova a percurá pa nos necesidad di compañerismo?

² Jehova Dios, e Formador i Creador di tur cos, ta conciente dje necesidad humano di compañerismo. Como e Diseñador di su creacion humano, for di cuminsamentu mes Dios tabata sa cu no tabata “bon p’e homber sigui su so,” i el a haci algu tocante esei. (Génesis 2:18, 21, 22) E registro bíblico ta yen di ehempelnan di actonan di bondad expresá pa cu hende dor di Jehova i dor di su sirbidornan. Esaki ta permití nos siña con pa “sigui e caminda di hospitalidad,” p’e goso i deleite di otronan i pa nos propio satisfaccion.—Romanonan 12:13.

Cariño pa Hende Straño

 3. Splica e nificacion básico di hospitalidad.

³ E palabra “hospitalidad” manera e ta ser usá den Bijbel ta ser traducí for dje palabra griego phi·lo·xe·niʹa, cu ta consistí di dos palabra básico nificando “amor” i “hende straño.” Pues, hospitalidad básicamente ta nificá “amor pa hende straño.” Sin embargo, esaki no ta djis un formalidad of un asuntu di cortesia. E ta enbolbé sintimentu i afecto di un persona. E verbo phi·leʹo, segun Exhaustive Concordance of the Bible di James Strong, ta nificá “ser un amigu di (tin cariño pa [un individuo of un obheto]), por ehempel tene afecto pa (indicando apego personal, como un asuntu di sintimentu).” P’esei, hospitalidad ta bai mas ayá cu amor basá riba principio, tal bes debí na un sentido di deber of obligacion. Generalmente e ta un expresion di berdadero cariño, afecto i amistad.

 4. Na ken nos mester mustra hospitalidad?

⁴ Esun cu ta ricibí e cariño i afecto aki ta e “hende straño” (griego, xeʹnos). Ken esaki por ta? Un biaha mas, Concordance di Strong ta definí e palabra xeʹnos como ‘stranhero (literalmente di estranheria, of figurativamente novedad); implicando un bishitante of (vise-versa) un hende straño.’ Pues hospitalidad, manera e ehempelnan di Bijbel ta mustra, por reflehá bondad expresá pa cu un persona cu nos tin cariño p’e, of e por ser extendé asta pa cu un persona completamente straño. Jesus a splica: “Si boso ta stima esnan cu ta stima boso, ki recompensa boso tin? E cobradornan di belasting tambe no ta haci mescos? I si boso ta cumindá boso rumannan so, kico extraordinario boso ta haci? Hende dje nacionnan tambe no ta haci mescos?” (Mateo 5:46, 47) Berdadero hospitalidad ta surpasá e division i discriminacion cu prehuicio i temor ta trece cuné.

Jehova, e Anfitrion Perfecto

 5, 6. (a) Kico Jesus tabatin na mente ora el a bisa, “Boso Tata celestial ta perfecto”? (b) Den kico nos ta mira e generosidad di Jehova?

⁵ Despues di a señalá e deficiencianan dje amor cu hende ta expresá un pa cu otro, manera a ser citá ariba, Jesus a agregá e remarke aki: “Boso mester ta perfecto, mescos cu boso Tata celestial ta perfecto.” (Mateo 5:48) Naturalmente, Jehova ta perfecto den tur sentido. (Deuteronomio 32:4) Sin embargo, Jesus tabata resaltando un aspecto particular di Jehova su perfeccion, manera el a bisa anteriormente: “[Dios] ta haci su solo sali riba hende malbado i bon i ta haci awa yobe riba hende hustu i inhustu.” (Mateo 5:45) Ora ta trata di mustra bondad, no tin parcialidad cu Jehova.

⁶ Como e Creador, Jehova ta doño di tur cos. “Na mi ta pertenecé tur animal salbahe di mondi, e bestianan riba mil ceru. Mi conocé bon tur criatura cu hala dje cerunan, i e trupanan di animal dje campo habrí ta cu mi,” Jehova ta bisa. (Salmo 50:10, 11) Sin embargo, e no ta tene nada egoistamente pa su mes. Den su generosidad, e ta percurá pa tur su criaturanan. E salmista a bisa di Jehova: “Bo ta habri bo man i ta satisfacé e deseo di tur cos bibiente.”—Salmo 145:16.

 7. Kico nos por siña for dje manera den cua Jehova ta trata hende straño i esnan den necesidad?

⁷ Jehova ta duna hende loke nan mester—asta hende cu no conoc’é, cu ta hende straño p’e. Pablo i Barnabas a recordá e adoradornan di ídolo den e stad di Listra cu Jehova “no a laga su mes sin testimonio pasobra el a haci bon, dunando boso yobida di shelu i temporadanan fructífero, yenando boso curason completamente cu cuminda i alegria.” (Echonan 14:17) Specialmente pa cu esnan den necesidad, Jehova ta bondadoso i generoso. (Deuteronomio 10:17, 18) Tin hopi cos cu nos por siña for di Jehova den mustra bondad i generosidad—ser hospitalario—na otronan.

 8. Den ki manera Jehova a mustra su generosidad den percurá pa nos necesidadnan spiritual?

⁸ Ademas di percurá abundantemente p’e necesidadnan material di su criaturanan, Jehova ta soru pa nan necesidadnan den un manera spiritual. Jehova a actua den e manera di mas generoso pa nos bienestar spiritual, asta promé cu cualkier di nos a realisá cu nos tabata den un estado spiritualmente desesperá. Nos ta lesa na Romanonan 5:8, 10: “Dios ta recomendá su propio amor na nos den e echo cu, miéntras cu nos tabata pecador ainda, Cristo a muri pa nos. . . . Ora nos tabata enemigu, nos a bira reconciliá cu Dios mediante e morto di su Yu.” E percuracion ei ta haci posibel pa hende pecaminoso drenta den un relacion felis di famia cu nos Tata celestial. (Romanonan 8:20, 21) Tambe Jehova a haci sigur pa nos haña e guia i direccion apropiado afin cu nos por tin éxito den bida apesar di nos estado pecaminoso i imperfecto.—Salmo 119:105; 2 Timoteo 3:16.

 9, 10. (a) Pakico nos por bisa cu Jehova ta e anfitrion perfecto? (b) Con adoradornan berdadero mester imitá Jehova den e aspecto aki?

⁹ En bista di esaki, nos por bisa cu Jehova ta berdaderamente e anfitrion perfecto den asina tantu manera. E no ta pasa por haltu di esnan den necesidad, di esnan di poco recurso i di esnan di condicion humilde. E ta mustra interes i atencion genuino pa hende straño, asta pa su enemigunan, i e no ta busca ningun recompensa material. Den tur esaki, e no ta e máximo ehempel di un anfitrion perfecto?

¹⁰ Como un Dios di tal bondad amoroso i generosidad, Jehova kier pa su adoradornan imit’é. Den henter e Bijbel, nos ta mira ehempelnan sobresaliente dje cualidad di bondad aki. Encyclopaedia Judaica ta remarcá cu “den Israel di antigwedad, hospitalidad no tabata djis un cuestion di bon manera, sino un custumber moral bon ancrá . . . E custumbernan bíblico di duna un bon biní na e biahero cansá i di ricibí e hende straño den nan seno tabata e molde for di cua hospitalidad i tur su aspectonan relacioná a desaroyá den un birtud altamente balorá den tradicion hudiu.” Mas cu un característica distintivo di cualkier nacionalidad of grupo étnico en particular, hospitalidad mester ta un característica di tur adorador berdadero di Jehova.

Un Anfitrion pa Angelnan

11. Ki ehempel sobresaliente ta mustra cu hospitalidad a trece bendicionnan inesperá? (Mira tambe Génesis 19:1-3; Huesnan 13:11-16.)

¹¹ Un dje relatonan bíblico di mas conocí dje manifestacion di hospitalidad ta esun di Abraham i Sara ora nan tabata campa entre e palunan grandi di Mamre, cerca Hébron. (Génesis 18:1-10; 23:19) Sin duda apostel Pablo tabatin e suceso aki na mente ora el a duna e amonestacion aki: “No lubidá hospitalidad, pasobra via dje algun, sin cu nan mes tabata sa, a ricibí angelnan.” (Hebreonan 13:2) Un estudio dje relato aki lo yuda nos mira cu hospitalidad no ta simplemente un asuntu di custumber of criansa. Mas bien, e ta un cualidad piadoso cu ta trece bendicionnan maraviyoso.

12. Con Abraham a demostrá su amor pa hende straño?

¹² Génesis 18:1, 2 ta indicá cu e bishitantenan tabata desconocí pa Abraham i cu e no tabata spera nan, cu ta mescos cu bisa cu nan tabata djis tres stranhero cu tabata pasando ei banda. E custumber entre e orientalnan, segun algun comentarista, tabata cu un biahero den un pais stranhero tabatin e derecho di spera hospitalidad asta si e no tabata conocé ningun hende ei. Pero Abraham no a warda p’e stranheronan haci uso dje derecho aki; é a tuma e iniciativa. El a “cuminsá core” pa topa e stranheronan aki cu tabata na un bon distancia for di dje—tur esaki den “e calor dje dia,” i Abraham tabatin 99 aña di edad! Esaki no ta mustra pakico Pablo a referí na Abraham como un modelo pa nos imitá? Esei ta e esencia di hospitalidad, cariño of amor pa hende straño, preocupacion pa nan necesidadnan. E ta un cualidad positivo.

13. Pakico Abraham a “buig abou” p’e bishitantenan?

¹³ Tambe e relato ta bisa nos cu despues cu Abraham a topa e stranheronan, el a “procedé na buig na tera.” Buig pa hende completamente straño? Wel, buig pa hende den e forma cu Abraham a hacié, tabata un manera di saludá un huésped di onor of un persona di un posicion haltu, i no mester ser confundí cu un acto di adoracion, cu ta reservá solamente pa Dios. (Compará cu Echonan 10:25, 26; Revelacion 19:10.) Dor di buig, no djis sak e cabes sino buig “na tera,” Abraham a concedé e stranheronan aki e onor di ta importante. E tabata cabes di un famia di patriarca grandi i próspero, tog el a considerá e stranheronan aki como digno di mas onor cuné mes. Ki diferente esaki ta for dje desconfiansa habitual cu hende tin pa cu stranheronan, e actitud di sinta i mira! Abraham berdaderamente a demostrá e nificacion dje declaracion: “Den mustra onor un na otro hiba delantera.”—Romanonan 12:10.

14. Ki esfuerso i sacrificio tabata enbolbí den e hospitalidad cu Abraham a mustra n’e stranheronan?

¹⁴ E resto dje relato ta mustra cu Abraham su sintimentunan tabata berdadero. E cuminda riba su mes tabata extraordinario. Asta den un famia grandi cu ta cria hopi bestia, “un toro yong, tierno i bon” no ta un cuminda di tur dia. Relacioná cu e custumbernan prevalente dje área, Daily Bible Illustrations di John Kitto ta mencioná: “Hende nunca ta complacé nan mes cu luho, cu excepcion di ora di algun festival, of ora un hende straño yega; i ta solamente na ocasionnan asina cu hende sa come carni, asta esnan cu ta poseé un gran cantidad di tou di bestia chikitu i baca.” E clima cayente no a permití pa warda ningun cuminda cu ta daña, pues pa prepará un cuminda asina, mester a haci tur cos e ora ei. Nada straño cu den e relato breve aki, e palabra “pura” of “purando” ta aparecé tres bes, i Abraham literalmente a “core” pa prepará e cuminda!—Génesis 18:6-8.

15. Cua ta e punto di bista apropiado di percuracionnan material ora di mustra hospitalidad, manera e ehempel di Abraham ta demostrá?

¹⁵ Sin embargo, e propósito no ta pa djis organisá un bankete grandi pa impresioná un hende. Maske Abraham i Sara a haci tur e esfuerso ei pa prepará i presentá e cuminda, nota con Abraham a referí anteriormente na dje: “Laga trece poco awa, por fabor, i boso mester laba boso pia. Anto descansá bou dje palu. I lagá mi trece un pida pan, i refrescá boso curason. Despues di esei, boso por sigui, pasobra ta p’esei boso a pasa e caminda aki cerca boso sirbidor.” (Génesis 18:4, 5) E “pida pan” ei a resultá di ta un bankete di bisé gordá huntu cu kuki rondó di hariña fini, manteca i lechi—un bankete cu ta pas pa un rey. Kico ta e les? Ora ta mustra hospitalidad, e cos importante, of loke mester ser enfatisá, no ta con luhoso e cuminda i bebida ta, of ki entretenimentu elaborá lo ser percurá, i cosnan asina. Hospitalidad no ta dependé di si un persona por permití su mes cosnan costoso. Mas bien, e ta basá riba un interes genuino den e bienestar di otronan i riba un deseo di haci bon na otronan te n’e grado cu nos por. “Mihó un plato di berdura unda tin amor cu un toro gordá for di pesebre i odio huntu cuné,” un proverbio bíblico ta bisa, i ei den tin e clave pa berdadero hospitalidad.—Proverbionan 15:17.

16. Con Abraham a mustra aprecio pa cosnan spiritual den loke el a haci p’e bishitantenan?

¹⁶ Sin embargo, nos mester tuma nota cu tabatin tambe un aspecto spiritual na henter e suceso. Di un of otro manera Abraham a dicerní cu e bishitantenan aki tabata mensaheronan di parti di Jehova. Un indicacion di esaki ta e palabranan cu el a dirigí na nan: “Awor, Jehova, si mi a haña fabor den bo bista, por fabor no pasa bo sirbidor forbij.”a (Génesis 18:3; compará cu Exodo 33:20.) Abraham no tabata sa di antemano si nan tabatin un mensahe di Jehova p’e of cu si nan tabata djis pasando ei banda. Sea cual sea e caso, el a comprendé cu un cumplimentu di Jehova su propósito tabata tumando lugá. E individuonan aki tabata enbolbí den un of otro mision di parti di Jehova. Si e por a haci algu pa contribuí na esei, lo tabata un placer p’e. El a realisá cu sirbidornan di Jehova ta merecé lo mihó, i lo el a percurá lo mihó bou dje circunstancianan. Haciendo esei, lo tabatin un bendicion spiritual, sea pa su mes of pa un otro hende. Manera a resultá, Abraham i Sara a ser ricamente bendicioná pa nan hospitalidad sincero.—Génesis 18:9-15; 21:1, 2.

Un Pueblo Hospitalario

17. Kico Jehova a rekerí dje israelitanan relacioná cu stranheronan i esnan den necesidad meimei di nan?

¹⁷ E nacion cu a bini for di Abraham no mester a lubidá e ehempel sobresaliente di dje. E Ley cu Jehova a duna e israelitanan a incluí percuracionnan pa mustra hospitalidad n’e stranheronan meimei di nan. “E residente stranhero cu ta biba como stranhero cerca boso tin cu bira pa boso manera un nativo di boso; i bo tin cu stim’é mescos cu bo mes, pasobra boso a bira residente stranhero den e tera di Egipto. Ami ta Jehova boso Dios.” (Levítico 19:34) E pueblo mester a mustra consideracion special na esnan den necesidad di sosten material i no mester a menospreciá nan. Ora Jehova a bendicioná nan cu cosechanan abundante, ora nan a alegrá den nan festivalnan, ora nan a sosegá di nan trabou durante añanan di sabat, i na otro ocasionnan, e pueblo mester a corda esnan ménos afortuná—e biudanan, e mucha hombernan sin tata i e residentenan stranhero.—Deuteronomio 16:9-14; 24:19-21; 26:12, 13.

18. Ki importante hospitalidad ta en relacion cu ricibí e fabor i bendicion di Jehova?

¹⁸ E importancia di bondad, generosidad i hospitalidad pa cu otronan, specialmente pa cu esnan den necesidad, por ser mirá den e manera cu Jehova a trata cu e israelitanan ora nan a neglishá e cualidadnan aki. Jehova a haci cla cu bondad i generosidad pa cu hende straño i esnan den necesidad ta entre e rekisitonan pa su pueblo sigui ricibí su bendicion. (Salmo 82:2, 3; Isaías 1:17; Jeremías 7:5-7; Ezekiel 22:7; Zacarías 7:9-11) Ora e nacion tabata diligente den efectuá esakinan i otro rekisitonan, nan a prosperá i a disfrutá di abundancia material i spiritual. Ora nan a bira enbolbí den nan propio empeñonan egoista i a neglishá di mustra e cualidadnan di bondad aki pa esnan den necesidad, nan a ricibí e condenacion di Jehova, i cu tempu huicio desfaborabel a ser ehecutá contra nan.—Deuteronomio 27:19; 28:15, 45.

19. Kico nos mester considerá mas aleu?

¹⁹ Ta ki importante anto pa nos examiná nos mes i mira si nos ta cumpliendo cu e expectativanan di Jehova en coneccion cu esaki! Esaki ta specialmente asina awe en bista dje spiritu egoista i divisivo den e mundu. Con nos por mustra hospitalidad cristian den un mundu dividí? Esei ta e tema cu ta ser tratá den e siguiente artículo.

[Nota]

Bo Ta Corda?

◻ Kico ta e nificacion dje palabra bíblico traducí como “hospitalidad”?

◻ Den ki maneranan Jehova ta e ehempel perfecto di mustra hospitalidad?

◻ Te con leu Abraham a bai pa ser hospitalario?

◻ Pakico tur adorador berdadero mester “sigui e caminda di hospitalidad”?