Sea Lector Felis dje Buki di Revelacion

“Felis ta esun cu ta lesa na bos haltu i esnan cu ta tende e palabranan di e profecia aki, i cu ta warda loke ta pará skirbí den dje.”—REVELACION 1:3.

 1. Den ki circunstancianan apostel Juan tabata ora el a skirbi Revelacion, i pa ki propósito el a pone e visionnan aki riba papel?

“AMI, Juan . . . a yega di ta riba e isla cu yama Pátmos pasobra mi a papia tocante Dios i a duna testimonio di Jesus.” (Revelacion 1:9) Eseinan tabata e circunstancianan bou di cua apostel Juan a skirbi e buki Apocalípsis, of Revelacion. Aparentemente nan a manda apostel Juan den exilio na Pátmos durante e mando di emperador romano Domiciano (81-96 E.C.), kende a imponé adoracion di emperador i a bira un persiguidó di cristiannan. Tempu cu Juan tabata na Pátmos, el a ricibí un seri di vision cu el a pone riba papel. El a relatá nan, no pa spanta e cristiannan di promé, sino pa fortalecé, consolá i animá nan en bista dje pruebanan cu nan tabata pasando aden i esnan cu ainda tabata den futuro.—Echonan 28:22; Revelacion 1:4; 2:3, 9, 10, 13.

 2. Pakico e situacion den cua Juan i su compañeronan cristian tabata, ta di interes pa cristiannan cu ta biba awe?

² E circunstancianan bou di cua a skirbi e buki bíblico aki ta masha significativo pa cristiannan cu ta biba awe. Juan tabata pasando persecucion pasobra e tabata un testigo di Jehova i di Su Yu, Cristo Jesus. E cu su compañeronan cristian tabata biba den un clima di hostilidad pasobra, aunke nan tabata haci esfuerso pa ta bon ciudadano, nan no por a adorá e emperador. (Lucas 4:8) Awe, den algun pais, cristiannan berdadero ta haña nan mes den un situacion similar, caminda Estado ta asumí e derecho pa definí loke ta ‘religiosamente corecto.’ P’esei, e palabranan di introduccion dje buki di Revelacion ta masha consolador: “Felis ta esun cu ta lesa na bos haltu i esnan cu ta tende e palabranan di e profecia aki, i cu ta warda loke ta pará skirbí den dje; pasobra e tempu señalá ta cerca.” (Revelacion 1:3) Sí, lectornan atento i obediente di Revelacion por haña berdadero felicidad i hopi bendicion.

 3. Ken ta e Fuente dje Revelacion cu Juan a ricibí?

³ Ken ta e berdadero Fuente di Revelacion, i ki canal el a usa pa transmitié? E promé versículo ta bisa nos: “Un revelacion via Jesucristo, cu Dios a dun’é, pa mustra su esclabonan e cosnan cu tin cu sosodé pronto. I el a manda su angel i mediante dje a present’é den señal na su esclabo Juan.” (Revelacion 1:1) Bisá senciyamente, e berdadero Fuente di Revelacion ta Jehova Dios, kende a dun’é na Jesus, i pa medio di un angel, Jesus a comunik’é na Juan. Un investigacion un tiki mas leu ta revelá cu Jesus a usa spiritu santu tambe pa transmití mensahe n’e congregacionnan i pa duna Juan vision.—Revelacion 2:7, 11, 17, 29; 3:6, 13, 22; 4:2; 17:3; 21:10; compará cu Echonan 2:33.

 4. Ki medionan Jehova ta usa awe ainda pa guia su pueblo riba tera?

⁴ Ainda Jehova ta usa su Yu, e “cabes dje congregacion,” pa siña su sirbidónan riba tera. (Efesionan 5:23; Isaías 54:13; Juan 6:45) Tambe Jehova ta usa su spiritu pa instruí su pueblo. (Juan 15:26; 1 Corintionan 2:10) I mescos cu Jesus a usa “su esclabo Juan” pa comunicá alimento spiritual nutritivo n’e congregacionnan di promé siglo, asina awe e ta usa “e esclabo fiel i discreto,” cu ta consistí di su “rumannan” ungí riba tera pa duna su domésticonan i nan compañeronan ‘alimento spiritual n’e debido tempu.’ (Mateo 24:45-47; 25:40) Felis ta esnan cu ta reconocé e Fuente dje ‘bon regalonan’ cu nos ta ricibí, manera e alimento spiritual i e canal cu E ta usando.—Santiago 1:17.

Congregacionnan Dirigí pa Cristo

 5. (a) Cu kico Revelacion ta compará congregacionnan cristian i nan superintendentenan? (b) Apesar di imperfeccion humano, kico lo contribuí na nos felicidad?

⁵ Den e promé capítulonan di Revelacion, congregacionnan cristian ta ser compará cu cándela. Nan superintendentenan ta ser compará cu angel (mensahero) i cu strea. (Revelacion 1:20)a Papiando di su mes, Cristo a bisa Juan pa skirbi: “Esaki ta loke esun cu ta tene e shete streanan den su man drechi ta bisa, esun cu ta cana meimei dje shete cándelanan di oro.” (Revelacion 2:1) E shete mensahenan mandá n’e shete congregacionnan asiático ta mustra cu den e promé siglo E.C., e congregacionnan i nan ancianonan tabatin nan puntonan fuerte i nan puntonan swak. Mescos ta cierto awe. P’esei, nos lo ta muchu mas felis si nos nunca perde for di bista e echo cu Cristo, nos Cabes, ta meimei dje congregacionnan. E sa precis kico ta pasando. Simbólicamente, e superintendentenan ta “den su man drechi,” esta, bou di su control i direccion i mester duna cuenta i rason na dje p’e manera cu nan ta pastoreá e congregacionnan.—Echonan 20:28; Hebreonan 13:17.

 6. Kico ta mustra cu no ta e superintendentenan so tin cu duna cuenta i rason na Cristo?

⁶ Sin embargo, nos lo ta gañando nos mes si nos pensa cu ta e superintendentenan so tin cu duna cuenta i rason na Cristo pa nan accionnan. Den un di su mensahenan, Cristo a bisa: “Tur e congregacionnan lo sa cu ami ta esun cu ta examiná nir i curason, i lo mi duna na boso individualmente segun boso echonan.” (Revelacion 2:23) Esaki ta un spiertamentu i a la bes un animacion: un spiertamentu cu Cristo conocé nos motibunan profundo, un animacion pasobra e ta sigurá nos cu Cristo ta conciente di nos esfuersonan i lo bendicioná nos si nos haci loke nos por.—Marco 14:6-9; Lucas 21:3, 4.

 7. Con e cristiannan na Filadelfia a ‘warda e palabra tocante Jesus su awante’?

⁷ Cristo su mensahe n’e congregacion den e stad Lidia di Filadelfia no ta contené reprendementu, pero sí e ta haci un promesa cu mester ta di gran interes pa nos. “Dor cu bo a warda e palabra tocante mi awante, ami tambe lo warda bo dje ora di prueba, cu tin cu bini riba henter e tera habitá, pa pone na prueba esnan cu ta biba riba tera.” (Revelacion 3:10) E palabra griego pa “warda e palabra tocante awante” por nificá tambe “warda loke mi a bisa tocante mi awante.” Versículo 8 ta indicá cu e cristiannan na Filadelfia no solamente a obedecé e mandamentunan di Cristo sino tambe a sigui su conseho pa nan mes tambe wanta fielmente.—Mateo 10:22; Lucas 21:19.

 8. (a) Ki promesa Jesus a haci n’e cristiannan di Filadelfia? (b) Ken awe ta ser afectá pa “e ora di prueba”?

⁸ Jesus a agregá cu lo el a warda nan for di “e ora di prueba.” Kico exactamente esei a nificá p’e cristiannan dje tempu ei, nos no sa. Aunke tabatin un pausa breve den persecucion despues dje morto di Domiciano na 96 E.C., a lanta un ola nobo di persecucion bou di Trajano (98-117 E.C.), sin duda treciendo mas prueba. Pero e “ora di prueba” principal ta tuma lugá den “e dia di Señor” durante “e tempu di fin,” den cua nos ta awor. (Revelacion 1:10; Daniel 12:4) Cristiannan ungí cu spiritu a pasa dor di un tempu di prueba notabel durante Guera Mundial I i inmediatamente despues di dje. I “e ora di prueba” ta vigente ainda. E ta afectá “henter e tera habitá,” incluso e miyones di personanan cu ta forma e multitud grandi, cu ta spera di sobrebibí e tribulacion grandi. (Revelacion 3:10; 7:9, 14) Nos lo ta felis si nos ‘warda loke Jesus a bisa tocante awante,’ esta: “Esun cu a wanta te na fin ta esun cu lo ser salbá.”—Mateo 24:13.

Sumision Felis n’e Soberania di Jehova

 9, 10. (a) Ki efecto e vision di Jehova su trono mester tin riba nos? (b) Con nos lesamentu di Revelacion ta contribuí na nos felicidad?

⁹ E vision di Jehova su trono i di su palacio celestial cu nos por haña den capítulo 4 i 5 di Revelacion mester yena nos cu respet reverencial. E expresionnan sincero di alabansa cu e criaturanan celestial poderoso ta declará segun cu nan ta someté nan mes gososamente na Jehova su soberania hustu, mester impresioná nos. (Revelacion 4:8-11) Lo mester tende nos bos entre esnan cu ta bisa: “Na Esun cu ta sintá riba e trono i n’e Lamchi sea bendicion i onor i gloria i poder pa semper hamas.”—Revelacion 5:13.

¹⁰ Den práctica, esaki ta nificá cu nos ta someté nos gososamente n’e boluntad di Jehova den tur cos. Apostel Pablo a skirbi: “Cualkier cos cu boso ta haci den palabra of den trabou, haci tur cos den e nomber di Señor Jesus, gradiciendo Dios e Tata mediante dje.” (Colosensenan 3:17) Nos lesamentu di Revelacion lo haci nos berdaderamente felis si den e parti mas interior di nos mente i curason, nos reconocé Jehova su soberania i tene cuenta cu su boluntad den tur aspecto di nos bida.

11, 12. (a) Con e sistema terenal di Satanas lo ser sagudí i destruí? (b) Segun Revelacion capítulo 7, ken lo “por keda para” n’e tempu ei?

¹¹ Sumision gososo na Jehova su soberania ta e base pa felicidad riba nivel personal i riba nivel universal. Pronto un temblor simbólico grandi lo sagudí e fundeshi mes di Satanas su sistema mundial i destruyé. Lo no tin ningun lugá di refugio pa hende cu ta nenga di someté nan na Cristo su gobernacion di Reino celestial, cu ta representá Dios su soberania legítimo. E profecia ta declará: “E reynan di tera i esnan di rango mas haltu i e comandantenan militar i esnan ricu i fuerte i tur esclabo i tur hende liber a sconde nan mes den cueba i den baranca di ceru. I nan ta sigui bisa e cerunan i e barancanan: ‘Cai riba nos i sconde nos for dje cara di Esun sintá riba e trono i for di rabia dje Lamchi, pasobra e gran dia di nan rabia a yega, i ken por keda para?’”—Revelacion 6:12, 15-17.

¹² Relacioná cu e pregunta ei, den e siguiente capítulo, apostel Juan ta describí esnan cu ta forma e multitud grandi, cu ta sali for dje tribulacion grandi, como “pará dilanti e trono i dilanti e Lamchi.” (Revelacion 7:9, 14, 15) Nan paramentu dilanti e trono di Dios ta mustra cu nan ta reconocé e trono ei i ta someté nan plenamente na Jehova su soberania. P’esei nan ta para aprobá.

13. (a) Kico mayoria habitante di tera ta adorá, i kico e marca riba nan frenta i riba nan man ta simbolisá? (b) Pues, pakico awante lo ta necesario?

¹³ Di otro banda, capítulo 13 ta describí e resto di habitantenan di tera ta adorá Satanas su sistema político, simbolisá pa un bestia salbahe. Nan ta ricibí un marca riba nan “frenta” of riba nan “man” cu ta mustra nan apoyo mental i físico n’e sistema ei. (Revelacion 13:1-8, 16, 17) Anto capítulo 14 ta agregá: “Si cualkier hende adorá e bestia salbahe i su imágen, i ricibí un marca riba su frenta of riba su man, e tambe lo bebe dje biña dje rabia di Dios cu ta ser bashá sin ta hací awa den e copa di su furia . . . Aki ta unda ta nificá awante p’e santunan, esnan cu ta warda e mandamentunan di Dios i e fe di Jesus.” (Revelacion 14:9, 10, 12) Segun cu tempu ta pasa, e pregunta cu lo keda bini bek ta: Ken abo ta apoyá? Jehova i su soberania of e sistema político malbado simbolisá p’e bestia salbahe? Felis lo ta esnan cu ta evitá di ricibí e marca dje bestia i cu ta wanta fielmente den sumision na Jehova su soberania.

14, 15. Ki mensahe ta interumpí Revelacion su descripcion di Armagedon, i cu ki nificacion pa nos?

¹⁴ E gobernantenan di “henter e tera habitá” ta riba caminda pa un choke, rumbo pa un confrontacion cu Jehova riba e cuestion di soberania. E confrontacion final lo ta Armagedon, “e guera dje gran dia di Dios e Todopoderoso.” (Revelacion 16:14, 16) Un paréntesis cu ta intrigá nos ta aparecé net meimei dje descripcion dje reunimentu di gobernantenan di tera p’e guera contra Jehova. Jesus mes ta interumpí e vision pa bisa: “Mira! Mi ta bini manera ladron. Felis ta esun cu ta keda lantá i ta keda cu su paña exterior, p’e no cana sunú i hende mira su bergwensa.” (Revelacion 16:15) Esaki por ta referí n’e guardianan levita dje tempel cu si a haña nan ta drumi durante nan tarea di vigilá, lo a kita nan paña i brongosá nan públicamente.

¹⁵ E mensahe ta cla: Si nos kier sobrebibí Armagedon, nos tin cu keda spiritualmente alerto i keda bistí cu e pañanan simbólico cu ta identificá nos como fiel Testigo di Jehova Dios. Felis nos lo ta si nos ta evitá cabishamentu spiritual i sigui sin stop, participando celosamente den plama e “bon nobo eterno” di Dios su Reino establecí.—Revelacion 14:6.

‘Felis Ta Ken Cu Ta Warda e Palabranan Aki’

16. Pakico e capítulonan final di Revelacion ta un causa special pa felicidad?

¹⁶ Lectornan felis dje buki di Revelacion solamente por yena di emocion gososo segun cu nan ta lesa e capítulonan final cu ta describí nos glorioso speransa: un shelu nobo i un tera nobo, esta, un gobernacion di Reino celestial hustu riba un sociedad humano nobo hací limpi, tur p’e alabansa di “Jehova Dios e Todopoderoso.” (Revelacion 21:22) Ora cu e seri maraviyoso di vision a yega na su fin, e mensahero angelical a bisa Juan: “E palabranan aki ta fiel i berdadero; sí, Jehova e Dios di expresionnan inspirá dje profetanan a manda su angel pa mustra su esclabonan loke tin cu sosodé pronto. I, mira! mi ta bini lihé. Ken cu cumpli cu e palabranan di profecia dje rol aki ta felis.”—Revelacion 22:6, 7.

17. (a) Ki siguransa Revelacion 22:6 ta duna? (b) Kico nos mester ta alerto pa evitá?

¹⁷ Revelacion su lectornan felis lo corda cu palabranan similar na esakinan ta presentá na cuminsamentu dje “rol.” (Revelacion 1:1, 3) E palabranan aki ta sigurá nos cu tur “e cosnan” profetisá den e buki final aki di Bijbel lo “sosodé pronto.” Nos ta bibando asina leu den e tempu di fin cu e sucesonan relevante cu Revelacion ta predicí sigur lo mester sosodé pronto un tras di otro. P’esei, cualkier aparente stabilidad den Satanas su sistema no mester manda nos soño. E lector alerto lo corda e spiertamentunan duná den e mensahenan cu a manda n’e shete congregacionnan asiático i lo evitá e trampanan di materialismo, idolatria, inmoralidad, di ta lou i di secta apóstata.

18, 19. (a) Pakico Jesus tin cu bini ainda, i ki speransa expresá pa Juan nos tambe tin awe? (b) Pa ki propósito Jehova tin cu “bini” ainda?

¹⁸ Den e buki di Revelacion, Jesus ta anunciá vários bes: “Mi ta bini lihé.” (Revelacion 2:16; 3:11; 22:7, 20a) E tin cu bini ainda pa ehecutá huicio riba Babilonia e Grandi, riba Satanas su sistema político i riba tur hende cu ta nenga di someté nan na Jehova su soberania, cu awor ta ser expresá dor dje Reino Mesiánico. Nos ta uni nos bos cu esun di apostel Juan, kende a sclama: “Amen! Bin, Señor Jesus.”—Revelacion 22:20b.

¹⁹ Jehova mes ta declará: “Mira! Mi ta bini lihé, i e recompensa cu mi ta duna ta cu mi, pa duna na cada un segun su obra.” (Revelacion 22:12) Miéntras cu nos ta warda e recompensa glorioso di bida sin fin como parti di sea e “shelu nobo” of e “tera nobo” primintí, laga nos uni celosamente den extendé e invitacion na tur hende di curason onrado: “‘Bin!’ I laga ken cu tin sed bini; laga ken cu kier tuma e awa di bida grátis.” (Revelacion 22:17) Laga nan tambe bira lectornan felis dje buki inspirá i inspirador di Revelacion!

[Nota]

Puntonan di Repaso

◻ Ki canal Jehova a usa pa transmití e Revelacion, i kico nos por siña for di esaki?

◻ Pakico nos mester ta felis pa lesa e mensahenan mandá n’e shete congregacionnan na Asia?

◻ Con nos por keda protehá durante “e ora di prueba”?

◻ Ki felicidad nos lo tin si nos warda e palabranan dje rol cu ta contené e Revelacion?

[Plachi na página 15]

Felis ta esnan cu ta reconocé e Fuente dje noticia alegre

[Plachi na página 18]

Felis ta esun cu ta keda lantá