Sigui Warda Riba Yehova

 1. Dikon nos lo por kansa di warda?

E ÚLTIMO dianan di e sistema di Satanas a kuminsá na aña 1914 ora ku Kristu a bira Rei den shelu. Komo resultado di e guera den shelu, Hesus a benta Diabel ku su demoñonan abou na tera. (Lesa Revelashon 12:7-9.) I Satanas sa ku a ked’é “masha poko tempu.” (Rev. 12:12) Pero ta kasi 100 aña kaba ku e “masha poko tempu” ei a kuminsá, i kisas tin hende ta haña ku e último dianan a dura muchu largu. Akaso nos tambe a kansa di warda riba Yehova p’e trese un fin na e sistema di Satanas?

 2. Kiko e artíkulo akí lo trata?

² Ta peligroso pa nos pèrdè pasenshi. Dikon? Pasobra ora nos no tin pasenshi, nos lo por hasi kos sin pensa bon promé. Pero kiko por yuda nos warda ku speransa riba Yehova? E artíkulo akí lo yuda nos pasobra e ta kontestá e siguiente preguntanan: (1) Kiko e ehèmpel di profeta Mikéas ta siña nos tokante pasenshi? (2) Kua ta e susesonan ku ta indiká ku e fin ta serka? (3) Kon nos por demostrá ku nos ta gradisidu ku Yehova tin pasenshi?

 3. Ki situashon tabata reina na Israel den tempu di Mikéas?

³ Lesa Mikéas 7:2-6. Yehova su profeta Mikéas a mira kon e kondishon spiritual di Israel a keda bai atras te ora ku nan a bira sumamente infiel na Yehova bou di mando di e rei malbado Akas. Mikéas a kompará e israelitanan infiel ei ku “mata di sumpiña” i “trankera di kadushi,” pasobra nan tabata kousa daño na tur hende ku nan tabatin trato kuné. E situashon a bira asina malu ku asta miembronan di famia no tabata stima otro mas. Mikéas a realisá ku e mes no por a hasi nada pa kambia e situashon, i p’esei el a hasi orashon na Yehova di henter su kurason. Kaba el a warda ku pasenshi pa Dios aktua. Mikéas tabatin sigur ku Yehova lo a intervení i korigí e situashon na Su debido tempu.

 4. Kua ta e retonan ku nos ta haña nos kuné?

⁴ Meskos ku Mikéas, nos tin ku biba meimei di hende egoista. Hopi di nan ta “malagradesí, desleal, sin kariño.” (2 Tim. 3:2, 3) Nos ta haña hopi strès ora ku koleganan di trabou òf kompañeronan di skol òf nos bisiñanan ta mustra un aktitut egoista. Pero algun di nos tin un reto mas grandi ainda. Hesus a bisa ku su siguidónan lo haña oposishon for di nan famia. I e palabranan ku el a usa pa deskribí e impakto ku su mensahe lo tin ta kasi meskos ku loke nos ta lesa na Mikéas 7:6. Hesus di: “Mi a bini pa kousa desunion: entre un yu hòmber i su tata, entre un yu muhé i su mama i entre un esposa hóben i su suegra. Sí, e enemigunan di un hende lo ta su mes hendenan di kas.” (Mat. 10:35, 36) Ta masha difísil ora ku nos miembronan di famia ku no ta sirbi Yehova ta hasi bofon di nos i oponé nos! Si nos ta pasando den un situashon asina, laga nos no entregá na e preshon akí. Na lugá di esei, nos mester keda leal na Yehova i warda ku pasenshi pa e korigí e situashon. Si nos keda pidié pa yuda nos, lo e duna nos e fortalesa i sabiduria nesesario pa perseverá i keda fiel.

5, 6. Kon Yehova a rekompensá Mikéas, pero kiko sí Mikéas no a eksperensiá?

⁵ Yehova a rekompensá Mikéas pa su pasenshi. Mikéas a mira e fin di Rei Akas i di su gobernashon malbado. Tambe el a mira Ezekías, yu di Akas, bira rei i yuda e israelitanan bolbe na adorashon berdadero. E huisio ku Yehova a inspirá Mikéas pa profetisá kontra Samaria a kumpli ora ku e asirionan a invadí Israel su reino di nort. Anto Mikéas a mira esei tambe sosodé.—Mik. 1:6.

⁶ Pero tòg Mikéas no a mira tur loke Yehova a inspir’é pa profetisá kumpli. Por ehèmpel, Mikéas a skirbi: “Lo sosodé den e último dianan ku e seru di e kas di SEÑOR lo wòrdu establesí komo hefe di e serunan. E lo wòrdu halsá mas haltu ku e seritunan, i e pueblonan lo basha bai na dje. I hopi nashon lo bin bisa: ‘Ban laga nos subi bai na e seru di SEÑOR.’” (Mik. 4:1, 2) Mikéas a muri hopi promé ku e profesia ei a kumpli. Ma e tabata determiná pa keda leal na Yehova te na morto, sin importá kiko e hendenan rònt di dje tabata hasi. El a skirbi: “Tur e pueblonan ta kana kada un den e nòmber di su dios, ma pa loke ta nos, nos sí lo kana den e nòmber di [Yehova] nos Dios pa semper i semper.” (Mik. 4:5) Mikéas por a warda ku pasenshi durante periodonan difísil pasobra e tabatin pleno konfiansa ku Yehova lo kumpli ku tur Su promesanan. E profeta fiel ei a konfia den Yehova.

7, 8. (a) Ki motibu nos tin pa konfia den Yehova? (b) Kiko lo pone tempu pasa mas lihé?

⁷ Nos tambe ta konfia den Yehova meskos ku Mikéas? Nos tin bon motibu pa hasi esei. Nos a mira personalmente kon e profesia di Mikéas a kumpli! Durante e último dianan akí, miónes di hende for di tur nashon, tribu i idioma a basha bai na ‘e seru di e kas di Yehova.’ Maske nan ta bini di nashonnan ku hopi biaha ta bringa otro, e adoradónan di Yehova akí a “bati nan spadanan traha plug ku nan,” i nan ta nenga di siña òf “tren pa guera.” (Mik. 4:3) Nos tin e gran privilegio di ta parti di Yehova su pueblo pasífiko!

⁸ Di mes, nos tur ke pa Yehova trese un fin na e sistema malbado akí pronto. Pero pa nos por warda ku pasenshi, nos tin ku mira kosnan for di e punto di bista di Yehova. El a fiha un dia riba kua e ta bai husga mundu “pa medio di un hòmber ku el a nombra,” Hesukristu. (Echo. 17:31) Pero promé ku e dia ei yega, Dios ta dunando tur sorto di hende e oportunidat pa haña “konosementu eksakto di e bèrdat,” pa pone na práktika loke nan ta siña i pa ser salbá. Nos tin ku kòrda ku ta bida di hende ta na peliger. (Lesa 1 Timoteo 2:3, 4.) Djis akí e fin ta yega. Si nos ta okupá ku e trabou di yuda hende haña konosementu eksakto di Dios, e ora ei e tempu ku falta pa Yehova su huisio yega lo pasa mas lihé. I ora e fin yega, nos lo keda masha kontentu mes ku nos tabata okupá ku e trabou di prediká e Reino!

9-11. E profesia di 1 Tesalonisensenan 5:3 a kumpli? Splika esei.

⁹ Lesa 1 Tesalonisensenan 5:1-3. Den futuro serkano, e nashonnan lo bisa “Pas i siguridat!” Si nos no ke pa e deklarashon akí kue nos fo’i base, nos tin ku “keda lantá i mantené nos sano huisio.” (1 Tes. 5:6) Pa yuda nos keda lantá den sentido spiritual, nos lo bai repasá brevemente algun suseso ku a prepará kaminda pa e anunsio remarkabel akí.

¹⁰ E nashonnan a sklama pa pas despues di tur e dos gueranan mundial. Despues di e promé guera mundial, nan a forma Liga di Nashonnan ku e speransa ku esei lo a trese pas. Anto despues di e di dos guera mundial, hopi hende a spera ku Nashonnan Uní lo por a trese pas. Lidernan gubernamental i religioso a konfia den e dos organisashonnan ei pa trese pas na mundu. Por ehèmpel, Nashonnan Uní a deklará aña 1986 komo Aña Internashonal di Pas. E aña ei, hopi lider polítiko i religioso a reuní huntu ku e kabes di Iglesia Katóliko na Assisi (Italia) pa resa pa pas.

¹¹ Ma ni e anunsio ei di pas i siguridat, ni otro anunsionan paresido na dje, no a kumpli ku e profesia di 1 Tesalonisensenan 5:3. Dikon nos ta bisa esei? Pasobra ‘e destrukshon ku lo a bini riba nan diripiente’ no a tuma lugá ainda.

12. Kiko nos sa tokante e deklarashon di “Pas i siguridat”?

¹² Ta ken lo hasi e futuro deklarashon importante akí di “Pas i siguridat”? Ki papel e lidernan di kristiandat i di otro religion lo hunga den esei? Kon e lidernan di vários gobièrnu lo ta enbolbí den e anunsio akí? Beibel no ta bisa nos. Loke sí nos sa ta ku maske kon nan hasi e anunsio ei òf kon konvinsente e por zona, lo e no ta berdadero “pas i siguridat.” E mundu bieu akí, ku ta kompletamente putrí, ta keda den gara di Satanas i lo no kambia. Lo ta masha tristu si kualke un di nos mester kere e proklamashon satániko akí i komprometé nos posishon neutral komo kristian!

13. Dikon angel tin e bientunan di destrukshon duru tené?

¹³ Lesa Revelashon 7:1-4. Miéntras ku nos ta warda pa 1 Tesalonisensenan 5:3 kumpli, angel poderoso tin e bientunan destruktivo di e tribulashon grandi duru tené. Riba kiko nan ta warda? Wèl, apòstel Huan a deskribí un suseso klave: “E esklabonan di nos Dios,” e ungínan, mester haña nan seyo final.a Unabes e seyamentu final terminá, e angelnan ta laga e bientunan di destrukshon lòs. Kiko lo pasa e ora ei?

14. Kiko ta indiká ku fin di Babilonia e Grandi ta serka?

¹⁴ Babilonia e Grandi, e imperio mundial di religion falsu, lo haña su destrukshon meresí. Ningun “pueblo, multitut, nashon i idioma” lo por yud’é. Ya kaba nos ta mira indikashon ku su fin ta serka. (Rev. 16:12; 17:15-18; 18:7, 8, 21) De echo, nos ta mira kaba e falta di apoyo ei den medionan di komunikashon: mas i mas nan ta kritiká religion i lidernan religioso. Apesar di esei, lidernan di Babilonia e Grandi no ta sinti ku nan ta realmente den peliger. Pero nan ta mal kiboká! Despues di e anunsio di “Pas i siguridat!,” elementonan polítiko di e mundu di Satanas diripiente lo ataká religion falsu i kaba kuné. Nunka mas nos lo mira Babilonia e Grandi! Ta bale la pena bèrdat pa nos warda ku pasenshi pa e susesonan impaktante ei tuma lugá.—Rev. 18:8, 10.

15. Dikon Yehova a warda ku pasenshi?

¹⁵ Apesar ku hende a desonrá e nòmber di Dios, Yehova a spera ku pasenshi riba e momento oportuno pa aktua. Yehova no ta deseá pa ningun hende di kurason onrado ser destruí. (2 Ped. 3:9, 10) Asina nos tambe ta sinti? Wèl, promé ku e dia di Yehova yega, nos por mustra nos gratitut pa su pasenshi na e siguiente maneranan.

16, 17. (a) Dikon nos lo ke yuda rumannan ku a bira inaktivo? (b) Dikon ta urgente pa rumannan inaktivo bolbe serka Yehova aworakí?

¹⁶ Yuda rumannan ku a bira inaktivo. Hesus a bisa ku tin goso den shelu ora ku haña djis ún karné pèrdí! (Mat. 18:14; Luk. 15:3-7) Esei ta mustra bon kla ku Yehova ta masha interesá den tur hende ku a yega di ekspresá amor pa su nòmber, asta pa esnan ku na e momentonan akí no ta sirbié aktivamente. Ora nos yuda personanan asina bolbe na e kongregashon, nos ta hasi Yehova i e angelnan masha kontentu.

¹⁷ Abo ta un di e personanan ku na e momentonan akí no ta sirbiendo Yehova aktivamente? Kisas un hende den kongregashon a hùrt bo i p’esei bo a stòp di asosiá ku e organisashon di Yehova. Si esei a sosodé algun tempu pasá kaba, bo por puntra bo mes: ‘Mi bida tin mas sentido awor? Mi ta mas felis? Ta Yehova a ofendé mi òf ta un hende imperfekto? Yehova a yega di hasi algu pa perhudiká mi?’ Si nos wak bon, Yehova semper a trata nos bon. Asta si aworakí nos no ta kumpliendo ku nos promesa di sirbié, tòg e ta laga nos disfrutá di e kosnan bon ku e ta ofresé. (Sant. 1:16, 17) Pero djis akí e dia di Yehova ta yega. Awor ta ora pa bolbe den e brasa di nos amoroso Tata selestial i na e kongregashon, e úniko refugio sigur den e último dianan akí.—Deu. 33:27; Heb. 10:24, 25.

18. Dikon nos mester apoyá e rumannan ku ta dirigí e kongregashon?

¹⁸ Sea fiel den apoyá e rumannan ku ta dirigí e kongregashon. Yehova, komo un Wardador amoroso, ta guia nos i protehá nos. El a nombra su Yu komo e Wardador Prinsipal di e tou. (1 Ped. 5:4) Ansianonan den mas ku 100.000 kongregashon ta tuma nan tempu pa pastoriá delaster un karné di Dios. (Echo. 20:28) Ora ku nos ta apoyá fielmente e rumannan ku ta dirigí e kongregashon, nos ta mustra Yehova ku Hesus ku nos ta masha gradisidu pa tur loke nan dos a hasi pa nos.

19. Kon nos por ‘sera fila’?

¹⁹ Hala serka di bo rumannan. Kiko esei ta nifiká? Wèl, ora un enemigu ta ataká un ehérsito bon entrená, e sòldánan di e ehérsito ei ta ‘sera fila,’ es desir, nan ta hala mas serka di otro pa no laga niun buraku den nan liña di defensa. Ora nan hasi esei, ta bira difísil pa e enemigu derotá nan. Satanas ta oumentando su atakenan kontra e pueblo di Dios. Awor no ta ora pa nos bringa ku otro. Awor ta ora pa nos hala mas serka di otro, pasa por haltu di imperfekshon di otro i demostrá konfiansa den e liderato di Yehova.

20. Kiko nos mester hasi aworakí?

²⁰ Pues, laga nos tur keda spiritualmente lantá i mustra ku nos ta spera riba Yehova. Laga nos warda ku pasenshi riba e anunsio di “Pas i siguridat!” i riba e seyamentu final di e skohínan. Despues di esei, e angelnan lo laga e bientunan di destrukshon lòs, i Babilonia e Grandi lo ser destruí. Miéntras ku nos ta warda pa e susesonan impaktante akí tuma lugá, laga nos aseptá instrukshon for di e rumannan nombrá pa dirigí e organisashon di Yehova. Laga nos ‘sera fila’ pa Diabel ku su demoñonan no haña ni ún chèns ku nos! Awor ta ora pa sigui e konseho di e salmista: “Sea fuerte i fortalesé boso kurason, boso tur ku ta spera den SEÑOR.”—Sal. 31:24.