Alaba e Rey di Eternidad!
“Jehova ta Rey pa tempu indefiní, asta pa semper.”—SALMO 10:16.
1. Ki preguntanan ta lanta relacioná cu eternidad?
ETERNIDAD—kico abo lo bisa e ta? Bo ta kere cu tempu realmente por continuá pa semper? Wel, no tin duda cu tempu ta extendé pa semper den pasado. Pues pakico no pa semper den futuro? En berdad e Traducción del Nuevo Mundo di Bijbel ta referí na Dios como unu cu ta ser alabá “for di tempu indefiní asta pa tempu indefiní.” (Salmo 41:13) Kico e expresion aki ta nificá? Loke por yuda nos comprend’é ta ora nos referí na un tópico relacioná cuné—espacio.
2, 3. (a) Ki preguntanan cu ta enbolbé espacio ta yuda nos comprendé eternidad? (b) Pakico nos mester kier adorá e Rey di eternidad?
2 Con extenso espacio ta? Tin un límite na dje? Te cu 400 aña pasá, hende a kere cu nos tera tabata e centro dje universo. Anto Galileo a desaroyá e telescop, percurando pa un bista muchu mas amplio di shelu. Awor Galileo por a mira hopi mas strea i tabata capas pa mustra cu e tera i otro planetanan ta drei rond di solo. Via Láctea no a parce manera un faha iluminá mas. El a resultá di ta un galaxia di strea, rond di shen mil miyon na cantidad. Nos nunca lo por conta dje tantu strea ei, ni sikiera durante henter nos bida. Despues, astrónomonan a sigui localisá miles di miyones di galaxia. Esakinan ta extendé interminablemente den espacio, mes leu cu e telescopnan di mas poderoso por explorá. Ta parce cu espacio no tin límite. Mescos ta cierto cu eternidad—e no tin límite.
3 E concepto di eternidad ta parce di ta fuera dje comprendimentu di nos celebro humano limitá. Sin embargo, tin un Persona cu sí ta comprend’é completamente. E por conta, sí, asta pa nomber e triyones di strea sin límite den nan miles di miyones di galaxia! E Persona aki ta bisa: “Hisa bo wowo na haltu i mira. Ken a crea e cosnan aki? Ta Esun cu ta saca e ehército di nan asta pa number, tur di cua e ta yama asta pa nomber. Debí n’e abundancia di energia dinámico, pasobra tambe e ta vigoroso den poder, ningun di nan ta falta. Bo no a yega di sa of bo no a tende? Jehova, e Creador dje extremidadnan dje tera, ta un Dios pa tempu indefiní. E no ta cansa ni fatigá. Su comprendimentu no por ser scudriñá.” (Isaías 40:26, 28) Ki un Dios maraviyoso! Siguramente, e ta e Dios cu nos mester kier adorá!
“Rey pa Tempu Indefiní”
4. (a) Con David a expresá aprecio p’e Rey di eternidad? (b) Kico un dje científiconan di mas grandi den historia a concluí en cuanto e orígen dje universo?
4 Na Salmo 10:16, David ta bisa dje Creador, Dios: “Jehova ta Rey pa tempu indefiní, asta pa semper.” I na Salmo 29:10, e ta ripití: “Jehova ta sinta como rey pa tempu indefiní.” Sí, Jehova ta e Rey di eternidad! Ademas, David ta duna testimonio cu e Rey halsá aki ta Diseñador i Trahador di tur loke nos ta contemplá den espacio, bisando na Salmo 19:1: “Shelunan ta declará e gloria di Dios; i dje obra di su mannan e expansion ta informando.” Rond di 2.700 aña despues, e famoso científico Sir Isaac Newton a mustra cu e tabata eens cu David, skirbiendo: “E sistema sumamente elegante aki di solo, planeta i cometa por a surgi solamente for dje propósito i soberania di un ser ilustre i poderoso.”
5. Kico Isaías i Pablo a skirbi tocante e Fuente di sabiduria?
5 Cuantu esei mester humiyá nos pa sa cu e Señor Soberano Jehova, kende ni e ‘shelunan spacioso, sí, ni e shelu di shelunan, . . . no por contené,’ ta biba eternamente! (1 Reynan 8:27) Jehova, describí na Isaías 45:18 como “e Creador di shelu, e Formador dje tera i e Trahador di dje,” ta e Fuente di sabiduria muchu mas extenso cu celebro humano mortal por yega na comprendé. Jehova a bisa, manera 1 Corintionan 1:19 ta resaltá: “Lo mi haci e sabiduria di hende sabí perecé, i e inteligencia di hende intelectual lo mi hala un banda.” Na esaki apostel Pablo a agregá den versículo 20: “Unda e homber sabí ta? Unda e escriba ta? Unda esun cu ta debatí dje sistema di cosnan aki ta? Dios no a haci e sabiduria dje mundu bobedad?” Sí, manera Pablo a sigui bisa, na capítulo 3, versículo 19, “e sabiduria dje mundu aki ta bobedad cerca Dios.”
6. Kico Eclesiástes 3:11 ta indicá pa loke ta “tempu indefiní”?
6 E cuerponan celestial ta parti dje creacion cu Rey Sálomon a referí na dje: “Tur cos [Dios] a haci bunita na su tempu. Asta tempu indefiní el a pone den nan curason, pa humanidad nunca descubrí e obra cu e Dios berdadero a haci for di principio te final.” (Eclesiástes 3:11) Berdaderamente, hende tin implantá den nan curason un deseo pa purba haña sa e nificacion di “tempu indefiní,” esta, eternidad. Pero e por alcansá tal conocimentu un dia?
Un Maraviyoso Prospecto di Bida
7, 8. (a) Ki maraviyoso prospecto di bida tin den futuro pa humanidad, i con e por ser alcansá? (b) Pakico nos mester alegrá cu educacion divino lo continuá pa tur eternidad?
7 Jesucristo a bisa den oracion na Jehova: “Esaki ta nificá bida eterno, nan ganando conocimentu di bo, e único Dios berdadero, i di esun kende bo a manda, Jesucristo.” (Juan 17:3) Con nos por gana tal conocimentu? Nos tin cu studia e Palabra di Dios, Bijbel Santu. Dje manera ei nos por gana conocimentu exacto di Dios su magnífico propósitonan, incluyendo e provision hací mediante su Yu pa bida eterno den paradijs riba tera. Esei lo ta “e berdadero bida” na cua 1 Timoteo 6:19 a referí. Lo e ta na armonia cu loke Efesionan 3:11 ta describí como “e propósito eterno cu [Dios] a forma en coneccion cu Cristo, Jesus nos Señor.”
8 Sí, nos como hende pecaminoso por alcansá bida eterno mediante educacion divino i fe den Jesus su sacrificio di rescate. Pa cuantu tempu e educacion aki lo continuá? Lo e sigui pa tur eternidad segun cu humanidad ta ser instruí progresivamente den e sabiduria di nos Creador. E sabiduria di Jehova no tin límite. Reconociendo esaki, apostel Pablo a sclama: “O e profundidad dje rikesa i sabiduria i conocimentu di Dios! Ki ininvestigabel su huicionan ta i ki fuera di averiguacion su camindanan ta!” (Romanonan 11:33) En berdad ta apropiado cu 1 Timoteo 1:17 ta yama Jehova “e Rey di eternidad”!
Jehova Su Sabiduria di Creacion
9, 10. (a) Ki obranan magnífico Jehova a efectuá preparando e tera como su regalo pa humanidad? (b) Con e sabiduria superior di Jehova ta ser manifestá den su obranan di creacion? (Mira e cuadro.)
9 Considerá e herencia maraviyoso cu e Rey di eternidad a percurá pa nos como hende. Salmo 115:16 ta bisa nos: “En cuanto e shelunan, na Jehova e shelunan ta pertenecé, pero e tera el a duna n’e yunan di hende.” Bo no ta kere cu esei ta un encargo maraviyoso? Siguramente! I cuantu nos ta apreciá nos Creador su pre-vision sobresaliente preparando e tera como nos cas!—Salmo 107:8.
10 Desaroyonan maraviyoso a tuma lugá riba tera durante e seis “dianan” di creacion di Génesis capítulo 1, cada dia cubriendo miles di aña. E obranan aki di creacion di Dios finalmente lo a cubri henter e tera cu un tapijt di yerba berde, cu selvanan mahestuoso i flornan colorido. Lo e ta abundante cu multitud di criaturanan exótico di laman, trupanan di para bunita, i un conhunto inmenso di animal doméstico i salbahe, cada un reproduciendo “segun su sorto.” Despues dje descripcion dje creacion di homber i muher, Génesis 1:31 ta relatá: “Dios a mira tur loke el a traha i, mira! e tabata hopi bon.” Ki un ambiente deleitabel a rondoná e promé hendenan ei! Nos no ta percibí den tur e creacionnan aki e sabiduria, pre-vision i interes di un Creador amoroso?—Isaías 45:11, 12, 18.
11. Con Sálomon a engrandecé Jehova su sabiduria den e creacion?
11 Un persona cu a maraviyá n’e sabiduria dje Rey di eternidad tabata Sálomon. Bes tras bes el a hala atencion n’e sabiduria dje Creador. (Proverbionan 1:1, 2; 2:1, 6; 3:13-18) Sálomon ta garantisá nos cu “e tera ta existí asta pa tempu indefiní.” El a apreciá e hopi maraviyanan di creacion, incluyendo e funcion cu nubianan di awaceru tin pa refrescá nos tera. Pues, el a skirbi: “Tur e corientenan di awa di winter ta saliendo pa laman, no obstante laman mes no ta yen. N’e lugá unda e corientenan di awa di winter ta saliendo, ei nan ta regresá pa por sali.” (Eclesiástes 1:4, 7) Asina ta cu despues cu e awaceru i e riunan a refrescá e tera, nan awanan ta completá e ciclo subiendo for dje océanonan bek den e nubianan. Con e tera aki lo tabata, i kico lo a para di nos, sin e ciclo i purificacion di awa aki?
12, 13. Con nos por mustra aprecio p’e creacion di Dios?
12 Nos aprecio p’e balansa den ecologia mester ser apoyá cu accion, manera Rey Sálomon a mencioná den su palabranan di conclusion di Eclesiástes: “E conclusion dje asuntu, despues di a tende tur cos, ta: Teme e Dios berdadero i warda su mandamentunan. Pasobra esaki ta tur e obligacion di hende. Pasobra e Dios berdadero mes lo trece tur clase di obra na huicio relacioná cu tur cos scondí, en cuanto si e ta bon of malu.” (Eclesiástes 12:13, 14) Nos mester tin temor di haci cualkier cos cu ta desagradá Dios. Mas bien, nos mester busca pa obedec’é cu temor reverencial.
13 Siguramente, nos mester kier alabá e Rey di eternidad pa su glorioso obranan di creacion! Salmo 104:24 ta declará: “Cuantu bo obranan ta, O Jehova! Nan tur bo a traha den sabiduria. E tera ta yen di bo produccionnan.” Gososamente, laga nos apoyá e último versículo dje salmo aki bisando na nos mes i na otronan: “Bendicioná Jehova, O mi alma. Boso alabá Jah!”
E Creacion Terenal Supremo
14. Den ki maneranan Dios su creacion humano ta muchu mas superior cu e animalnan?
14 Henter Jehova su creacion ta maestral. Pero e creacion terenal di mas remarcabel ta nos—humanidad. Adam, i despues Eva, a ser creá como e culminacion di Jehova su di seis dia di creacion—un creacion muchu mas superior cu piscá, para i animal! Miéntras cu hopi di esakinan ta instintivamente sabí, humanidad ta dotá cu e facultad di razoná, un concenshi cu por distinguí entre bon i malu, e abilidad di planea pa futuro, i un deseo inherente pa adorá. Con tur esaki a tuma lugá? Na lugá di evolucioná for di bestia sin sintí, hende a ser creá den imágen di Dios. P’e motibu ei, hende so por reflehá e cualidadnan di nos Creador, kende a identificá su mes como “Jehova, Jehova, un Dios misericordioso i yen di gracia, tardá pa rabia i abundante den bondad amoroso i berdad.”—Exodo 34:6.
15. Pakico nos mester alabá Jehova humildemente?
15 Laga nos alabá i gradicí Jehova p’e diseño extraordinario di nos curpa. Nos circulacion di sanger, esencial pa bida, ta circulá dor dje curpa cada 60 seconde. Manera Deuteronomio 12:23 ta declará, “e sanger ta e alma”—nos bida—precioso den bista di Dios. Wesu duru, músculo flexibel i un sistema di nervio sensitivo ta ser completá dor di un celebro muchu mas superior cu cualkier celebro di animal i cu capacidadnan cu un computer tamaño di un rascashelu no por ni cuminsá contené. Esaki no ta hací bo sintí bo humilde? E mester. (Proverbionan 22:4) I considerá esaki tambe: Nos pulmonnan, strot, lenga, djente i boca ta interactua pa percurá abla humano den cualkier un dje miles di idiomanan. David a haci melodia apropiado na Jehova, bisando: “Lo mi alabá bo pasobra den un manera cu ta inspirá temor mi a ser trahá maraviyosamente. Bo obranan ta maraviyoso, manera mi alma sa masha bon.” (Salmo 139:14) Laga nos uni cu David den alabá Jehova cu gratitud, nos maraviyoso Diseñador i Dios!
16. Ki melodia un famoso músico a haci den alabansa na Jehova, i na ki invitacion urgente nos por respondé?
16 E texto di un obra musical di siglo 18 di Joseph Haydn ta declará den alabansa na Jehova: “Dun’E gradicimentu, boso tur, Su obranan cu ta asina maraviyoso! Canta Su onor, canta Su gloria, bendicioná i engrandecé Su Nomber! Jehova su alabansa ta dura pa semper, Amen, Amen!” Asta mas bunita ta e expresionnan inspirá frecuentemente ripití den e Salmonan, manera e invitacion extendé cuater biaha den Salmo 107: “O laga hende duna gradicimentu na Jehova pa su bondad amoroso i pa su obranan maraviyoso n’e yunan di hende.” Bo ta uni den e alabansa ei? Lo bo mester, pasobra tur loke ta berdaderamente bunita tin Jehova como su fuente, e Rey di eternidad.
Obranan Mas Poderoso Ainda
17. Con ‘e cantica di Moises i dje Lamchi’ ta alabá Jehova?
17 Durante e último seis mil añanan, e Rey di eternidad a iniciá obranan asta mas poderoso. Den e buki final di Bijbel, na Revelacion 15:3, 4, nos ta lesa di esnan den shelu cu a triunfá riba enemigunan demoniaco: “Nan ta cantando e cantica di Moises e esclabo di Dios i e cantica dje Lamchi, bisando: ‘Grandi i maraviyoso ta bo obranan, Jehova Dios, e Todopoderoso. Hustu i recto ta bo camindanan, Rey di eternidad. Ken lo no realmente temé bo, Jehova, i glorificá bo nomber, pasobra abo so ta leal? Pasobra tur e nacionnan lo bini i lo adorá dilanti bo, pasobra bo decretonan hustu a ser manifestá.’” Pakico esaki ta ser yamá ‘e cantica di Moises i dje Lamchi’? Laga nos mira.
18. Ki obra poderoso ta ser conmemorá den forma di cantica na Exodo capítulo 15?
18 Rond di 3.500 aña pasá, ora Fárao su ehército poderoso a perecé den Laman Corá, e israelitanan cu gratitud a alabá Jehova den cantica. Nos ta lesa na Exodo 15:1, 18: “N’e ocasion ei Moises i e yunan di Israel a procedé na canta e cantica aki na Jehova i bisa lo siguiente: ‘Lagá mi canta na Jehova, pasobra el a bira sumamente halsá. E cabai i su ginete el a tira den laman. Jehova lo reina como rey pa tempu indefiní, asta pa semper.’” Decretonan hustu dje Rey di eternidad aki a ser manifestá den su husgamentu i ehecucion di enemigunan cu a desafiá su soberania.
19, 20. (a) Pakico Jehova a forma e nacion di Israel? (b) Con e Lamchi i otronan a contestá e desafio di Satanas?
19 Pakico esaki a bira necesario? Tabata den e hofi di Eden cu e Colebra astuto a hiba nos promé mayornan den picá. Esaki a causa cu imperfeccion pecaminoso a ser transmití na henter humanidad. Sin embargo, e Rey di eternidad a dal paso mesora na armonia cu su propósito original, cua lo hiba n’e expulsion di tur su enemigunan for dje dominio dje tera i n’e restoracion di condicionnan paradísico. E Rey di eternidad a forma e nacion di Israel i a percurá su Ley pa prefigurá con lo e cumpli cu esaki.—Galationan 3:24.
20 Sin embargo, cu tempu, Israel mes a degradá den infieldad, i e situacion lamentabel aki a culminá ora su lidernan a entregá Dios su Yu unigénito n’e romanonan pa ser torturá i matá cruelmente. (Echonan 10:39; Filipensenan 2:8) Sin embargo, Jesus su integridad te na morto, como e ‘Lamchi sacrificial di Dios,’ a refutá sobresalientemente e desafio cu Dios su antiguo Adversario, Satanas, a haci—esta cu ningun hende riba tera por keda fiel na Dios bou di un prueba severo. (Juan 1:29, 36; Job 1:9-12; 27:5) Aunke nan a heredá imperfeccion for di Adam, miyones di otro hende temeroso di Dios a sigui den e pasonan di Jesus dor di warda integridad ora nan a enfrentá atakenan satánico.—1 Pedro 1:18, 19; 2:19, 21.
21. Na armonia cu Echonan 17:29-31, kico lo ser considerá siguientemente?
21 Awor e tempu a yega pa Jehova recompensá e fielnan ei i pa husga tur enemigu dje berdad i di husticia. (Echonan 17:29-31) Con esaki lo ser efectuá? Nos siguiente artículo lo splica esei.
Cuadro di Repaso
◻ Pakico Jehova ta ser yamá corectamente “e Rey di eternidad”?
◻ Con Jehova su sabiduria ta ser manifestá den su obranan di creacion?
◻ Den ki maneranan humanidad ta un obra maestral di creacion?
◻ Ki obranan ta impulsá e cantamentu di ‘e cantica di Moises i dje Lamchi’?
[Kuadro na página 12]
Jehova Su Sabiduria Superior
E sabiduria dje Rey di eternidad ta ser reflehá den asina tantu manera den su produccionnan riba tera. Nota e palabranan di Agur: “Tur dicho di Dios ta refiná. E ta un escudo pa esnan cu ta busca refugio den dje.” (Proverbionan 30:5) Despues Agur ta referí na hopi dje creacionnan bibiente di Dios, cosnan grandi i chikitu. Por ehempel, den versículo 24 pa 28, e ta describí “cuater cos cu ta esnan di mas chikitu dje tera, pero nan ta instintivamente sabí.” Esakinan ta vruminga, klipdas, dalakochi i pega-pega.
“Instintivamente sabí”—sí, bestia a ser trahá asina. Nan no ta razoná manera hende sino ta dependé riba sabiduria implantá. Bo nunca a maraviyá riba esaki? Ki un creacion organisá nan ta! Por ehempel, vruminganan ta organisá den colonianan, cuanan ta incluí e reina, vruminga trahadó, i e machunan. Den algun sorto, e vruminganan trahadó asta ta cuida grupo di pispis den cunucunan cerá cu nan a traha. Ei nan ta hala lechi dje pispisnan miéntras e vruminganan soldat ta core cu cualkier enemigu invasor. Proverbionan 6:6 ta duna e amonestacion: “Bai cerca e vruminga, abo floho; mira su camindanan i bira sabí.” Ehempelnan asina no mester impulsá nos como hende pa tin “hopi di haci den e trabou di Señor”?—1 Corintionan 15:58.
Hende a traha avionnan masha grandi. Pero cuantu mas ábil paranan ta, incluyendo e blenchi, cu ta pisa ménos cu 30 gram! Un Boeing 747 mester carga 180.000 liter di combustibel, mester ser manehá pa un tripulacion entrená, i ta usa sistemanan complicá di nabegacion pa crusa océano. Sin embargo, un blenchi chikirititu ta dependé solamente di un gram di combustibel consistiendo di vet p’e por bula henter e distancia for di Nort América, crusa Golfo di México, i drenta Sur América. Ningun carga pisá di combustibel, ningun entrenamentu den nabegacion, ningun mapa ni computer complicá! E abilidad aki ta resultado di un proceso accidental di evolucion? Siguramente cu no! E para chikirititu aki ta instintivamente sabí, siendo programá asina dor di su Creador, Jehova Dios.
[Plachi na página 10]
E obranan diversificá di creacion di “e Rey di eternidad” ta elogiá su gloria
[Plachi na página 15]
Mescos cu Moises i henter Israel a celebrá Jehova su victoria na Laman Corá, asina lo tin gran alegria despues di Armagedon