“Tende! Mi Ta Traha Tur Kos Nobo”

Abo ta deseá di por tin un bon salú i un bida largu, tantu pa bo mes komo pa bo famia? Bo ta anhelá pa biba den un mundu kaminda no tin doló, sufrimentu i morto? Esaki no ta djis un soño. Al kontrario, Yehova a primintí ku esei lo bira realidat pasobra pronto lo e trese un hustu mundu nobo. Wak kon e promesa akí lo kumpli segun Revelashon 21:3-5.—Les’é.

“[Dios] lo . . . seka tur lágrima for di nan wowo.” (Revelashon 21:4) Ki sorto di lágrima lo e seka? No ta lágrima di alegria, ni lágrima ku ta protehá nos wowo. Mas bien, Dios ta primintí di kita tur lágrima di doló i tristesa. Lo e no djis kita e lágrimanan akí; lo e kita tambe e doló i sufrimentu ku ta kousa e lágrimanan akí.

“Lo no tin morto mas.” (Revelashon 21:4) Akaso tin algu ku a kousa mas tantu lágrima ku morto, nos enemigu? Yehova lo libra hende obediente for di e gara di morto. Kon? Dor di eliminá e berdadero kousa di morto: e piká ku nos a heredá for di Adam. (Romanonan 5:12) A base di e sakrifisio di reskate di Hesus, Yehova lo hasi hende obediente perfekto atrobe.a Esei lo “kaba” ku morto, e último enemigu. (1 Korintionan 15:26) E ora ei hende fiel lo por biba pa semper den salú perfekto—manera tabata Dios su propósito.

“Ni doló lo no tin mas.” (Revelashon 21:4) Ki sorto di doló lo no tin mas? Tur e doló físiko, mental i emoshonal ku piká i imperfekshon a produsí i pone miónes i miónes di hende sufri lo disparsé.

Pronto un mundu sin lágrima, morto i doló lo bira realidat. Kisas bo ta puntra bo mes: ‘Pero unda esaki lo ta? Akaso Dios ke men bida den shelu?’ Nò. Dikon nò? Wèl, na promé lugá, e teksto ta bisa ku “e tènt di Dios lo ta ku humanidat,” i humanidat ta biba riba tera. (Revelashon 21:3) Di dos, e teksto ta papia di un mundu kaminda “lo no tin morto mas”—un mundu kaminda morto tabata eksistí un tempu, pero ku awor no t’ei mas. Nunka no tabatin morto den shelu, pero riba tera sí e tin un historia largu. Pa e motibu akí anto, ta lógiko pa konkluí ku Dios su promesa di un mihó bida lo kumpli aki mes riba tera.

Yehova ke pa nos tin fe den su promesa di un hustu mundu nobo. Dirèkt despues ku el a deskribí e bendishonnan di futuro, e ta duna nos e siguiente garantia: “Tende! Mi ta traha tur kos nobo.” Anto el a agregá: “E palabranan akí ta digno di konfiansa i bèrdat.” (Revelashon 21:5) Nos ta invitá bo pa siña kon abo ku bo famia por ta entre e hendenan felis ku lo mira e promesa di Dios bira realidat.