Mayo

Israelitasta Egiptopi esclavos kasqankumanta kacharichiytawan, Jehovaqa sacerdotesta churarqa yupaychana toldonpi sirvinankupaj. Chantapis levitasta churarqa chay toldopi wakin ruwanasta ruwanankupaj. Chaywanpis, ¿aswan sumajtachu Jehová cuidarqa yupaychana toldopi sirvejkunata chayri chay qayllaspi tiyakojkunata? Mana. Payqa tukuyninkuta sumajta cuidarqa. Tukuy israelitas Jehovaj amigosnin kayta aterqanku. Jehovaqa yupaychana toldo patapi chhoqo phuyunta churarqa, chhoqo ninatawan. Chaytataj churarqa tukuy israelitas rikunankupaj jina (Éxo. 40:38). Chay phuyu oqharikojtintaj, tukuynin israelitas chayta rikoj kanku, karupi kajkunapis. Phuyu oqharikusqanta rikuspataj, tukuy imasninkuta qʼepichakoj kanku, toldo wasisninkuta phaskaraj kanku, tukuyninkutaj ujllapi purirej kanku (Núm. 9:15-23). Kunanpis ajinallataj: Maypi tiyakojtinchejpis Jehová munakuwanchej, cuidawanchej, jarkʼawanchejtaj. w24.06 pág. 4 párrs. 10-12

Davidqa wañuy patapi rikukorqa wawan Absalón gobiernonta qhechuyta munasqanrayku (2 Sam. 15:12, 13). Chayrayku Davidqa usqhayllata Jerusalenmanta ayqenan karqa. Kamachisnin khuskan ñanpiña kashajtinkutaj, Davidqa cuentata qokorqa Jerusalenpi pillatapis saqenan kasqanta, ajinamanta Absalón imatachus wakichishasqanta payman willananpaj. Chayrayku Sadoctawan waj sacerdotestawan Jerusalenman kuticherqa wateqamunankupaj (2 Sam. 15:27-29). Paykunataj sumajta cuidakunanku karqa. Davidqa Sadocta kachaytawanña, Husaitañataj Jerusalenman kacharqa, paykunaqa sumaj amigosnin karqanku (2 Sam. 15:32-37). Husaiqa Davidpa kamachisqanta kasuspa, Absalonwan allinpaj qhawachikorqa, paymantaj yuyaycharqa imaynatachus Davidta japʼinankuta. Chay yuyaychasqantaj Davidman tiempota qorqa maqanakupaj wakichikunanpaj. Husaiqa chay yuyaychasqanta Sadocman, Abiatarmanwan willachimorqa (2 Sam. 17:8-16). Paykunataj chayta Davidman willacherqanku, ajinamanta David mana wañuchisqa kananpaj yanapakorqanku (2 Sam. 17:21, 22). w24.07 págs. 4, 5 párrs. 9, 10

Jehovaj wakin kamachisnintaqa ñaupa juchasninkumanta sonqonku juchachallanpuni. Ichapis chay juchastaqa ruwarqanku niraj bautizakushaspa chayri bautizakuytawanña. Chaywanpis yuyarikunanchej tiyan Jehovaqa mayta munakuwasqanchejrayku Wawanta noqanchejrayku kachamusqanta, munantaj yanapachikunanchejta. Jehová niwanchej: “Jamuychej, chay imasmanta parlarinachej”, nispa. Chayta ruwajtinchejtaj, payqa niwanchej juchasninchejta qʼalata pampachananta. Maytapuni agradecekunchej Tatanchej Jehová ñaupa juchasninchejta qonqayman churapusqanmanta, allin imasta ruwasqanchejtataj ni jaykʼaj qonqapusqanmanta (Sal. 103:9, 12; Heb. 6:10). ¿Imatá ruwawaj ñaupa juchasniykimanta sonqoyki siga juchachasojtin? Imatachus kunan, aswan qhepamanpis ruwayta atisqaykipi astawan yuyay. Imatachus ñaupajta ruwasqaykitaqa mana cambiayta atiwajchu. Chaywanpis yuyayniykita churayta atiwaj imatachus kunan Jehovata jatunchanaykipaj ruwayta atisqaykipi, ima sumaj imastachus Jehová aswan qhepaman ruwananpipis. w24.10 pág. 8 párrs. 8, 9

Bibliata leeshaspa, ashkha imaspi cambiananchejta reparakojtinchej ichapis wakin kutis desanimakusunman. Kaypi tʼukurina: Uj día Bibliapi wakin versiculosta leerisunman, chaytaj parlashanman mana wakillantachu allinpaj qhawanamanta (Sant. 2:1-8). Reparakusunmantaj wakillanta allinpaj qhawashasqanchejta, chayrayku cambianata nikusunman. Qʼayantintaj waj textotañataj leerisunman, chaytaj parlashanman qallunchejta wataykukunamanta (Sant. 3:1-12). Chayta leespataj reparakusunman wakin kutis mana allin imasta nisqanchejta, nitaj kʼacha simiwanchu parlasqanchejta. Chayrayku nikusunman allin imasmanta parlananchejta, kʼacha simiwantaj parlananchejta. Qʼayantintaj leesunman mana kay mundo runaswan masichakunamanta (Sant. 4:4-12). Reparakusunmantaj ima peliculatachus, chayri ima musicatachus uyarishasqanchejta sumajta qhawarikunata. Qʼayantintaj ichapis desanimakusunman tukuy chay imaspi cambiananchej kasqanrayku. Ama desanimakunachu. Yuyarikuna “mosoj kausaywan” pʼachallikunapajqa, sapa kuti kallpachakunanchej kasqanta. w24.09 págs. 5, 6 párrs. 11, 12

Jesusqa yacharqa Jehová tukuy imata qhawamushasqanta, atienekorqataj maychus tiemponpi tukuy sajra imasta tukuchinanta. Sajra imasta ruwawajtinchejqa parlasqanchejta Jesús jina sumajta qhawarikusunman. Chay ruwawasqanchej mana gravechu kajtenqa pasachillasunman, chayri ichapis chʼinlla kasunman mana problemata jatunyaykuchinapaj (Ecl. 3:7; Sant. 1:19, 20). Wakin kutistaj ichapis parlananchejpuni kanqa. Chaytaj kanman pitapis sajra imasta ruwasqankuta rikojtinchej, chayri imapichus creesqanchejmanta cheqata parlananchej kajtin (Hech. 6:1, 2). Jinapis kallpachakunanchej tiyan llampʼu sonqowan, sonqomantapacha respetaspataj parlanapaj. Jesús jina ruwallasunmantaj ‘pichus cheqa kajman jina juzgan, chaypa makinman churakuspa’ (1 Ped. 2:23). w24.11 pág. 5 párrs. 10-12

Uj juchallikoj arrepientekun chayqa, mayta kusikunchej (Luc. 15:7). Chanta, ¿pitaj juchallikojta arrepientekunanpaj yanapan? ¿Ancianoschu? Yuyarikuna imatachus apóstol Pablo nisqanta. Pay nerqa: “Ichapis Diosqa arrepientekunankuta saqenqa”, nispa (2 Tim. 2:25). Chayrayku juchallikojpa yuyaynintaqa mana runasllachu cambiachinku, manachayqa Jehová Diosninchej. Payqa juchallikojkunata cambianankupaj yanapan. Chantá Pabloqa nerqa uj runa arrepientekojtin imaschus kasqanta: chay juchallikojqa cheqa kajta aswan allinta rejsin, yuyayninman churakun, Satanaspa trampasninmantataj ayqekun (2 Tim. 2:26). Uj juchallikoj arrepientekojtin, ancianosqa payta waturikullanqankupuni, kay imaspi yanaparinankupaj: creeyninta sinchʼiyachinanpaj, Satanaspa trampasninman mana urmananpaj, allin kajtataj ruwananpaj (Heb. 12:12, 13). w24.08 pág. 23 párrs. 14, 15

Pikunamanchus Jesús mikhucherqa chay runasqa, qʼayantin maypichus tʼantata mikhorqanku chayman kuterqanku. Jesuswan apostolesninwantaj manaña chaypichu kasharqanku. Chayrayku paykunaqa Tiberiadesmanta jamoj canoasman wicharispa, Capernaumman rerqanku Jesusta maskʼaj (Juan 6:22-24). ¿Diospa Gobiernonmanta astawan yachakuyta munaspachu chayman rerqanku? Mana. Paykunaqa Jesús watejmanta tʼantata qonallanta munasharqanku. ¿Imaraykú chayta ninchej? ¿Imataj karqa chay runas Capernaúm qayllapi Jesusta taripajtinku? Jesusqa sutʼita nerqa tʼantata watejmanta mikhuyta munasqankuraykulla payta maskʼashasqankuta. Nerqataj “tʼantata mikhuspa” sajsakusqankuta, chay tʼantataj “pʼosqoj” mikhunalla kasqanta. Chantataj nerqa: “Llankʼaychej […] wiñay kausayta qoj mikhunarayku”, nispa (Juan 6:26, 27). Chantapis nillarqataj chay mikhunataqa Tatan paykunaman qonanta. w24.12 pág. 5 párrs. 8, 9

Hermanos, uj anciano aswan sumaj yachachej kananpajqa Diospa Palabranman jinapuni yachachinan tiyan discursosta qoshaspa, uj hermanota yuyaycharishaspapis. Chantapis Bibliata, publicacionesninchejtapis sumajta estudianan tiyan (Pro. 15:28). Estudiashaspataj sumajta reparanan tiyan imatachus publicacionesninchej uj versiculomanta sutʼinchasqanta. Ajinamanta mana yuyasqanman jinallachu entiendenanpaj. Yachachishaspataj uyarejkunaj sonqonkuman chayananpaj kallpachakunan tiyan. Aswan sumaj yachachej kananpajqa unayña ancianos kajkunata tapurikunman, nisqankuman jinataj ruwanman (1 Tim. 5:17). Uj ancianoqa wakichisqa kanan tiyan hermanosta kallpachananpaj wakin kuti yuyaycharinan kajtinpis, pantasqankuta reparachinan kajtinpis. Chaytataj munakuywanpuni ruwananku tiyan. Sichus kʼachas, munakuyniyoj kanqanku, Diospa Palabranmantapunitaj yachachenqanku chayqa, sumaj yachachejkuna kanqanku, Sumaj Yachachejninchej Jesús jina ruwashasqankurayku (Mat. 11:28-30; 2 Tim. 2:24). w24.11 pág. 24 párr. 16

Jehovata jatunchanchej paymanta allinta parlaspa. Diospa kamachisnenqa invitasqa kanchej Jehová Diospaj ‘takiripunanchejpaj’, ‘sutinta jatunchananchejpaj’, “salvasqanmanta sumaj willaykunata” willananchejpaj, “naciones ukhupitaj jatun kayninmanta” willananchejpaj (Sal. 96:1-3). Chay imasta ruwaspa Tatanchej Jehovata jatunchanchej (Hech. 4:29). Jehovata jatunchallasunmantaj kapuyninchejwan. Diospa kamachisnenqa kapuyninkuwanpuni Jehovata jatunchayta yachanku (Pro. 3:9). Israelitasqa templo ruwakunanpaj, allinchakunanpajpis kapuyninkuwan yanapakorqanku (2 Rey. 12:4, 5; 1 Cró. 29:3-9). Cristoj discipulosninpis “kapuyninkuwan yanapaj kanku” payta, apostolesnintawan (Luc. 8:1-3). Ñaupa tiempomanta cristianospis hermanosninku pisichikushajtinku yanapata apacherqanku (Hech. 11:27-29). Noqanchejpis Jehovata jatunchasunman kapuyninchejmanta churaspa. w25.01 pág. 4 párr. 8; pág. 5 párr. 11

¿Imataj Corneliota yanaparqa bautizakunanpaj? Biblia nin: “Cornelioqa Diosta manchachikoj, tukuy familianpis”. “Diosmantapis mayta mañakullajpuni”, nispa (Hech. 10:2). Pedro sumaj willaykunata willajtin Corneliowan familianwanqa Cristopi creerqanku, usqhayllatataj bautizakorqanku (Hech. 10:47, 48). Cornelioqa familianwan khuska Jehovata yupaychananpaj imastachus cambianan kasqanta reparakuspa, chay ratochá cambiarqa (Jos. 24:15; Hech. 10:24, 33). Cornelioqa sumaj cargoyoj kasqanrayku, ichapis mana munanmanchu karqa cristianoman tukuyta, jinapis mana ajinachu karqa. ¿Qanpis bautizakunaykipaj ashkha cambiostarajchu kausayniykipi ruwanayki kashan? Jina kajtenqa Jehová yanapasonqa. Payqa bendecisonqa Bibliaj yuyaychaykunasninman jina kausakunaykipaj kallpachakojtiyki. w25.03 pág. 5 párrs. 12, 13

Diospa llajtanmanta, chayri ñaupajman pusaj hermanosmanta mana allin imasta parlasqankuta uyarinchej chayqa, yuyarikuna tiyan imatachus Diospa enemigosnin ruwasqankuta Jesustawan discipulosnintawan. Bibliapi nikorqa jina, runasqa Jehovaj testigosninta qhatiykachashanku, llullastataj paykunamanta parlashanku (Mat. 5:11, 12). Noqanchejqa yachanchej maymantachus chay llullas jamusqanta. Chayrayku enemigosninchejqa mana engañayta atiwasunchu, tukuy imatataj ruwasun jarkʼakunanchejpaj. Llulla cuentosta qhesachana. Apóstol Pabloqa sutʼita niwarqanchej imatachus ruwananchejta llulla cuentosta uyarejtinchej. 1 Timoteo 1:3, 4 versiculospi nin: “Amataj uyarichunkuchu llulla cuentosta”, nispa. Timoteomantaj kayta yuyaycharerqa: “Diospa contranpi kashan chay llulla cuentosta qhesachay”, nispa. Noqanchejpis llulla cuentos maymantachus jamusqanta yachasqanchejrayku mana uyarillanchejchu, “cheqa yachachiykunamanta” imasllata uyarinchej (2 Tim. 1:13). w24.04 pág. 11 párr. 16; pág. 13 párr. 17

Hermanosninchejman ujchasqa kana. Diosqa munan tukuyninchej ujchasqa payta yupaychananchejta. Chaypajtaj cheqa kajmanta chʼipakunanchej tiyan. Cheqa kajmanta karunchakojkunaqa congregacionpi hermanosta tʼaqanachinku. Chayrayku Diosninchejqa niwanchej ama paykunawan masichakunanchejta, ama cheqa kajmanta karunchachinawanchejpaj (Rom. 16:17). Sichus reparayta yachasun mayqenchus cheqa kaj kasqanta, chaymantataj chʼipakusun chayqa, mana Jehovamanta karunchakusunchu, creeyninchejtaj sinchʼillapuni kanqa (Efe. 4:15, 16). Chantapis mana Satanaspa llulla yachachiykunasninwan engañachikusunchu, ajinamantataj manchay ñakʼariy tiempopi Jehová jarkʼawasun. Chayrayku cheqa kajmanta sinchʼita chʼipakuna, “sonqo tiyaykuyta qoj Diostaj” noqanchejwan kanqa (Fili. 4:8, 9). w24.07 pág. 13 párrs. 16, 17

Jesusqa juchasapas kasqankumanta llakikojkunata khuyakoj, qhepanta rinankutataj nej. Payqa yacharqa jucharayku tukuy runas sufrisqanchejta. Chayrayku payqa juchasapas jina rejsisqa kajkunata astawan yanapaj. Jesusqa nerqa: “Sano runasqa mana doctorta necesitankuchu, onqosqaslla necesitanku”, nispa. Chantá nillarqataj: “Noqaqa mana cheqan runastachu wajyaj jamuni, manachayqa juchasapasta”, nispa (Mat. 9:12, 13). Chay nisqanman jinapuni Jesús ruwarqa. Uj pacha, uj warmi waqayninwan Jesuspa chakisninta mayllarqa, Jesustaj juchasninta may khuyakuywan perdonarqa (Luc. 7:37-50). Samaritana warmimanpis allin imasta yachacherqa, mana allin kausayniyoj kasqanta yachaspapis (Juan 4:7, 17-19, 25, 26). Diosqa Jesusman atiyta qorqa juchamanta rikhurej wañuyta atipananpaj. ¿Imaynatá Jesús chayta ruwarqa? Qharista, warmista, wawasta kausarichispa (Mat. 11:5). w24.08 pág. 4 párrs. 9, 10

¿Imaynatá Jehová tumpamantawan sutinta jatunchanqa? Justiciata ruwaspa. Tumpamantawan Jatun Babiloniata chinkachenqa santo sutinta chʼichichasqanrayku (Apo. 17:5, 16; 19:1, 2). Llulla religiones chinkachisqa kasqankuta rikojkunamanta wakenqa ichapis noqanchejwan khuska Jehovata yupaychayta munanqanku. Chaymantataj Armagedonpi Jehovaqa Satanaspa rikhurichisqan imasta chinkachenqa. Pikunachus payta chejnikunku, sutintapis chʼichichanku chaykunata chinkachenqa. Payta munakojkunata, kasukojkunata, sutintataj jatunchayta munajkunata salvanqa (Mar. 8:38; 2 Tes. 1:6-10). Cristo waranqa watasta kamachisqantawan, qhepa kaj prueba tukukusqantawan, Jehovaqa sutinta llimphuchayta tukuchanqa (Apo. 20:7-10). Chaypachataj “jallpʼaqa Jehová Diospa jatun kayninta rejsiywan juntʼa kanqa, imaynatachus mar qochaman yaku juntʼaykun ajinata” (Hab. 2:14). May sumajpuni kanqa tukuypis Jehovallata jatunchajtinku, sutin jatunchanapaj jina kasqanrayku. w25.01 pág. 7 párrs. 15, 16

¿Imataj hebreo cristianosta yanapanman karqa qhatiykachasqa kayta aguantanankupaj? Apóstol Pabloqa paykunaman entiendechiyta munarqa aguantasqankoqa mana qhasipajchu kasqanta. Chayrayku nerqa Diosqa llakiykunapi rikukunankuta saqesqanta, aswan sumaj cristianosman tukunankupaj. Paykunaqa reparananku karqa pruebasqa wakin kʼacha kaykunata yachakunankupaj yanapananta, chayri chaykunata aswan sumajta kausayninkupi rikuchinankupaj. Pruebas ajinata yanapasqanpi tʼukurejtinkoqa, aswan facilta chay pruebasta aguantayta atinkuman karqa (Heb. 12:11). Pabloqa chay cristianosta kallpacharqa aguantanallankupajpuni, nitaj saykʼupunankupaj. Payqa yacharqa imaraykuchus chayta yuyaychasqanta. Niraj cristiano kashaspa Pabloqa cristianosta qhatiykacharqa, yacharqataj imayna sinchʼitachus qhatiykachasqa kasqankuta. Cristianoman tukojtinñataj paypis qhatiykachasqallataj karqa, tukuy imasta payta ruwasqankurayku (2 Cor. 11:23-25). w24.09 pág. 12 párrs. 16, 17

Días pasasqanman jina aswan usqhayllata willamuna tiyan. ¿Imaraykú chayta ninchej? Imaraykuchus tiempoqa sapa kuti aswan pisillaña. Marcos 13:10 versiculopi qhepa pʼunchaykunapi willakunanmanta imatachus Jesús nisqanpi piensarina. Mateopis Jesús chayta nisqanmanta qhelqallarqataj. Mateo qhelqasqanman jina Jesús nerqa sumaj willaykunaqa niraj ‘tukukuy’ chayamushajtin jallpʼantinpi willakunanta (Mat. 24:14). ‘Tukukuy’ nispaqa Satanaspa sajra mundon wiñaypaj tukuchisqa kananmanta parlasharqa. Jehovaqa yachanña ima diachus, ima horachus paypa nisqan juntʼakunanta (Mat. 24:36; Hech. 1:7). Sapa día pasasqanman jina, tukukoyqa aswan qayllitapiña kashan (Rom. 13:11). Tukukuy chayamunankamataj predicanallapuni tiyan. Tukuy kayta tapurikunanchej tiyan: ¿Imaraykutaj sumaj willaykunata willanchej? Munakuyniyoj kasqanchejrayku. Runasman willamuspaqa sumaj willaykunata, runastapis munakusqanchejta rikuchinchej. Chantapis astawanqa Jehovata, sutintawan munakusqanchejta rikuchinchej. w24.05 págs. 14, 15 párrs. 2, 3

Tatas, wawasniykichejta yanapariychej Jehovaj ruwasqasninpi tʼukurinankupaj. Campopi pasearishaspa chayri jallpʼata llankʼashaspa, reparachiychej ashkha imasqa kikin formitayoj kasqanta. Ajina ruwasqa kasqanqa sutʼita reparachiwanchej pichus chayta ruwajqa sumaj yachayniyoj, sumaj yuyayniyojtaj kasqanta. Cientificosqa ashkha watasta chʼuwisqeta jina formitayoj imasta mayta estudiarqanku. Biofísico Nicola Fameli nin chay chʼuwisqeta jina kaj imas mashkha muyitusniyojchus kasqankuta yupajtinchej, numerosnenqa kikillanpuni llojsisqanta. Chay numerostaqa sutichanku sucesión de Fibonacci nispa. Chay jina formitastaj rikhurin wakin galaxiaspi, chʼuruspi, wakin plantaspa hojasninpi, girasol tʼikapi, waj imaspiwan. w24.12 pág. 16 párr. 7

Moisespa, Davidpa, Juanpa kausayninkupis mana kausayninchej jinachu karqa, waj jina tiempospi kausakusqankurayku. Jinapis ashkha imaspi paykunaman rijchʼakunchej. Paykunaqa noqanchej jinallataj cheqa Diosta yupaycharqanku. Noqanchejpis paykuna jinallataj Jehovamanta mañakunchej, paypi atienekunchej, yanapaynintataj maskʼanchej. Chantapis paykuna jinallataj mana iskayrayanchejchu Jehová payta kasukojkunata mayta bendecisqanmanta. Noqanchejpis paykunaj yuyaychasqankuta sumajta uyarina, Jehovaj kamachiykunasnintataj kasukuna. Ajinamanta allin riwasunchej tukuy ima ruwasqanchejpi. “Unayta” kausakusunchej, nisunman wiñaypaj. Chantapis mayta kusikusunchej Tatanchej Jehovata kusichisqanchejta yachaspa. Payqa tukuy nisqasninta juntʼanpuni. Qhepamantaj tʼukunapaj jina may sumaj bendicionesta qowasun (Efe. 3:20). w24.11 pág. 13 párrs. 20, 21

Ñaupa cristianospa tiemponkupeqa, wakin hermanosta siervos ministerialesta jina churaj kanku (1 Tim. 3:8). Paykunamantasina apóstol Pablo parlarqa ‘yanapajkuna’ nispa. Paykunasina wakin ruwaykunaspi yanapakoj kanku, ajinamanta ancianosqa yachachispa, hermanosta waturispa ima kanankupaj. Siervos ministerialesqa ichapis Diospa Palabranta copiaspa yanapakoj kanku, chayri chaykunata copianapaj imatachus necesitakusqanta rantispa. Kay tiempopirí, ¿imasta ruwaspataj congregacionespi siervos ministeriales yanapakunku? (1 Ped. 4:10). Wakenqa yanapakunku congregacionpi cuentasta ruwaspa, territoriosta ruwaspa, publicacionesta mañaspa, chaykunatataj hermanosman jaywaspa, audio y videopi yanapakuspa, acomodadores kaspa, Tantakuna Wasita mantenimientota ruwaspa ima. Chay tukuy imastaqa ruwakunanpuni tiyan congregación sumaj kananpaj (1 Cor. 14:40). w24.10 pág. 19 párrs. 4, 5

Amapuni qonqakunachu Jehová kausaj Dios kasqanta, yanapanawanchejpajtaj chaypipuni kashasqanta. Ajinamanta ima pruebatapis, jatunpis juchʼuypis kachun, aguantayta atillasun. Payqa Tukuy Atiyniyoj kasqanrayku, imata aguantanapajpis kallpata qoyta atiwanchej. Chayrayku sutʼita yachanchej ima pruebatapis aguantayta atisqanchejtapuni. Juchʼuy pruebaspi rikukojtinchej imaynatachus Jehová yanapawasqanchejta rikuspaqa, sutʼita yachanchej jatun pruebaspi rikukojtinchejpis yanapanallawanchejtataj. Rey Davidtaqa kausayninpi iskay imaspi rikukusqan yanaparqa Jehovapi astawan atienekunanpaj. David jovenllaraj kashajtin, tatanpa ovejasnintataj michishajtin, uj león, uj ovejata apakaporqa, waj kutipitaj uj jukumariñataj uj ovejata apakaporqa. Chay iskaynin kutispi Davidqa mana manchachikuspa, leontapis jukumaritapis qhatiykuspa japʼimorqa, ovejasnintataj siminkumanta qhechukanporqa. Chaywanpis Davidqa mana yuyarqachu kallpallanwan chayta ruwasqanta, manachayqa yacharqa Jehovaj yanapaynillanwan chayta ruwasqanta (1 Sam. 17:34-37). Chay kutispi imaynatachus Dios yanapasqanpi tʼukurisqanrayku, Davidqa mana iskayrayarqachu aswan qhepamanpis kausaj Dios yanapananmanta. w24.06 pág. 21 párrs. 5, 6

Uj fiestitaman wajyarisojtinku, ¿rillawajchu? Chay fiestitata ruwachejta mana allinta rejsejtiyki chayri imatachus chaypi ruwachinanta mana yachajtiyki, kay imasta tapuriy: “¿Maypitaj, chanta maykʼajtaj ruwakonqa? ¿Mashkha runastaj renqanku? ¿Pitaj cargoyoj kanqa? ¿Pikuná renqanku? ¿Imastaj chay fiestitapi ruwakonqa? ¿Machana ujyanas kanqachu?”. Chay imasta yachayqa allinta ajllanaykipaj yanapasonqa. Tukuy imata allinta yachaspaña sumajta tanteariy. Sichus yachanki chay fiestitaman Jehovata mana kasukojkuna rinankuta, chayri machanasta ujyanata ni pi controlananta chayqa, ¿chay fiestita ‘millay fiestamanchu’ tukunman? (1 Ped. 4:3). Chay tukuy imasta tanteareyqa allinta ajllanaykipaj yanapasonqa. w25.01 pág. 15 párrs. 4, 5

Bibliapi wakin kikinchaykunata qhawarina, chaykuna yanapawasun aswan sumajta entiendenapaj imaynatachus Jehová Jesuspa wañuyninmanta valekuspa arrepientekojkunaj juchasninkuta qʼalata chinkachisqanta. Ima ropallatapis manchay pukawan pintaykojtinchej mana chayta orqhoyta atillanchejchu. Jehovaqa chay kikinchaywan entiendechiwanchej juchasninchejta qʼalatapuni chinkachisqanta. Juchasqa “manus” jina kanku (Mat. 6:12; Luc. 11:4). Chayrayku Jehovaj contranta sapa juchallikuspa, sapa kuti aswan manu rikhurishanchej. Chaywanpis Jehovaqa juchasninchejta perdonaspa, may chhika manunchejtapis perdonapuwasunman jina ruwan. Chayraykutaj manaña payman manuchu kanchej. Arí, Jehová juchasninchejta perdonawanchej chayqa, manaña chaymanta uj manuta jina cobrawanchejchu. Chay jinata Jehová perdonawasqanchejta yachayqa mayta sonqochawanchej. w25.02 pág. 10 párrs. 9, 10

Ichapis tatasqa machuyaspa wawasninku qolqesituwan chayri waj imaswan yanaparinankuta necesitankuman. Ashkha wawastaj tukuy sonqo chayta ruwanku (1 Tim. 5:4). Jinapis Jehovapi atienekoj tatasqa mayta kusikunku wawasninkuta Jehovata sirvinankupaj yanapajtinku, manataj machuyayninkupi cuidanankupaj qolqeta ganayta yachachejtinkuchu (3 Juan 4). Tatas, wawasniykichejta trabajayta yachachishaspa ruwasqaykichejwan rikuchiychej Jehovapi atienekusqaykichejta. Juchʼuymantapacha sumaj trabajadores kayta yachachiychej (Pro. 29:21; Efe. 4:28). Wiñasqankuman jina escuelapi mana qhellakuspa sumajta estudianankupaj yanapaychej. Publicacionesninchejpi Bibliaj yuyaychaykunasninta maskʼaychej. Chaywantaj wawasniykichejta yanapaychej imatachus estudianankuta allin yuyaywan ajllanankupaj. Tatasqa wawasninkuta yanapananku tiyan predicayta atinankupaj jina, precursorespis kayta atinankupaj jina trabajota tarinankupaj. w25.03 págs. 30, 31 párrs. 15, 16

Isaías 65 capitulopi, Jehová willarqa kay tiempopi uj paraisopi jina kausakuy imaynachus kananta. Chay profeciaqa ñaupaj kutirayku 537 watapi juntʼakorqa Jesús niraj jamushajtin. Chay tiempopi, arrepientekoj judiosqa kacharichisqa karqanku Babiloniamanta, jallpʼankumantaj kutiporqanku. Jerusalenqa qʼala thuñisqa kasharqa. Jehovataj llajtanta bendicerqa, yanaparqataj watejmanta sayarichinankupaj. Ajinamanta uj kʼachitu llajtaman watejmanta tukucherqanku. Chantapis templota watejmanta sayaricherqanku, Israelpi watejmanta Jehovallata yupaychanankupaj (Isa. 51:11; Zac. 8:3). Isaiaspa nisqanqa 1919 watapi juntʼakuyta qallarillarqataj, chay karqa iskay kaj juntʼakuynin. Chay watapi Jehovaj kamachisnenqa Jatun Babiloniamanta kacharichisqa karqanku. Chay kutimantapacha chay paraisonchejqa jallpʼantinman chayashan. Diospa Gobiernonmanta sonqo kʼajaywan willajkunaqa, ashkha congregacionesta rikhuricherqanku. Ñaupajtaqa may chhika qharis, warmis ima sajra runas karqanku, khuchi kausayniyoj karqanku, Jehovata rejsispataj cambiarqanku, “mosoj runa kaywantaj” pʼachallikorqanku, “mayqenchus Diospa munayninman jina ruwasqa karqa chaywan”. w24.04 págs. 20, 21 párrs. 3, 4

Wakin lugarespeqa uj solterojta tatasnin chayri waj familiaresnin ajllapunku piwanchus casarakunanta. Waj lugarespitaj familiaresninku chayri amigosninku parejata maskʼapunku. Maskʼapuytawantaj paykunata rejsinachinku, noviayta munasqankutachus manachus qhawarinankupaj. Chaykunamanta mayqellantapis ruwana kajtenqa, imachus iskayninkupaj allin kasqanta, imatachus necesitasqankutapis qhawarina. Sichus amigonchejpaj chayri familiarninchejpaj allin parejata tarisqanchejtaña yuyanchej chayqa, imaynachus kasqanta rejsinapaj kallpachakuna, astawanqa Jehovata munakusqantachus manachus yachanapaj. Jehovata munakusqan aswan sumaj qolqemanta nisqa, profesionniyoj kananmanta chayri rejsisqa kananmanta nisqa. Jinapis kayta ama qonqanachu: Casarakunankutachus manachus sapa ujninku ajllakunanku tiyan. w24.05 pág. 23 párr. 11

Noviosta yanaparinapajqa sumajta qhawarikunanchej tiyan imatachus nisqanchejta, imatachus mana nisqanchejtapis. Wakin kuteqa qallunchejta wataykukunanchej tiyan (Pro. 12:18). Ichapis chay rato tukuyman willarayta munasunman noviashasqankuta, noviostajrí paykuna kikin willariyta munankuman. Ama paykunamanta wajkunaman parlaspa purinachu, nitaj imata ruwasqankumantapis qhawaranachu (Pro. 20:19; Rom. 14:10; 1 Tes. 4:11). Ama imatapis ninachu, nitaj imatapis tapunachu casarakunankupuni kasqanta yuyachinapaj jinaqa. Uj pareja noviayta tukuchapunku chayqa, ama yachaytapuni munanachu imaraykuchus manaña noviashasqankuta, nitaj ni mayqenman kutikunachu (1 Ped. 4:15).Uj pareja noviayta tukuchapunku chayqa, mana niyta munanchu noviasqankupi mana allinchu risqanta, mana ajinapunichu kanman. Astawanpis noviasqankoqa sumajta ajllanankupaj yanaparqa. Pero allinta ajllajtinkupis sonqonkoqa nananqapuni. Chayrayku yanaparinapaj wakichisqapuni kana. w24.05 pág. 31 párrs. 15, 16

Uj familiarninchej chayri uj amigonchej Jehovamanta karunchakojtin, sonqonchej maytapuni nanawanchej (Sal. 78:40). Paywan may ujchasqas karqanchej chaytaj, aswan sinchʼitaraj nanawasunman. Chay kutispi Sadocpa kausaynin mayta yanapawasunman. Rey David wañupunanpaj jinaña kasharqa. Wawan Adoniastaj gobiernonta qhechuyta munarqa. Jehovatajrí munarqa wawan Salomón rey kananta (1 Cró. 22:9, 10). Chaypacha Sadocqa Jehovamanta mana karunchakorqachu, amigon Abiatartaj Adoniasman sayakorqa (1 Rey. 1:5-8). Ajinamanta Abiatarqa Davidta, Sadocta, Jehovatapis wasancharqa. Sadocwan Abiatarwanqa ashkha watastaña sacerdotes jina khuska llankʼarqanku (2 Sam. 8:17; 15:29; 19:11-14). w24.07 pág. 6 párrs. 14, 15

Juchaman mana urmananchejpaj kallpachakusqanchejqa, mana qhasichu. “Uj tiempollata kusikuspa juchapi” pureyqa, ni imapi kikinchakunchu Jehovaj kamachiykunasninta kasukuspa kusisqa kausakuywan (Heb. 11:25; Sal. 19:8). Noqanchejqa ruwasqa kanchej Diospa munayninta ruwanapaj (Gén. 1:27). Ajinallamanta llimphu sonqoyoj kasun, wiñaypajtaj kausakuyta atisun (1 Tim. 6:12; 2 Tim. 1:3; Jud. 20, 21). Allin kajta ruwayta munanchej chaypis, ‘cuerponchej’ mana chaypaj jinachu (Mat. 26:41). Jinapis chayqa mana niyta munanchu mana kallpachakuyta atisqanchejta. Jehová noqanchejwanpuni kanqa atiyninwan yanapanawanchejpaj (2 Cor. 4:7). “Sumaj ateyqa Diosmanta” jamun. Dios chay atiyta qowajtinchejpis, sapa día kallpachakunanchej tiyan mana juchaman urmanapaj. Jehovaqa mañakusqanchejman jina kallpata qowasunchej (1 Cor. 10:13). Jehovaj yanapayninwanqa rijchʼarisqallapuni kasun, manataj juchaman urmasunchu. w24.07 pág. 19 párrs. 19-21

Timoteoqa ancianollataj karqa, apóstol Pablotaj kay diapaj versiculopi nisqanman jina payman nerqa juchallikojkunata “tukuypa ñaupaqenpi kʼamiy” nispa. “Tukuypa ñaupaqenpi” nispa, ¿pikunamantataj parlasharqa? Mana tukuynin congregacionmantapunichu, manachayqa chay juchata yacharqankuña chaykunallamanta. Chaytataj ichapis yacharqanku paykunapuni rikusqankurayku, chayri juchallikoj willasqanrayku. Chayrayku ancianosqa chayta yachajkunallaman willarenqanku chay juchallikojta yanapasqankutaña, cheqanchasqankutañataj. Wakin kutisqa uj hermanoj juchanta congregacionmanta ashkhasña yachankuman, chayri aswan qhepaman yachankuman. Ajina kajtenqa, Pablo “tukuypa ñaupaqenpi” nisqanqa, tukuynin congregación kanman. Chayrayku uj anciano tukuy congregacionman willanqa juchallikoj kʼamisqa kasqanta. ¿Imapajtaj willanqa? Pablo nerqa jina, “wajkunapis manchachikunankupaj”, nitaj jatun juchapi urmanankupaj. w24.08 pág. 24 párrs. 16, 17

Jehovata tukukuykama tukuy sonqo sirvinanchej tiyan. Ajllasqa cristianosqa tukukuykama rijchʼarisqasllapuni kananku tiyan Diospa Gobiernonman apasqa kanankupaj (Mat. 24:40). Paykunaqa tukuy sonqowan suyakushanku Jesuswan khuska cielopi ‘tantakonqanku’ chay pʼunchay chayamunanta. Armagedón maqanakuy pasaytataj Jesuspa novian kanqanku, paywantaj casarakonqanku. Chaytaj kanqa ‘Corderoj casamienton’ (2 Tes. 2:1). Pisi tiempollaña faltan Jesús runasta juzgananpaj, nitaj chayta manchachikunanchejchu tiyan. Sichus munakuyniyoj Tatanchejta tukuy sonqo kasukusunchej chayqa, payqa ‘sumaj atiyta’ qowasunchej Jesuspa ‘ñaupaqenpi sayayta atinanchejpaj’ (2 Cor. 4:7; Luc. 21:36). Chayrayku cielopi chayri kay jallpʼapi kausakuyta suyakuspapis, imamantachus Jesús kikinchaykunasninpi sumajta qhawarikunata niwasqanchejta kasukuna. Sichus chayta ruwasun chayqa, Tatanchej Jehová allinpaj qhawawasun, jatun khuyakuyninraykutaj sutinchejqa ‘kausay libropi’ qhelqasqa kanqa (Dan. 12:1; Apo. 3:5). w24.09 págs. 24, 25 párrs. 19, 20

¿Imaynamantá sonqo tiyayta tariyta atisunman? Ñaupajtaqa piensarina ima allin imaschus kapuwasqanchejpi, Jehová mayta bendeciwasqanchejpipis. Jehovata mana sirvejkunajtataj mana chay imas kapunchu. Paykunajtaqa tiyapun imaschus kay mundopi kaj imaslla, nitaj ima suyakuyniyojpischu kanku. Noqanchejmantaj Jehovaqa qhepaman may sumaj imasta qonawanchejta niwanchej (Sal. 145:16). Waj imasta kausayninchejpi ajllasunman karqa chay, ¿aswan allinchu riwasunman karqa? Chaytaqa mana yachayta atisunmanchu. Jinapis kayta yachanchej: Jehovata, runa masinchejtapis munakusqanchejrayku imatapis ruwanchej chayqa, aswan kusisqaspuni kasun, nitaj imapis pisiwasunchu. w24.10 pág. 27 párrs. 12, 13