Junio

Cristoj wañuynenqa yanapashawanchejña. Jesús wañusqanrayku Jehovaqa juchasninchejta perdonawanchej. Jinapis mana obligasqa jinachu perdonawanchej, manaqa perdonayta munawasqanchejrayku (Sal. 103:3, 10-13). Wakenqa yuyanku Jehová mana perdonananpaj jina kasqankuta. Ama qonqanachu, tukuyninchejpis mana perdonanapaj jinachu kanchej. Apóstol Pablo nerqa: “Manataj apóstol nisqa kanaypaj jinachu kani”, nispa. Chantá nillarqataj: “Diospa jatun khuyakuyninrayku apóstol kani”, nispa (1 Cor. 15:9, 10). Juchasninchejmanta pesachikojtinchej Jehová perdonawanchej. ¿Imajtin? Mana perdonanapaj jina kasqanchejraykuchu, manachayqa munakuwasqanchejrayku. Chayrayku Jehová mana perdonanawanchejpaj jina kasqanchejta yuyaspaqa, yuyarikuna Jehovaqa Wawanta qosqanta juchasapa runaspaj, juchasninkumanta arrepientekojkunapaj, manataj mana pantaj runaspajchu (Luc. 5:32; 1 Tim. 1:15). w25.01 pág. 27 párrs. 3, 4

Mana noqanchejchu cuentayoj kanchej imatachus wajkuna ruwasqankumanta chayri nisqankumanta. Jinapis noqanchej cuentayoj kanchej imatachus chay kutispi ruwananchejmanta. Pillapis sonqonchejta nanachiwajtinchej, ¿imata ruwaytaj aswan allin? Perdonay. ¿Imarayku? Jehovata munakusqanchejrayku. Payqa munan wajkunata perdonananchejta. Chantapis phiñasqallapuni kasun chayqa, nitaj perdonasunchu chayqa, ichá imatapis sonso jina ruwasun, chayri ichá chayqa onqoykuchiwasun (Pro. 14:17, 29, 30). Mana phiñasqallapunichu kajtinchejqa, sonqonchej manaña phiñakuywan juntʼachu. Chantapis chayqa allinninchejpaj, siga ñaupajman rinchej, watejmantataj kusisqa kausakunchej. ¿Imatá ruwasunman mana phiñasqallapunichu kanapaj? Ñaupajtaqa tiempo pasananta saqena. Uj runa sinchʼita accidentakusqanpi piensarina. Doctor jampisqantawan, tiempo pasanan tiyan sanoyapunanpaj. Noqanchejpis sonqonchej sanoyananpaj tiempo pasananta necesitanchej, ajinamanta sonqomantapacha perdonanapaj wakichisqas kasunchej (Ecl. 3:3; 1 Ped. 1:22). Chantaqa Jehovamanta mañakuna perdonanapaj yanapanawanchejta. w25.02 págs. 16, 17 párrs. 8-11

‘Cristomanta qallariy yachachiykunamanta’ wakenqa kanku arrepientekuy, creey, bautismo, kausarimuy ima (Heb. 6:1, 2). Chay yachachiykunataqa tukuy cristianos rejsinanchej tiyan. Chayrayku apóstol Pedroqa Pentecostés Fiestapi ashkha runasman predicashaspa chaymanta parlarqa (Hech. 2:32-35, 38). Cristoj discipulosnin kayta munanchej chayqa, chay yachachiykunata japʼikunanchejpuni tiyan. Pabloqa nerqa kausarimuy kananpi mana creespaqa, mana cheqa cristianoschu kasqanchejta (1 Cor. 15:12-14). Chayrayku wiñay tukusqa cristiano kanapajqa, mana qallariy yachachiykunasllawanchu qhepakunanchej tiyan. Mana qallariy yachachiykunallachu kapuwanchej, waj yachachiykunapis kapullawanchejtaj, chaytaj khamuna mikhuna jina. Chay mikhunaqa mana Jehovaj leyesnillanchu, manachayqa yuyaychaykunasninpis. Chaytaj yanapawanchej imaynatachus Diosninchej yuyasqanta entiendenapaj. Chaywan yanapachikunapajtaj Bibliata estudiananchej tiyan, chaypitaj tʼukurinanchej tiyan, kallpachakunanchejtaj tiyan yachakusqanchejman jina ruwanapaj. Ajinamanta Jehovata kusichinapaj jinapuni imatapis ajllayta yachakusun. w24.04 pág. 5 párrs. 12, 13

Diosqa Jonasman yuyaricherqa ninivitasqa ‘mana yachasqankuta imachus allin, imatajchus mana allin kasqanta’ (Jon. 1:1, 2; 3:10; 4:9-11). Aswan qhepamantaj Jesusqa Jehovaj cheqan kayninmanta, khuyakuyninmantawan yachachinanpaj ninivitas arrepientekusqankumanta parlarqa. ¿Ima ‘Juicio Pʼunchaypitaj’ ninivitas kausarimonqanku? Jesusqa nerqa sajra imasta ruwajkuna “juzgasqa kanankupaj” kausarimunankuta, chaytaj aswan qhepaman kanqa (Juan 5:29). Jesusqa waranqa watasta kamachinan tiempomanta parlasharqa. Chay tiempopi “cheqan runasta, mana cheqan runastapis” Dios kausarichimonqa (Hech. 24:15). Mana cheqan runasqa “juzgasqa kanankupaj” kausarimonqanku. Chaypacha Jehovawan Jesuswanqa ruwasqankuta qhawanqanku, kasukusqankutachus manachus reparanankupaj, yachakusqankuman jinachus manachus ruwasqankutapis. Uj ninivita kausarimojtin Jehovata mana yupaychayta munanqachu chayqa, Jehovaqa mana saqenqachu kausanallantapuni (Isa. 65:20). Chaywanpis Jehovata kasukuyta ajllanqa chayqa, wiñaypaj kausayta atenqa (Dan. 12:2). w24.05 pág. 5 párrs. 13, 14

Jesusqa Tatan jinapuni runasta khuyakoj (Juan 14:9). Jesusqa parlasqanwan ruwasqanwanpis rikucherqa Jehová munakuwasqanchejta, mayta khuyakuwasqanchejta, juchata atipananchejpajtaj yanapayta munawasqanchejta. Jesusqa juchasapasta yanapaj cambiayta munanankupaj, qhepantataj riyta munanankupaj (Luc. 5:27, 28). Jesusqa sumajta yacharqa imachus paywan kananta. Chayrayku ashkha kutispi discipulosninman nerqa wasanchasqa kananta, rakhu kʼaspipitaj wañuchisqa kananta (Mat. 17:22; 20:18, 19). Chantapis yachallarqataj wañuynenqa tukuy runaspa juchanta chinkachinanta. Chantapis nerqa wañuchisqa kasqantawan ‘tukuy laya runasta payman pusamunanta’ (Juan 12:32). Juchasapa runasqa Jehovata kusichiyta atinku Jesuspi creespa, pay jinataj ruwaspa. Ajinamanta paykunaqa “juchamanta kacharichisqa” kayta atinku (Rom. 6:14, 18, 22; Juan 8:32). Chay kananpajtaj Jesusqa mana manchachikuspa, mayta ñakʼarispataj kausayninta qorqa (Juan 10:17, 18). w24.08 pág. 5 párrs. 11, 12

Bibliata estudiashaspa imayna kusisqachus kashasqaykipi piensariy. Chaypeqa yachakorqanki Jehová munakususqanta, llajtanwan khuska payta yupaychanaykita munasqanta, nanaytapis llakiykunatapis chinkachisaj nisqanta, mosoj jallpʼapitaj munasqa familiaresniykita, amigosniykitapis kausarichimunanta (Mar. 10:29, 30; Juan 5:28, 29; Rom. 8:38, 39; Apo. 21:3, 4). Tukuy chay yachakusqaykitaj sonqoykiman chayarqa (Luc. 24:32). Ajinamanta chay sumaj imasta yachakusqaykitaqa munakuyta qallarerqanki, tukuy runasmantaj chayta willariyta munarqanki (Jeremías 20:9 versiculowan kikinchay). Sichus sonqonchejpi Bibliaj yachachiykunasninta mayta munakusun chayqa, siminchejqa chaymanta parlanqa (Luc. 6:45). Noqanchejpis ñaupa tiempomanta discípulos jinallataj ninchej: “Mana chʼinlla kayta atiykumanchu, willanaykupuni tiyan imastachus rikusqaykuta, uyarisqaykutapis”, nispa (Hech. 4:20). Noqanchejqa maytapuni cheqa kajta munakunchej. Chayraykutaj tukuy runasman chayta willariyta munanchej. w24.05 pág. 15 párr. 5; pág. 16 párr. 7

Jehovaj kamachisnenqa Tatanchej Jehovata munakusqanchejrayku, runas payta rejsinankuta munasqanchejrayku predicanchej. Wakintajrí mana atillankuchu kusiywan predicayta. ¿Imarayku? Wakenqa ancha manchalis kasqankurayku mana sumajtachu yachachisqankuta yuyanku. Wakintaj mana rejsisqa runaswan parlariyta mana atillankuchu. Wakintaj yuyanku runas mana uyarinankuta. Wakintajrí ichá wawitamantapacha yachakorqanku mana phiñanakusta rikhurichinankuchu kasqanta. Tukuy chay hermanosninchejqa mana atillankuchu sumaj willaykunata mana rejsisqasman willariyta. Noqanchejrí, ¿predicaspa kusisqachu kanchej? Wakin kuti mana kusisqachu kanchej chayqa, ama desanimakunachu. Mana predicayta atisqanchejta yuyaspaqa, kʼumuykukoj sonqo kasqanchejta rikuchishasunman. Ichapis mana munanchejchu runaswan qhawachikuyta, nitaj chʼajwasta rikhurichiytapis. Chantapis ni piman gustawanchejchu runas mana uyarinawanchejqa, astawanraj yanaparillayta munasqanchejrayku. Tatanchej Jehovaqa sumajta yachan imaspichus rikukusqanchejta, yanapariytataj munawanchej (Isa. 41:13). w24.04 pág. 14 párrs. 1, 2

Bibliata leeshaspaqa mana ujllapi tukuy imata ruwayta munanachu, astawanqa kallpachakuna pisimanta pisi leesqanchejman jina ruwanapaj. Kayta ruwasunman: Imaspichus kallpachakunanchej kasqanmanta uj listata ruwakusunman. Chaykunamanta ujta chayri iskayta ajllakusunman, chaytaraj ñaupajta ruwanapaj, chay ujkunatataj aswan qhepaman ruwasunman. ¿Imaynatá ajllasunman mayqentarajchus ñaupajta ruwanata? Chay listanchejmanta ñaupajta ajllasunman aswan fácil kajta, chayri mayqenpichus astawan kallpachakunanchej kasqanta. Mayqenmantachus qallarinanchejta ajllanchejña chayqa, publicacionesninchejpi yachaqanasta maskʼasunman. Jehovamanta mañakuna ‘kallpachanawanchejta ruwayta munananchejpaj, ruwayta atinanchejpajtaj’ (Fili. 2:13). Chantá yachakusqanchejman jina ruwana. Imatachus ruwanata nikusqanchejta ruwasqanchejman jina, waj imaspiwan kallpachakuyta munasun. Imaspichus cambiasqanchejqa, anotakusqanchej listamanta waj imaspiwan cambianapaj yanapawasunman. w24.09 págs. 6, 7 párrs. 13, 14

Ñaupajta imastachus ruwasqaykeqa ichapis wajkunata ñakʼaricherqa, chayraykutaj ichapis sonqoyki juchachasunki. Jina kajtin, ¿imatá ruwawaj? Tukuy sonqo perdonta mañakuy, tukuy atisqaykitataj ruway chayta allinchanaykipaj. Pikunatachus ñakʼaricherqanki chaykunapaj Jehovamanta mañapuy. Jehovaqa qanta, paykunatapis yanapasunkichejman ñaupajllamanpuni rinaykichejpaj, watejmantataj sonqo tiyasqa kanaykichejpaj. Pantasqasniykimanta yachakuy, Jehovaj makinmantaj churakuy paypa munasqanta ruwanaykipaj. Profeta Jonasmanta yuyarikuy. Payqa Jehová kamachisqanman jina Niniveman rinanmantaqa waj ladoman ayqekorqa. Jehová cheqanchajtintaj, Jonasqa pantasqanmanta yachakorqa (Jon. 1:1-4, 15-17; 2:7-10). Jehovaqa mana yuyarqachu Jonás niña paypaj llankʼayta atisqanta. Astawanqa watejmanta Niniveman kacharqa. Jonastaj Jehovata kasukuspa rerqapacha. Imatachus ñaupajta ruwasqanmanta sonqon juchachajtinpis, mana yuyarqachu niña Jehovapaj llankʼayta atisqanta. Astawanpis kamachisqanman jina ruwarqa (Jon. 3:1-3). w24.10 págs. 8, 9 párrs. 10, 11

Jehovaqa juchasninchejta perdonaspa, mana imaynatachus uj manuta perdonaspa papelpi raqhaykunku ajinallatachu ruwan, manaqa qʼalata chinkachin. Uj runa uj manuta perdonaspaqa, maypichus chay manu anotasqa kasharqa chay numerosta raqhaykunman, ajinapis chay numerosqa yachakunmanraj. Bibliataj mana uj manuta raqhaykuymanta jinallachu parlashan, manaqa qʼalata chinkachiymanta. Ñaupa tiempopeqa carbontawan, gomatawan, yakutawan chajruspalla tintata ruwaj kanku. Chayrayku chay tintawan escribisqataqa, uj joqʼo esponjallawan borrayta atikoj. Chayrayku uj manuta perdonaspaqa mana raqhaykullajchu kanku, manaqa qʼalata borrapoj kanku. Niña ni ima rikukusqanrayku, mana pipis yachayta atejchu mashkhachus chaypi anotasqa kasqanta. Chay manoqa ni jaykʼajpis kanmanchu jina karqa. Jehovapis juchasninchejta perdonaspa ajinata qʼalata chinkachin, chayta ruwasqanmantataj maytapuni agradecekunchej (Sal. 51:9). w25.02 pág. 10 párr. 11

Sichus pipis noqanchejmanta malta piensan chayri kʼumuykachachiwanchej chayqa, Jehová tukuy imata qhawamushasqanta yuyarikuna. Chayqa yanapawasunchej pipis sajra imasta ruwawajtinchej aguantanapaj. Jehovaqa maychus tiemponpi tukuy sajra ruwaykunata allinchanqa. Jehovaj makinman tukuy imata saqepusunchej chayqa, mana rabiasqallachu, nitaj phiñasqallachu kasun. Phiñasqalla kaspaqa mana piensarispalla imatapis ruwasunman, mana kusisqachu kasunman, Jehovamantapis karunchakusunman. Mana jaykʼajpis Jesús jinapuni ruwayta atisunmanchu. Ichapis ruwasqanchejwan chayri nisqanchejwan pantasun (Sant. 3:2). Wakin sajra imasta ruwawasqanchejtaqa kay sajra mundo tukukunankama mana qonqayta atillasunchu. Sajra imasta ruwasusqankuta mana qonqayta atishankichu chayqa, Jehová chayta yachasqanta yuyarikuy. Jesuspis payta sajra imasta ruwasqankurayku imaynachus kashasqaykita sumajta entiendesunki (Heb. 4:15, 16). Mayta kusikunchej Jehová sumaj yuyaychaykunata Bibliapi churachipuwasqanchejmanta, sajra imasta ruwawajtinchej imatachus ruwanata yachanapaj. w24.11 págs. 5, 6 párrs. 12, 13

Wiñay kausayta japʼinapajqa Jesuspi creenapuni tiyan (Juan 3:16-18, 36; 17:3). Ashkha judiosqa Jesús paypi creenankuta nisqanta mana japʼikorqankuchu. Chayrayku taporqanku: “¿Ima milagrotataj rikuchiwasqayku qanpi creenaykupaj?”, nispa (Juan 6:30). Chantá nerqanku ñaupa tatasninkoqa Moisespa tiemponpi maná mikhunata japʼisqankuta, chaytaj tʼantawan ninakunman (Neh. 9:15; Sal. 78:24, 25). Chaywan sutʼita rikucherqanku tʼantata mikhuyllapi yuyashasqankuta. Chayrayku Jesús ‘cielomanta cheqa kaj tʼantamanta’ parlajtin, mana taporqankuchu imamantachus parlashasqanta, chaytaj cielomanta kausayta qoj maná tʼanta jina karqa (Juan 6:32). Paykunaqa mikhunallapi yuyasqankurayku, mana Jesuspa yachachisqanta uyarillarqankupischu. Jesusqa wiñay kausayta japʼinankupaj imatachus ruwanankuta yachachiyta munasharqa. w24.12 págs. 5, 6 párrs. 10, 11

Wawasqa clasespi Cienciasta pasashaspa yachakonqanku, ashkha imaspaj leyes jina kasqanta kikin formitayojpuni kanankupaj. Sapa ritʼisitoqa sumaj sukʼasqa formitasniyoj, jatunmanta juchʼuykama, chay formitasnintaj tukuysitun kikillan. Chayta sutichanku fractales nispa. Sachʼaspis waj imaspis chayman rijchʼakoj formitasnillayojtaj. ¿Pitaj ajina formitasniyoj kananpaj leyesta jina rikhuricherqa? ¿Pitaj sumaj yuyaywan ajina kʼachituta ruwarqa? Sichus wawasniykichej ajina tapuykunata ruwakonqanku chayqa, Diospuni tukuy imata ruwasqanpi astawan creenqanku. Wawasniykichej jatunña kajtinkutaj kayta tapuriwajchej: “Sichus Dios ruwawarqanchej chay, ¿nichu payqa kamachiykunata churapuwasunman karqa kusisqa kausakunanchejpaj?”, nispa. Chantataj chay kamachiykuna Bibliapi kashasqanta niwajchej. w24.12 pág. 16 párr. 8

Apóstol Pabloqa Dios yuyaychasqanman jina nerqa uj mana arrepientekoj runata congregacionmanta orqhonankuta (1 Cor. 5:13). Jina kajtin, ¿hermanos paywan masichakuyta atillankumanpunichu karqa? Apóstol Pabloqa nerqa amaña paywan ‘purinankuta’, chay jina runawanqa ‘ama mikhunallankutapis’ (1 Cor. 5:11). Piwanpis mikhuspaqa parlarikunchejpuni, ajinamantataj aswan tiempota paywan kanchej. Chayrayku Pabloqa paywan mana mikhunankuta nispa, ama paywan masichakunankuta nisharqa. Paywan mana masichakojtinkutaj congregación jarkʼasqa kanman karqa (1 Cor. 5:5-7). Chantapis juchallikoj runa reparanman karqa Jehovaj sonqonta nanachisqanta. Chay juchata ruwasqanmanta mayta pʼenqakunman karqa, ajinamanta arrepientekuyta munanman karqa. w24.08 pág. 15 párrs. 4, 5

Israelpeqa Perdonta Tarina Pʼunchaypi kuraj kaj sacerdote, llajtarayku uywa wañuchisqasta jaywaj. Chaytataj watapi uj kutillata ruwaj. Chay jaywanastaj mana israelitaspa juchasninkuta qʼalata llimphuchayta atejchu, animales mana runas jinallatajchu kasqankurayku. Jinapis Jehovaqa juchasninkuta perdonananpaj wakichisqapuni kasharqa israelitas kay imasta ruwajtinku: arrepientekojtinku, Dios mañasqanman jinataj jaywanasta jaywajtinku (Heb. 10:1-4). Ofrendasta jaywasqankoqa paykunata yuyarichej juchasapas kasqankuta. Jinapis, ¿imatataj Jehová ruwarqa runaspa juchasninku perdonasqa kananpaj? Saqerqa Wawan “uj kutillata wiñaypaj jaywasqa” kananta, “ashkha runaspa juchasninkuta apananpaj” (Heb. 9:28). Jesusqa kausayninta qorqa ‘ashkha runasta kacharichinanpaj’ (Mat. 20:28). w25.02 pág. 4 párrs. 9, 10

“Runaqa cheqa kajtapuni ruwayta munan, cuerpontajrí mana chaypaj jinachu” (Mat. 26:41 tukukuynin). Jesusqa chaywan niyta munasharqa pantaj runas kasqanchejta yachasqanta, chayraykutaj juchaman urmasqanchejta. Chaywanpis Jesús nillawarqanchejtaj sumajta qhawarikunanchej kasqanta ama noqallanchejpi anchata atienekunapaj. Jesús niraj chayta nishajtin, discipulosnenqa mana iskaychakuspa nerqanku ni jaykʼaj payta saqerparinankuta (Mat. 26:35). Paykunaqa allin kajtapuni ruwayta munarqanku, chaywanpis mana reparakorqankuchu pruebaman churasqa kajtinku, juchaman facilta urmayta atisqankuta. Chayrayku Jesús paykunata nerqa kay diapaj ajllasqa versiculoj nisqanta. Jesusta presochashajtinku, ¿imatataj discipulosnin ruwarqanku? Paykunaqa mana rijchʼarisqaschu kasqankurayku juchaman urmarqanku. Mana allinta qhawarikusqankurayku Jesusta saqerparerqanku, mana chayta ruwanankuta nishaspapis (Mat. 26:56). w24.07 pág. 14 párrs. 1, 2

Adanwan Evawanqa Tatanku Jehovawan niña amigos kayta aterqankuchu. Niraj juchallikushaspaqa Diospa familianmanta karqanku (Luc. 3:38). Chaywanpis Jehovata mana kasukusqankurayku, chay familianmanta wijchʼusqa karqanku, chaytaj niraj wawasniyoj kashajtinku karqa (Gén. 3:23, 24; 4:1). Chayrayku mirayninkumanta kajkunaqa Jehovawan allinyachisqa kayta necesitanchej (Rom. 5:10, 11). Nisunman Jehovawan watejmanta amigos kayta necesitanchej. Uj libro nisqanman jina, kay versiculopi “allinyachisqa” kanamanta parlasqanqa griego parlaypi niyta munan “uj enemigowan amigos ruwakuy”. Jehovataj paywan allinyakunanchejpaj pay noqanchejwan allinyakuyta maskʼarqa. Chaytaj tʼukunapaj jinapuni. ¿Imaynatá chayta ruwarqa? Jehovaqa uj jaywanata jaywakunanta nerqa juchasapa runas paywan watejmanta amigos kayta atinanchejpaj. Chaytaj kanman uj imata kikin valorniyoj imawan cambiay jina. Ajinamanta imatachus pierdekusqanta watejmanta japʼiyta atikun. w25.02 págs. 3, 4 párrs. 7, 8

Apóstol Pablo nerqa: “Qankunaqa chay juchallikoj runata cheqanchankichejña. Amaña payta qhesachaychejchu”, nispa (2 Cor. 2:5-8). Chaywanqa nisharqa madrastranwan khuchichakusqanrayku congregacionmanta orqhosqa karqa chay runaqa, arrepientekunan kasqanta reparakusqantaña (1 Cor. 5:1). Arrepientekusqanraykutaj hermanosqa manaña cheqanchanankuchu karqa (Heb. 12:11). Chaymantataj Pabloqa hermanosta nerqa: “Chay runata perdonaychej, sonqochaychejtaj”, nispa. Chantá nillarqataj: “Mañakuykichej, munakuyniykichejta payman watejmanta rikuchinaykichejta”, nispa. Chaywanqa Pablo nisharqa congregacionman kutimojta saqenankuta, chantapis parlasqankuwan ruwasqankuwan sonqomantapacha perdonasqankuta, munakusqankutataj rikuchinankuta. Ajinamanta juchallikojqa reparanman karqa congregacionmanta hermanosqa kutinpusqanmanta mayta kusikusqankuta. w24.08 pág. 15 párrs. 4, 6; págs. 16, 17 párrs. 7, 8

Apóstol Pabloqa sumajta yacharqa aguantanapaj imachus necesitakusqanta. Chayrayku cristianosman yuyaricherqa mana paykunallapichu atienekunanku kasqanta, manachayqa Jehovapi. Pay kikin nerqa: “Jehová Diosmin yanapawajneyqa, mana manchachikusajchu”, nispa (Heb. 13:6). Kay tiempopipis wakin hermanosninchejqa qhatiykachasqallataj kashanku. Noqanchejtaj munakuywan yanaparisunman Diosmanta paykunapaj mañapuspa, atikojtintaj wakin imasta ruwapuspa. Bibliaqa sutʼita nin: “Cristo Jesuspa discipulosnin jina Diosta tukuy sonqo yupaychaspa kausayta munajkunaqa, tukuyninku qhatiykachasqallataj kanqanku”, nispa (2 Tim. 3:12). Chayrayku tukuyninchej wakichikunanchej tiyan llakiy tiempospaj. Tukuy sonqo Jehovapi atienekunanchej tiyan, nitaj iskayrayananchejchu tiyan ima kajtinpis aguantanapaj yanapanawanchejmanta. Payqa tukuy sonqo kasukullajtinchejpuni, maychus tiemponpi llakiykunamanta samarichiwasun (2 Tes. 1:7, 8). w24.09 págs. 12, 13 párrs. 17, 18

¿Imataj corintiosta yanaparqa bautizakunankupaj? (2 Cor. 10:4, 5). Diosqa Palabrannejta, espíritu santonnejta paykunata yanaparqa kausayninkuta cambiasqata cambianankupaj (Heb. 4:12). Sumaj willaykunata japʼikoj corintiosqa machaykuyta, suwakuyta, qharipura puñuykuytapis saqeporqanku (1 Cor. 6:9-11). Wakin corintiosqa bautizakunankupaj ashkha imasta kausayninkupi cambiananku karqa, nitaj yuyarqankuchu mana cambiayta atinankuta. Tukuy atisqankuta ruwarqanku wiñay kausayman pusaj kʼullku ñanta purinankupaj (Mat. 7:13, 14). ¿Qanpis kallpachakushankichu uj viciota chayri mana allin ruwaykunata qonqanaykipaj? Kallpachakullaypuni. Jehovamanta espíritu santonta mañakuy mana chay imaspi urmanaykipaj. w25.03 pág. 6 párrs. 15-17

Jehovaqa yachayta “tukuyman mana michʼakuspa qon, mana rimaspallataj”. Chay qowasqanchej yachaytaj yanapawasun reparanapaj imallatapis ajllajtinchej kusichinantachus manachus. Jehovamanta yanapata mañakuytawan sumajta reparana imaynatachus yanapawasqanchejta. Maymanpis viajashaspa chinkarpajtinchej, chaypi tiyakojkunata tapurikuytapuni yachanchej. Chanta, ¿tapurikuytawanpachachu ripunchej? Mana, ¿icharí? Sumajtaraj uyarisunman maynintachus rinanchejta indicawasqanchejta. Kikillantaj Jehová Dioswanpis, yachayninta mañakuytawanqa sumajta uyarina. Nisunman, imapajchus yachayta mañakusqanchejmanta kamachiykunasninta, yuyaychaykunasnintapis maskʼarina. Uj fiestitaman rinanchejtachus manachus ñapis ajllashaspaqa yuyarikunanchej kanman imatachus Biblia nin millay fiestasmanta, mana allin amigosmanta, Diospa Gobiernontapis munayninchejmanta nisqa ñaupajman churanamanta (Mat. 6:33; Rom. 13:13; 1 Cor. 15:33). w25.01 pág. 16 párrs. 6, 7

Isaiasqa sutʼincharqa paraisopi jinaña kasqanchejrayku imaynachus kausayninchej kasqanta, mana chaypichu kajkunaj kausayninkutaj mana ajinachu kasqanta. Jehovaqa kamachisninman tukuy ima necesitasqankuta qon paypa qayllallanpipuni kanankupaj. Payqa qowanchej espíritu santonta, Palabranta, ashkha yachachiykunatapis. Chayta ‘mikhurikunchej, ujyarikunchej, kusirikunchejtaj’ (Apocalipsis 22:17 versiculowan kikinchay). Mana chay paraisopichu kajkunatajrí mana ajinachu kanku. Paykunaqa ‘yarqhaymanta, chʼakiymanta, pʼenqaymanta’ ima wañunku, mana Diosta rejsisqankurayku (Amós 8:11). Jehovaqa llajtanman tukuy ima necesitasqankuta qon. Creeyninkuta kallpachanankupaj imatachus necesitasqankutapis (Joel 2:21-24). Kay tiempopeqa payqa qowanchej Bibliata, publicacionesninchejta, Internetpi paginanchejta, reunionesta, asambleastapis. Chayta sapa día sumajta mikhusqanchejraykutaj aswan sanitos kanchej, kallpachasqastaj. w24.04 pág. 21 párrs. 5, 6

Piwanpis rejsinakuyta munanki chayqa, paywan uyapura parlariwaj, pero mana uj chʼin lugarpichu, chayri telefononejta parlariwaj. Payman sutʼita niy gustasusqanta, astawantaj rejsiyta munasqaykita (1 Cor. 14:9). Piensarinanraj kasqanta nisojtenqa suyarillay (Pro. 15:28). Mana qanwan rejsinakuyta munajtintaj, respetay chay nisusqanta. ¿Imatá ruwawaj pipis qanwan rejsinakuyta munasqanta nisojtin? Payqa maytachá kallpachakorqa chayta nisunanpaj. Chayrayku kʼachamanta, respetowantaj parlapayay. Piensariytaraj munanki chayqa chayta niy, jinapis ama anchata suyachiychu (Pro. 13:12). Mana paywan rejsinakuyta munankichu chaytaj, kʼachallamanta, sutʼintataj niy. Chaywanpis paywan rejsinakuyta munanki chayqa, imachus sonqoykipi kasqanta payman willay, imaynatachus novianaykichejmantataj parlariychej. Imaynatachus novianamantaqa mana kikintapunichu yuyawajchej. w24.05 pág. 24 párrs. 12, 13

Davidqa ichapis niraj 20 watasniyoj kashaspa israelita soldados kasharqanku chayman rerqa. Chaypitaj rikorqa israelita soldados manchariymanta wañushasqankuta, Goliat sutiyoj jatun filisteo contrankupi sayaykusqanrayku (1 Sam. 17:10, 11). Israelita soldadosqa may mancharisqa kasharqanku Goliat may jatun kasqallanpi yuyasqankurayku, paykunamantataj burlakusqanrayku (1 Sam. 17:24, 25). Davidtajrí mana ajinatachu yuyarqa. Payqa repararqa Goliatqa mana israelitaspa contrallantachu sayaykushasqanta, manachayqa “kausaj Diospa soldadosninpa contranpi” sayaykusqanta (1 Sam. 17:26). Davidqa Jehovapi ñaupajta yuyasharqa. Payqa sutʼita yacharqa imaynatachus ovejasta michishajtin Dios yanaparqa, ajinallatataj chay kutipipis yanapananta. Jehová paywan kashasqanmanta mana iskayrayasqanrayku Goliatwan maqanakorqa, atiparqataj (1 Sam. 17:45-51). w24.06 pág. 21 párr. 7

Jehovata mana sirvejtinchej imaynachus kausayninchej kananpi tʼukurisunman. Chayta ruwasun chayqa, Jehovata tukuy sonqo kasukullasunpuni, salmista jinataj nisun: “Noqapajrí allinpuni Diosman qayllaykusqayqa”, nispa (Sal. 73:28). Noqanchejqa “kausaj cheqa Diosta esclavos jina” sirvishanchej (1 Tes. 1:9). Chayrayku kay qhepa pʼunchaykunapi ima prueba kajtinpis, aguantayta atisunpuni. Diosninchejqa noqanchejmanta llakikun, chaypipunitaj kanqa yanapanawanchejpaj. Payqa ñaupa tiempopi kamachisninta yanaparqapuni, kunanpis yanapashallawanchejtaj. Tumpamantawanqa manchay ñakʼariy tiempo qallarenqa. Chaypitaj mana sapallanchejchu kasunchej, Jehová noqanchejwan kanqa. “Chayrayku mana manchachikuspa niyta atinchej: ‘Jehová Diosmin yanapawajneyqa, mana manchachikusajchu’”, nispa (Heb. 13:5, 6). w24.06 pág. 25 párrs. 17, 18

Bibliaqa niwanchej Israelpi 40 runasmanta astawan reyes kasqankuta. Nillawanchejtaj wakin kʼacha reyespis sajra imasta ruwasqankuta. Davidmanta parlarina, payqa kʼacha rey karqa. Chayrayku Jehová paymanta nerqa: “Tukuy sonqotaj sirviwarqa cheqan kajllata ñaupaqeypi ruwaspa”, nispa (1 Rey. 14:8). Jinapis payqa uj casada warmiwan puñuykorqa, qosantataj maqanakupi wañuchicherqa (2 Sam. 11:4, 14, 15). Chantapis Israelpeqa sajra reyes kallarqankutaj, allin imastataj wakin kutis ruwarqanku. Rehoboammanta parlarina. Paymanta parlaspa Jehová nerqa: “Rehoboamqa sajra imasta ruwarqa”, nispa. Arí, payqa Jehovaj ñaupaqenpi mana allin reychu karqa (2 Cró. 12:14). Jinapis Jehovata kasukorqa ama Israelmanta chunka aylluswan maqanakunanta nejtin, reyninkutataj paykuna ajllakunankuta saqenanta nejtin. Chantapis ashkha llajtasta aswan sumaj llajtasman tukucherqa nacionta enemigosninmanta jarkʼananpaj (1 Rey. 12:21-24; 2 Cró. 11:5-12). ¿Imatá Jehová qhawarqa wakin reyes allin reyes kasqankuta ninanpaj, wakintaj mana? Jehová qhawarqa payta tukuy sonqochus manachus munakusqankuta, juchasninkumanta pesachikusqankutachus manachus, chantapis payllatachus yupaychasqankuta manachus. w24.07 pág. 20 párrs. 1-3

¿Imataj kanman 18 watayojmanta uraman kajkuna bautizasqaña kaspa uj jatun juchata ruwajtinku? Tukuynin ancianos tantakuspa iskay ancianosta ajllanqanku chay menor de edadwan cristiano tatasninwan ima parlanankupaj. Chay ajllasqa ancianostaj tatasninta tapurenqanku imaynamantachus wawankuta yanapashasqankuta cambiananpaj, arrepientekunanpaj ima. Sichus chay menor de edad tatasninwan yanapachikushan, yuyasqantapis ruwasqantapis cambiashan chayqa, chay iskay ancianos ninkuman manaña uj comité ruwakunanchu kasqanta. Yachanchej jina, Diosqa tatasta churan wawasninkuta munakuywan cheqanchanankupaj (Deu. 6:6, 7; Pro. 6:20; 22:6; Efe. 6:2-4). Aswan qhepamantaj ancianosqa maypi jina tatasninta tapurenqanku wawankuta yanapashallasqankutapunichus manachus. Chanta, ¿imataj kanqa sichus chay menor de edad mana arrepientekunmanchu, nitaj cambiayta munanmanchu chay? Jina kajtenqa uj comiteta ruwakonqa, paywan cristiano tatasninwan ima parlanankupaj. w24.08 pág. 24 párr. 18

Pillapis uj regalota qowajtinchejqa kusirikunchejpuni. Jinapis noqanchej wajkunapaj imatapis ruwapunchej chayqa, aswan kusisqaraj kanchej. Jehová ajinata ruwawasqanchejrayku, noqanchejmanta kashan aswan kusisqas kanaqa. Noqanchej tukuy imaynamanta wajkunata yanapariyta maskʼasun chayqa, aswan kusisqas kasun. Ajina kanapaj ruwasqa kasqanchejqa may sumajpuni, ¿icharí? (Sal. 139:14). Bibliaqa niwanchej qorikuyta yachajkunaqa kusisqas kasqankuta. Chayrayku Jehovapis ‘kusikuyniyoj Dios’ (1 Tim. 1:11). Pay ñaupajta tukuy imata qorqa, nitaj pipis paymanta astawan qonchu. Apóstol Pablo nerqa jina, “paynejta kausanchej, kuyunchej, kanchejtaj” (Hech. 17:28). Chantapis “tukuy ima allin kaj regaloqa, aswan sumaj regalopis” Jehovamanta jamun (Sant. 1:17). ¿Imatá ruwasunman wajkunaman qorispa aswan kusisqa kananchejpaj? Jehová jina qorikuyta yachananchej tiyan (Efe. 5:1). w24.09 pág. 26 párrs. 1-4

Ancianos kanankupaj imatachus ruwanankuta estudiaytawan, ichapis wakin siervos ministerialesqa yuyankuman ni jaykʼaj anciano kayta atinankuta. Jinapis kayta yuyarikunanku tiyan: Ni Jehovapis, ni llajtanpis suyanchu ni imitapi pantanankuta (1 Ped. 2:21). Chantapis espíritu santo paykunata yanapanman ancianos kayta atinankupaj (Fili. 2:13). Qanrí, ¿reparankichu anciano kanaykipaj imapichus astawan kallpachakunayki kasqanta? Jina kajtenqa Jehovamanta mañakuy, chayta astawan ukhunchariy, ancianostataj tapurikuy yuyaycharisunankupaj. Kallpachakullaypuni anciano kanaykipaj. Jehovamanta mañakuy yachachisunanta, wakichisunanta ima. Ajinamanta paypaj, congregacionpajpis astawan ruwayta atinaykipaj (Isa. 64:8). Jehovaqa bendicenqapuni anciano kanaykipaj kallpachakusqaykita. w24.11 págs. 24, 25 párrs. 17, 18

Ashkha watastaña Jehovata sirvispapis mana yuyananchejchu tiyan kallpachakusqanchejrayku khuyakuwasqanchejta. Jehovaqa jatunpajpuni qhawan payrayku imastachus ruwasqanchejta. Jinapis payqa regalota jina Wawanta qowanchej, manataj sirvisqanchejmanta pagota jinachu. Sichus nisunman kallpachakusqanchejrayku khuyakuwasqanchejta chayri allinpaj qhawawasqanchejta chayqa, waj parlaypi nishasunman mana Cristoj wañuyninta necesitasqanchejta (Gálatas 2:21 versiculowan kikinchay). Apóstol Pabloqa yacharqa mana kallpachakusqanraykuchu Jehová perdonananta. Jina kajtin, ¿imajtintaj mayta kallpachakorqa Jehovata sirvinanpaj? Payqa Jehovaj jatun khuyakuyninmanta agradecekuyta munarqa (Efe. 3:7). Noqanchejpis tukuy sonqo Jehovata sirvishallanchejpuni mana khuyakunawanchejraykuchu, manachayqa khuyakuwasqanchejmanta agradecekuyta munasqanchejrayku. w25.01 pág. 27 párrs. 5, 6