Llakiypi kashaspa sonqochasqas karqanku

Setha nin: “Warmiywan noqawan mana trabajoyoj qhepakorqayku. Iskay watata familiayku yanapallawasqaykuwan kausakorqayku, chantá imallamantapis trabajaspa. Chayrayku warmiy Priscilla sinchʼi llakiywan onqoykorqa, noqapis niña allinpajchu qhawakorqani.

”¿Imaynatá chayta atiparqayku? Priscillaqa yuyarikoj Jesús, Mateo 6:34 versiculopi nisqanta, chaypeqa nin ama phutikunata qʼaya pʼunchaymanta, imaraykuchus qʼaya pʼunchayqa pay kikinmanta llakiyniyoj. Sonqomantapacha Diosmanta mañakusqanqa ñaupajllamanpuni rinanpaj yanaparqa. Noqatataj Salmo 55:22 sonqochawarqa. Salmista jina llakiyniyta Jehovaman saqerqani, paytaj yanapawarqa. Trabajoyojña kaspapis mana chayllamanchu qokuyku, imajtinchus Jesús, Mateo 6:20-22 versiculospi yuyaychasqanman jina kausakuyku. Astawanqa sumajta warmiywan kausakuyku, Dioswanpis astawan masichakuyku”.

Jonathanpis nillantaj: “Negocioykupi niña allinchu riwajtiyku mancharisqa kasharqani. Qolqe pisiyasqanrayku, 20 watata llankʼasqayqa qhasillapaj karqa. Warmiywantaj qolqerayku mayta chʼajwarqayku. Tarjeta de crédito nisqata apaykachaytapis manchachikorqayku, manaña valenanta yuyaspa.

”Jinapis Diospa Palabran, espíritu santon ima allinta yuyaychakunaykupaj yanapawarqayku. Tukuy imamantataj trabajakorqani. Niña qhasi imaspi qolqeykuta gastarqaykuchu. Noqaykoqa Jehovaj testigosnin kayku, hermanosniykupis yanapallawarqaykutaj. Paykunaqa allinpaj qhawakunaykupaj kallpachawarqayku, llakiypi kashajtiykutaj yanapariwarqayku”.

Raquel nin: “Qosay jinallamanta ripojtin phiñasqa, sonqo nanasqataj kasharqani. Sinchʼi llakisqapuni kasharqani, jinapis Diosman qayllaykorqani, paytaj sonqochawarqa. Sapa diataj paymanta mañakoj kani, jinamanta sonqoy tiyaykorqa. Paypis jampishawanman jina karqa.

”Diospa Palabran yanapawarqa phiñakuyniyta atipanaypaj. Apóstol Pabloj nisqanta ruwanaypaj mayta kallpachakorqani. Pay nerqa: ‘Ama sajra kajwan atipachikuychu, astawanqa sajra kajta allin kajwan atipay’ (Romanos 12:21).

”Uj sumaj amigo yanapawarqa manaña chayllapi yuyanaypaj. Eclesiastés 3:6 nisqanta rikuchiwarqa, kʼachallamantataj niwarqa uj tiempo tiyasqanta ‘maskʼayta saqenapaj’. Chay niwasqantaqa mana japʼikuyta atillarqanichu, jinapis chaytapuni necesitasharqani. Kunanqa niña llakiynillaypichu yuyani, astawanqa kusichiwasqan imasta ruwani”.

Elizabeth nin: “Qosayki chayri warmiyki ripojtenqa yanapata necesitanki. Uj amigay sapa día yanapawarqa. Noqawan khuska waqaj, sonqochawaj, munakuwajtaj. Jehovapuni paynejta yanapawarqa sonqo nanayniyta chinkachinanpaj”.

Luispis pimantachus ñaupaj kaj yachaqanapi parlarerqanchej, sonqonmanta sinchʼi onqosqa, iskay kutipi casipuni wañuporqa. Sapa día 16 horasta oxigenota churanankuta necesitan. Pay nin: “Sapa rato Jehovamanta mañakuni, paytaj espíritu santonwan kallpachawan. Diosmanta mañakusqay yanapawan ñaupajllamanpuni rinaypaj. Imajtinchus Diospi atienekuni, nitaj iskayrayanichu Dios noqamanta llakikusqanmanta”.

Petra, pichus 80 wata kurajniyoj, nin: “Tukuy imata ruwayta munani, nitaj atinichu. Kallpay pisiyasqanqa llakichiwan. Saykʼusqaña kani, jampisllawanñataj kausani. Ashkha kutispi Jesús kayta nisqanpi tʼukurini: ‘Atikojtenqa, noqamanta karunchay ñakʼarinayta’, nispa. Jinapis Jehovaqa kallpacharqa. Noqatapis kallpachallawantaj. Sapa día paywan parlarini, jinamanta sonqo tiyasqa kani” (Mateo 26:39).

Julián, pichus 30 watata jinaña esclerosis múltiple nisqa onqoywan kashan. Paypis nillantaj: “Sumaj empresapi llankʼarqani. Kunantaj silla de ruedasllapiña kashani. Jinapis aswan allin kausayneyqa, imajtinchus runasta yanapani. Wajkunata yanaparispaqa mana nanaynillaypi yuyanichu, Jehovataj ajina llakiypi kajtinchej kallpachawasun. Pablo jinataj niyta atini: ‘Imallapipis tarikuspa, atipayta atisajpuni, kallpachawajniy [Dios kasqanrayku, NM]’”, nispa (Filipenses 4:13).

Antonio yuyarikuspa nin: “Tatayqa uj accidentepi wañuporqa. ¿Imaraykú chay jinapi wañupunan karqari? Payqa purikushallarqa. Ni imanakuyta aterqanichu. Niraj wañupushaspaqa, phishqa diasta wañusqa jina kasharqa. Mamaywan kashaspaqa mana waqanaypaj aguantakoj kani. Sapallaypitaj sonqo nanayta waqarikorqani. Nerqanitaj: ‘¿Imajtin paypuniri?’.

”Chay llakiy diaspeqa Jehovamanta yanapata mañakorqani sonqo tiyasqa kanaypaj. Tiempo pasasqanman jinataj manaña anchata llakikorqanichu. Yuyarikorqanitaj Bibliaqa kayta nisqanta: ‘Tiempo chayamojtin, wakimpaj allin imas tiyan, wakimpajtaj mana’. Diosqa ‘mana jaykʼaj llullakoj’, chayrayku yachani watejmanta tataywan tinkukunayta wañuymanta kausarimojtin” (Eclesiastés 9:11; Juan 11:25; Tito 1:2).

Robertpis, pimantachus ñaupaj kaj yachaqanapi parlarillarqanchejtaj, jinata nin: “Warmiywan noqawan Jehovamanta mañakuspaqa, Filipenses 4:6, 7 nisqanman jina sonqo tiyaykuyta tarerqayku. Chayrayku periodistaswan wañusqas kausarimunankumanta parlariyta atillarqayku. Wawayku avionpi accidentakuspa wañupojtinpis, khuska kashaspa kusisqa kausakusqaykumanta yuyarikuyku. Chaypitaj astawan tʼukuriyku.

”Wakin hermanosniyku telepi rikuwasqayku mana llakisqachu creenciasniykumanta parlasqaykuta. Chayta niwajtiyku, Diosmanta mañapuwasqaykurayku ajina kashasqaykuta nerqayku. Jehovapuni sonqochashawasqaykuta creerqayku ashkha mensajesnejta”.

Chay runaspa kausayninkoqa rikuchin chʼampaypi, llakiypi kajkunata Dios sonqochayta atisqanta. Qantapis sonqochasunkiman. Ima llakiypi rikukojtiykipis, chaykunata atipanaykipaj Dios yanapasonqa.b Chayrayku Jehovata maskʼay, payqa “tukuy imapi sonqochaj” (2 Corintios 1:3).