“Wakichisqas” kay ¿Imaraykutaq may allinpuni?

JUK kutipi Jesusta, discipulosnin tapurqanku: “Ima señaltataj rikuchiwasqayku kutimunaykimanta, kay pachaj tukukuyninmantawan?”, nispa (Mat. 24:3). Mateo 24, Marcos 13, Lucas 21 tʼaqaspi ninjina, Jesusqa ima señaleschus, imaynachus kananta ima sutʼinchaspa kutichirqa. Nirqataq: “Wakichisqas suyaychej”, nispa (Mat. 24:42).

¿Imaraykutaq Jesús watiqmanta discipulosninta yuyaycharqa? Kaykunata qhawarina. Ñawpaqtaqa, kay pachap ruwaykunasninrayku chay señalesta mana kasukunankuta yacharqa. Chaytaq Diosmanta karunchachinman karqa, nitaq wakichisqaschu kankuman karqa. Chantapis tiyakuchkasqanku chiqapi wakin imasta mana juntʼaqta rikuspa, profecías juntʼakuchkasqanta ichá pisipaq qhawankuman karqa. Jina kaptin ichapis “manchay ñakʼariy” —Jesuspa profecianpa tukukuynin— qhiparikunantaraq yuyankuman karqa, ajinamantataq wakichisqas kayqa, qhasilla kasqanta yuyankuman karqa (Mat. 24:21).

“Mana imatapis reparakorqankuchu”

Jesusqa, Noep tiemponpi kawsaq runasmanta discipulosninwan parlarqa. Chay runasqa, Noeta arcata ruwaqta rikuspapis, willaqta uyarispapis, saqra kawsay kasqantataq rikuspapis, mana kasukurqankuchu (Mat. 24:37-39). Kay tiempopipis runasqa, willaykunata nillataq kasukunkuchu. Sutʼincharinapaq, autota apaykachaqkunaqa, mana anchata correnankupaq señalesta rikuspa imapaqchus kasqanta yachanku. Chaywanpis achkhasqa mana kasunkuchu. Chayrayku kamachiqkunaqa, rompemuelles nisqata callespi churachinku. Ajinallatataq wakin cristianospis kay qhipa pʼunchaykunapi, ima profeciaschus juntʼakuchkasqanta señalestajina reparaspapis, wak ruwaykunata ruwanankurayku Jehovata mana tukuy sunquchu yupaychanku. Africamanta juk sipasita Arielle sutiyuq ajinapi rikukurqa.

Arielleqa, balonmano nisqata pukllaq, telepi sapa kuti pukllaptinkutaq qhawaqpuni. Juk pʼunchayqa, yachaywasinmanta kaqkuna pukllanankuta uyarirqa. Payqa chayta uyarispa, ima tuqllaschu kananpi mana allinta tʼukurispa, arquerajina pukllananpaq qillqachikurqa. Imachus aswan qhipaman kasqanmanta, pay nin: “Wakin compañerasniypa noviosninkuqa, cigarrota pitaq kanku, drogakuqtaq kanku. Mana paykunajina kasqayrayku asipayawaptinkupis, allillan kanayta yuyarqani. Chaywanpis pukllasqayqa, Diosmanta karunchachkawarqa. Maytapuni gustaykuchikurqani, tantakuykunapi kaspapis canchallapi kachkasqayta yuyaq kani. Manañataq kikintachu yuyaq kani. Manaña pukllallaytachu munarqani, manaqa atipaytapuni munarqani. Chayrayku allinta pukllanaypaq mayta wakichikuq kani, chaytaq mayta llakichiwaq, wakin amigosniypis karunchakuwarqanku.

”Chantapis juk kutipi pukllachkaptiy chay wak equipoqa, arcoy chiqantapuni pelotata chuqamunanku karqa. Chayta jarkʼayta atinaypaqtaq Diosmanta mañakurqani. Chayllapi may karunchasqaña Diosmanta kachkasqayta reparakurqani. ¿Imaynatá Jehovaman watiqmanta qayllaykurqani?

”Los jóvenes preguntan... ¿Qué haré con mi vida?a, nisqa videomanta yuyarikurqani. Chay videotaqa qhawarqaniña, juktawantaq sumaqta entiendenaypaqjina qhawarqani. Chay videopiqa, Andymanta parlachkan, kawsayniytaq paypa kawsayninman rikchʼakusqanta repararqani. Chantapis juk anciano chay waynataqa, Filipenses 3:8 pʼitita ñawirinanta, chaypitaq tʼukurinanta yuyaycharirqa. Ñuqapis kikinta ruwarqani, chaytaq yanapawarqa. Equipoypi pukllaytataq saqipurqani.

”Chaymantapacha manaña atipayllapichu yuyarqani, jinamanta llakiyniypis pisiyarqa. Aswan kusisqataq kachkarqani, hermanosmanpis astawan qayllaykurqani. Tantakuykunapi allinta uyarisqaypis astawan kusichiwarqa. Diosmantapis astawan willarqani. Kunanqa, sapa killa precursora auxiliarjina llamkʼachkani”, nispa.

Arielletajina ima ruwayllapis, Jesuspa willasqan profeciasta mana allinta reparananchikpaq jarkʼachkawanchik chayqa, ¿imatá ruwasunman? Ichapis Índice de las publicaciones Watch Tower nisqa librota qhawarisunman. Chay librotaqa, valorniyuq imasta tarinapaq mapawan kikinchakun. Chaypiqa, imaynatachus wak cristianos ñuqanchikjina saqra ruwayman tanqasqa kachkaspa, imatachus ruwasqankumanta, sumaq yuyaychaykunata tarinchik. Chantapis tukuynin tantakuykunaman riy, allinta wakichikuy, imamantachus parlakuchkasqantataq qillqay imaqa, may allinpuni. Wakinqa ñawpaqpi tiyakuspa sumaqta yachakunku. Tapuykunawan kutichiykunawan ukhunchakuptintaq qallariymantapacha kutichina. Chantapis wakichisqallapuni kanapaqqa, noticiasta uyarina, ñawirina ima. Chantá imaynatachus qhipa pʼunchaykunamanta profeciasta juntʼachkasqankupi tʼukurina (2 Tim. 3:1-5; 2 Ped. 3:3, 4; Apo. 6:1-8).

“Wakichisqa kaychej”

Qhipa pʼunchaykunamanta señalqa, “tukuynejpi” juntʼakuchkan (Mat. 24:7, 14). Wakin lugarespiqa, achkha runas unquykunarayku, yarqhayrayku, jallpʼa ikhakuyrayku, Biblia nisqanmanjina wak imas kasqanrayku mayta ñakʼarinku. Wak lugarespitaq runasqa, mana chaykunawan ñakʼarichkankuchu. ¿Ñuqanchikrí ajinapichu tiyakunchik? Jina kaptinqa, jatun ñakʼariy ichá niraq chayamunanta yuyasunman, chayta yuyaspataq pantachkasunman.

Jesús “yarqhaykuna, wañuchej onqoykuna” kanan kasqanta nisqanpi tʼukurina (Luc. 21:11). Jesusqa, mana jukllapichu tukuyniqpi juk riqllata chaykuna kananta nirqa. Manaqa “caynejpi jakaynejpi, (Dios Parlapawanchej)”. Chayrayku mana pachantinpipuni chay tukuy ima juntʼakunanta suyasunmanchu. Chantapis Jesusqa discipulosninman nirqa: “Qhawarikuychej; pajtataj sonqoykichej atipachikunman mikhunawan”, nispa (Luc. 21:34). Chayrayku mana allinchu kanman Jesuspa tukuy nisqan juntʼakuqtapuni rikuyta suyakunanchikqa. Jesús nirqa: “Chay tukuy imasta rikuspaqa, yachaychej Diospa reinon qayllapiña kasqanta”, nispa (Luc. 21:31). Chantapis tiyakunchik chayniqpi mana chay tukuy imas rikukuptinpis noticiasniqta chaykunata rikunchik, uyarinchik ima.

Jehovaqa, maykʼaqchus jatun ñakʼariy qallarinanta yachanña. Chayrayku “ima pʼunchaychus, ima horachus” chaykuna Jallpʼapi kanantaqa, ni ima jarkʼanqachu (Mat. 24:36).

Jesusqa discipulosninman nirqa: “Wakichisqa kaychej”, nispa (Mat. 24:44). Arí, wakichisqapuni kananchik tiyan. Chaytaq mana ninayanchu pʼunchaynintinta cristiano ruwanasnillanchikta ruwananchik. Chantapis ima horachus jatun ñakʼariy qallarinantaqa mana yachanchikchu, ichá chay ratoqa llamkʼachkasun, campopi, wasipi chayri mayllapipis kachkasun (Mat. 24:40, 41). Chayrayku, ¿imatá wakichisqas kananchikpaq ruwasunman?

Emmanuelmanta Victorinemanta ima parlarina. Paykunaqa, suqta warmi wawasninkuwan Africapi tiyakunku. Chaypiqa, Jesuspa nisqan profecías mana tukuyninpunichu rikukun. Paykunaqa, sapa pʼunchay Biblia yachachisqanmanta parlarinku. Ajinamantataq wakichisqas kasqankuta rikuchinku. Emmanuelqa, ajinata wakichikusqankuta nin: “Qallariypiqa, mana tukuyniyku tantakuyta atillarqaykuchu. Chaywanpis, tutamanta 6:00 horasmantapacha khuskan horallata ukhunchariyku. Ñawpaqtaqa, sapa pʼunchay ukhunchanapaq folletota ukhunchariyku. Chantá qutuchakuypi ukhunchakunan publicacionespa wakin parrafosninta wakichikuyku”, nispa. Chayta ruwaspaqa, wakichisqas kanku. Imaraykuchus Emmanuelqa, qutuchakuyninmanta ancianosta umachaqjina llamkʼan. Victorinetaq sapa kuti precursora auxiliarjina llamkʼan, achkha runastañataq Bibliamanta yachakunankupaq yanapan. Warmi wawasninqa, qutuchakuypi ñawparichkallankupuni.

Jesusqa nirqa: “Wakichisqa kaychej; ama puñurpayaychejchu”, nispa (Mar. 13:33). Arí, wakichisqallapuni kananchik tiyan. Ariellejinataq publicacionesniqta, tantakuykunaniqta yuyaychawasqanchikta kasukuna. Emmanuelpa familianjinataq wakichisqallapuni kanapaqqa, sapa pʼunchay Bibliata ukhuncharina.

[Sutʼinchaynin]

[4 paginapi dibujo/foto]

Emmanuelwan familianwanqa, sapa pʼunchay Bibliamanta parlarinku ajinamantataq wakichisqas kanku