Noviembri

Anciänukunaqa Jehovänömi llakipäkoq kayänan congregacionpita rakishqakunata yanaparnin. Jehovä Diosnintsikqa manam, mana cäsukoq israelïtakunata dejarirqantsu y yanapanampaqqa manam arrepentikuyänantaraqtsu shuyararqan. Tsëpa rantinqa, manaraq arrepentikuyaptinmi yanaparqan. Osëasta pasanqanwanmi alläpa llakipäkoq kanqanta entienditsirqan. Osëastam mandarqan, juk ollqukunallawanraq kakuykaptin warminta kutitsimunampaq y perdonanampaq (Os. 3:1; Mal. 3:7). Anciänukunapis Jehovänömi, congregacionpita rakishqakunata llapan shonqunkunawan yanapayänan arrepentikuyänampaq y congregacionman fäcil-lla kutiyämunampaq. Tsënöllam yarpänantsik, oqrakashqa tsurinta papänin karullataraq shamuykaqta rikëkur, “alläpa llakipar cörripa ëwarqan, y waqurkur o makallarkurmi kuyëpa mutsar chaskirqan” (Lüc. 15:20). Perdontapis manaraq mañakuptinmi, kuyakoq teyta karnin kushishqa chaskirqan. w24.08 päg. 28 pärrk. 7, 8

Jehoväqa manam kikinllatsu yachaq këta munan, tsëpa rantinqa kanan junaqpaq textu ninqannömi yachaq kanantsikpaq yanapamantsik. Y yanapamarnintsikqa, manam noqantsikpaq “mana allita parlartsu këkan” o manam yanapamanqantsikpita rimamantsiktsu. Tsëpa rantinqa, yanapamänapaq mañakunantsiktam munan (Prov. 2:1-6). ¿Y noqantsikqa Jehovä ruranqannö jukkunata yachatsita puëdishwantsuraq? (Sal. 32:8). Awmi, tukuynöpam yachatsita puëdintsik. Këllaman pensarishun: mushoq publicadorkunatam yachatsikuyänampaq yachatsita puëdintsik. Anciänu kaqkunanam siervu ministerialkunata y tsëllaraq bautizakushqa ollqukunata congregacionchö yanapakuyänampaq pacienciawan yachatsiyan. Y mëtsikaq wawqi panikunam yachayanqankunata jukkunata yachatsiyan, Diosta adoranantsik wayikunata rurëchö o altsëchö yanapakuyänampaq. w24.09 pägk. 28, 29 pärrk. 11, 12

Juk anciänuqa, “imapitapis mana parlashqa[m]” kanan. Juk parlakuychöqa, imanö portakunqampitam wawqi panikuna allita parlayänan (1 Tim. 3:2). Tsënöllam, ‘congregacionchö mana kaqkunapis pëpaq allita parlayänan’. Diosta mana sirweqkunapis, honrädu kanqanta y alli kanqantaqa clärum rikäyänan (Dan. 6:4, 5). Tsëmi kënö tapukunëki: “¿Noqapaqqa allitaku parlayan wawqi panikuna y Diosta mana sirweqkunapis?”. “Alli kaqtam kuyanan”. Alli kaqta kuyarqa, wakinkuna allikunata rurayanqantam alkäbu kanan y imanö kayanqampitam felicitänan (Tïtu 1:8). Tsënöllam wakinkunata kushishqa yanapanan y ruranampaq kaqpitapis mastam ruranan (1 Tes. 2:8). Juk anciänuqa wawqi panikunata watukanampaq y ruranampaq kaqkunata alli atiendinampaqmi tiempunta patsätsinan (1 Pëd. 5:1-3). Tsënö tiempunta rakirpis y ruranampaq kaqkuna sasa o aja kaptimpis kushishqam sientikunqa (Hëch. 20:35). w24.11 päg. 20 pärr. 3; päg. 21 pärrk. 4, 5

Siervu ministerialkunaqa allipam congregacionchö yanapakuyan. Tsëchi apostol Pabluqa alläpa valorarnin, Filïpus cristiänukunaman cartakurnin, siervu ministerialkunapaq y anciänukunapaq salüduta apatsirqan (Filip. 1:1). Mëtsikaq bautizakushqa wawqikunam jövin o mayor karpis, siervu ministerial kayan y kushishqa yanapakuyan. Pensarishun Ivan y Luis jutiyoq wawqikunaman: Ivantaqa 18 watayoq këkaptinmi siervu ministerial churayarqan y Luistanam 50 watayoq këkaptin. Luismi imanö sientikunqampaq kënö nin: “Congregacionchö wawqi panikunaqa alläpam kuyayäman, tsëmi noqapis siervu ministerialnö kushishqa yanapakü”. Wawqillä, ¿bautizakushqana karqa siervu ministerial këta munankimantsuraq? ¿Imanirtan siervu ministerial këta munankiman? w24.11 päg. 14 pärrk. 1-3

Judächö gobernaq Ezequïasqa 39 watayoq këkarmi alläpa grävi qeshyarirqan. Y Jehoväqa willakoqnin Isaïaswanmi willatsirqan mana alliyänampaq kaqta, sinöqa wanukunampaq kaqta (2 Rëy. 20:1). Tsëta musyarirqa, Ezequïasqa alläpam waqarqan y yanapëkunampaqmi Jehoväman. Jehovä Diosnintsikqa Ezequïas mañakunqanta wiyar y waqanqanta rikarmi alläpa llakipärirqan. Tsëmi willakoqnin Isaïaswan kënö willatsirqan: “Mañakamunqëkita y waqanqëkitam wiyarqö. Tsëmi qeshyanqëkipita alliyätsishqëki”. Jehovä Diosnintsikqa llakiparmi alliyäratsirqan y asiriukunapita Jerusalenta salvanampaqmi änirqan (2 Rëy. 20:4-6). ¿Qampis alläpa grävi qeshyawanku qeshyëkanki? Tsënö karqa, imanö sientikunqëkita Jehovä Diosnintsikta willë. Bibliachöqa nimantsik Teytantsik Jehoväqa ‘llakipäkoq Teyta y tukuynöpa shoqakoq Dios’ kanqantam, tsëmi consolamantsik (2 Cor. 1:3, 4). w24.12 päg. 24 pärrk. 15-17

Kawarimoqkunata chaskiqa, ¡alläpa shumaqchi kanqa! Y alläpa kushikuypaqchi kanqa Jehoväpita y llapan ruranqankunapita masta yachakuypis (Sal. 104:24; Is. 11:9). Peru tsëkunapitapis masqa, jutsata manana rurarmi Jehovä Diosnintsikta limpiu concienciawan adorëta puëdishun, y mananam kanannö imatapis mana allita ruranqantsikpita llakikur kashunnatsu. ¿Tsë llapantatsuraq perdirinkiman kanan tiempu ‘cuerpuyki munanqanta rurakur’? (Heb. 11:25). Kanan witsan imëkata dejanqantsikkunapita mas väleq y mas alliqa Diosnintsik änikunqankunata chaskinapaq kaqkunam. Tsë Shumaq Patsachöqa mananam Diosnintsik änikunqankunata shuyaräshunnatsu, tsë änikunqanqa cumplikashqanam kanqa. Y tsë llapankunaqa cumplikanqa Diosnintsik kuyamanqantsikpitam y noqantsikrëkur Tsurin wanunanta permitinqampitam. w25.01 päg. 29 pärr. 12

Hebrëus libruchömi willakun mëtsikaq nunakuna Jehoväman markäkuyanqanta o yärakuyanqanta. Jukqa Moisesmi karqan, y pëpitam yachakuyta puëdintsik (Heb. 3:2-5; 11:23-25). Moisesqa confiakurqanmi. Y confiakunqannöllam Jehoväqa, tsunyaq sitiuchö israelïtakuna kawayänampaq mikuyta ni yakuta faltatsirqantsu (Ex. 15:22-25; Sal. 78:23-25). Egiptupita israelïtakuna yarqayämunqampita juk watanöna pasariptinmi, israelïtakunata Jehovä änirqan ëtsata qaranampaq. Peru Moisesqa Jehoväman markäkur o yärakurpis, manam creirqantsu mëtsika millon israelïtakunapaq tsunyaq sitiuchö ëtsata mëpita yuritsimunampaq kaqta. Tsëmi Jehoväqa Moisesta kënö tapurqan: “¿Noqa Jehovä tsëta rurëta mana puëdinqätaku pensanki?” (Nümerus 11:21-23). Jehoväqa Moisesta kënö tapoq cuentam nikarqan: “¿Tsëta rurëta mana puëdinäpaq kaqtaku creinki?”. w25.03 päg. 26 pärrk. 1, 2

¿Diluviuchö llapan pasakunqannötsuraq alläpa sufrimientu witsampis pasakunqa? Bibliaqa manam tsënö kanampaq kaqta nintsu. Jesusqa Noëpa tiempuntam Nunapa Tsurin këkämunqan tiemputawan igualatsirqan. Peru manam nirqantsu Diluviuchö llapan pasakunqankuna o Jehovä arcapa punkunta wichqanqannölla, alläpa sufrimientu witsampis pasakunampaq kaqta (Mat. 24:37-39). Nunakunata ushakätsinampaq kaqta Jehovä willariptinqa, Noëqa Jehoväman markäkunqanta rikätsikurqan arcata rurarninmi (Hebrëus 11:7; 1 Pëdru 3:20). Tsënöllam kanan witsampis, Diospa Gobiernumpita yachakoqkunaqa rurayanqankunawan markäkuyanqanta rikätsikuyänan (Hëch. 3:17-20). Apostol Pëdrum Noëpaq nirqan, “allita rurayänampaq willakoq” nuna kanqanta. Noqantsikpis llapan nunakunatam Diosnintsikpita parlapëta procurantsik, peru kallpachakurpis ushakë shamunan tiempupaqqa manam llapan nunakunata parlapëta puëdishuntsu. w24.05 pägk. 9, 10 pärrk. 3-5

Jehoväpa amïgunkunata respetanqantsikta rikätsikunapaq alkäbu këkänantsik (Rom. 12:10). ¿Imakunata rurartan respetanqantsikta rikätsikuntsik? Salmus 15:4 textuchömi nin Jehoväpa wayinchö këkaqkunaqa perdiyänan kaptimpis änikuyanqanta cumpliyanqanta. Änikunqantsikta mana cumplirqa, wakinkunatam llakitsishwan (Mat. 5:37). Këllaman pensarishun: Jehoväpa amïgunkunaqa, casakurnin äninakuyanqantam cumpliyänan, papä kaqkunapis wamrankunata äniyanqantam cumpliyänan, y Jehoväta y nuna mayintsikta kuyarmi llapan parlanqantsikta cumplinantsik. Y juknöpaqa, Diosta kuyaqkunata respetanqantsikta rikätsikuntsik alli nuna karninmi (Rom. 12:13). Imatapis ruranqantsik hörakuna o jamanqantsik hörakuna pëkunawan juntu kanapaq invitarninqa, pëkunawan masllam reqinakushun y Jehovätapis masmi kuyashun. Tsënöllam pëkunawan alli karninqa, Jehovänö kuyakoq këkantsik. w24.06 päg. 12 pärrk. 15, 16

Jehoväqa humildikunatam rasumpa kaqta musyatsin (Mat. 11:25). Bibliapita yachakur qallanqantsik witsanqa humildim karqantsik, tsëmi jukkuna yachatsimashqa kushishqa chaskikurqantsik (Hëch. 8:30, 31). Tsënö karpis, allim cuidakunantsik orgullösu mana tikrakurinapaq. Orgullösu karqa kikintsik pensanqantsik mas alli kanqantam pensashun, y Biblia ninqanta y dirigimaqnintsikkuna niyanqantaqa manam valorashuntsu. ¿Imaraq yanapamäshun imëpis humildi kanapaq? Teytantsik Jehovä alläpa poderösu kanqanta yarpanqantsikmi (Sal. 8:3, 4). Tsënöllam humildi kanantsikpaq y dirigimaqnintsikkunawan yachatsimanqantsikkunata chaskikunapaq Jehoväman mañakunantsik. Pëmi yanapamäshun pensanqantsikkunata puntaman churanantsikpa rantin, Bibliawan y dirigimaqnintsikkunawan yachatsimanqantsikkunata puntaman churanapaq. Bibliata leyirninqa, humildikunata Jehovä kuyanqanta y orgullösukunata alläpa chikinqanta entiendita procurë. Y ima cargutapis chaskirqa, orgullösu mana tikrakurinëkipaq alli cuidakuy. w24.07 päg. 10 pärrk. 8, 9

1919 watachö, Jesusqa ciëlupaq akrashqa wallkalla grüputa utilizarqan imanö yachatsikuyänampaq kaqta patsätsiyänampaq y wakin sirweqninkunata Diospita yachatsiyänampaq (Lüc. 12:42). Pëkuna rurayanqanta Jehovä bendicikanqanqa clärum rikakun (Is. 65:13, 14). Yachatsikunapaq alli patsätsishqa mana kaptinqa, manam Jesus mandamanqantsikta cumplita puëdishwantsu (Mat. 28:19, 20). Këllaman pensarishun: mëkunachö yachatsikunapaq patsätsishqa mana kaptinqa, munanqantsikchöchi lluta yachatsikushwan. Y wakin sitiukunallachömi kutin kutin yachatsikushwan, y wakinmanqa manachi chashwantsu. ¿Imanö mastan yanapamantsik alli patsätsishqa këkanqantsik? Kanan witsampis Jesusqa, unë witsanchö qateqninkuna yachatsikuyänampaq patsätsinqannöllam ordenädu yachatsikuyänampaq Diospa sirweqninkunata patsätsin. w24.04 pägk. 8, 9 pärrk. 2-4

Adanwan Ëva jutsata rurayashqa kayaptinmi, wamrankuna Cainqa jutsa ruraqllana yurikurqan. Pëpaqmi Bibliachöqa nin “ruranqankuna mana alli” kanqanta (1 Juan 3:12). Tsëchi Jehoväqa, qarëkunata rupatsiptin chaskirqantsu. Y Cainqa corregikunampa rantinmi, “alläpa cölerakur mana alli sientikurqan”. ¿Imatataq Jehovä rurarqan? Cambiananta munarmi corregirqan (Gen. 4:3-7). Jehoväqa kuyëllapam entienditsirqan allikunata ruraptinqa bendicinampaq kaqta, peru mana cambiarqa mana allikunaman chänampaq kaqta. Peru Cainqa, arrepentikunampaq Jehovä yanapëkaptimpis manam chaskikurqantsu. Tsënö kanqanta rikar, ¿imatataq Jehovä rurarqan? ¿“Kananqa mananam pitapis arrepentikunampaq yanapashaqnatsu” nirku pensarqan? Manam. w24.08 päg. 10 pärr. 8

Israelïtakunaqa Jehovä chätsinqan markachömi atska watapa kawayänan karqan. Y ¿imanötan tsë markakunaqa karqan? ¡Alläpa shumaqmi karqan y imëkapis allipam wayoq! Tsë nacionpaqmi Moises kënö nirqan: “Shumaq y jatun listu markakunata[m] entregayäshunki. Tsë markakunachöqa, pözukunata, üvas plantakunata, olïvu plantakunata y imëkatapis listullatanam tariyanki” (Deut. 6:10, 11). Peru ¿imatataq israelïtakuna rurayänan karqan tsë markachö mëtsika watapa kawayänampaq? Jehovätam cäsukuyänan karqan. Moisesmi consejarqan Jehovä mandakunqankunata wiyakuyänampaq y mana dejayänampaq. Peru israelïtakunaqa manam cäsukuyarqantsu (Deut. 30:20). Tsëmi tiempuwanqa asiriukuna prësur apakuyarqan y tsëpitanam babiloniukuna (2 Rëy. 17:6-8, 13, 14; 2 Crön. 36:15-17, 20). w24.11 päg. 9 pärrk. 5, 6

Wakin nunakunaqa pensayan Jesusman ‘criyicurlla’ y salvaqnintanö rikarninlla salvakuyänampaq kaqtam (Juan 6:29, Señor Jesucristopa Alli Willacuynin Conchucos Norte Biblia). Peru Jesus parlapanqan nunakunapis Jesusmanqa creiyaqmi, peru tsëpitam dejariyarqan. ¿Imanirtan dejariyarqan? Wakin nunakunaqa Jesuspa qateqnin këta munayaq, munayanqan kaqkunata rurananta munarllam; milagrukunata rurananta, grätis mikuyta y munayanqan kaqkunata yachatsinanllatam munayaq. Peru Jesuspa rasumpa qateqnin kayänampaqqa, manam tsëllatatsu rurayänan karqan. Pëqa manam nunakunata alliyätseqllatsu ni mikuynin qaraqllatsu kë Patsaman shamurqan. Jesuspa rasumpa discïpulun kayänampaqqa, pë yachatsikunqankunatam cäsukuyänan karqan y yachatsikunqannömi kawayänan karqan (Juan 5:40). w24.12 päg. 12 pärrk. 12, 13

¿Imatataq juk casädu ollqu ruranman warminta penqakatseq o llakitseq rurëkunata dejanampaq? Jesuspitam yachakunan. Pëqa, mana casädu karpis shumaqmi discïpulunkunata tratarqan, pëpitam casädu ollqu yachakuyta puëdin. Apostolninkunata Jesus shumaq parlapanqampita y tratanqampita casädu ollqu imata yachakunqanta rikärishun. Jesusqa kuyëpam y respëtuwanmi apostolninkunata tratarqan. Manam llutaqa imëpis qayapaqtsu. Pëkunapita mas poderösu karpis, manam imatapis rurayänampaq obligaqtsu ni mana väleqtanöqa sientitseqtsu. Tsëpa rantinqa, humildi karmi llapankunata shumaq yanapaq (Juan 13:12-17). Discïpulunkunatam kënö nirqan: “Noqaqa yachanëpaq y humildim kä. [...] Noqapita yachakuyë. Tsëta rurarqa yamë këtam tariyanki” (Mat. 11:28-30). Yachanëpaq nunaqa manam dëbiltsu, tsëpa rantinqa allim geniunta controlëta yachan y manam imatapis rasllaqa cölerakuntsu. w25.01 päg. 10 pärrk. 10, 11

Mana alli tiempuchömi kawantsik y capazchi mas watakuna pasaptinqa wananqantsikkunata faltapakur qallëkushun. Capazchi polïtica asuntuchö problëmakuna kaptin, guërrakuna kaptin, ima desgraciapis pasakuptin o muyakoq o shukukoq qeshyakuna kaptin trabäjupita qarqaramashwan o cösasnintsikkunata y hasta wayintsiktapis perdirishwan. Tsëkuna pasamashqaqa, ¿imanöraq Jehovä yanapamänapaq kaqman confiakunqantsikta rikätsikushwan? Tsëkunapa pasarqa, imanö sientikunqantsikta y yarpachakunqantsikkunatam Jehoväta willanantsik. Jehoväta mañakushun imatapis allita decidinapaq, alläpa mana yarpachakunapaq y tranquïlu sientikunantsikpaq yanapëkamänapaq (Lücas 12:29-31). Tsënölla rogakushun tarinqantsikkunallawan kushishqa kanantsikpaq yanapëkamänapaq (1 Tim. 6:7, 8). Y pasëkanqantsik asuntupaq consëjukunata publicacionnintsikkunachö ashishun. Wakinkunaqa pasëkäyanqan asuntukunapaq consëjukunata tariyashqa videukunachö y jw.org päginachömi. w25.03 pägk. 28, 29 pärrk. 10, 11

Jehovämi decidishqa karqan juk nacionkunapita nunakuna cristiänu tikrayänampaq, tsëmi apostol Pëdruta mandarqan Corneliuta yachatsinampaq. Cornelium mana judïu kaq nunakunapitaqa puntata cristiänu tikranan karqan. Judïukunaqa manam juk nacion nunakunawanqa juntakäyaqllatsu, tsëchi Pëdrupaqqa Corneliuta yachatsinanqa fäciltsu karqan. Peru Jehovä imata munanqanta entiendirirqa, pë pensanqannönam pensarqan. Tsëmi Corneliuta yachatsinampaq Jehovä mandaptinqa upälla ëwarqan (Hëch. 10:28, 29). Y Corneliuta y wayinchö llapan kaqkunatam yachatsirqan, y pëkunaqa bautizakuriyarqanmi (Hëch. 10:21-23, 34, 35, 44-48). Tiempuwannam apostol Pëdruqa cristiänu mayinkunata kënö consejarqan: “Llapëkipis juk pensëyoqlla kayë” (1 Pë. 3:8). Llapantsikpis juk pensëyoqlla kanapaqqa Jehovänömi pensanantsik, y Jehovä pensanqankunaqa Palabran Bibliachömi qellqarëkan. w25.03 pägk. 9, 10 pärrk. 7, 8

Kanan witsan nunakunaqa manam Jehovä mandakunqanta ichikllapis cäsukuyta munayantsu (Prov. 17:15). Tsëmi pëkunanö pensar mana qallëkunapaq o Jehovä Diosnintsikta sirwita mana dejanapaq, Bibliata alli yachakunantsik. Apostol Pablum hebreu cristiänukunata nirqan poqu cristiänu këman chäyänampaq kallpachakuyänampaq, y tsëtam noqantsikpis ruranantsik. ¿Imanötan rurashwan? Allim kallpachakunantsik Bibliata alli yachakunapaq y Jehovä pensanqannö pensanapaq. Tsëtaqa bautizakushqana këkarpis rurarmi sïguinantsik. Tsëllaraq o unëna bautizakushqa karpis, Bibliata seguïdu leyinapaq y estudianapaqmi kallpachakunantsik (Sal. 1:2). Tsëpaqqa yanapamäshun tiempuntsikta alli patsätsinqantsikmi, tsënöpam Jehovä Diosnintsikman maslla markäkushun o yärakushun (Heb. 11:1, 6). w24.09 päg. 10 pärrk. 7, 8

Jehovä rasumpa kawanqanta creirninqa, Josënömi llakitsita munashuntsu. Josëqa Jehovä rasumpa kawanqantam següru karqan, tsëmi llakitsita mana munar jutsata rurarqantsu (Gen. 39:9). Jehovä rasumpa kawanqanta següru kanantsikpaqqa, seguïdum pëman mañakunantsik y Palabran Bibliatam estudianantsik. Tsëmi yanapamäshun pëwan mas amïgu kanantsikpaq. Y Josënömi Jehoväpa amïgun karqa, llakitsita munashuntsu. Jehovä kawaq Dios kanqanta qonqëkoqkunaqa fäcil-llam sirwita dejariyanman. Tsunyaq jirkachö këkäyaptin israelïtakuna imanö kayanqampaq parlarishun. Pëkunaqa allim musyayarqan Jehovä rasumpa Dios kanqanta, peru manam confiakuyarqannatsu yanapanampaq kaqmanqa(Ex. 17:2, 7). Tsënö pensarmi Jehovä Diosta cäsukuyarqannatsu. Noqantsikqa manam pëkunanö këta munantsiktsu (Heb. 3:12). w24.06 päg. 24 pärrk. 14, 15

Ushanan tiempukunachönam kawëkantsik, tsëmi masraq problëmakunapa y llakikuykunapa pasashun y waqashun. Jehoväqa musyanmi ëka kuti waqanqëkita. Tsëmi llakikuykunapa pasanqëki hörakunaqa, imanö sientikunqëkita llapan shonquykiwan Jehoväta willanëki. Ama wawqi panikunapita rakikëtsu; pëkunaqa kuyayäshunkim. Consolashunëkipaq Diosnintsikpa Palabranta leyirnin sïgui. Y yarpë, ushananyaq tsarakuptikiqa, Jehovä Diosnintsikqa bendicishunkim. Chäramunqanam llakikuypita manana waqar kawakunantsik tiempu (Apo. 21:4). Shumaq Patsachöqa, ¡kushikuyllapitanam waqashun! w24.12 päg. 20 pärr. 3; päg. 25 pärr. 19

Testïgunkuna kanapaqmi Jehoväqa akramarquntsik (Is. 43:10-11). Y yanapamänapaqmi änimantsik, tsëmi valienti këta puëdishun. Imanö yanapamanqantsikta chuskullata rikärishun. Juk, yachatsikunqantsik hörakunam noqantsikwan Jesus këkan (Mat. 28:18-20). Ishkë, Jehoväqa angelkunatam yanapamänantsikpaq churashqa (Apoc. 14:6). Kima, Jehoväqa yachakunqantsikta yarpänapaqmi santu espïritunwan yanapamantsik (Juan 14:25, 26). Y chusku, wawqi panintsikkunatam churamushqa yanapamänapaq. Wawqi panikuna y Jehovä yanapamashqam valienti kashun, y tsënöpam mana mantsapakur nunakunata yachatsirnin sïguishun. Nunakunata wayinkunachö mana tarirqa, ¿qelanäkurinkiku? Tsëqa, kënömi pensanëki: “Kë hörakunaqa nunakuna, ¿mëchötan këkäyan? ¿Trabajëkäyanku o rantipakuykäyanku?” (Hëch. 16:13). Tsëqa, ¿manatsuraq cällikunachö yachatsikuyta puëdinkiman? w24.04 päg. 17 pärrk. 10, 11

Juk wawqi anciänu kanampaqqa, familianmi Diospa kaqchö alli kanan. Tsëmi Diosnintsikqa munan juk wawqi ‘familianta shumaq dirigeq’ kananta. Manam familianta descuidanantsu, kuyakoqmi kanan y Diosnintsikta shumaq sirwiyänampaqmi yanapanan. Tsëta mana rurarqa, manam anciänu këta puëdintsu. Wamrankunatapis kuyëllapam yachatsinan ‘cäsukoq y alli portakoq kayänampaq’. Musyanqantsiknöpis, wamrakunataqa asikuy y pukllëmi gustan (1 Tim. 3:4). Peru shumaq yachatsiyaptinqa, cäsukoq, respetakoq y alli portakoqmi kayanqa. Tsënöllam yanapanan Jehoväpa amïgun kayänampaq, Biblia ninqannö kawakuyänampaq y bautizakuyänampaq. w24.11 päg. 22 pärrk. 10, 11

Jehovä yanapamanqantsikta valorashun y tsëqa masmi pëman confiakushun (1 Cor. 3:9). Jehoväqa manam ruranqëkita jukkuna rurayanqankunawan igualatsintsu. Pëqa musyanmi shonquykichö imanö kanqëkita, y musyanmi Tsurin wanunanta permitinqampita alläpa agradecikunqëkita (1 Sam. 16:7; Mar. 12:41-44). Yachakunqantsiknöpis Jesus wanunqanrëkurmi Jehoväqa jutsantsikpita perdonamantsik, amïgun këta puëdintsik y mana wanuypa kawakuyta shuyarantsik. Jehovä Diosnintsik kuyamanqantsikpita imëpis agradecikushun. Pëqa kuyamarnintsikmi imëka bendicionkunata chaskinapaq patsätsimurqan (1 Juan 4:19). Tsënöllam, kuyamarnintsik wanunqampita Jesustapis agradecikunantsik. w25.01 päg. 31 pärrk. 16-18

Imëllapis tsënö pensashqa karqa, Salmus librupa 73 capïtulunta qellqaq nuna imanö sientikunqanman pensë. Pëqa rikarqan Jehoväta mana sirweq nunakuna imëkayoq kayanqanta, alli saloryoqta y kushishqa kawakoqtanömi (Sal. 73:3-5, 12). Alli kawakoqtanö rikarmi Jehoväta sirwinqan imapaqpis mana välishqa kanqanta pensarqan. Tsëkunallaman alläpa pensarmi ‘cada junaq llakishqa kakurqan’ (Sal. 73:13, 14). Peru ¿imatan yanaparqan? Kë Salmus qellqaq nunaqa Jehoväpa templunmanmi ëwarqan (Sal. 73:16-18). Y tsëchömi mas tranquïlu sientikur alli pensëta puëdirqan. Y entiendirirqanmi mana alli kawakoq nunakunaqa Diosnintsik änikunqan bendicionkunata shamoq tiempuchö mana chaskiyänampaq kaqta. Y clärum entiendirqan Jehoväta sirwinampaq decidinqanqa alli kashqa kanqanta, tsënöpam yarpachakurqannatsu y Jehoväta sirwir sïguinampaqmi mas kallpayoq sientikurqan (Sal. 73:23-28). w24.10 päg. 27 pärrk. 11, 12

Noqantsiktam Jehoväqa testïgun kanantsikpaq akramarquntsik (Is. 43:10-12). Jehoväpa Testïgunkunata Pushaqkunam unëna cartakayämunqanchö kënö niyämurqan: “Jehoväpa testïgunnö reqishqa këqa, manam imawampis igualantsu”. Tsëta entiendirinapaq këman pensarishun: juk nuna mana kaqpita acusamashqantsik kaptin juiciuchö këkashwan. ¿Imanö nunataraq akrashwan defendimänantsikpaq? Capazchi akrashwan reqinqantsik, confiakunqantsik y llapankunapis respetayanqan nunata, tsënöpam llapan ninqankunata creiyanqa. Tsënöllam Teytantsik Jehoväpis noqantsikta akramarquntsik Testïgun kanantsikpaq. Y ¿imanirtan akramarquntsik? Noqantsikman confiakurninmi. Tsëmi noqantsikpaqqa, Jehoväpa testïgun këqa alläpa shumaq. Y jutimpaq imëka mana allikunata parlayanqampitam rasumpa kaqta willakurnin defendita puëdintsik. Tsënömi Jehoväpa testïgun kanqantsiktaqa alli cumplikantsik (Rom. 10:13-15). w24.05 päg. 18 pärr. 13

Jesusqa wakinkunata yanaparmi rasumpa kushishqa sientikoq. Peru Jesusqa manam yachatsirqanllatsu, sinöqa llapan wanayanqankunachömi yanaparqan. Tsëmi milagruta rurar ichiklla mikuyta miratsirqan y discïpulunkunatam nirqan nunakunata repartiyänampaq (Mar. 6:41). Tsënömi discïpulunkunata yachatsirqan wakinkunata yanapayänampaq, siervu ministerialkunapis tsënömi wakinkunata yanapayan. Apostolkunaqa alläpa kushishqachi repartikuyarqan milagruta rurar Jesus miratsinqan mikuyta. Y llapan nunakunam “pacha junta mikuyarqan” (Mar. 6:42). Peru Jesusqa manam tsë kutillatsu nunakunata yanaparqan. Kë Patsachö kanqan tiempuqa, llapan puëdinqanmannömi nunakunata yanaparqan (Mat. 4:23). Jesusqa alläpa kushishqam sientikoq wakinkunata yachatsir y humildi nunakunata yanaparnin. w24.11 päg. 16 pärrk. 10, 11

Kë ‘ushanan tiempukunachöqa’ imëkapis pasakunqam. Tsëmi wawqi panintsikkunaqa maslla yanapanantsikta wanayanqa. Juknöpaqa wawqi panintsikkunata yanapantsik shumaq parlaparnin y Diospa kaqchö alli kayänampaq animarninmi. Këllaman pensarishun: reunionman chäyämuptinqa, alli sientikuyänampaqmi shumaq parlaparnin chaskirinantsik. Tsëmi wawqi panikuna reunionkunaman chäyämuptin shumaq parlapashqaqa, mantsapakuyanqatsu y kuyanqantsiktam sientiyanqa. Anciänukunapis, wawqi panikunatam mana allikunapa pasayanqan hörakuna yanapayan. Tsëmi desgraciakunapa pasayaptin o hospitalman emergencia ëwayaptimpis raslla o saslla yanapayan. Tsënöllam Diospa kaqchö alli kayänampaqpis yanapayan. Anciänukuna yachanëpaq y kuyakoq kayaptin y parlapäyanqanta shumaq wiyayaptinqa imapa pasarpis confianzam willariyanqa, kuyashqam sientikuyanqa y Bibliawan consejayaptimpis kushishqam chaskikuyanqa (1 Tes. 2:7, 8, 11). w24.06 päg. 29 pärrk. 12, 13

Tsurin Jesusta wanutsiyänampaq kaqpita Jehovä mana salvarpis, sufreqta rikarninqa alläpam llakikurqan. ¿Imanötan musyantsik? Pëqa kamamarquntsik sentimientuyoqtam, tsëwanmi entiendintsik pëpis sentimientuyoq kanqanta. Y Bibliachöqa clärum nimantsik, wakin nunakunaqa rurayanqankunawan Teyta Diosta ‘llakitsiyanqanta’ (Sal. 78:40, 41). Jehoväqa, ¿imanöraq sientikurqan Tsurinta maqayaptin y wanutsiyaptin? Alläpachi llakikurqan. ¿Imanötan entiendintsik Jehovä alläpa kuyamanqantsikta? Noqantsikrëkur Tsurin wanunanta permitinqanwanmi. Pëqa familiantsikpita y mas alli kaq amïguntsikpitapis masmi kuyamantsik (Romänus 8:32, 38, 39). Jehoväqa, kikintsik kuyakunqantsikpitapis masmi kuyamantsik. Këllaman pensari: ¿munankiku imëyaqpis mana wanuypa kawakuyta?, ¿munankiku jutsëkikunapita perdonashqa këta? Jehovä Diosnintsikqa qampitapis masmi tsëkunata munan. Peru tsëpaqqa Jesus wanunqanmanmi markäkunantsik o yärakunantsik y mandakunqankunatam cäsukunantsik. Jesus wanunqanwanmi cläru entiendirintsik Diosnintsik alläpa kuyamanqantsikta (Ecl. 3:11). w25.01 pägk. 22, 23 pärrk. 8, 9

Imatapis decidinapaqqa, höraqa yanapamantsik wiyanqantsik, rikanqantsik o imanö sientikunqantsikmi. Höraqa wiyanqantsik, rikanqantsik o imanö sientikunqantsikqa manam confiakuypaqtsu. Tsënöllam wiyanqantsikllawan, rikanqantsikllawan o imanö sientikunqantsikllawan decidirqa, manam Jehovä munanqannöqa imatapis decidita puëdishuntsu (Ecl. 11:9; Mat. 24:37-39). Peru Jehoväpa consëjunkunaman confiakurqa, pë munanqannömi imatapis decidita puëdishun. Y tsë consëjukunata imëpis cäsukurqa, tranquïlu y kushishqam sientikushun (Sal. 16:8, 9; Is. 48:17, 18). Y manam tsëllatsu, hasta manana wanuypam kawakuyta puëdishun (2 Corintius 4:18). ¿Imanötan musyashwan Jehoväpa consëjunkuna ninqannö kawëkanqantsikta o kikintsikllaman confiakuykanqantsikta? Tsëta musyanapaqqa, kënömi pensanantsik: “Imatapis decidinä kaptinqa, ¿Jehoväpa consëjunkunamanku confiakü o kikï pensanqänöllaku imatapis decidï?”. w25.03 pägk. 20, 21 pärrk. 3, 4

Jehoväta adoranqantsik shumaq rikakunampaqmi puëdinqantsikmannö llapantsik yanapakunantsik, tsëta rikarmi nunakunaqa kikinkunalla Jehoväta adorëta munayanqa. ¿Imanötan rurashwan? Jehovänömi alli kanantsik. Jehoväqa nunakunata manam obligantsu pëta sirwiyänampaq. Tsëpa rantinqa, kuyëllapam yanapan pëta sirwita munayänampaq (Jer. 31:3; Juan 6:44). Jehoväpita yachakoqkuna y alli shonquyoq nunakunaqa, Jehovä imanö kanqanta cuentata qokurirqa kikinkunallam sirwita munayanqa. Tsëqa, nunakuna noqantsikwan juntu Jehoväta adorëta munayänampaq, ¿imanö nunatan kashwan? Nunakuna noqantsikwan juntu Jehoväta adorëta munayänampaqqa, wawqi panintsikkunatam kuyëpa y shumaq tratanantsik. Unë Corintu markachö cristiänukuna reunionta rurayaptinqa, capazchi mana creikoq nunakunapis tsë reunionkunaman ëwayarqan, y kuyakoq kayanqanta rikarninchi kënö niyarqan: “Rasumpa[m] Teyta Diosqa qamkunawan këkan” (1 Cor. 14:24, 25; Zac. 8:23). Noqantsikpis, reunionkunaman shamoqkuna tsënö niyänantam munantsik. Y tsëpaqqa kanan junaqpaq textu ninqan consëjutam cäsukunantsik. w24.04 pägk. 23, 24 pärrk. 16, 17