¿Imatam bibliaqa nin angelkunamanta?

Jehova Diosqa munanmi angelkunamanta yachananchikta, bibliaqa ninmi paykunaqa ‘Diospa churin’ kasqankuta (Job 38:7, willakuy). ¿Imatam bibliaqa nin angelkunamanta? ¿Imaynatam angelkunaqa yanapawanchik? ¿Llapallan angelkunachu Diosta servinku?

1. ¿Imaynataq angelkunaqa kanku?

Manaraq kay pachata unanchachkaspanmi Jehova Diosqa angelkunata unancharqa. Paykunaqa mana rikuy atina espiritum kanku (Hebreos 1:14). Angelkunaqa wara-waranqantinmi kanku, hinaspapas manam chaynallachu kanku (Apocalipsis 5:11). Paykunaqa Jehova Diostam llapanpi kasukunku (Salmos 103:20). Ñawpaq tiempopim Diosqa nisqankunata willakunankupaq chaynataq runankunata yanapanankupaq angelninkunata kachamurqa. Kunanpas Diosmanta yachay munaqkunata tarinapaqmi angelkunaqa yanapakuchkanku.

2. ¿Pikunataq kanku satanaswan demoniokunaqa?

Wakin angelkunaqa Jehova Diostam qipancharurqaku. Puntatam qipancharurqa diablowan hinaspa satanaswan sutichasqa angel. Paymi kay pachapi llapallan runakunata pantachichkan (Apocalipsis 12:9). Satanasqa yupaychanankuta munaspanmi Adantawan Evata pantarachirqa Diosta qipanchanankupaq. Pantarachirqataqmi wakin angelkunatapas. Chay angelkunam demoniowan sutichasqa kanku. Paykunatam Diosqa kay pachaman qarquramurqa. Manapas unaymantam chinkachisqa kanqaku (leey Apocalipsis 12:9, 12).

3. ¿Imakunawanmi satanaswan demoniokunaqa pantachiwanchik?

Satanaswan demoniokunaqa runakunatam pantachin layqakunawan, brujokunawan, qatipaqkunawan, espiritistakunawan chaynataq chayman rikchakuq tukuy mana allinkunawan. Chaymi wakinqa hampichikunankupaq curanderokunaman, brujokunaman rinku. Wakinñataqmi vidankumanta yachanankupaq horoscopota leenku, suertenkuta qawachikunku. Wakin espiritistakunaqa ninkum wañusqakunawanpas rimasqankuta. Ichaqa satanaspa atiyninwanmi chaytaqa ruwanku. Chaymi Jehova Diosqa niwanchik: “Amam qayaqkunamanqa nitaq qawaqkunamanqa rinkichikchu”, nispa (Levitico 19:31). Chaynataqa niwanchik satanaswan demoniokuna mana ñakarichiwananchikpaqmi.

ASTAWAN YACHAYKUSUN

4. Angelkunaqa runakunatam yanapanku Diosmanta yachanankupaq

Angelkunaqa manam runakunamanqa kikinkuchu Diosmantaqa yachachinku, aswanqa Diosmanta willakuqkunatam yanapanku yachay munaq runakunata tarinankupaq. Leeychik Apocalipsis 14:6, 7 hinaspa qatiqninmanta rimariychik:

• ¿Imanasqataq necesitanchik angelkuna Diosmanta willakusqanchikpi yanapawananchikta?

• Qamtapas angelkunaqa yanapasunkimanmi Diosmanta yachay munaq runakunata tarinaykipaq, ¿imaynam chayta yachaspa tarikunki?

5. Ama riychu brujokunaman nitaq chayman rikchakuqkunamanqa

Satanaswan demoniokunaqa Jehova Diospa enemigonmi kanku, ñuqanchikpaqpas paykunaqa enemigonchikmi. Leeychik Lucas 9:38-42 hinaspa qatiqninmanta rimariychik:

• ¿Imaynatam demoniokunaqa runakunata ñakarichinku?

Demoniokunapa kaqkunata ruwaspanchikqa, wasinchikman yaykuchichkachwanpas hinam kanman, chaytaqa manamá munanchikchu ¿aw? Leeychik Deuteronomio 18:10-12 hinaspa qatiqninmanta rimariychik:

• ¿Imakunawanmi demoniokunaqa runakunata pantachinku? ¿Llaqtaykipipas leemusqanchikpi kaqkunataqa ruwankuchu? ¿Imakunatawanraqmi ruwanku?

• Chaykunata mana ruwananchikpaq Diospa niwasqanchikqa ¿allinchu? ¿Imanasqa?

VIDEOTA qawaykuychik hinaspa qatiqninmanta rimariychik:

VIDEO: “Diablopa contranpi churakuychik” (5:02)

• Mana allinmanta harkananpaq wawanpa makinman Rosapa watarusqanqa, ¿allinninpaqchu karqa? ¿Imanasqa?

• ¿Imatam Rosaqa ruwarqa demoniokuna mana ñakarichinanpaq?

Ñawpaq tiempomantaraqmi Diosta serviqkunaqa demoniokunapa contranpi churakurqaku. Leeychik Hechos 19:19 hinaspa 1 Corintios 10:21, chaymantañataq qatiqninmanta rimariychik:

• Imamantapas harkachikunapaq utaq suerteyuq kanapaq imapas wasikipi kaptinqa, ¿imanasqataq chaykunata kañanayki?

6. Satanasmantawan demoniokunamanta librakuytaqa atichwanmi

Demoniokunapa kamachiqninqa satanasmi, Diosman sunqu angelkunapa kamachiqninñataqmi Miguel, payqa Jesusmi. ¿Mayna atiyniyuqtaq Miguelqa? Leeychik Apocalipsis 12:7-9 hinaspa qatiqninmanta rimariychik:

• Pikunataq aswan atiyniyuqqa, ¿Miguelwan Diosta kasukuq angelkunachu, icha satanaswan demoniokunachu?

• Jesuspa qatiqninkunaqa ¿manchakunanchikchu satanastawan demoniokunata?

Satanaspa hinaspa demoniokunapa contranpi churakuytaqa atiwaqmi. Leeychik Santiago 4:7 hinaspa qatiqninmanta rimariychik:

• ¿Imatam ruwanayki satanaswan demoniokuna mana imanasunaykipaq?

YUYARIYKUSUN

Angelkunaqa yanapawanchikmi. Satanaswan demoniokunam ichaqa Diospa enemigon kanku, paykunaqa espiritistakunapa, brujokunapa ruwasqankuwanmi runakunata pantachin.

¿Ima niwaqtaq?

• ¿Imatam kasukuq angelkunaqa ruwachkanku llampu sunquyuq runakuna Diosmanta yachanankupaq?

• ¿Pikunataq kanku satanaswan demoniokunaqa?

• ¿Imanasqataq brujokunamanqa, curanderokunamanqa, utaq chayman rikchakuqkunamanqa mana rinaykichu?

ASTAWAN YACHANAYKIPAQ

Jesusqa angelkunata kamachiq Miguel kasqanmanta yachanaykipaq kay yachachikuyta leey.

“¿Mayqin angeltaq Miguelqa?” (Tarinkim jw.org nisqanpi)

Satanasqa kanmi, manam mana allinwan tupachisqallankuchu. Chaymanta kaypi yachaykuy.

“¿Imatam biblia nin diablomanta?” (Tarinkim jw.org nisqanpi)

Kaypi leey imaynata huk warmi demoniokunamanta librakusqanmanta.

“Llakisqam karqani, kunanqa kusisqañam kawsakuni” (Willakuq, 1 julio 1993)

Satanas layqakunawan runakunata imaynata pantachisqanmanta kaypi leey.

“¿Ima nintaq bibliaqa adivinaqkunamanta hinaspa layqa ruwaqkunamanta?” (Tarinkim jw.org nisqanpi)