Bautizakunaykipaq kallpanchakuy

Jesusqa yachachirqam paypa qatiqnin kanapaqqa puntata bautizakunamanta (leey Mateo 28:19, 20). ¿Imaynatataq bautizakuna? ¿Imatataq ruwana bautizakunapaqqa?

1. ¿Imaynatataq bautizakuna?

Griego rimaypi bautismo ninanqa “yaku ukuman challpuy” ninanmi. Jesustapas Jordan mayupi bautizaspankum yaku ukuman enteron cuerponta challpurqaku, chaymi bibliapi nin bautizakuruspan ‘yakumanta lluqsisqanta’ (Marcos 1:9, 10). Kunanpas Jesusta qatikuqkunaqa bautizakuq runapa enteron cuerpontam yaku ukuman challpunku.

2. ¿Imapaqtaq tantiakunan bautizakuyta munaqqa?

Pipas bautizakunanpaqqa Diospaqña kawsakunanpaqmi tantiakunan. Chaypaqqa manaraq bautizakuchkaspanmi sapallanpi tukuy sunqunwan Jehova Diosta mañakuspan ninan payllata wiña-wiñaypaq servinanpaq, hinaspa munayninta puntata ruwananpaq. Chaymantapas qatipakunanmi Jesuspa imayna kawsakusqanta hinaspa yachachikuyninkunatapas kasukunanmi. Jesusqa nirqamá: “Pipas qatiwayta munaqqa amaña kikillanpaq kawsaspayá [...] hinalla qatiwachun”, nispa (Mateo 16:24). Pipas Diosllapaqña kawsakunanpaq tantiakuspanqa hinaspa bautizakuspanqa Jehova Diosman asuykuspanmi serviqninkunawan huk sunqulla yupaychanqa.

3. ¿Imatataq ruwana bautizakunapaqqa?

Bautizakunapaqqa Jehova Diosmanta yachaspam paypi hapipakuna (leey Hebreos 11:6). Jehova Diosmanta astawan yachaspaqa paypi hapipakuspam kuyasun. Kuyasqanchikraykum paymanta willakusun hinaspa kamachikuyninkunata kasukuspa kawsakusun (2 Timoteo 4:2; 1 Juan 5:3). ‘Jehova Diospa munasqanman hinaña kawsakuspaqa’ atichwanmi payllapaqña kawsakunapaq tantiakuspa bautizakuyta (Colosenses 1:9, 10).a

ASTAWAN YACHAYKUSUN

4. Jesuspa bautizakusqanmanta yachaykusun

Jesuspa imayna bautizakusqanmanta yachanapaq leeychik Mateo 3:13-17, hinaspa qatiqninmanta rimariychik:

• ¿Jesusqa wawallaraqchu bautizakurqa?

• ¿Umallanmanchu yakuta talliykurqaku, icha imaynatam bautizakurqa?

Jesusqa bautizakuruspanmi Diospa kamachisqanman hina ruwayta qallaykurqa. Leeychik Lucas 3:21-23 hinaspa Juan 6:38, chaymantañataq qatiqninmanta rimariychik:

• Bautizakurusqan qipamanqa, ¿imata ruwananpaqmi Jesusqa astawan kallpanchakurqa?

5. Bautizakuytaqa atiwaqmi

Jehova Diosllapaqña kawsakunaykipaq tantiakuyta hinaspa bautizakuytaqa manchapakunkipaschá. Ichaqa Jehova Diosmanta astawan yachaspaqa manañam manchapakunkichu. Bautizasqakunapa ima nisqankuta yachanaykipaq VIDEOTA qawaykuychik.

VIDEO: Jehova Diosta astawan kuyanaykipaq kallpanchakuy (1:11)

Leeychik Juan 17:3 hinaspa Santiago 1:5, chaymantañataq qatiqninmanta rimariychik:

• ¿Imatam ruwanan pipas bautizakuyta munaspanqa?

1. Jehova Diostam mañakuspa ninanchik wiña-wiñaypaq payllata servinanchikpaq tantiakusqanchikta.

2. Bautizakusqanchikwanmi iñiqmasinchikkuna yachanqaku Jehova Diosllapaqña kawsakunapaq tantiakusqanchikta.

6. Bautizakuruspaqa Diosta serviqkunawanmi huk sunqulla kanchik

Bautizakuruspanchikqa enteron allpa pachapi iñiqmasinchikkunawanmi aylluntin hinaña kanchik. Ima llaqtamantaña utaq ñawpaqpi imaynaña kaspanchikpas, llapanchikmi Diospi iñisqanchikrayku bibliapa nisqanman hinaña kawsakunchik. Leeychik Salmos 25:14 hinaspa 1 Pedro 2:17, chaymantañataq qatiqninmanta rimariychik:

• Bautizakuruspaqa, ¿pimantaq astawan asuykusun? ¿Iñiqmasinchikkunawanpas imaynam kasun?

YUYARIYKUSUN

Jesuspa qatiqnin kanapaqqa bautizakunanchikmi. Chaypaqqa Jehova Diospim allinta hapipakunanchik, kamachikuyninkunatam kasukunanchik hinaspapas mañakuspam ninanchik payllapaqña kawsakunapaq tantiakusqanchikta.

¿Ima niwaqtaq?

• ¿Imaynatataq bautizakuna? ¿Imanasqataq bautizakuna?

• ¿Jehova Diosllapaqña kawsakunapaq tantiakuyqa chaynallachu bautizakuywan?

• Jehova Diosllapaqña kawsakunapaq tantiakuspa bautizakunapaqqa, ¿imakunatam ruwananchik?

ASTAWAN YACHANAYKIPAQ

Bautismomanta runakuna ima nisqankuta chaynataq bibliapi ima nisqantapas kaypi yachaykuy.

“¿Ima nintaq bibliaqa bautizakuymanta?” (Tarinkim jw.org nisqanpi)

¿Imakunatam bautizakunaykipaq ruwanayki? Chaymanta yachanaykipaq kay yachachikuyta leey.

“¿Imam yanapasunki bautizakunaykipaq?” (Willakuq, marzo 2020)

Kay runa bautizakunanpaq kikin tantiakusqanmanta yachanaykipaq kaypi leey.

“Cheqap yachachikuymanta kikiy yachanaytam munarqaku” (Willakuq, marzo-abril 2013)

¿Imanasqataq bautizakuyqa ancha allin? ¿Imakunatam ruwanayki bautizakunaykipaq? Chaymanta kaypi yachay.

“¿Bautizakunayñachu?” (Musu-sipaskunapa yachay munasqankumanta (2 kaq), 37 kaq yachachikuy)