Diosmi salvawanchik Mesiaswan

“Imaynam Adanpa huchallikusqanwan llapallan runa wañunchik, chaynallataqmi Cristopi iñiqkunapas llapallanchik kawsarimusunchik.” (1 COR. 15:22.)

1, 2. a) ¿Imatam rurarqaku Jesusta reqsiruspanku Andres hinaspa Felipe? b) ¿Imanasqataq punta qatiqninkunamantaqa ñoqanchikpaq achka razonkuna kachkan Jesuspa Mesias kasqanpi creenapaq?

ANDRESQA segurom karqa Jesusqa Diospa Akllasqan otaq Nombrasqan kasqanmanta. Chaymi wawqen Pedrota nirqa: “Mesiastam tariramuniku”, nispa. Felipepas amistadnin Natanaelta maskaruspan nirqa: “Tariramunikum huk runata, paymantam Moisespas chaynataq Diosmanta willakuqkunapas qellqarqa. Payqariki Joseypa churin Nazaret llaqtayoq Jesusmi”, nispa (Juan 1:40, 41, 45).

² ¿Convencisqachu kachkanki Jesus Mesias hinaspa ‘Salvaqninchik’ kasqanmanta? (Heb. 2:10.) Punta cristianokunamantaqa aswan achka razonkunam kachkan Jesuspa Mesias kasqanpi creenapaq. Bibliapi willakuykunam sutillata yachachiwanchik, nacesqanmanta kawsarimunankama Mesias kasqanmanta Jesus qawachisqanta (leey Juan 20:30, 31). Chaynataq, Bibliaqa qawachinmi hanaq pachapipas Jesusqa Mesias kasqanwan cumplinanta (Juan 6:40; leey 1 Corintios 15:22). Ñoqanchikpas nichwanmi: “Mesiastam tariramuniku” nispa. Qawasun imaynatam Jesuspa punta qatiqninkuna yacharurqaku Mesiasta tarirusqankumanta.

Pisi-pisimantam ‘pakasqa kaqmantaqa’ yacharqaku

3, 4. a) ¿Imaynatam Jesuspa punta qatiqninkuna yacharqaku Mesias kasqanmanta? b) ¿Imanasqam Mesiasmanta willakuy Jesusllapi cumplikurqa?

³ Jesuspa punta qatiqninkuna, ¿imanasqataq seguro karqaku pay Mesias kasqanmanta? Diosmi profetankunawan willachirqaña Jesuspa Mesias kasqanta imaynata yachanankupaq. Huk rikchanachiywan qawasun. Bibliamanta yachaysapa runam willakun marmolmanta monumento imayna rurasqa kananmanta. Nisqanman hinaqa, mana reqsinakuq runakunam monumentopa huk partenta sapakama apamuspa huñunakunmanku. ¿Imatam nichwan chay marmolpa partenkunata tupanachiptinku monumento qespiruptinqa? Piensanchikmanchá huk runa monumentopa partenkuna imayna kananmanta dibujaruspan sapakamaman apachisqanta. Mesiasmanta willakuykunapas monumentopa partenkuna hinam, sapa willakuymi Mesiasta reqsinapaq ancha allin karqa.

⁴ ¿Pipas qonqayllamanta cumplirunmanchu Mesiasmanta willakuykunata? Huk yachaysapa runapa nisqanman hinaqa, manam chayqa atikunmanchu. Chay runaqa nirqam Mesiasmanta willakuywan “lliw runakunapa kawsasqanpi Jesuslla” cumplisqanta.

5, 6. a) ¿Imaynatam Satanaspa contranpi willakuy cumplikunqa? b) ¿Imaynatam Diosqa qawachirqaña prometesqa ‘miray’ chayamunanmanta?

⁵ Mesiasmanta willakuykunam sapichasqa kachkan ‘pakasqa kaq’ willakuypi (Col. 1:26, 27; Gen. 3:15). Chay pakasqa kaqmanta willakuyqa achkam, allinmi hanaq pachapi kaqkunapaqwan kay Pachapi kaqkunapaqpas. Huknin willakuymi ‘ñawpaqmantaraq kaq culebrapa’ otaq Satanaspa contranpi karqa, paypa rurasqanmantam huchapa hinaspa wañuypa makinpi kanchik (Apo. 12:9). ¿Imaynatam chay willakuy cumplikunman? Diosmi nirqa ‘culebrapa’ umanta ‘warmipa’ ‘miraynin’ chamchananta, chaynapim mana kasukuyta hinaspa huchatawan wañuyta rikurichiqta chinkachinqa. Ichaqa manaraq chayta rurachkaptinmi, Diosqa saqenan karqa warmipa ‘mirayninta’ talonninpi Diablo kachunanta.

⁶ Pisi-pisimantam yachakurqa chay ‘miray’ pi kasqanmanta. Qallarinapaq, Abrahanmanmi Jehová Dios prometerqa: “Kasuwasqaykiraykum kay pachapi lliw runakuna miraynikirayku bendecisqa kanqa”, nispa (Gen. 22:18). Tiempo pasaptinmi Moisespas nirqa paymanta aswan atiyniyoq ‘willakuq’ hamunanmanta (Deu. 18:18, 19). Chaymantam Davidta kikin Dios hinaspa willakuqninkunapas nirqa paypa castanmanta Mesias nacemunanta, rantinpi gobiernananta hinaspa gobiernonpas wiñaypaq kananta (2 Sam. 7:12, 16; Jer. 23:5, 6).

Imakunam qawachin Mesias kasqanta

 7. ¿Imanasqataq ninchik Jesusqa ‘warmipa’ miraynin kasqanta?

⁷ Prometesqa ‘mirayqa’ ‘warmimanta’ otaq Diosta kasukuq angelkunamantam rikurimunan karqa. Chaymi Diospa sapallan Churin otaq punta kaq angel, ‘menoschakuspa’ hanaq pachapi kawsakuyninta saqemurqa hinaspa mana huchayoq nacerqa (Fili. 2:5-7, NM; Juan 1:14). Mariata ‘Diospa atiynin puyu hina pampaykuptinmi’ “Diospa Churinwan” Jesus sutichasqa karqa (Luc. 1:35).

 8. ¿Mesiasmanta ima willakuykunawanmi Jesus cumplirqa?

⁸ Diospa Palabranqa nirqañam Belenmanta Mesias hamunanta, chaypim Jesus nacerqa (Miq. 5:2). Nirqataqmi haykapi rikurinanta. Chaymi judiokunaqa punta pachak watapi rikchan–rikchanlla karqaku, yacharqakum Mesias rikurimunanta. Chaymi Bautizaq Juanta rikuruspa tapukurqaku: “¿Paychuch Cristo kanman?”, nispa. Ichaqa Juanmi nirqa: ‘Qepay hamuqmi [. . .] ancha atiyniyoqqa’, nispa (Luc. 3:15, 16). 30 watanpim Jesusqa Juanman rirqa bautizananpaq. 29 watam tukuchkarqaña, Bibliapa nisqanman hinaqa chay killakunapim Mesias rikurimunan karqa (Dan. 9:25). Chay watapim Jesusqa Diospa munaynin rurayta qallarirqa, nirqam: “Tiempom chayaramunña. Diospa munaychakunan tiempom hichparamunña”, nispa (Mar. 1:14, 15).

 9. ¿Imamantam Jesusta qatiqkuna seguro karqaku Mesiasmanta mana lliwta entiendespankupas?

⁹ Manam llapankuchu allintaqa piensarqaku. Wakinkum nirqaku Jesus rey kasqanta, ichaqa tiempo pasaptinñam entiendekurqa hanaq pachamanta hinaspa hamuq tiempopi kamachinantaqa (Juan 12:12-16; 16:12, 13; Hech. 2:32-36). Chayna kaptinpas, pi kasqanmanta qatiqninkunata tapuptinmi, Pedro mana iskayrayaspan nirqa: “Qamqa kanki kawsaq Diospa Churin Cristom”, nispa (Mat. 16:13-16). Yaqa chaynatam Pedro nirqa Jesuspa yachachisqanmanta piñakuruspanku runakuna karunchakuptinkupas (leey Juan 6:68, 69).

Mesiastam kasukunanku karqa

10. ¿Imanasqataq Diosqa kamachirqa Churinta kasukunankupaq?

¹⁰ Diospa sapallan Churinmi hanaq pachapi kaspan ancha atiyniyoq karqa, Diospa sutinpim kay Pachaman ‘hamurqa’ (Juan 16:27, 28). Chaymi nirqa: ‘Kay yachachisqayqa manam ñoqapachu aswanqa kachamuwaqniypam’, nispa (Juan 7:16). Jesusta qatiqkuna revelacionpi qawaptinkum, Jehová Dios nirqa Akllasqa kasqanta hinaspam kamachirqa: “Paytayá uyariychik”, nispa (Luc. 9:35). Arí, qatiqninkunaqa kasukunankum karqa. Iñiyniyoq kaspapas allinkunatam rurananku karqa, chaynapim Diospa favorninta hinaspa wiñay kawsayta tarinmanku (Juan 3:16, 35, 36).

11, 12. a) ¿Imanasqataq achka judiokunaqa mana creerqakuchu Jesus Mesias kasqanta? b) ¿Pikunam ichaqa creerqaku?

¹¹ Jesus Mesias kasqanta achka willakuykuna qawachiptinpas, yaqa lliw judiokunam mana creerqakuchu. ¿Imanasqa? Piensasqankuman hapipakusqankuraykum. Paykunatam Roma nacion kamachirqa, chaymi suyachkarqaku libraqninkuta (leey Juan 12:34a). Diospa Palabranmi ichaqa willakurqaña Mesiaspa despreciasqa, mana kaqpaqpas hapisqa, wañuchisqa kananmanta hinaspa onqoytawan nanayta reqsinanmantapas. ¡Judiokunaqa manam chaskinmankuchu karqa chayna kaqtaqa! (Isa. 53:3, 5.) Israelta mana libraptin wakin qatiqninkuna hukmanyaspankupas hinallam qatirqaku, hinaspam tiempo pasaptin lliwta entienderqaku (Luc. 24:21).

¹² Achkataqmi Jesusta saqerurqaku yachachisqankuna sasa kasqanta piensaspanku. Diospa Gobiernonpi kanankupaqqa manam ‘kikillankupaqqa kawsanankuchu’, Jesuspa cuerpontam ‘mikunanku’, yawarnintam ‘tomananku’, ‘mosoqmantam nacenanku’ hinaspa ‘manam kay pachallapaqchu kananku’ (Mar. 8:34; Juan 3:3; 6:53; 17:14, 16). Apupaq, hatunchakuqpaqwan iskay uyakunapaqqa sasam chaykunaqa karqa. Ichaqa humilde judiokunapaqmi mana sasachu karqa Jesus Mesias kasqanta yachayqa. Chaynata piensaspankum Samariamanta runakunapas nirqaku: ‘Payqa cheqaptapuni kay pachapi runakuna salvaqmi’, nispa (Juan 4:25, 26, 41, 42; 7:31).

13. ¿Imaynatam Jesusqa talonninpi kachusqa karqa?

¹³ Jesusqa willakurqam wañunanpaq sacerdotekunapa jefenkuna sentencianankumanta, mana judiokuna qerupi warkunankumanta hinaspa kimsa punchawmanta kawsarinantapas (Mat. 20:17-19, NM). “Diospa Churin Cristo” kasqanmanta cortepi willakuptinmi llullapaq hapirqaku (Mat. 26:63-66). Pilatopas pusamuptinkum cuentata qokurqa “wañunanpaq hinaqa” mana imatapas rurasqanta, ichaqa autoridadkunapa contranpi hatarisqanta judiokuna acusaptinkum paykunaman entregaykurqa (Luc. 23:13-15, 25). “Kawsay qokuq” Jesustam paykunaqa mana chaskirqakuchu hinaspa Diosmanta hamusqan sutilla kachkaptinpas tukuyta rurarqaku wañuchinankupaq (Hech. 3:13-15). Bibliapa willakusqanman hinam qerupi warkuspa ‘wañuchirqaku’, 33 watapi Pascua fiestapi (Dan. 9:26, 27; Hech. 2:22, 23). Chayna wañusqanwanmi cumplikurqa talonninpi kachusqa kananmanta Genesis 3:15 nisqan.

¿Imanasqam Mesiasqa wañurqa?

14, 15. a) ¿Ima 2 razonraykum Diosqa saqerqa Jesus wañunanta? b) ¿Imatam Jesus rurarqa kawsarimuspan?

¹⁴ Diosmi Churin wañunanta saqerqa 2 razonrayku. Puntataqa, ‘pakasqa kaqmanta’ huk willakuy allin yachasqa kananpaqmi. Jesusqa wañukunankama kasukuspanmi, qawachirqa Satanas maynataña ñakarichiptinpas mana pantaq runa aguantay atisqanta hinaspa Diospa Llapallan Kamachiq kasqanta defiendey atisqantapas (1 Tim. 3:16, NM). Chaymantapas, runapa Churinqa wañurqa ‘achka runakunapa rantinpim’ (Mat. 20:28). Chaynatam Adanpa saqewasqanchik huchamanta librawarqanchik. Hinaspapas wiñaypaq kawsakuytam tarisun salvakunanchikpaq Diospa qowasqanchik Jesusta chaskispaqa (1 Tim. 2:5, 6).

¹⁵ Payqa 3 punchawmanta kawsarimuspanmi 40 punchawta qatiqninkunaman rikurirqa, kawsarimusqanta qawachinanpaq hinaspa kamachikuykunata qonanpaq (Hech. 1:3-5). Chaymantam hanaq pachaman rirqa rantinchikpi wañusqanpa valorninta Taytanman qonanpaq. Hinaspam suyarqa hanaq Pachamanta gobiernananpaq tiempo chayamunanta. Chay tiempopim ichaqa achka rurayniyoq karqa.

Rurayninmi tukuyninman chayan

16, 17. ¿Imakunatam Mesiasqa rurachkan hanaq pachaman risqanmanta?

¹⁶ Kawsarimusqan tiempomantam Jesusqa qatiqninkunawan kasqanta qawachirqa hinaspa rurasqankutapas qawarqa (Col. 1:13). Chaymantam ichaqa tiempo chayaramurqa Diospa Gobiernonpi Rey kaspan rurayninkunata qallarinanpaq. Bibliapa willakusqan hinaspa allpantinpi tukuy imapa pasakusqanmi qawachin Jesuspa ñoqanchikwan kasqan tiempo hinaspa tukupay tiempo 1914 watapi qallarisqanta (Mat. 24:3; Apo. 11:15). Chaymanta qepallatam Jesuswan angelninkuna Satanastawan demoniokunata hanaq pachamanta qarqoramurqaku (Apo. 12:7-10).

¹⁷ Jesuspa 29 watapi predicaciontawan runakunaman yachachiyta qallarichisqanqa tukurunqañam. Lliw runakunatam juzganqaña. Salvaqninta hina reqsikuq llampu sonqo runakunatam ninqa: ‘Kay pacha unanchasqa kasqanmantapuni [. . .] alistasqa munaychakuyta chaskiychik’, nispa (Mat. 25:31-34, 41). Ichaqa mana chaskiqnin runakunatam puchukachinqa, hanaq pachapi kaq tropakunawan mana allinta chinkachispan. Chaymantam Jesusqa Satanasta watarunqa hinaspam angelninkunatawan ‘uku pachaman’ otaq qaqaman wischuykunqa (Apo. 19:11-14; 20:1-3).

18, 19. ¿Imatam Mesias ruranqa, hinaspa imaynatam yanapanqa kasukuqkunata?

¹⁸ Jesuspa sutinkunaqa: ‘Admirakuypaq Kaq, Consejakuq, Tukuy Kallpayoq Dios, Wiña-wiñaypaq Tayta hinaspa Hawkayay Qokuq Kamachikuqmi’, chayman hinam 1.000 wata Kamachispan imatapas ruranqa (Isa. 9:6, 7). Kamachiptinmi lliw runakuna hinaspa kawsarimuqkunapas mana pantaqña kanqaku (Juan 5:26-29). Mesiasmi kasukuq runakunata pusanqa ‘kawsachiq yakukunaman’, chaynapim Dioswan allin amistad kanqaku (leey Apocalipsis 7:16, 17). Mana kasukuqkunam ichaqa Satanaspiwan demonionkunawan “azufreyoq rupachkaq qochaman” wischusqa kanqaku, chayqa kanqa 1.000 wata qepatam. Chaynatam umanta chamchachkaq hina ‘culebrata’ chinkachinqa (Apo. 20:10).

¹⁹ Arí, Jesusqa Mesias kasqanwanmi allintapuni cumplen. Chayraykum salvasqa runakunapaq kay Pacha paraiso kanqa, chaypim wiñaypaq mana onqospa kusisqa kawsanqaku. Chaymantapas, Diospa sutinmi imamantapas chuyanchasqa kanqa hinaspa paylla kamachikunanpaq derechoyoq kasqanpas hatunchasqa kanqa. ¡Mayna sumaq suyakuymi kachkan Diospa Akllasqanta kasukuqkunapaq!

¿Mesiasta tarirunkichu?

20, 21. ¿Ima razonkunam kachkan Mesiasmanta willakunanchikpaq?

²⁰ Jesuspa ñoqanchikwan kasqan otaq parousía tiempom qallarirqa 1914 watapi. Ñoqanchikwan tarikusqanqa mana rikuy atinam, ichaqa Bibliapi willakuykuna cumplikusqanmi qawachin cheqap kasqanta (Apo. 6:2-8). Ichaqa, punta pachak watapi judiokuna hinam yaqa lliw runakuna mana creenkuchu. Suyankum kay Pachapi kamachiqkunamanta Mesias rikurimunanta otaq gobiernokunawan imatapas rurananta. Ñoqanchikmi ichaqa yachanchik Jesus hanaq pachapi Reyña kasqanta. ¿Imaynam tarikurqanchik chaymanta yacharuspa? Punta pachak watapi Jesuspa qatiqninkuna hinachá nirqanchik: “Mesiastam tariramuniku”, nispa.

²¹ Kunanqa astawanmi runakunaman willananchik Jesus Mesias kaspa ima rurayniyoq kasqanmanta. ¿Chayta rurachkankichu? Chayna kaptinqa, qampaq rurasqantawan hamuq tiempopi ruranantam astawan chaninchanki. Andreswan Felipe hinachá amistadnikikunaman hinaspa aylluykikunaman Cristomanta willarunkiña. Munanikum kay yachachikuy yanapasuptiki, Jesuswan otaq prometesqa Mesiaswan runakunata Dios salvananmanta hinalla yachachinaykita.

[Willakuy]

¿Yuyachkankichu?

• ¿Imaynatam Jesus Mesias kasqanmanta yacharqaku punta pachak watapi qatiqninkuna?

• ¿Ima iskay razontaq karqa Jesus wañunanpaq?

• ¿Imatam Mesiasqa ruranqa hamuq tiempopi?

[21 kaq paginapi dibujokuna]

¿Imaynatam punta pachak watapi judiokuna yacharqaku Jesus prometesqa Mesias kasqanta?

[23 kaq paginapi dibujo]

Runakunaman yachachispayki, ¿willankichu Jesuspa Mesias kasqanmanta?