Qarikuna, espirituman hina kawsaspa serviyta munaychik

‘Chuya espirituman hina tarpuqqa [. . .] cosechachkaq hinam [. . .] wiñay kawsayta chaskinqa.’ (GAL. 6:8.)

1, 2. ¿Imaynatam Mateo 9:37, 38 nisqan cumplikuchkan, hinaptin imam necesitakuchkan Diospa llaqtanpi?

ADMIRAKUYPAQ tiempopim kawsanchik. Jesuspa kayna nisqanmi cumplikuchkan: ‘Achkallañam kachkan cosechanapaqqa, cosechaqkunam ichaqa aslla. Chaynaqa mañakuychikyá chakrayoqta cosechaqkunata kachamunanpaq’ (Mat. 9:37, 38). Kunanmi Jehová Diosqa chayna mañakusqanchikta astawan uyarichkan. Septiembre 2008 watamanta agosto 2009 watakamam 2.031 mosoq congregacionkuna qallarirqa, allpantinpiqa kachkan 105.298 congregacionkunañam. Chaymantapas, sapa punchawmi bautizakurqaku yaqa 757 runakuna.

² Chayna yapakusqanraykum necesitakun Diospa ovejankunata michiq hinaspa yachachiq qarikuna (Efe. 4:11). Tukuy tiempopim Diosqa yachayniyoq qarikunata churarqa serviqninkunata cuidananpaq, payqa hinallamá chaynata ruranqa. Miqueas 5:5 willawanchik Diospa llaqtanpi tukupay tiempopi ‘qanchis gobiernaqkuna’ otaq michiqkuna chaynataq ‘pusaq [. . .] runakuna’ kananmanta, chaywanqa nichkarqam iñiqkunata cuidaq experienciayoq runakuna kananmanta.

 3. ¿Ima ninantaq ‘chuya espirituman hina tarpuyqa’?

³ ¿Bautizasqa qarichu kanki? Chaynaqa, ¿imatam ruranayki congregacionpi astawan llamkayta munanaykipaq? Chaypaqqa ‘espirituman hinam tarpunayki’ otaq kallpanwan Dios yanapasunaykipaq hina kawsanayki (Gal. 6:8). Manam ‘aychapa munasqallanman’ hinachu kawsanayki, chaypaqqa manam kusirikuykuna hinaspa tukuy imayoq kay munayqa yanqachananchu tukuy kallpaykiwan Dios serviy munasqaykita. Lliw cristianokuna ‘chuya espirituman hina tarpunanku’ kaptinpas, qarikunam astawan kallpanchakunanku Bibliapa nisqanwan cumplispanku congregacionpi astawan servinankupaq. Ancianokunawan siervo ministerialkuna ancha necesitakusqanraykum, kay yachachikuyqa qarikunapaq rurasqa kachkan. Chaymi qarikunata kallpanchaniku orakuspanku kay yachachikuyta estudianankupaq.

Serviy munasqaykita qawachiy

4, 5. a) ¿Ima kanankupaqmi bautizasqa qarikunaqa kallpanchakunanku? b) ¿Imaynatam qawachinmanku congregacionpi serviy munasqankuta?

⁴ Manam pi qaripas mana kallpanchakuspanqa ancianoqa kanmanchu. Anchatam kallpanchakunan chay ‘allin oficiota’ otaq llamkayta haypananpaqqa (1 Tim. 3:1). Interesakunanmi necesitasqankupi iñiqmasinkunata yanapananpaq (leey Isaias 32:1, 2). Manam kikillanpaq munaspanchu imatapas ruranan aswanqa hukkunata yanapayta munaspanmi.

⁵ Anciano otaq siervo ministerial kayta munaqqa kallpanchakunanmi Bibliapa nisqanwan cumplinanpaq (1 Tim. 3:1-10, 12, 13; Tito 1:5-9). Chaymi bautizasqa qarikunaqa tapukunanku: “¿Kallpanchakunichu astawan predicanaypaq hinaspa hukkunatapas yanapanichu chayta ruranankupaq? ¿Preocupakunichu hukkuna allin kanankupaq hinaspa kallpanchanichu? ¿Bibliata allin estudiaq kasqaywanchu reqsichikuni? ¿Kallpanchakunichu huñunakuypi rimasqay aswan allin kananpaq? ¿Kusisqachu rurani ancianokunapa kamachiwasqankuta?” (2 Tim. 4:5.) Allinmi chayna tapukuykuna rurakuyqa.

 6. ¿Imatam qarikunaqa rurananku congregacionpi llamkayta chaskinankupaq?

⁶ ¿Imaynatawanmi qarikunaqa preparakunku congregacionpi llamkayta chaskinankupaq? Diospa ‘espiritunpa atiyninwan sonqonkuta’ otaq imayna kasqankuta kallpanchaspankum (Efe. 3:16). Manam pipas allin reqsisqa kayta munaspanqa anciano otaq siervo ministerial kaytaqa munananchu. Aswanqa yachananmi Dioswan allin amistad kasqankurayku chayna allin llamkay chaskinankuta. ¿Imatam qarikunaqa rurananku iñiyninkupi ñawparinankupaq? ‘Chuya espirituman hinam’ kawsananku (Gal. 5:16, 22, 23). ‘Aswan-aswan ñawpaqmanqa rinqaku’ sumaq kayniyoq kasqankuta qawachispanku hinaspa chaskisqanku consejokunata kasukuspankum, chaytaqa lliwmi qawanqaku (1 Tim. 4:15).

Imatapas saqespam kallpanchakuna

 7. ¿Imatam rurana iñiqmasinchikkunata servinapaq?

⁷ Iñiqmasinchikkunata servinapaqqa anchatam llamkana, chaymi munasqanchikta saqespa kallpanchakuna. Ancianokunaqa allin michiqkuna kaspankum, iñiqkunata sasachakuyninkupi yanapanku. ¿Imaynataq wakin kutipiqa Pablo sientekurqa iñiqmasinkunata yanapaspan? Corinto llaqtapi iñiqmasinkunatam nirqa: “Qellqamuspayqa manam ima rurakuytapas atirqanichu, sonqoypi llakikuspaymi weqe ñawintin karqani, qellqamurqaykichikqa manam llakisqa kanaykichikpaqchu aswanqa llumpay kuyasqayta yachanaykichikpaqmi”, nispa (2 Cor. 2:4). Pabloqa tukuy sonqonmantam rurayninta cumplirqa.

8, 9. ¿Pikunam kikinkupa ima munasqankutapas saqespanku Dios serviqkunata yanaparqaku?

⁸ Dios serviqninkunapa favorninpi llamkaqkunaqa haykapipas kikinkupa ima munasqankutaqa saqerqakum. Ejemplopaq, Noeyqa manam familiantaqa nirqachu: “Buque rurayta tukuruspañam willamuwankichik hinaptinmi qamkunawan risaq”. Moisespas Egiptopi israelitakunataqa manam kaynatachu kamachirqa: “Imaynatapas Puka lamar qochaman chayaychik, chaypiña tupasun”. Josueypas manam nirqachu: “Jericopa murallankuna tuñiruptinña qayamuwankichik”. Isaiaspas manam huk willakuqta qawaspanchu nirqa: “¡Kayqaya kaypi kachkan! Paytayá kamachiy”, nispachu (Isa. 6:8).

⁹ Chuya espiritupa munasqanman hina ruraqkunamanta aswan allin ejemploqa Cristom, payqa munarqam huchanchikrayku wañuyta (Juan 3:16). Jesuspa kuyakuyninmanta hinaspa tukuyta saqespa rurasqanmanta, ¿manachu imayna kawsasqanchikwan agradecekusqanchikta qawachinanchik? Experienciayoq huk ancianom iñiqmasinkunata imayna qawasqanmanta nirqa: “Haykapipas admirachiwarqam Pedrota Jesuspa kayna nisqan: ‘Ovejaykunatayá nanachikuy’. Achka watañam qawani kuyakuywan rimapayay otaq imallatapas rurayqa hukkunata kallpanchasqanta. Gustawanmi iñiqmasiykunata watukuspa kallpanchayqa”, nispa (Juan 21:16).

10. ¿Imataq qarikunata kallpanchan iñiqmasinkunawan Jesus hina kananpaq?

¹⁰ Bautizasqa qariqa Jesus hinam iñiqmasinkunawan kanan, paymi nirqa: “Ñoqam samachisqaykichik”, nispa (Mat. 11:28). Anciano kaytaqa munan Diospi iñisqan hinaspa iñiqmasinkunata kuyasqan kallpanchaptinmi. Manam piensanchu chayna ruray llumpay sasa kasqantaqa. Ichaqa, ¿imatam ruranman iñiqmasinkunata serviyta pipas mana munaspanqa? ¿Atinmanchu hukkuna serviy munayta?

Hukkuna serviyta munay

11. ¿Imatam rurana astawan serviyta munananchikpaq?

¹¹ ¿Piensankichu congregacionpi astawan llamkay mana atisqaykita? Chayna kaptinqa Diosta mañakuy espiritunta qosunaykipaq, chaynapi mana iskayrayanaykipaq (Luc. 11:13). Astawan llamkayta munananchikpaqqa Jehová Diosmi chuya espiritunwan yanapawanchik, chaymi kallpanchawanchik payta servinanchikpaq (Fili. 2:13; 4:13, NM). Chaymi hukkunata serviyta munananchikpaq yanapakuyninta mañakunanchik (leey Salmo 25:4, 5).

12. ¿Imaynatam yachayta tarichwan congregacionpi rurayninchikkunata cumplinapaq?

¹² Wakin qarikunaqa manchakunkum iñiqmasinkunapa necesitasqanku sasa atiendena hinaspa achka kasqanta piensaspanku. Otaq piensanku llamkayninkuwan cumplinankupaq mana ancha yachayniyoq kasqankuta. Chayna kaptinqa, Diospa Palabranta hinaspa Bibliamanta qellqakunatapas estudiaspam astawan yachayniyoq kanmanku. Allinmi kanman kayna tapukuyninkupas: “¿Tiempota rakirunichu Bibliata estudianaypaq hinaspa Diosta mañakunichu yachayta qowananpaq?”, nispa. Allintam Santiago kaynata nirqa: “Mayqannikichikpapas yachaynikichik pisilla kaptinqa Diostayá mañakuychik [. . .]. Lliw mañakuqninkunamanqa mana piñakuspam chaninninpi qoykun”, nispa (Sant. 1:5). ¿Creenkichu Diospa kayna nisqanpi? Ama qonqasunchu Diosta Salomon mañakuspa ‘yachayta chaynataq allin entendimientota’ chaskisqanmanta, chaymi juzgaspan yacharqa imam allin kasqanta chaynataq mana allin kasqantapas (1 Rey. 3:7-14). Chayna pasasqanqa admirakunapaqmi. Ichaqa, segurom kachwan ovejankunata michinanpaq pitapas nombraspan yachayta Jehová Dios qonanmanta (Pro. 2:6).

13, 14. a) ¿Imaynatam Pablota yanaparqa Cristopa kuyasqan? b) ¿Imaynam kananchik ‘Cristo kuyawasqanchikrayku’?

¹³ Hukkunata serviyta astawan munanapaqqa yuyaymanananchiktaqmi Diospa hinaspa Jesuspa ñoqanchikrayku rurasqankupi. Qawasunyá 2 Corintios 5:14, 15 versiculokunapa ima nisqanta (leey). ¿Ima ninantaq “Cristo kuyawasqanchikraykum kaykunata rurananchik” nisqanqa? Agradecesqa tarikuspam kuyawasqanchikman hina rurananchik, ancha kuyakuyniyoq kaspan Taytanpa nisqanta kasukusqanmanta hinaspa ñoqanchikpaq wañusqanmanta. Jesuspa kuyasqanraykum Pablopas mana kikillanpiqa piensaqchu, aswanmi kallpanchakurqa congregacionpi chaynataq huk lawpipas Diosta servinanpaq hinaspa runakunata yanapananpaq.

¹⁴ Runakunata Jesus kuyasqanmanta yuyaymanaspam ancha agradecesqa tarikunchik. Manachá allinchu kanman ‘aychapa munasqallanman’ hina tarpuyqa, chayqa kikillanchikpaq hinaspa munasqallanchikta ruraymi. Chaymi vidanchikta cambianchik Diospa kamachiwasqanchik rurayta puntapi churanapaq. Kuyaspanchikmi iñiqmasinchikkunata sirviente hina ‘yanapayta’ munanchik (leey Galatas 5:13). Sirviente hina kaspanchikqa haykapipas respetasunmi, manam Satanas hinaqa hukkunamanta mana allinta rimasunchu nitaq acusasunchu (Apo. 12:10).

Familiapas yanapanmanmi

15, 16. ¿Maynatam cristianokunapa familian yanapanman siervo ministerial otaq anciano kananpaq?

¹⁵ Anciano otaq siervo ministerial kananpaq Bibliapa nisqanwan cumplisqanta qawaspankuqa, piensankum señoranpiwan churinkuna imayna kasqankupi. Paykunapa Dioswan amistadninku imayna kasqanmanta hinaspa hukkuna imayna qawasqankumantam nombrasqa kananpaq kanqa. Kaymi qawachiwanchik anciano otaq siervo ministerial kananpaq familianpas yanapananmanta (leey 1 Timoteo 3:4, 5, 12).

¹⁶ Jehová Diosqa kusikunmi familiapi llapanku yanapanakuptinku (Efe. 3:14, 15, NM). Qarikunaqa congregacionpi rurayninkunata cumplispankupas allintam ‘wasinpi kaqkunata’ yanapanan. Ancianokunawan siervo ministerialkunaqa, familiawan Diosta yupaychanapaq tutapim señorankuwan hinaspa churinkunawan sapa semana Bibliata estudiananku. Chaymantapas sapa kutim llapanku predicaq lloqsinanku. Ancha allintaqmi taytapa tanteasqanta kasukuyninkuqa.

¿Congregacionpi kaqllamanta serviwaqchu?

17, 18. a) ¿Imatam ruranan anciano otaq siervo ministerial kasqanta saqeruq cristiano? b) ¿Imaynam cristianoqa kanan anciano otaq siervo ministerial manaña kaspan?

¹⁷ Yaqapaschá haykapipas siervo ministerial otaq anciano karqanki. Ichaqa hinallam Diosta kuyachkanki hinaspa segurom kawaq paypas hinalla kuyasusqaykimanta (1 Ped. 5:6, 7). Yaqapaschá consejota chaskirqanki imakunata ruranaykipaq. Chayna kaptinqa faltaykitam reqsikunayki hinaspa Jehová Diospa yanapakuyninwan corregikunayki. Ama chaywanqa piñakuychu. Yachayniyoq kaspa allinta piensay. Huk cristianom achka wata anciano kasqanta saqeruspan ima rurasqanmanta willawanchik: “Tantearurqanim hinalla huñunakuyman rinaypaq, predicanaypaq hinaspa anciano kasqay tiempopi hina Bibliata leenaypaq, chaynatamá rurarqani. Pacienciakuq kaytam yacharurqani, piensarqanim huk otaq iskay watallapi kaqllamanta anciano kayta, ichaqa yaqa qanchis watamantañam nombrasqa karqani. Chay watakunapi mana hukmanyanaypaqmi, yanapawarqa hinalla kallpanchakunaypaq niwasqanku”.

¹⁸ Chayna tarikuspaykiqa ama hukmanyaychu. Piensay predicasqaykitawan familiaykita Jehová Dios imayna bendecisqanpi. Familiaykita yanapay Dioswan amistadnin allin kananpaq, onqoqkunata watukuy hinaspa kallpanchay hukmanyasqakunata. Amataq qonqaychu allin noticiamanta willakuyta chaynapi Jehová Diospa Testigon kaspa alabayta (Sal. 145:1, 2; Isa. 43:10-12).a

Kaqmantam piensanayki

19, 20. a) ¿Imata ruranankupaqmi kallpanchasqa kanku bautizasqa llapallan qarikuna? b) ¿Imamantam yachasunchik qatiqnin estudiopi?

¹⁹ Kunanmi astawan necesitakun ancianokunawan siervo ministerialkunaqa. Chaymi kallpanchaniku bautizasqa qarikunata imayna tarikusqankupi kaqmanta piensanankupaq hinaspa tapukunankupaq: “¿Imam harkawachkan anciano otaq siervo ministerial kanaypaq?”, nispa. Ancha allinmi espiritunta Dios qonanpaq mañakuyninkuqa. Chaynapim kay asuntomanta allinta tanteanqaku.

²⁰ Congregacionpiqa lliwmi yanapachikunku cristianokunapa rurasqankuwanqa. Qawasqanchikman hinaqa, hukkuna allin kananpaq sonqomanta yanapaspam kusikunchik hinaspa chuya espirituman hina ruranchik. Ichaqa, cuidakunanchikmi chuya espirituta haykapipas mana llakichinapaq. Chaymantam qatiqnin estudiopi yachasun.

[Willakuy]

¿Imatam niwaq?

• ¿Imatam willawanchik Miqueas 5:5?

• ¿Imatam rurana iñiqmasinchikkunata servinapaq?

• ¿Imaynatam iñiqmasinchikkuna serviyta munachwan?

• ¿Imaynatam cristianota familian yanapanman siervo ministerial otaq anciano kananpaq?

[25 kaq paginapi dibujokuna]

¿Imaynatam cristianoqa qawachin congregacionpi astawan llamkay munasqanta?