¿Imatam Diospa Munaychakuyninqa qampaq ruwanqa?

Qawamusqaykiman hinam Jehova Diospa testigonkunaqa anchata chaninchanku Diospa Munaychakuynintaqa. Yaqapaschá qampas munawaq chay Gobiernopa huk kaqnin prometesqankuna cumplikunanta. Ichaqa, ¿cumplikunqachu?

Manamá lliw uyarisqanchiktachu kaqpaqqa hapina (Proverbios 14:15). Chaytamá Berea llaqtapi ñawpa cristianokunapas ruwarqaku.a Diospa Munaychakuyninmanta uyariruspankuqa manamá chayllachu iñirqaku. Aswanqa Bibliatam allinta estudiarqaku “¿cheqapchu kay runakunapa willawasqanchik?” nispanku (Hechos 17:11). Uyarisqankutam Bibliawan tupachirqaku chaynapim cheqap kasqanmanta mana iskayrayarqakuchu.

Jehova Diospa testigonkunam kallpanchaykiku Berea llaqtapi cristianokuna hina ruwanaykipaq. Bibliamanta mana imallapaq yachachisqaykum yanapasunki Diospa Munaychakuyninmanta rimasqaykuta Bibliawan tupachinaykipaq.

Bibliamanta yachachisqaykuqa manamá Diospa Munaychakuyninmanta yachanallaykipaqchu yanapasunki, yanapasunkitaqmi kay ancha allin tapukuykunapa kutichiyninta tarinaykipaqpas.

• ¿Maymantataq hamurqanchik?

• ¿Imapaqtaq kawsakunchik?

• ¿Imanasqataq Diosqa saqen ñakarinanchikta?

• ¿Imam pasan wañuptinchik?

• ¿Chinkanqachu kay allpa Pacha?

• ¿Imaynatam familiakunaqa kusisqa kawsakunmanku?

Biblia estudiasqaykiqa Diosmanmi asuykachisunki, chaymi aswan allinqa (Santiago 4:8). Dioswan amistadniki astawan sapichakuptinqa, mana sasachakuspallam qawanki kunan hinaspa hamuq tiempopi Diospa Munaychakuynin qampaq imakuna ruwasqanta. Jesusmi Taytanta nirqa: “Chay wiñay kawsayniyoqqa kanku sapallan cheqap Dios kasqaykita reqsiqkunam hinaspa kachamusqayki Jesucristota reqsiqkunam”, nispa (Juan 17:3).