¿Imanasqataq Jesusqa chaninchan Diospa Munaychakuynintaqa?

Punta yachachikuypi qawamusqanchikman hinam Jesusqa ‘Diospa Munaychakuyninmanta willakustin purirqa’ (Lucas 8:1). Runakunaman willananpaqmi Israel Nacionpi karu llaqtachakunaman rirqa. Bibliapim Mateo, Marcos, Lucas hinaspa Juan librokunapi pachak kuti mastaraq riman Diospa Munaychakuyninmantaqa. Chaykunataqa yaqa llapantam kikin Jesus rimarqa. Ichaqa manam lliw rimasqankunachu qellqakurqa (Juan 21:25).

¿Imanasqataq Diospa Munaychakuynintaqa anchata chanincharqa? Puntataqa, chay Munaychakuyninpi kamachiq kananpaq Dios akllasqanraykum (Isaias 9:6; Lucas 22:28-30). Ichaqa manamá atiyniyoq nitaq hatunchasqa kaytachu munarqa (Mateo 11:29; Marcos 10:17, 18). Yacharqam hinaspapas yachanmi chay Gobiernoqa kuyasqan Taytanpa hinaspa kuyasqan qatiqninkunapa allinninpaq tukuy ima ruwananta.a Chayraykum payqa astawan willakurqa.

Jesusqa tukuy sonqonwanmi taytantaqa kuyan (Proverbios 8:30; Juan 14:31). Chaninchantaqmi kuyakuyninta, llakipayakuyninta hinaspa allin ruwaq kasqantapas (Deuteronomio 32:4; Isaias 49:15; 1 Juan 4:8). Chaymi cheqnin Taytanmanta llulla rimaykunata. Ninkum Diosqa rumi sonqo kasqanta hinaspa mana allinkuna kananpaq pay huchayoq kasqantapas. Chayraykum Jesusqa kallpanchakurqa “Diospa munaychakusqanmanta allin noticiata” willakuypi. Chay Gobiernom Diospa sutintaqa chuyanchanqa. (Mateo 4:23; 6:9, 10) ¿Imaynatam ruwanqa?

Runakunapa allinninpaqmi tukuy imata allichanqa. Munaychakuyninpim runakunapa weqenta pichanqa. Waqachiwaqninchik kaqkunatam chinkachinqa, “manañam kanqachu wañuypas, waqaypas nitaq nanaypas” (Apocalipsis 21:3, 4) Diospa Munaychakuyninraykum runakunaqa manaña haykapipas ñakarinqakuñachu.b

Chay Gobiernom qawachinqa Taytanqa kuyakuq hinaspa atiyniyoq kasqanta, chayraykumá Jesusqa Diospa Munaychakuyninmanta willakurqa (Santiago 5:11). Chay Gobiernoqa Jesuspa kuyasqan qatiqninkunatapas yanapanqam.

Jesusqa manaraq kay Pachaman hamuchkaspanmi hanaq pachapi Taytanwan una-unay kawsakurqa. Chaypim tukuy imakunata unanchaypi yanaparqa, llapallan chaskakunata, intita, kay allpa Pachanchikta hinaspa imaymana kawsaqkunatapas (Colosenses 1:15, 16). Ichaqa lliw unanchasqa kaqkunamantaqa, runakunatam Jesusqa kuyarqa (Proverbios 8:31).

Chayna kuyasqanraykum Diosmanta willakurqa. Willakuyta qallaykuspallanmi nirqa, necesitaqkunaman ‘allin noticiata willananpaq’ hamusqanmanta (Lucas 4:18). Jesusqa manam rimayllachu rimaq, chayman hinam ruwaq. Huk kaqninpim achka runakuna huñunakurqaku payta uyarinankupaq, chaypim “llakipayarikurqa hinaspam sanoyachirqa paykuna ukupi kaq onqoqkunata” (Mateo 14:14). Huk kutipipas llumpay onqoq runam nirqa: “Señorlláy, munaspaykiqa allinyaykachillawayá”, nispa. Hinaptinmi llakipayariykuspa nirqa: “Arí, munanim, allinyayña, nispa”, hinaspam hampiykurqa (Lucas 5:12, 13). Chaymantapas amistadnin Lazaro wañukuptinmi paypa panin Maria waqachkarqa, chayta qawaykuspanmi Jesusqa “sonqonpi sinchita llakirikurqa”, hinaspam “waqarqa” (Juan 11:32-36). Hinaptinmi admirakuypaq kaqta ruwarqa, tawa punchawña Lazaro wañusqa kachkaptinpas kawsarirachirqam (Juan 11:38-44).

Jesusqa yacharqam chay milagrokuna ruwasqanqa mana unaypaq kasqanta. Hampisqan hinaspa kawsarichisqan runakunaqa kasqallanmi haykapipas onqonanku hinaspa wañunanku karqa. Yacharqataqmi Diospa Munaychakuyninpi ruwasqanqa wiñaypaq kananmanta. Chayraykum mana milagrokuna ruwayllapichu purirqa, aswanqa “Diospa munaychakusqanmanta yachachistin [hinaspa] allin noticiakunata” willakustinmi purirqa (Mateo 9:35). Milagrokuna ruwasqanqa pisillapim qawachirqa Diospa Munaychakuynin kay Allpapi tukuy ima ruwananmanta. Qawasunyá Bibliapa ima nisqanta.

• 

  Onqoykunam chinkanqa.

  “Ñawsakunam qawarikunqa. Hinaptinqa mana uyariqkunam uyarikunqa. Wistukunam luwichu hinaraq pawaykachanqaku. Upakunam sumaqllataña qaparinqaku.” Chaymantapas “manañam mayqannikichikpas ninkichikñachu: ‘Onqochkanim’ nispaqa.” (Isaias 33:24; 35:5, 6.)

• 

  Wañuyqa chinkanqam.

  “Allin ruraq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku.” (Salmo 37:29.)

  “Diosmi wiñaypaq chinkachinqa wañuyta. Señor Diosmi pichanqa llapallan waqaqkunapa weqenta.” (Isaias 25:8.)

• Wañuqkunam kawsarimunqaku.

  ‘Diospa Churinpa qayasqanta uyarispankum llapallan wañuqkuna kawsarimunqaku.’ (Juan 5:28, 29.)

  ‘Hamuq punchawpim Dios kawsarichimunqa.’ (Hechos 24:15.)

• 

  Llapankum wasiyoq hinaspa llamkayniyoq kanqaku.

  “Wasikunatam hatarichinqaku hinaspam chaypi yachanqaku. Uvas huertakunatam plantanqaku hinaspam rurunta mikunqaku. Wasikunatam hatarichinqaku ichaqa manam sapaq runakuna yachananpaqñachu. Uvas huertakunatam plantanqaku ichaqa manam sapaq runakuna rurun mikunanpaqñachu. [. . .] Akllakusqaykunaqa llamkasqankunapa ruruntam horqonqa.” (Isaias 65:21, 22.)

• 

  Manañam guerrakunaqa kanqañachu.

  “Guerrakunatam [Diosqa] tanirachin. Kay pachapa cantonkamam tanirachin.” (Salmo 46:9.)

  “Manañam nacionpurapas peleanqakuñachu. Guerrapaqpas manañam yachanqakuñachu.” (Isaias 2:4.)

• 

  Lliwpaqmi mikuy kanqa.

  “Allpanchikqa sinchitam rurunqa. Bendeciwasunmi yupaychasqanchik Diosqa.” (Salmo 67:6.)

  ‘Kay pachapim achka-achka kawsaykuna qespinqa. Moqo chakrakunapim sumaqllataña kawsaykuna aywityanqa.’ (Salmo 72:16.)

• Manañam wakchayayqa kanqachu.

  “Mana imayoqkunaqa manataqmiriki kanqa qonqallasqachu.” (Salmo 9:18.)

  “Payqa libraykunqam qayakuq wakcha runataqa. Payqa libraykunqam mana yanapasqa runataqa. Payqa llakipayanqam mana kallpayoq runataqa. Payqa llakipayanqam mana imayoq runataqa. Payqa salvaykunqam wakchakunapa vidantaqa.” (Salmo 72:12, 13.)

Kay willakuykunata qawaruspa, ¿entiendenkichu, imanasqam Jesusqa Diospa Munaychakuyninta chaninchasqanta? Payqa lliw uyariy munaq runakunamanmi willarqa, yacharqamá tukuy ima sasachakuykunataqa Diospa Munaychakuyllan allichananta.

¿Munankichu Diospa kay willakuyninkuna cumplikunanta? Chayna kaptinqa, ¿imaynatam astawan yachawaq Munaychakuyninmanta? ¿Imatam ruwawaq tukuy chayta chaskinaykipaq? Qatiqnin yachachikuypim kay tapukuykunamanta yachasunchik.