¿Imaynatam mana allinmanta Jehova Dios harkawanchik?

 1. ¿Imanasqataq Jesusqa qatiqninkunapaq mañakurqa?

JESUSQA anchatam qatiqninkunataqa kuyarqa. Chaymi manaraq wañukuchkaspan taytanta mañakurqa satanasmanta paykunata harkaykunanpaq (Juan 17:14, 15). Jesusqa yacharqam hanaq pachaman kutikuptin qatiqninkuna Diosta mana servinankupaq peleachkaq hina satanas tukuyta ruwananta.

 2. ¿Imanasqataq mana iskayrayananchikchu mañakusqanchikta Dios uyariykuwananchikmanta?

² Jehova Diosqa churinpa mañakusqantaqa kuyasqanraykum uyariykurqa. Ñuqanchiktapas Diosqa kuyawasunmi paypa munasqanman hina kawsakuptinchikqa, chayraykum yanapaykuwananchikpaq mañakusqanchiktapas uyariykuwasun. Imaynam huk taytapas churinkunata yanapaykun hinaspa mana allinkunamanta harkaykun, chaynam Diosninchikpas.

 3. ¿Imanasqam Diosta mañakunanchik satanasmanta harkaykuwananchikpaq?

³ Satanasqa hanaq pachamanta wischurachikamusqanraykum piñasqallaña kachkan. Chaymi kunanqa astawanraq munanchik paymanta Dios harkaykuwananchikta (Apoc. 12:12). Wakin runakunam chiqniwanchik utaq ñakarichiwanchik Diospa munasqanman hina kasqanta satanas piensachisqanrayku (Juan 16:2). Wakin runakunañataqmi chiqniwanchik paykuna hina mana kasqanchikrayku. Ichaqa manam manchakunchikchu imaña-haykaña kaptinpas, bibliam niwanchik: “Señorninchikqa rimasqantam cumplin, payqa kallpanchasunkichikmi hinaspapas satanasmantam harkaykusunkichik”, nispa (2 Tes. 3:3). Qatiqninpiyá yachaykusun Jehova Dios imayna harkawasqanchikmanta.

 4. Efesios 6:13-17 nisqanman hinaqa, ¿imakunatam Dios quwanchik satanasmanta harkawananchikpaq?

⁴ Imaynam soldadopas peleaq rinanpaq peleanan pachanwan churakun, chaynam ñuqanchikpas satanaswan peleaypi hina kasqanchikrayku Diospa tukuy ima quwasqanchikwan churakunanchik (qaway Efesios 6:13-17). Tukuy chaykunaqa ancha allinmi. Ichaqa manam haykapipas hurqukunanchikchu allinta harkawananchikpaqqa. Qatiqninpiyá qawasun churakunanchikpaq Diospa quwasqanchik imakuna kasqanmanta.

 5. ¿Imawantaq tupan wiqawninchikta allinta watakuyqa? ¿Imanasqataq wiqawninchikta watakuchkaq hina kananchik?

⁵ Chiqap kaqwan wiqawninchikta allinta watakuyqa tupan bibliapi yachachikuykunawanmi. ¿Imanasqataq bibliamanta imam kaqta yachananchik? Satanas mana pantarachiwananchikpaqmi, payqariki llullam hinaspapas llullakunapa taytanmi (Juan 8:44). Ñawpaqmantaraqmi satanasqa kay pachapi runakunata pantachichkan (Apoc. 12:9). Chaynaqa, ¿imaynatam wiqawninchikta watakuchkaq hina kachwan? Jehova Diosmanta imam kaqta yachaspanchikmi, chayman hina yupaychaspanchikmi hinaspa tukuy imapi allinta kawsakuspanchikmi (Juan 4:24; Efes. 4:25; Heb. 13:18).

 6. ¿Imawantaq tupan allinkunata ruwanapaq qasqu harkachikunaqa? ¿Imanasqataq chaywan churakunanchik?

⁶ Allinkunata ruwanapaq qasqu harkachikunanchikqa tupan bibliapa kamachikuyninkunawanmi. ¿Imanasqataq chaywan churakunanchik? Mana allin munapayaykunamanta sunqunchikta harkananpaqmi hinaspa runakunapa mana allin ruwasqankuta mana qatipakunapaqmi (Prov. 4:23). Taytanchik Jehova Diosqa munan tukuy sunquwan kuyaspa servinanchiktam (Mat. 22:36, 37). Satanasmi ichaqa Diosmanta karuncharuyta munawanchik. Chaymi Diospa chiqnisqan kaqkunata munachiwanchik (Sant. 4:4; 1 Juan 2:15, 16). Payqa tukuytamá ruwanqa Diospa kamachikuyninkunata mana kasukunapaq.

 7. ¿Imaynatam allinkunata ruwanapaq qasqu harkachikunawan churakuchwan?

⁷ ¿Imaynatam allinkunata ruwanapaq qasqu harkachikunawan churakuchwan? Jehova Diospa kamachikuyninman hina kawsakuspam (Sal. 97:10). Ichapas wakin runamasinchikkunaqa ninmanku munasqanchikman hina kawsakuspanchik kusisqa kananchikta. Ichaqa Diosta mana kasukuspa munasqanchikman hina kawsakuspaqa kachwan peleachkaspa “llasakunmi” nispan qasqu harkachikunanta hurqukuruq soldado hinam. Diosta kuyaqkunapaqqa kamachikuyninkuna kasukuyqa manam llumpay sasachu (1 Juan 5:3).

 8. ¿Imata ruwaspataq usutasqa hina kachwan?

⁸ Pabloqa nirqataqmi hawkayay qukuq sumaq willakuymanta willakuywan usutasqa hina kananchikpaqpas. Chaymi haykapipas listolla kananchik Diosmanta willakunanchikpaq. Runamasinchikkunaman bibliamanta willaspanchikqa astawanmi Diospi hapipakunchik. Enteron allpa pachapi iñiqmasinchikkunam Diosmanta willakunku llamkayninkupi, estudiasqankupi, negociokunapa kasqanpi, wasin-wasin rispanku, rantipakuq rispanku, ayllunkuman utaq riqsinakusqankuman watukuspanku, wasillapi kaspanku utaq maypiña kaspankupas. Chayta ruwasqankumantaqa anchatamá kusikunchik. Manchakuspanchik Diosmanta mana willakuspaqa kachwan peleachkaspan usutanta hurqukuruq soldado hinam. Chayna soldadoqa manamá peleaytapas atinmanchu, manataqmi kamachiqninpa nisqantapas ruwanmanchu.

 9. ¿Imawantaq tupan harkachikuna escudo? ¿Imanasqataq allin iñiyniyuq kananchik?

⁹ Harkachikuna escudoñataqmi tupan Diospi iñiyninchikwan. Manapunim iskayrayanchikchu nisqankunata Dios cumplinanmantaqa, chaymanta mana iskayrayasqanchikmi yanapawasun satanaspa llapallan flechankunata amachananchikpaq. Diospi iñiyninchikqa yanapawasunmi Diosta qipanchaqkunapa pantay yachachikuyninkunawan hinaspa ñuqanchikmanta asikuqkunapa nisqankuwan mana hukmanyarunanchikpaq. Yanapawasuntaqmi mana allinta ruwananchikpaq hikutawaptinchik Diospa kamachikuyninkunata kasukunapaqpas. Iñiyniyuq kaspaqa llamkaqmasinchikkuna utaq estudiaqmasinchikkuna bibliamanta tapuwaptinchikmi mana manchakuspa willasun (1 Ped. 3:15). Llamkayllaman qukurunamantaqa Diospa kaqkunata ruwanapaqmi kallpanchakusun (Heb. 13:5, 6). Manataqmi hukmanyasunchu runakuna chiqniwaptinchikpas utaq ñakarichiwaptinchikpas (1 Tes. 2:2).

10. ¿Imawantaq tupan bibliapa nisqan cascoqa? ¿Imanasqataq churakunanchik?

¹⁰ Salvasqa kananchikwan cascowan hina churakuyqa tupan wañuytawan tukuy mana allinta Dios chinkachinanta hinaspa wiñay kawsay quwananchikta suyasqanchikwanmi (1 Tes. 5:8; 1 Tim. 4:10; Tito 1:1, 2). Imaynam cascopas soldadopa umanta harkan, chaynam hamuq tiempopi imakunata Dios ruwananpi piensayninchikpas yanapawasun ima sasachakuyña kaptinpas mana hukmanyarunanchikpaq. ¿Imaynatam salvasqa kananchik cascowan churakuchwan? Diospa piensasqanman hina piensanapaq kallpanchakuspam. Chaymi bibliapi niwasqanchikman hina chinkaruqlla kapuqninchikpi hapipakunamantaqa payllapi hapipakunchik (Sal. 26:2; 104:34; 1 Tim. 6:17).

11. ¿Imawantaq tupan Diospa quwasqanchik espadaqa?

¹¹ Pablopa nisqan chuya espiritupa espadanqa tupan bibliawanmi. Bibliaqa atiyniyuqmi, chaymi runamasinchikkunatapas yanapan pantay yachachikuykunata hinaspa mana allinkunata saqinankupaq (2 Cor. 10:4, 5; 2 Tim. 3:16, 17; Heb. 4:12). Bibliata allinta servichikunapaqmi yanapawanchik estudiasqanchik hinaspa Diospa llaqtanpi yachachiwasqanchik (2 Tim. 2:15). Qatiqninpiyá yachaykusun imaynatawanraq Dios yanapawasqanchikmanta.

12. ¿Pikunataq yanapawachwan satanastawan qatiqninkunata vencenapaq?

¹² Huk soldadollaqa manam achkallay-achkataqa venceyta atinmanchu, soldadomasinkunam yanapanan. Chaynam ñuqanchikpas sapallanchikqa mana venceyta atichwanchu satanastawan qatiqninkunataqa. Achkallay-achka iñiqmasinchikkunam kachkan yanapaykuwananchikpaq (1 Ped. 2:17).

13. Hebreos 10:24, 25 nisqanman hinaqa, ¿imaynatam huñunakuyninchikkuna yanapawanchik?

¹³ Iñiqmasinchikkuna yanapawananchikpaqqa huñunakuyninchikkunamanmi rinanchik (qaway Hebreos 10:24, 25). Llapallanchikmi wakinpiqa hukmanyanchik, ichaqa huñunakuyman rispanchikmi kallpanchasqa tarikunchik. Chaypim uyarinchik iñiqmasinchikkunapa rimarisqankuta hinaspa ñawpaqmanta yachachimuwasqanchikta. Chaykunam kallpanchawanchik Jehova Diosta hinalla servinapaq. Kallpanchawanchiktaqmi huñunakuy manaraq qallarichkaptin hinaspa tukuruptin iñiqmasinchikkunawan parlarisqanchikpas (1 Tes. 5:14). Ñuqanchikpas iñiqmasinchikkunata yanapaykusqanchikwanmi kusisqa tarikunchik (Hech. 20:35; Rom. 1:11, 12). Chaymantapas, huñunakuykunapiqa qillqakunawan hinaspa videokunawan Diosmanta allinta willakunapaqmi yachachiwanchik. Chaynaqa, huñunakuyman manaraq richkaspayá ima yachanamanta sumaqta yachaykusun, huñunakuypipas yachachikuykunatayá allinta uyarisun hinaspapas chayman hinayá ruwasun. Chaynapi Jesuspa allin soldadonkuna kananchikpaq (2 Tim. 2:3).

14. ¿Pikunapiwantaq Jehova Diosqa yanapawanchik?

¹⁴ Jehova Diosqa yanapawanchiktaqmi mana yupay atina angelninkunawanpas. Angelqa hukllapas ancha atiyniyuqmi, astawanraqchá achkaqa (Is. 37:36). Chaynaqa, manamá imapas-haykapas imanawachwanchu angelninkunawan Dios yanapawaptinchikqa. Arí, Diospa yanapakuyninwanmi achkallaña chiqniwaqninchikkunatapas “chulla runata hinalla” vencerusun (Juec. 6:16). Chaytayá yuyarisun llamkaqmasinchik, estudiaqmasinchik utaq Diosta mana serviq ayllunchik rimasqanwan utaq ruwasqanwan hukmanyachiwaptinchikqa. Manamá sapallanchikchu kachkanchik.

15. Isaias 54:15, 17 nisqanman hinaqa, ¿imanasqataq Diosmanta willakunanchiktaqa mana imapas harkawasunchu?

¹⁵ Satanasmi kay pachataqa kamachichkan. Chaymi runakunaqa chiqniwanchik autoridadkunaman mana sayapakusqanchikrayku, guerraman mana risqanchikrayku, Diospa sutinta riqsichisqanchikrayku, paylla allin kamachiq kananmanta willakusqanchikrayku hinaspa kamachikuyninkunata kasukusqanchikrayku. Chiqniwanchiktaqmi kay pachapi kamachiq satanaspas chaynataq mana allin runakunapas chinkachisqa kananmanta willakusqanchikrayku (Juan 8:44). Chaywanpas, satanaswan qatiqninkunaqa manamá Diosmanta willakusqanchiktaqa upallachiwasunchu. Imaña-haykaña kaptinpas hinallamá Jehova Diostaqa yupaychasun. Paymi harkawachkanchik, chaymi satanasqa atiyniyuqña kaspanpas mana harkakuyta atinchu enteron allpa pachapi runakuna paymanta yachanankutaqa (qaway Isaias 54:15, 17).

16. ¿Imaynatam Jehova Diosqa hamuq punchawkunapipas harkaykuwasun?

¹⁶ Jehova Diosqa llumpa-llumpay ñakariy punchawkunapipas yanapaykuwasunmi. Payman sunqu kaqkunatam harkaykuwasun kay pachapi kamachiqkuna pantay religionkunata chinkachiptin (Apoc. 17:16-18; 18:2, 4). Harkaykuwasuntaqmi piñakuynin punchawpi satanaspa munaychakusqan tukuy mana allinkunata chinkachispanpas (Apoc. 7:9, 10; 16:14, 16).

17. ¿Imanasqataq Diosmanta mana karunchakunanchikchu?

¹⁷ Jehova Diosmanta mana karunchakuptinchikqa satanasqa manam imanawasunchu. Kikin satanastam Diosqa chinkachinqa (Rom. 16:20). Chaynaqa, peleanapaq Diospa quwasqanchikkunawanyá churakusunchik, hinaspayá ama haykapipas hurqukusunchu. Amayá sapallanchikqa peleasunchu, iñiqmasinchikkunatayá yanapasun, hinaspapas Diostayá kasukusun. Chaynata ruwaptinchikqa taytanchik Jehova Diosmi kallpanchaykuwasun hinaspa imamantapas harkaykuwasun (Is. 41:10).