¿Imataq Armagedonqa?

Armagedonqa Diospa piñakuynin punchawpi guerram. Chay guerrapim kay pachapi gobiernokunata Diosqa chinkachinqa payta mana kasukusqankurayku (Salmos 2:2). Chay guerramanta qipaman paypa gobiernonñam enteron allpa pachata kamachinqa (Daniel 2:44).

Armagedon palabraqa bibliapim huk kutillata Apocalipsis libropi rikurin. Hamuq punchawkunapi ima kananmanta willakuspanmi bibliapi nin ‘enteron pachapi kamachiqkuna’ Diospa contranpi peleaq rinankupaq huñusqa kanankumanta, hinaspapas bibliapiqa nintaqmi “Armagedon” sutiyuq sitiopi huñunakunankumanta (Apocalipsis 16:14, 16).

¿Pikunataq Armagedonpiqa peleanqaku? Peleanqakuqa Jesus hinaspa wara-waranqantin angelkunam. Paykunam Diospa enemigonkunata wañuchinqaku (Apocalipsis 19:11-16, 19-21). Wañuchisqaqa kanqaku yachachkaspanku Diosta mana kasukuqkunam (Ezequiel 39:7).

¿May lawpitaq Armagedonpi peleanankupaqqa huñunakunqaku? Manam huk sitiollapichu enteron allpa pachapim chay guerraqa kanqa (Jeremias 25:32-34; Ezequiel 39:17-20).

Armagedon ninanqa hebreo rimaypi “Meguido urqu” ninanmi. Meguido llaqtaqa israel nacionpi huk kaqnin llaqtam karqa. Bibliapim willawanchik chay llaqtapa hichpanpi achka kutikunapi israel runakuna chiqniqninkunawan peleasqankumanta (Jueces 5:19, 20; 2 Reyes 9:27; 23:29). Ichaqa Diospa piñakuynin punchawqa utaq Armagedonqa manam Meguido lawpiqa kanmanchu, chay lawpiqa manam kanchu hatun urqukunaqa. Chaymantapas enteron pachamanta Diospa contranpi peleanankupaq riqkunaqa manam Meguido wayqullapiqa haypanmankuchu. Arí, Armagedonpiqa enteron allpa pachapi kamachiqkunam Dioswan peleanankupaq hatarinqaku.

¿Imataq pasanqa Armagedon guerrapiqa? Enemigonkunata Dios imaynata wañuchinanmantaqa manam sumaqtaqa yachanchikchu. Ñawpaqpim yupaychaqnin chiqniqkunata wañuchirqa: Runtu parawan, terremotowan, loco parawan, azufreyuq nina parawan, rayukunawan hinaspa unquykunawan. Ichapas chaykunawantaq piñakuynin punchawpipas chiqniqninkunata wañuchinqa (Job 38:22, 23; Ezequiel 38:19, 22; Habacuc 3:10, 11; Zacarias 14:12). Muspaypi hina tarikuspankutaqchá kikinkupurapas wañuchinakunqaku. Cuentataqmi qukunqaku kikin Dios paykunawan peleasqanta (Ezequiel 38:21, 23; Zacarias 14:13).

¿Armagedon guerrawanchu allpa pacha chinkarunqa? Manam. Allpa pachaqa runakuna kaypi wiñaypaq yachananchikpaqmi unanchasqa karqa (Salmos 37:29; 96:10; Eclesiastes 1:4). Chaymi Diosqa allpa pachanchiktaqa mana chinkarachinqachu. Bibliapim nin ‘achkallay-achka runakuna’ salvakunankumanta (Apocalipsis 7:9, 14; Salmos 37:34).

Wakin runakunam ninku: “Bibliapiqa nichkanmi fin del mundo kananmanta”, nispanku. Bibliapiqa wakinpim mundo nispanqa rimachkan Diosta mana kasukuq runakunamanta (1 Juan 2:15-17 Sagrada Biblia Quechua-Castellano). Chaymi bibliapiqa Diosta mana kasukuqkuna chinkanamanta rimaspan nin ‘kay pacha puchukananmanta’ (Mateo 24:3, Chuya Qellqa).

¿Haykapitaq armagedon guerraqa kanqa? Jesusmi nirqa “llumpa-llumpay ñakariy punchawkuna” kananmanta hinaspa chaypa qipallanman Armagedon guerra kananmanta, nirqataqmi: “Chay punchawmanta hinaspa chay horamantaqa manam pipas yachanchu, hanaq pachapi angelkunapas nitaq Diospa churinpas, aswanqa taytallaymi”, nispa (Mateo 24:21, 36). Imay punchaw, imay hora kananmanta mana nispapas bibliapiqa ninmi ‘[Jesus] chayaramuspa kaypi kasqan’ tiempopa tukupayninpi Armagedon guerra kananmanta. Chay tiempoqa qallaykurqa 1914 watapim (Mateo 24:37-39).