¿Pipa churinkunataq karqaku?

Jesusqa ramada fiestapim hinalla runakunaman Diosmanta allin kaqkunamanta yachachirqa. Wakin judiokunam nirqaku Abrahanpa miraynin kasqankuta hinaspa mana pipapas sirvienten kasqankuta. Chaymi Jesusqa paykunata nirqa: ‘Yachanim Abrahanpa miraynin kasqaykichikta, ichaqa wañuchiwaytam munachkankichik rimasqaykunata mana chaskikuspa. Taytaywanraq kaspay tukuy ima qawasqaykunamantam rimani, qamkunam ichaqa ruwankichik taytaykichikmanta imapas uyarisqaykichikta’, nispa (Juan 8:33, 37, 38).

Chaynatam Jesusqa qawachirqa huk taytayuq kasqankuta. Judio runakunam ichaqa mana musyakuspa nirqaku: “Taytaykuqa Abrahanmi”, nispa (Juan 8:39; Isaias 41:8). Paykunaqa Diospa kuyasqan Abrahanpa miraynin kasqankuraykullam Diospa chaskisqan kasqankupaq hapikuqku.

Chaymi Jesusqa nirqaraq: ‘Abrahanpa churinkuna kaspaykichikqa paypa ruwasqantachá ruwawaqchik’, nispa. Arí, pi churipas taytantam qatipakun. Jesusqa nirqataqmi: “Qamkunaqa wañuchiwaytam munachkankichik Diospa yachachiwasqankunamanta chiqap willakuq runata, Abrahanqa manam chaytaqa ruwarqachu”, nispa. Nirqataqmi: “Qamkunaqa taytaykichikpa ruwasqantam ruwachkankichik”, nispa (Juan 8:39-41).

Chaywanpas pimanta Jesus rimasqanta mana musyaspam nirqakuraq: “Ñuqaykuqa manam huchapakuymantachu nacerqaniku, chullallam kapuwanku taytaykuqa, payqa Diosmi”, nispa. Ichaqa, ¿Diospa churinkunachu karqaku? Manam. Chaymi Jesusqa nirqa: “Taytaykichik Dios kaptinqa qamkunaqa kuyawankichikmanchá, ñuqaqa Diosmantam hamurqani hinaspam kaypi kachkani. Manataqmi kikillaymantachu hamurqani, aswanqa Diosmi kachamuwarqa”, nispa. Nirqataqmi: “Yachachisqaytam qamkunaqa uyariyta mana munankichikchu, chayraykum nisqayta mana entiendenkichikchu”, nispa (Juan 8:41-43).

Jesusqa unayñam qawachirqa Diospa churin kasqanta qipanchasqankuqa mana allin kasqanta. Chaymi uyankupiña nirqa: “Qamkunaqa kankichik taytaykichik diablomantam, hinaspam taytaykichikpa munasqanta ruwayta munankichik”, nispa. Hinaspam chay taytankumanta nirqa: “Payqa mana kasukuq kayta qallaykuspanmi runa wañuchiq karqa, manataqmi chiqap kaqpiqa takyarqachu chiqap kaq paypi mana kasqanrayku”, nispa. Nirqaraqmi: “Diosmanta kaqqa Diospa rimasqantam uyarin. Qamkunaqa manam uyarinkichikchu Diosmanta mana kasqaykichikrayku”, nispa (Juan 8:44, 47).

Chaywanmi judiokunaqa llumpayta piñakuruspa nirqaku: “¿Manachu allinta nichkaniku, ‘qamqa kanki Samaria lawmanta demonioyuq runam’ nispayku?”, nispa. Chaynataqa nirqaku Samaria runakunata hina chiqnispankum. Jesusñataqmi kamisqankuta mana kasuspan nirqa: “Ñuqaqa manam demonioyuqchu kani, ñuqaqa taytaytam respetani, qamkunañataqmi ñuqata despreciawankichik”, nispa. Hinaspam kasukuqninkunamanta nirqa: “Pipas rimasqayta kasukuqqa manam haykapipas wañunqachu”, nispa. Chaywanqa manam apostolkunapas hinaspa qatiqninkunapas manaña wañunankumantachu rimachkarqa, aswanqa kawsariramuspankuña wiñaypaq kawsakunankumantam. Paykunaqa manañam tarinqakuñachu ‘iskay kaq wañuytaqa’ utaq wiñaypaq chinkachisqa kaytaqa (Juan 8:48-51; Apocalipsis 21:8).

Kaqllam judiokunaqa Jesuspa nisqanmanta mana yachaspa nirqaku: ‘Kunanmi ichaqa yacharuniku demonioyuq kasqaykita. Abrahanqa wañukunñam, chaynataq Diosmanta willakuqkunapas. Qamñataqmi nichkanki: “Pipas rimasqayta kasukuqqa manam wañunqachu”, nispayki. Qamqa manam taytayku Abrahanmanta maschu kanki. ¿Pitaq qamqa kanki?’, nispa (Juan 8:52, 53).

Jesusqa Diospa kachamusqan kasqantam qawachirqaña. Chaymi pim kasqanmanta tapuptinku nirqaraq: ‘Kikillay alabakuptiyqa yanqapaqchiki kanman. Taytaymi alabawaqniyqa, paytam qamkuna ninkichik “Diosniykum” nispa. Qamkunaqa manam riqsinkichikchu, ñuqam ichaqa riqsini. “Manam riqsinichu” nispayqa qamkuna hina llullach kayman’, nispa (Juan 8:54, 55).

Chaymantam ñawpaq abuelonkumanta rimaspan nirqa: “Qamkunapa taytaykichik Abrahanqa anchatam kusikurqa ñuqapa punchawniyta qawaykuyta suyaspan, chay punchawtaqa rikurqamá hinaspam kusikurqa”, nispa. Abrahanqa manam iskayrayarqachu Diospa kachamusqan runa hamunanmantaqa. Chay judiokunañataqmi nirqaku: “Manaraqtaq pichqa chunka watayuqpas kankiraqchu, ¿chaychum Abrahanta rikuwaq karqa?”, nispa. Jesusñataqmi nirqa: “Chiqaptapunim nikichik: Manaraqpas Abrahan kachkaptinmi ñuqaqa karqaniña”, nispa. Chaywanqa hanaq pachapiraq kaspan atiyniyuq angel kasqanmantam rimachkarqa (Juan 8:56-58).

Chaywanmi judiokunaqa llumpayta piñakurqaku, chaymi rumiwan tukunanku kaptin Jesusqa ayqikurqa.