Hechos

2 Pentecostés Fiesta* punllapica, tucuillacunami chai huasipillata tandanajushca carca. 2 Shinapimi ñapash jahua cielomandaca, huaira ninanda huacamunshna paicuna tianajuj huasipica, ucu entero uyarirca. 3 Chaipimi rupajuj uchilla ninacunashna* ricurishpa, cada unopa umapi tiarirca. 4 Shinami, tucuicuna Taita Diospa espíritu santota chasquirca. Taita Diospa espíritu santo ayudajpimi paicunaca shuj shuj idiomacunata parlai callarirca.

5 Chai punllacunapica, Taita Diosta tucui shunguhuan respetaj judiocunami Jerusalenbi carca. Paicunaca mundo entero llactacunamandami carca. 6 Huaira ninanda huacamunshna uyarijpimi, ashtaca gentecuna tandanajurca. Jesuspa discipulocunaca, chai gentecunapa idiomacunapimi parlanajurca. Chaita uyashpami chai gentecunaca ninanda manllarinajurca. 7 Paicunaca ninandapacha manllarishpami ninajurca: “Paicunaca ñucanchi propio idiomatamari parlanajun. ¿Nachu paicunaca Galilea llactamandacuna canyari? 8 Shinaca ¿imashinata ñucanchi propio idiomata parlanajujta tucuicunallata uyanajunchiyari? 9 Caipica Partia llactamanda, shinallata Media, Elam, Mesopotamia, Judea, Capadocia, Ponto y provincia de Asiamanda gentecunami canchi. 10 Shinallata Frigia, Panfilia, Egipto y Cirene ladolla Libia llactamanda shamushca gentecuna, Roma llactamanda visitaj shamushca gentecunami capanchi. Tanto judiocunapash como judío tucushcacunapashmi caipi capanchi. 11 Cutin huaquingunaca, Creta y Arabia llactamanda gentecunapashmi capanchi. Tucuicunallatami Taita Diospa alipacha rurashcacunata parlanajujtaca, ñucanchi idiomapi uyashcanchi” ninajurcami. 12 Tucuicunami manllarishpa paicunapura cashna ninajurca: “Caipica ¿imata pasajunyari?”. 13 Cutin shujcunaca burlarishpami paicunataca ninajurca: “Paicunaca machashcami can yarin” ninajurca.

14 Chaimi Pedroca, chaishuj 11 apostolcunandi shayarishpa, gentecunataca shinllita cashna nirca: “Judea llactamanda runacuna, Jerusalén llactamanda gentecuna, ñuca imata nigrijujtaca aliguta uyapaichi. 15 Quiquingunaca pensanguichimi, chai gentecunaca machashcami can nishpa. Pero paicunaca na machashca canllu. Las 9 de la mañanallamari can. 16 Ashtahuangarin, profeta* Joelpa shimicunami pactarijun. Profeta Joelca nircami: 17 ‘Taita Diosca nishcami, último punllacunapica ñuca espíritu santotami tucui gentecunaman cusha. Paicunapa churicuna, ushicunami* Taita Dios imata villai nishcata villachinga. Paicunapurapi jovengunami muscuipishna imatapash ricunga. Paicunapa mayorlla gentecunapashmi muscuicunata muscunga. 18 Chai punllacunapica, ñucapa esclavo jaricunaman, esclava huarmicunamanbashmi ñuca espíritu santota carasha. Chaimi paicunaca Taita Dios imata villai nishcata villanajunga. 19 Jahua cielopica señalcunatami ricuchisha. Y cai alpapica milagrocunatami rurasha. Yahuarpash, ninapash, yana yana cushnipashmi tianga. 20 Jehová* Diospa importantepacha, jatun punlla nara chayamujpillatami, indipash yana yana tucunga, lunapash yahuarshna puca pucami tucunga. 21 Jehová* Diosta shutipi mañajcunaca tucuicunami salvai tucunga’ nircami.

22 ”Israel llactamanda runacuna, caita uyapaichi: Imashinami ña ali yachapanguichi, Nazaret llactamanda Jesustaca Taita Diosmi cachamurca. Y paita utilizashpami Taita Diosca shuj shuj jatun milagrocunata cangunapurapi rurarca. 23 Chai runatami cangunaca prezo japishpa, jatun racu caspipi* huarcushpa, huañuchichun nali runacunaman curcanguichi. Jesusta shina pasanataca ñami Taita Diosca pundamandallata yacharca. Y shina pasachunmi saquirca. 24 Shinapash Taita Diosca, paita causachishpami huañuimanda librarca. Huañuica, paita imahuanbash huatashcashna charitaca na usharcachu. 25 Davidca Jesusmanda parlashpami nirca: ‘Jehová* Diostaca siempremi yarishpa* causajuni. Pai ñuca ali ladopi cajpimi na imatapash manllasha. 26 Chaimi ñuca shunguca ninanda cushijun. Ñucapash ninanda cushijushpami parlarcani. Taita Diospi confiashpami causasha. 27 Quiquinga Huañushcacunata Pambana Pushtupica* na saquihuanguichu. Quiquinda tucui devoción sirvishcamandami, ñuca cuerpo ismuchunga na saquipangui. 28 Causaiman apaj ñangunatami rijsichihuashcangui. Quiquinba ñaupapi cashpaca ninandami cushijuni’ nircami.

29 ”Huauquicuna, ñucanchi punda taita Davidmandami na manllashpa parlangapaj munapani. Imashinami quiquinguna yachapanguichi, paica huañurcami y pambai tucurcami. Paita pambashca pushtuca cunangamanmi ñucanchi llactapi tian. 30 Davidca profetami carca. Shinallata Taita Diosca juramentushpami cashna nishcarca, canba shuj churimi, canba mandangapaj tiarinapica tiaringa nishpa. Chaitapashmi Davidca yacharca. 31 Paica pundallatami Cristo* causarinataca yacharca. Cristo causarinamanda parlashpami paica nirca, Cristoca Huañushcacunata Pambana Pushtupica* na saqui tucungachu y paipa cuerpopash na ismungachu nishpa. 32 Taita Diosmi Jesustaca causachirca. Chaitaca tucuicunami ricushcanchi. 33 Jesusca jahua cieloman rishpami Taita Diospa ali ladopi tiarirca. Shinami paica, paipa Taita carasha nishca espíritu santota chasquirca. Chai espíritu santotami paica ñucanchiman caramushca. Shina pasashcatami cangunaca ricunajunguichi y uyanajunguichi. 34 Ashtahuanbash Davidca jahua cielomanga na rircachu. Shinapash paica nircami: ‘Jehová* Diosca ñuca Señortaca nircami: 35 “Canba tucuilla contracunata canba chaquihuan saruchun ñuca churangacamanmi, canga ñuca ali ladopi tiajuna cangui”’ nishpa. 36 Cangunaca jatun racu caspipi* huarcushpami, Jesustaca huañuchircanguichi. Paitami Taita Diosca Gobernante cachunbash y Cristo cachunbash churashca. Chaitaca Israel llactapi gulpi gentecunami yachana can” nircami.

37 Pedro shina nijpimi gentecunaca imahuanbash shungupi clavajpi nanachinshna llaquirirca. Shina llaquirishpami Pedrotapash, chaishuj apostolcunatapash cashna nishpa tapunajurca: “Huauquicuna ¿imatata rurana capanchi?”. 38 Chaimi Pedroca paicunataca nirca: “Cangunapa pecadocunata perdonachunga, cada unomi arripintirishpa Jesucristopa shutipi bautizarina capanguichi. Shinami Taita Diospa espíritu santota chasquinguichi. 39 Porque ñucanchi Jehová* Diosca, paipa agllashcacunamanmi espíritu santota carasha nishca. Cangunaman, cangunapa huahuacunaman y carupi causanajuj gentecunamanmi carasha nirca”. 40 Pedroca shuj shimicunatapash nishpami, Jesusmanda aliguta intindichishpa paicunataca cashna consejarca: “Cai nali gentecunamandaca* separarinami canguichi”. 41 Chaimi Pedro ima nishcata aliguman chasquishca gentecunaca bautizarirca. Chai punllaca, más o menos 3 mil gentecunami Jesuspa discipulocuna tucurca. 42 Paicunaca apostolcuna yachachishcatami yachajushpa catirca. Shinallata tucuicuna tandanajushpa, micunaguta igual micushpa y Taita Diosta mañashpami causanajurca.

43 Apostolcunaca shuj shuj jatun milagrocunatami rurai callarirca. Chaimi chai tucuilla gentecunaca manllarishpa ricunajurca. 44 Tucuilla mushuj discipulocunami tandanajun carca. Paicunaca tucui imata charishcagutami paicunapura cararin carca. 45 Paicuna charishca cosascunatapash, alpacunatapash jatushpami, chai jatushca culquitaca cada uno según mashnaguta minishtishcata ricushpa caranajurca. 46 Punllandi punllandimi paicunaca Taita Diospa templo huasipi* tandanajun carca. Shinallata caishujpa, chaishujpa huasiman rishpami, micunagutaca cushijushpa, tucui shunguhuan carashpa micunajun carca. 47 Taita Diostapashmi alabanajurca. Shinallata tucui gentecunami paicunataca alicachinajurca o cushijushpa ricunajurca. Ashtahuanbash cada punllami Jehová* Diosca gentecunata salvajurca. Chai gentecunami Jesuspa discipulocuna tucushpa miranajurca.