Jesuspa catijcuna tucuchun ayudapashunchi

 1. Jehová Diosca ¿imatata cada unomanda rurashca?

ÑUCANCHICUNACA ¿imashinata testigo de Jehovacuna tucuparcanchi? Talvez ñucanchi taitacuna, trabajopi o escuelapi shuj cumba, o shuj Testigo huasin huasin villachijushpami ñucanchicunamanga ali villaigucunamanda parlashcanga (Mar. 13:10). Chai jipaca, pipashmi ñucanchimanga Bibliamanda cabalguta yachachingapaj tiempoguta llujchishcanga. Shina yachachishcamandami ñucanchicunaca Jehová Diosta juyai callariparcanchi, y pai ñucanchita juyashcatapash intindiparcanchi. Jehová Diosmi ñucanchitaca paipa organizacionman pushamurca. Cunanga Jesuspa catijcunami capanchi. Chaimi para siempre causana esperanzatapash charipanchi (Juan 6:44). Jehová Diostaca pitapash utilizashpa Bibliamanda ñucanchita yachachishcamandami ninanda agradicipanchi. Bibliata yachajuimandami ñucanchicunaca Jehová Diosta sirvitapash ushapashcanchi.

 2. Cunanga ¿imatata yachajupashun?

² Cunanga ña Jehová Diosmanda yachajushcamandami shujcunamanbash Jehovamanda yachachina bendicionda charipanchi. Shinami paicunapash para siempre causana esperanzaguta charita ushanga. Huaquin huauquipanicunapaca huasin huasin villachinaca facilmi ricurishca. Shinapash Bibliamanda pimanbash yachachina o shuj estudioguta charinami paicunapaca shinlli ricurishca. ¿Ñucanchitapashchu shinallata pasajun? Shina cajpica, cai temapi llujshishca ayudacunata ali ali uyapashunchi. Cunanga imamanda villachina cashcatami yachajupashun. Shinallata pimanbash Bibliamanda yachachi callaringapaj o shuj estudioguta charingapaj ima manllaicunata chari ushashcatapashmi ricupashun. Chai manllaicunata mishangapaj imata rurana cashcatapashmi yachajupashun. Shinapash pundapica imamanda na solo villachina cashcata, sino yachachinapash cashcatami ricupashun.

 3. ¿Imamandata gentecunamanga villachina carca?

³ Jesús cai alpapi cashpaca, paipa discipulocunamanga cai ishcai cosascunata rurachunmi mandarca: Primeroca, Diospa Reinomanda ali villaicunata gentecunaman villachichunmi mandarca. Chaita pactachi ushachunga Jesusllatami paipa discipulocunamanga imashina villachinata yachachirca (Mat. 10:7; Luc. 8:1). Jesús yachachijushpaca, ali villaicunata gentecuna aliguta chasquijpi o na chasquingapaj munanajujpipash imata rurana cashcatami yachachirca (Luc. 9:2-5). Chashnallata Jesusca caitapashmi nirca: ‘Tucui llactacunapi causajcunamanmi villachinguichi’ nishpa (Mat. 24:14; Hech. 1:8). Ali villaigucunata gentecuna uyangapaj munajpi o na uyangapaj munajpipash, paicunaman Diospa Reinomanda villachinami carca. Shinallata, Diospa Reino imacunatalla rurana cashcatapashmi villachina carca.

 4. Mateo 28:18-20​pi nishcashnaca ali villaigucunata villachishca jahuapash ¿imatata ashtahuan rurana capanchi?

⁴ Diospa Reinomanda ali villaigucunata gentecunaman villachichun mandashca jahuapash, Jesusca paipa discipulocunataca, ñuca yachachishcacunata gentecuna cazushpa, pactachichunmi yachachina canguichi nishpapashmi mandarca. Shinapash Jesuspa mandashca obrataca na chai tiempopillachu pactachina carca. Jesuspa mandashca cai importante obraguca, ‘cai pacha tucurimui punllacaman’ cagrijushcatapashmi Jesusca intindichirca (Mateo 28:18-20, liipangui). Jesusca causarishca jipa, 500 yali discipulocunapa ñaupapi ricurishca horasmi, cai ishcai mandashcacunamandaca talvez parlashcanga (1 Cor. 15:6). Jesusca, apóstol Juanman shuj muscuipishna ricurishpaca, paipa tucui discipulocuna shuj gentecunaman Jehová Diosmanda yachachishpa ayudachun munashcatami intindichirca (Apoc. 22:17).

 5. Villachinata, yachachinata aliguta intindichunga apóstol Pabloca 1 Corintios 3:6-9​pica ¿ima chimbapuraitata churarca?

⁵ Apóstol Pabloca, Taita Diosmanda villachina obrataca tarpunahuanmi chimbapurarca. Paica, imatapash tarpushpaca na tarpushpalla saquina cashcatami intindichirca. Chaimi paica: “Ñucami, tarpunshna villajurcani. Apolosca, yacuta churanshnami yachachijurca [...]. Cangunaca, Taita Dios tarpujuj alpashnami canguichi” nircami (1 Corintios 3:6-9 liipangui). ‘Taita Diospa alpagupi’ tarpushpa trabajajcunaca muyuguta tarpushpaca na chaipilla saquinllu, ashtahuangarin chai muyugu viñachunmi yacuguta regashpa ricurianajun. Shinallata imaguta cashpapash Taita Dios viñachijujtapash alimi yachan. Shina cuendallatami Bibliamanda villachishpaca na chaipilla saquinchi. Ashtahuangarin yacuguta churanshnami Bibliamanda yachachishpa ñaupaman catichun ricuriapanchi (Juan 4:35). Shinallata Taita Dios, gentecuna yachajushpa ñaupaman catichun ayudajushcatapash alimi yachapanchi.

 6. Bibliamanda yachajujcunataca ¿imacunatalla rurachunda ayudana capanchi?

⁶ Ñucanchicunaca ‘para siempre causangapaj munaj’ gentegucunatami mascapanchi (Hech. 13:48, TNM ). Bibliamanda yachajujcuna Jesuspa catijcuna tucuchunga ¿imashinata ayudaita ushapanchi? 1) Bibliapa yachachishcacunata intindichishpa, 2) chai yachachishcacunata aliguman chasquichun ayudashpa, 3) Bibliapi imaguta yachajushcata paicunapa causaipi pactachichun ayudashpa (Juan 17:3; Col. 2:6, 7; 1 Tes. 2:13). Congregacionbica tucui huauquipanicunallatami Bibliamanda yachajujcunataca tandajuicunaman shamujpi aliguman chasquishpa, paicunata juyashcata ricuchi ushapanchi (Juan 13:35). Bibliamanda yachajujcunaca alipacha shayachishca pircacunashna costumbrecunatami charin. Paicunapa costumbrecunata ladoman saquinaca shinllimi caita ushan. Chaimi Bibliamanda yachachij huauqui o panica Bibliamanda yachachishcacunata aliguman chasquichunga tiempoguta llujchishpa ashtacata esforzarina can (2 Cor. 10:4, 5). Bibliamanda yachajujcuna paicunapa causaipi cambiocunata rurashpa bautizaringacamanga ashtaca quillacuna o ashtaca tiempomi yalita ushan. Pero bautizaringacaman ayudashpa catijpica bautizaringami. Chaipica ninanda cushijupashun.

 7. ¿Imamandata gentecunamanga Diospa Reinomanda villachingapaj, Bibliamanda yachachingapapash esforzaripanchi?

⁷ ¿Imamandata gentecunamanga Diospa Reinomanda villachingapaj, Jesuspa ali catijcuna tucuchunbash esforzaripanchi? Primero, Jehová Diosta ninanda juyaimanda. Gentecunaman Diospa Reinomanda villachingapaj, Bibliamanda yachachingapaj esforzarishpaca Jehová Diosta juyashcatami ricuchipanchi (1 Juan 5:3). Caipi pensaripashun: Jehová Diosta juyaimandami ñucanchicunaca huasin huasin villachishpa ripashcanchi. Cai mandashcagucunata pactachinaca na fácil cashcangachu. Seguromi primera vez villachijushpaca, manllaihuan capashcashun. Shinapash, Jesús chaita mandashcamandami chaigucunataca rurapashcanchi. Shinapash cunanga talvez villachinataca ñana manllapanchichu. Pero cunanga, shuj gentegucunaman Bibliamanda yachachinatami talvez manllapanchi. Huaquinbica pimanbash Bibliamanda yachachinata pensashpallatami ninanda manllapanchi. Shinapash Jehová Diosta, “shuj estudioguta charingapami munapaiman, pero manllaicunata mishangapaj ayudahuai” nishpa mañajpica Jehová Diosllatami ayudanga.

 8. Marcos 6:34​pi nishcashnaca ¿imamandata gentegucunataca yachachingapaj munanchi?

⁸ Segundo, gentecunata juyaimandami yachachipanchi. Shuj punllaca Jesusca paipa discipulocunahuanmi punlla entero villachishca cashcamanda shaijushca carca. Paicunaca samangapami shuj pushtuguta mascanajurca. Shinapash, ashtaca gentecuna paicunata shuyanajujtami ricurca. Jesusca paicunata ricushpaca ninanda llaquishpami paicunamanga ‘imagutapash yachachi callarirca’ (Marcos 6:34​ta liipangui). Jesusca shaijushca cashpapash ¿imamandata gentecunataca ayudangapaj munarca? Jesusca chai tiempopi gentegucuna sufrinajujta, Taita Diosmanda yachajunata minishtinajujtaca alimi yacharca. Chaimi paica, paicuna imashina sintirinajujta intindishpa paicunataca ayudarca. Cunan punllacunapipash chashnallatami gentegucunaca Taita Diosmanda yachajunata minishtinajun. Paicunaca cushilla causanajuj shina ricurishpapash na shina canllu. Paicunaca michij illaj llamagucunashnami causanajun. Chaimandami paicunata pipash ayudachun minishtin. Apóstol Pabloca, paicunaca Taita Diosmandapash, jipa punllacunapi ali causaigu tianamandapash na yachanllu nircami (Efes. 2:12). Paicunaca huañuiman ‘pushajuj ñandami’ catinajun (Mat. 7:13). Shinaca gentegucuna Taita Diosmanda yachajungapaj minishtinajujta ricushpaca, ñucanchica paicunata juyaimanda, llaquimandami paicunata ayudangapaj munapashun. Ashtahuanbachaca, paicunataca Bibliamanda yachachishpami ayudaita ushapanchi.

 9. Filipenses 2:13 nishcashnaca ¿imashinata Jehová Diosca ñucanchitaca ayudaita ushan?

⁹ Ñucanchicunaca Bibliamanda pimanbash yachachingapaca ninanda esforzarina cashcataca alimi yachapanchi. Chaimi huaquinbica pimanbash estudioguta cungapaca manllapanchi. Shina manllajushpaca, Jehová Diosmanmi ñucanchicuna imashina sintirijushcata parlanalla capanchi. Jehová Diosmanga, “pimanbash Bibliamanda yachachingapami munani, pero yachachina munaita charingapapash ayudahuai” nishpami mañanalla capanchi (Filipenses 2:13​ta liipangui).b Apóstol Juanga, ñucanchicuna Jehová Dios munashcashna mañajpica, Jehová ñucanchi mañaicunata contestanatami nirca (1 Juan 5:14, 15). Shinaca, Jehová Diosllatami pimanbash Bibliamanda yachachina munaita charichunga ayudanga.

10, 11. ¿Imamandata huaquinbica Bibliamanda yachachi callaringapaca manllaita ushapanchiman?

¹⁰ Jesuspa catijcuna tucuchun gentecunata ayudana cashcataca alimi yachapanchi. Shinapash huaquinbica, huaquin manllaicunatami charita ushapanchi. Shina manllaicuna ricurijpica ¿imatata rurai ushapanchi? Chaipaca cati yuyaicunata ricupashunchi.

¹¹ Ñucanchicuna munashcashna imatapash na rurai ushanichu nishpa pensajuna. Por ejemplo huaquin huauquipanicunaca ña mayorllagucuna o saludhuanbash na ashta ali canllu. Chaimandami quiquin shina pasajushpaca, COVID-19 ungui tiashcamanda, villachinapi imacunatalla rurajushcapi pensarina capangui. Cai ungui tiashcamandami mundo enteropica telefonopi cayashpa, internetta utilizashpa gentecunamanga Bibliamanda yachachinajupashcanchi. Shinaca ¿nachu ñucanchicunapash huasimandallata pimanbash Bibliamanda yachachi ushapanchiman? Huasipilla yalinajushpapash ñucanchicunaca gentecunamanga paicuna munashca horaspimi yachachita ushapanchi. Ashtaca gentecunaca huauquipanicuna ñana villachinajushca horascunapimi Bibliamanda yachachichun munan. Por ejemplo, huaquingunaca madrugadota yachachichun o huaquingunaca tuta tutapi yachachichunmi munan. ¿Imashpata na chai horascunapi ñucanchicunapash Bibliamanda yachachingapaj esforzaripanchi? Por ejemplo, Jesusca, Nicodemo runagu paiman tuta yachachichun munajpica, Jesusca paimanga tutami yachachirca (Juan 3:1, 2).

12. “Shujcunaman Bibliamanda na yachachi ushashachu” yajushpaca ¿ima quimsa yuyaicunata ñucanchitaca ayudanga?

¹² “Bibliamanda yachachitaca pimanbash na ushashachu” nishpa pensajuna. Talvez ñucanchicunaca na ashtaca conocimientota charinichu, o pitapash na “ali yachachita ushashachu” yashpami pensaripanchi. Shina pensajushpaca cai quimsa yuyaicunami ñucanchitaca ama manllachun ayudanga: Primero, Jehová Diosca quiquin Bibliamanda shujcunaman yachachingapaj listo cashcataca alimi yachan (2 Cor. 3:5). Segundo, Jesusca ‘jahua pachapipash, cai pachapipash mandajuchun’ autoridadtami chasquishca. Paimi ñucanchitaca yachachichun mandashca (Mat. 28:18). Tercero, na ñucanchilla canchichu. Jesushnallatami ñucanchicunapash Jehová Dios ñucanchita ayudanapi confiana capanchi. Jehová Diosllatami imata ninata, imashina ninatapash ayudanga (Juan 8:28; 12:49). Shinallata, superintendente de grupo huauquihuan, shuj precursorhuan o experienciata charij shuj publicador o publicadorahuanmi parlaita ushapanchi. Paicunami ñucanchitaca Bibliamanda imashina shujcunaman yachachi callarinata yachachinga. Paicunata, paicunapa estudiogucunaman cumbashpaca paicuna imashina yachachijta ricushpami ñucanchicunapash gentecunaman yachachinata yachajui ushapashun.

13. Cunanbica Bibliamandaca ¿imashinata yachachinajupanchi?

¹³ “Mushuj publicaciongunahuan, shinallata mushujta yachachinatami na ashta ali intindijuni” nishpa pensajuna. Cunanbica Bibliamanda yachachingapaca Cushilla causapashunchi librohuanmi ashtahuanbachaca yachachinajupanchi. Chaimi cunanga shuj layata yachachinajupanchi. Cunanga ashtahuan prepararingapami tiempoguta surcuna capanchi. Cai libroca ashalla parrafocunatami charin. Chaimi Bibliamanda yachajujhuanga ashtahuan parlaita ushapanchi. Ashtahuan videocunatapashmi ricuchipanchi. Shinallata JW Library^® aplicaciondapashmi ashtahuan utilizapanchi. Cai ayudacunata na ashta ali utilizaita ushajushpaca, “chai ayudacunata imashina utilizanata yachachichunmi” shuj huauquipa o shuj panipa ayudata mañanalla capanchi. Jehová Diospa, ñucanchi huauquipanicunapa ayudahuanga Bibliamanda shujcunaman yachachijushpaca ninandami cushijupashun. Cai mushuj librohuanbash Bibliamandaca ashtahuan facilmi yachachi ushapashun. Shuj precursor huauquica nircami: “Cai mushuj publicacionhuan yachachinaca, Bibliamanda yachajujpapash, yachachij huauquipa o panipapash alipachami can” nishpa.

14. a) “Ñucanchi llactapica pipash na yachajungapaj munangachu” yajushpaca ¿imatata yarina capanchi? b) 1 Corintios 3:6, 7​pi shimicunaca ¿imata rurachunda animan?

¹⁴ “Ñucanchi llactapica pipash na Bibliamanda yachajui callaringapaca munanllu” nishpa pensajuna. Tal vez ñucanchi causajuj llactapica huaquin gentecunaca ñucanchi villachinajujpica na uyangapaj munangachu. O tal vez ñucanchi obrata prohibishca llactapimi causanajupashun. Shinapash cushilla villachishpa, yachachishpa catichunga ¿imata ayudanga? Caita yarinami ashtacata ayudanga. Cai mundopica ashtaca problemacuna tiashcamandami gentecunapa causaica ñapash cambianlla. Huaquingunaca cunanbi Taita Diosmanda na yachajungapaj munashpapash, jipacunamanga yachajungapaj munangami (Mat. 5:3). Shinallata pundacunapi ñucanchi publicaciongunata na chasquingapaj munashca gentecunapashmi tiempohuanga Bibliamandapash yachajui callarishca. Jehová Diosmi cai obrataca ñaupaman pushajun. Chaitami siempre yarina capanchi (Mat. 9:38). Jehová Diosca ñucanchicuna tarpunshna villachishpa catichun, reganshna cutin visitangapaj tigrachunmi munan. Jehová Diosllatami gentecuna Bibliamanda yachajushpa paiman quimirichun ayudanga (1 Cor. 3:6, 7). Shinallata ñucanchicuna cunanbi pimanbash na Bibliamanda yachachinajujpipash, Jehová Diosca ñucanchicuna ninanda esforzarijujtaca ricujunmi. Chaimi esforzarishcata ricushpaca bendiciashpa catinga.c

15. Pipash Bibliamanda yachajushpa, chai yachajushcacunata pactachi callarijta ricushpaca ¿imashinata Jehová Diosca sintirin?

¹⁵ Pipash Bibliamanda yachajushpa, chai yachajushcata shujcunamanbash parlajta ricushpaca Jehová Diosca ninandami cushijun (Prov. 23:15, 16). Cunan punllacunapi imacunatalla ruranajushcata ricushpacarin cushijushcami canga. Por ejemplo huata 2020​pica, COVID-19 ungui tiashca jahuapash, Jehovapa organizacionga ashtacatami rurarca. Por ejemplo, 7 millón 705 mil 765 gentecunami Bibliamanda yachajui callarishca. Chaicunamandaca 241 mil 994 gentecunami, “Jehová, candallami sirvisha” nishpa bautizarishca. Cai mushuj bautizarishcacunapashmi shujcunamanga Bibliamanda yachachishpa, shujcuna bautizarichun ayudanga (Luc. 6:40). Shinaca, Bibliamanda shuj gentecunaman villachishpa, yachachishpaca Jehová Diostaca ninandami cushichipanchi.

16. ¿Imata rurangapata tucuicunallata esforzarina capanchi?

¹⁶ Pipash Bibliamanda yachajui callarichun, yachajushcacunata pactachishpa Jesuspa catij tucuchun ayudanaca tucuicunapami shinlli can. Shinapash Jehová Diospa ayudahuanga ushashunmi. Tucuicunallatami shuj personamanllapash Bibliamanda yachachi callaringapaj esforzarina capanchi. Pihuanbash parlajushpaca, “¿nachu Bibliamanda yachajungapaj munapanguiman?” nishpami tapuita ushapanchi. Shina nijpica talvezpashmi Bibliamanda yachajungapaj munanga. Bibliamanda yachachingapaj esforzarijpica, Jehová Diosca seguromi bendicianga.

17. Pimanbash Bibliamanda yachachi callarishpaca ¿imashinata sintiripashun?

¹⁷ Gentecunaman Diospa Reinomanda villachina, Bibliamanda yachachinaca shuj sumaj bendicionmi can. Caita rurashpaca, tucuicunallata ninanda cushijupanchi. Apóstol Pabloca, Tesalónica llactapica ashtaca gentecunatami Jesuspa catijcuna tucuchun ayudarca. Pai imashina sintirishcata parlashpaca: “Ñucanchica, ¿ima alita japigrishun yashpata, cushijushpa shuyanajunchi? Ñucanchi Apunchi Jesucristo tigramujpi, cangunamanda coronata japigrinata yachashpami cushijunchi. Cangunamanda alicachi tucushpa, cushijunataca yachanchimi” nircami (1 Tes. 2:19, 20; Hech. 17:1-4). Cai tiempopica tauca huauquipanicunami shuj gentecunaman Bibliamanda yachachishpa, paicuna Jesuspa catijcuna tucuchun ayudashpaca ninanda cushijunajushca. Stéphanie shuti paniguca, paipa cusagundimi taucacunata bautizarichun ayudashca. Paniguca ninmi: “Pipash Bibliamanda yachajui callarishpa, Jehová Diosta juyashpa sirvi callarijta ricunaca imahuanbash na igualanllu. Chaica shuj sumaj, alipacha bendicionmi can” ninmi.