Jesuspa Chaquita Catishpa Causashunchi Yachachishunchi Tandanajuipi Yachajungapaj Hojapa referenciacuna
© 2024 Watch Tower Bible and Tract Society of Pennsylvania
6-12 DE MAYO
BIBLIAPA VALISHCA YUYAICUNA | SALMOS 36, 37
“Nali runacunamandaca, ama fíñarichu”
Diospa Reino mandajpica ¿imacunallata ñana tianga?
4 Nali gentecuna tiashcamandaca ¿imashinata causanajunchi? Apóstol Pabloca nircami: “Tucurimui punllacunapica, jatun llaquicunami shamunga” nishpa. Gentecunapash ashtahuan ashtahuan huaglishpami catinga nircami (2 Timoteo 3:1-5, 13). ¿Nachu Bibliapi chai shimicuna pactarijujta ricunajupanchi? Ashtacacunaca shuhua gentecunapa, huañuchij gentecunapa culpamandami sufrishcanchi. Shinallata, shujcuna maltratashpa llaquichishcamanda, shuj llactamanda cashcamandalla millanayachishpa tratashcamandami sufrishcanchi. Huaquin nali gentecunaca nalita ruranajushcataca nimata na pinganayachinllu. Cutin shujcunaca ayudangapaj munajshnalla cashpapash gentecunataca llaquichingapami munan. Huaquingunaca, shujcuna ñucanchita na llaquichishca cajpipash, nali gentecuna tiajtaca ricushcanchimi. ¿Nachu uchilla huahuagucunata, rucugucunata, huajchalla gentecunata llaquinaita maltratajta ricushpaca manllarishcanchi? Huaquin nali gentecunacarin, sacha animalcunashna millai millaicuna o ayacunashna jatun nalicunami can (Santiago 3:15). Chashna llaquicuna tiajpipash Bibliapica ali villaicunata villachishpami cushichin.
Jehová Diosca tucui shunguhuan perdonajcunataca ninandami bendician
10 Resentido quidanaca ñucanchipallatami nali can. Resintirishca quidanaca ñucanchipaca shuj llashaj quipita charijunshnami can. Chaimandami Jehová Diosca cai llashaj quipita ñucanchicuna anchuchichun munan (Efesios 4:31, 32ta liipangui). Chaimandami Jehová Diosca “ninanda fiñarinata saquishpa, chai fiñarinataca shitai” nishpa consejan (Sal. 37:8). Cai consejota catinaca ñucanchipallatami ayudan. Porque resintirishca quidanaca ñucanchipa saludtami afectan (Prov. 14:30). Resintirishca quidanaca venenota ufiajuj cuendami can. Porque si na perdonanchica ñucanchillatami dañota rurarinajunchiman. Chaimandami shujcunata perdonashpaca, ñucanchillata ali cai ushashun (Prov. 11:17). Shinallata ñucanchillata tranquilo sintirishpami Jehová Diostapash sirvishpa cati ushashun.
w03-S 1/12 13 párr. 20
‘Mandaj Dioshuanlla cushijupashun’
20 Chai tiempopica “na jariyajcunami, llactataca japinga” (Salmo 37:11a; Mateo 5:5). Cai textopi ‘na jariyajcuna’ nishpaca ¿picunamandata parlajun? Caipi ‘na jariyajcuna’ nishpaca shuj gentecuna llaquichi tucushcacunamandami parlajun. Paicunaca ‘na jariyajcuna’ o humilde cashcamandami paicunata llaquichishca gentecunata Jehová Dios juzgachun saquin. Paicunaca “casilla ali causaihuanmi, ninanda cushijunajunga” (Salmo 37:11b). Cunan punllacunapipashmi ali cristianocunaca Jehová Diospi confiashcamanda tranquilo, ali causaiguta charin.
Bibliapa Valishca Yuyaicunata Mascashunchi
it-2-S 424 párr. 3
Urcu, montaña
Tucuimanda yali jatun, na tucurinalla cana. Bibliapica urcucunamanda parlashpaca shinlli, na tucurinalla cashcatami ricuchin (Isa 54:10; Hab 3:6; Sl 46:2huan chimbapurashpa ricupangui). Shinaca salmista runagu ‘imatapash cashcatapacha can rurashcapash, can Taita Diospaj urcucunashnami can’ (Sl 36:6) nishpaca Jehová Dios siempre justo Dios cashcatami ricuchingapaj munashcanga. O na cashpaca imashinami urcucuna jatun jatun can, shina cuendami Taita Diospa justiciaca gentecunamanda ashtahuan yali cashcata ricuchingapaj munashcanga (Isa 55:8, 9huan chimbapurashpa ricupangui).
13-19 DE MAYO
BIBLIAPA VALISHCA YUYAICUNA | SALMOS 38, 39
Na yapata culparishpa catinachu capanchi
“Ñaupajman ricushpa catingui”
12 (1 Juan 3:19, 20, liingui). Casi tucuicunallatami Jehovata nara rijsishpaca talvez nalitaiman rurashcashun. O cutin ña bautizarishca jipa talvez nalitaiman rurashcashun. Chaimi llaquirishpa culparipanchi. Shina sintirinaca normalmi can (Rom. 3:23). Huaquinbica alita rurangapaj esforzarijushpapash ‘imatapash pandata nishpami llaquichinchilla’ (Sant. 3:2; Rom. 7:21-23). Llaquirishpa culparijunaca shuj partemandaca alimi can. ¿Imamandata ali can nipanchi? Imatapash nalita rurajujta cuenta japichun, ama chaitalla rurashpa catichunmi ayudaita ushan (Heb. 12:12, 13).
13 Ñucanchi juchacunamanda arripintirishpa Jehová Dios perdonashcata yachanaca alimi can. Shinapash punda rurashcata yarishpa causajunaca ¿imamandata nali can? Yapata culparijunaca ñucanchipallatami nalipacha can (Sal. 31:10; 38:3, 4). ¿Imamandata nalipachami can nipanchi? Cunanga shuj panigupa causaimanda yachajupashun. Paica paipa punda causaipi nalicuna rurashcata yarishpami cutin cutin culparijurca. Paica: “Jehovata ashtahuan sirvingapaca imapata esforzarisha. Jehová Diosca ñucataca na perdonahuashcachu” nishpami nin carca. Nachu cai shimicunataca tucuicunallata nipashcanchi. Shinapash ama yapata culparingapami cuidarina capanchi. Diabloca shina culparishpa causachunmi munan. Cutin Jehová Diosca culparishpa causajuchunga na munanllu (2 Corintios 2:5-7, 11huan chimbapurashpa ricupangui).
w02-S 15/11 20 párrs. 1, 2
Ñucanchi causai Jehovapa ñaupapi valishca ricurichunga ¿imatata rurana capanchi?
ÑUCANCHIPA causaica ashalla, ñapash tucurinshnami can. Gentecunapa causaipi pensarishpami rey Davidca Jehová Diostaca shuj mañaipica: “Mandaj Dioslla, ñuca causai tucurinata villahuayari. Ima punllacunacamanlla causanatapash villahuayari. Ñuca imashna tucurinalla cajtami yachangapaj munani. Ricui, ñuca causana punllacunatapash, ashatallami cushcangui. Ñuca causajui huatacunaca, cambaj ñaupajpica imapash na canllu” nircami. Davidca paipa tucui rurashcacunahuan, parlashcacunahuanmi Taita Diospa ñaupapi ali ricuringapaj munarca. Davidca Jehová Diosmandalla causajushcata yachashcamandami: “Ñucaca candallami shuyajuni” nirca (Salmo 39:4, 5, 7). Jehová Diosca David imata rurashcata ricushpa y chai ruraicunamanda paita bendiciashpami paipa mañashcacunata uyashcata ricuchirca.
Ñucanchicunaca tranquilamentemi: “Tiempota ali aprovechangapami munanchi” nishpa trabajashpalla o ñucanchi imapash munashca cosascunatalla rurashpa yalita ushapanchiman. Shinapash chashnalla causanaca estresta o ansiedadtami cuita ushan. Porque ashtaca cosascunata rurangapaj munashpapash na suficiente tiempota charishcata cuenta japimandami shina sintirita ushapanchiman. Jehová Diosca ñucanchicuna imashina causajta, imata rurajtaca tucuitami ali ricujun. Chaimandami Davidshnallata Jehová Diospa ñaupapi ali ricuringapaj munana capanchi. Más o menos 3 mil 600 huatacuna huashamanga Job runagupashmi Jehová Dios paipa tucui rurashcacunata ricujushcata parlarca. Chaimandami Job runaguca: “Pai imata tapujpipash, ¿imatashi tigrachiman carcani?” nirca (Job 31:4-6, 14). Shinaca ñucanchi causaipi espiritual cosascunata primero churashpa, Jehovapa mandashcacunata pactachishpa, ñucanchi tiempota ali utilizashpaca Jehovapa ñaupapica ñucanchi causaipi rurashca cosascunaca valishcami ricuringa. Caicunata imashina pactachi ushashcata ashtahuan yachajupashunchi.
¿Imashinata Jehová Dioshuanga cutin ali amigo tucuita ushapangui?
Jehová Diosta siempre mañapai. Jehová Diosca juchata rurashcamanda quiquin nali sintirishpa catijtaca alimi intindin. Chaimandami paita mañangapaj quiquinba na fácil cashcatapash ali intindin (Rom. 8:26). Shina cashpapash Jehová Diostaca mañashpami catina capangui. Jehová Diostaca quiquinhuanga cutinmi ali amigo tucungapaj munani nishpami mañaita ushapangui (Rom. 12:12). Andrej huauquiguca ninmi: “Juchata rurashcamandaca nali, pingai tucushcami sintirin carcani. Shinapash Jehová Diosta mañashpami, jipamanga tranquilo, ali sintirin carcani” nin. Shinaca quiquin Jehová Diosta imashina mañanata na atinajushpaca, Salmos 51 y 65pi rey David arripintirishca cashpa, imashina Jehová Diosta mañashcapimi pensarita ushapangui.
Bibliapa Valishca Yuyaicunata Mascashunchi
Shujcuna ñucanchipi confiai ushashcata ricuchipashunchi
16 Shujcuna ñucanchipi confiachunga, controlarinatami yachajuna capanchi. Controlarinata yachashpaca na villana cosascunataca na shujcunaman villashunllu (Proverbios 10:19ta liipangui). Internetta, redes socialesta utilizajushpami controlarinaca difícil caita ushan. Porque si na cuidadota charishpaca shujcuna na yachana informaciondarami internetpi o redes socialescunapica churanchiman. Y chai informacionda shujcuna imashina utilizanataca na yachapanchichu. Y ima problemacuna tianatapash na yachapanchichu. Chaimandami cuidadota charina capanchi. Shinallata Jehovata sirvichun prohibishca llactacunapimi ñucanchi huauquipanicunapa informacionda villachun policiacunaca atichita ushan. Chai cosascunapimi controlarinata yachanaca ñucanchi huauquipanicunapa informacionda ama villachun ayudanga. Cashna pasajpi o imapash shuj situacionguna ricurijpica “ñuca shimitaca frenohuanshnami jarcasha” nishca consejota catinami ayudanga (Sal. 39:1). Ñucanchicunapi familiacuna, amigocuna y huauquipanicunapash confiachunga controlarinata yachanami importantepacha can.
20-26 DE MAYO
BIBLIAPA VALISHCA YUYAICUNA | SALMOS 40, 41
¿Imamandata shujcunata ayudana capanchi?
Carajcunaca ninandami cushijun
16 Ayudachun yashpallaca ñucanchica na ayudanachu capanchi. Chaimi Jesusca cashna nirca: “Ashtahuangarin jatun micuita rurajushpaca, imagutapash na charijcunata, shuj maqui cashpa, shuj chaqui cashpapash illajcunata, jangacunata, ñausacunatami micungapaca shamupaichi nishpa carana cangui. Shina rurashpaca, ninandami cushijungui. Paicunaca, canman cutin tigrachishpa caraitaca na ushangachu” nishpa (Luc. 14:13, 14). Bibliapica cashnami nin: “Imagutapash na charij runaguta yarij runaca, ninandami cushijun” nishpa (Prov. 22:9; Sal. 41:1). Gentecunata juyaimanda ayudashpaca ninandami cushijushun.
17 Apóstol Pabloca Jesuspa nishcacunatami nirca. Paica nircami: “Carajpi japijcunatapash yalimi carajcunaca, ninanda cushijun” nishpa. Chashna nishpaca na nijurcachu imapash cosascunata caranatalla. Ashtahuangarin cushichina, shujcunata ayudana cashcatami nijurca (Hech. 20:31-35). Apóstol Pabloca paipa parlocunahuan, ruraicunahuanmi gentecunataca ayudarca. Ñucanchicunapash gentecunata juyaimandami ñucanchi tiempohuan, ñucanchi fuerzahuan ayudangapaj munapanchi.
18 Huaquin estudiashca gentecunaca ninmi, imagutapash caranaca cushilla causachunmi ayudan nishpa. Shinallata shuj ali estudiashcacunaca ninmi, shujcunata ayudajcunaca ashtahuan cushillami sintirin nishpa. Cutin shuj estudiashca gentecunaca nin shujcunata ayudanaca ali causachun, ñucanchi causaipi imata ruranata yachachunmi ayudan nishpa. Chaimi estudiashcacunaca, gentecuna ashtahuan cushilla sano causachunga shujcunata ayudachunmi mandashca. Shinapash Jehovata sirvijcunaca, shujcunata ayudana cushilla sintirichun ayudaj cashcataca alimi yachapanchi (2 Tim. 3:16, 17).
Jehová Diosmi cuidanga
7 Ñucanchicuna ungushca cajpi Jehová Dios na shuj milagrota rurashpa jambishpapash shinlliyachishpami ayudan. Imashinami punda tiempopi paita sirvijcunata ayudarca, shinallatami cunanbipash ungushca cajpica cushichin, ali yuyaihuan imata rurachunbash ayudan. Rey Davidca nircami: “Imagutapash na charij runaguta yarij runaca, ninandami cushijun. Llaqui punllapica, Mandaj Diosmi paitaca quishpichinga. Mandaj Diosmi, huacaichishpa causaitapash caranga” nishpa (Sal. 41:1, 2). Shinapash, imagutapash na charijcunata ayudajcuna cunangaman causashpa catinataca rey Davidca na nijurcachu. Shinaca ¿imashinashi Taita Diosca ayudana carca? ‘Nanaihuan camapi sirijujpi’ cuidashpa, shinlliyachishpami ayudana carca (Sal. 41:3). Jehová Diosca imagutapash na charij gentecunata ayudajcunataca ricujunmi, na cungangachu. Shinallata, ñucanchicunata huaquin ungüicuna japijpi, ñucanchi cuerpollata paimanda ali tucuchunmi Jehová Diosca rurashca.
Jehová Dios llaquinshnami llaquina canchi
17 Jehová Diosca juyaj, llaquij Diosmi can. Chaimandami shujcunata llaquishcata ricuchina ñucanchipallata ali cajpipash, ashtahuanbachaca Jehová Diospa ejemplota catingapaj munaimanda, paita alabangapaj munaimanda shujcunata llaquishcata ricuchinchi (Prov. 14:31). Jehová Diospa ejemplota ashtahuan ali catingapaj esforzarishpami, ñucanchi huauquipanicunaman ashtahuan quimirishun, shujcunahuanbash ashtahuan ali llevarishun (Gál. 6:10; 1 Juan 4:16).
Bibliapa Valishca Yuyaicunata Mascashunchi
it-2-S 46 párr. 7
Jehová
Biblia enteropimi Jehová Dios tucuita mandana derechota charishcata ricuchin. Shinapash Jehová Diosca pai tucuita mandana derechota charishcata ricuchingapaca primeroca paipa shutitami santificana can. Diablo y gentecunapash Taita Diosmanda y paipa shutimandaca ashtaca llullacunatami nishca. Shinaca paipa shutita santificangapaca chaicuna na cierto cashcatami Taita Diosca ricuchina can. Chai jahuapash Taita Diospa shuti santificado cachunga cielopi, cai alpapi causajcuna Jehová shutita alabashpa respetana cashcatami ricuchin. Chaita rurashpaca Jehovapa autoridadta respetashcata, pailla mandana derechota charishcatami ricuchin. Shinallata Jehovata juyaimanda paitalla sirvingapaj munashcatapashmi ricuchin. Y Salmo 40:5-10pi Davidca paipa mañashcacunahuanga chaita rurashcatami ricuchin.
27 DE MAYO-2 DE JUNIO
BIBLIAPA VALISHCA YUYAICUNA | SALMOS 42-44
Jehovapa yachachishcacunata pactachipashunchi
w06-S 1/6 9 párr. 4
Salmos libropa valishca yuyaicuna
42:4, 5, 11; 43:3-5. Imamandapash huauquipanicunahuan ñana tandanajui ushashpaca paicunahuan cashpa cushilla yalishcata yarinami shinlli tucushpa ñaupaman catichun ayudanga. Aunque callaripi chashna pensarina ashtahuan sololla sintichina cajpipash Jehová Dios llaqui tiempocunapi ñucanchipa pacajuna pushtushna cashcapi pensarichun, shinallata tranquilo, ali sintiringapaj paita shuyana cashcata yarichunbashmi ayudanga.
w12-S 15/1 15 párr. 2
Bibliata estudiashpa ashtahuan beneficiaringapaca ¿imatata rurana capanchi?
1 MAÑANA. Callaripica Diostami mañana capanchi (Sal. 42:8). Bibliata estudiashpaca Jehová Diostami adoranajupanchi. Chaimandami estudiagrijushpaca yachajuna munaita charingapaj, aliguta intindi ushangapaj Jehová Dios paipa espíritu santota cuchun mañana capanchi (Luc. 11:13). Barbara paniguca ashtaca huatacunatami misionera shina sirvijushca. Paica: “Bibliata nara liishpallata, nara estudiashpallatami Jehová Diostaca siempremi mañani. Shinami Jehová ñucata apoyajujta, pai munashcashna imagutapash rurajujta sintini“ ninmi. Jehová Diosta mañanaca imaguta estudiashpapash chaicunata aliguta intindi ushachun, shinallata chai intindishcacunata ñucanchi causaipi pactachi ushachunbashmi ayudan.
Ñucanchi maqui ushai illanshna tucuchunga na saquinachu canchi
11 Ñucanchicunata shinlliyachingapaca Jehová Diosca tandanajuicunatapash, jatun tandanajuicunatapash, Diosmanda yachajuna tauca escuelacunatapashmi cushca. Chaicunapimi Jehová Diosta tucui shunguhuan sirvinata, Jehovata ashtahuan sirvingapaj imata ruranata, ñucanchi responsabilidadcunata ali pactachinatapash yachachin (Salmo 119:33). Shinaca, ñucanchicunata Jehová Dios shinlliyachijujpica ¿alichu aprovechanajunchi?
12 Imashinami ricushcanchi, Amaleq llactamanda contracunata, Etiopía llactamanda contracunata mishachunmi Jehová Diosca paipa sirvijcunata ayudarca. Cutin Nehemiasta, judiocunataca Jerusalenba jatun pircacunata cutin shayachichunmi ayudarca. Imashinami paicunata ayudarca, shinallatami ñucanchicunataca preocupaciongunata, jarcaicunata charijpipash, gentecuna na uyangapaj munajpipash villachishpa catichun ayudanga (1 Pedro 5:10). Shinapash, ñucanchi llaquicunata anchuchingapaca Jehová Diosca na milagrocunata rurangachu. Shinaca, ñucanchi maqui shinlli cachun munashpaca ñucanchipashmi esforzarina canchi. Chaipaca ¿imatata rurana canchi? Bibliatami cada punlla liina canchi. Tandanajuicunapapash prepararinami canchi, na faltanachu canchi. Estudio personalta, Familiahuan Adorana Tutatapash charinami canchi. Jehovata mañanatapash na cunganachu canchi. Chai tucui ayudacunahuan Jehová Dios ñucanchita animajushcamandaca, chai tucuilla ayudacunatami ali aprovechana canchi. Imapipash mejoranami cani yashpaca Jehovatami mañana canchi. Shina mañajpimi Jehová Diosca paipa espíritu santota cushpa ñucanchitaca shinlliyachishpa paita sirvina munaita charichun, paipa munaita pactachichunbash fuerzata cunga (Filipenses 2:13). Shinapash ¿imashinata shujcunapa maquita shinlliyachita ushanchi?
Bibliapa Valishca Yuyaicunata Mascashunchi
it-1-S 470
Chacal
Taita Diospa pueblo shuj guerrapi llaquinaita mishai tucushcamanda parlashpaca shuj salmista runaguca ninanda llaquirishpami “chacal nishca animalcuna causajuj pushtupimi ñucanchitaca llaquichishcangui” nirca (Sl 44:19, TNM-S). Chashna nishpaca talvezpashmi chacal nishca animalcuna huañushca gentecunata micungapaj tandanajuj pushtumanda parlajushcanga (Sl 68:23huan chimbapurashpa ricupangui).
3-9 DE JUNIO
BIBLIAPA VALISHCA YUYAICUNA | SALMOS 45-47
Shuj cancionbica shuj Rey cazarajushcatami ricuchin
Llamagupa cazamientomanda cushijushunchi
8 (Salmo 45:13, 14, liingui.) Noviaca rey Jesushuan cazaragrijushcamandami ‘punchapambata’ churajun. Apocalipsis 21:2pica ninmi, noviaca Mushuj Jerusalenshnami can. ‘Cusata cazarangapaj juyaillaguta’ arreglarishcami can nishpa. Cai Mushuj Jerusalén llactaca “Taita Dios punchapambagu cajpimi” ‘ninan juyailla rumishna, jaspe nishca rumishna, punchapamba espejoshna’ brillajunga (Apoc. 21:10, 11). Mushuj Jerusalén juyaillagu cashcataca Apocalipsis libropimi intindichijun (Apoc. 21:18-21). Jahua cielopi cazarana cashpami noviaca punchapambagupacha ricurin.
9 Diospa Reinopi mandana Rey Jesusmi noviataca chasquin. Rey Jesusca ‘Diospa Shimihuanbash, yacuhuanbash armachishpa cuendami, Diospalla causanajuchun, mapa illajta rurashpa’ noviataca segurachijushca (Efes. 5:26, 27). Rey cazaragrijushcamandami noviaca ‘oro puchahuan ahuashca, bordashca churajunahuan’ can. Ashtahuangarin ‘Diospalla causajcuna [alita] rurashpa causajushcamandami juyailla linota rurashca, punchapamba yuraj churajunahuan can’ nin (Apoc. 19:8).
Shamuj punllacunapi ima bendiciongunata charinamanda Apocalipsis libropi villashcacuna
10 Shinaca Jehová Diosta sirvijcunata ashtaca tandanajushca llactacuna atacai callarijpica, Jehová Diosca ¿imatata ruragrin? Bibliapica Jehová Diosca chai tiempocunapica “ninandapachami fiñarisha” nijunmi (Ezeq. 38:18, 21-23). Jehová Dios fiñarishpa imata ruranataca Apocalipsis capítulo 19pimi ashtahuan villajun. Jehová Diosca paipa llactata difindingapaca paipa churi Jesustami cachamugrijun. Jesusmi paipa tucui contracunata tucuchigrin. Y Jesusca ‘jahua cielopi soldadocunahuanmi’ shamunga. Cai soldadocunaca Diosta ali sirvij angelcuna y 144 mil ungidocunami can (Apoc. 17:14; 19:11-15). Shinaca Taita Diospa macanajuna punllapica tucui nali gentecunata, Diospa contra tucuj organizaciongunataca tucuitami tucuchinga (Apocalipsis 19:19-21ta liipangui).
11 Cai alpapi Jehová Diosta ali sirvijcuna, Jehová Dios paicunata salvashcamanda contracunapa maquimanda quishpirishcata ricushpaca ¿imashinata sintirigrin? Paicunaca Jehová Dios salvashcata ricushpaca ninandami cushijunajunga. Shinallata cai importante Babilonia Llacta o tucui panda religionguna tucurijpica, jahua cielopica ashtaca cushijuimi tianga (Apoc. 19:1-3). Shinapash ashtahuanbachaca Apocalipsis libropi nishcashnaca “Maltun Llamagupa cazamiento” punllami ashtahuan cushijui tianga (Apoc. 19:6-9).
12 ¿Imaurata Maltun Llamapa cazamientotaca ruran? Taita Diospa Armagedón guerra nara callarijpillatami 144 mil ungidocunaca ña tucuilla jahua cielopi canga. Shinapash chai tiempopica jahua cielopica nara cazamientotaca rurangachu (Apocalipsis 21:1, 2ta liipangui). Armagedón guerrapi Taita Dios paipa tucui contracunata tucuchishca jipami, jahua cielopica cazamientota ruranga (Sal. 45:3, 4, 13-17).
it-1-S 1061 párr. 5
Guerra
Cai guerra tucurishca jipaca, cai alpapica tucui gentecunallatami mil huatacunacaman tranquilo, ali causaiguta charinga. Chaimandami Salmos libropica, “[Jehová Diosca], cai pacha tucui manñacunacaman jatun macanajuicuna tiajtapash saquichinllami. Arcota, lanzata faquishpa fitishpami, carretacunatapash ninapi rupachin” nin. Cai textopi nishca shimicunaca callaripica Jehová Dios israelitacunapa contra gentecunapa armacunata tucuchishpa, shuj tranquilo causaiguta cujpimi pactarirca. Shinapash Jesús Diospa tucui contracunata Har-Magedón guerrapi tucuchijpimi cai mundopica tranquilo, ali causaigu tucui ladopi tianga (Sl 46:8-10). Ña tucurijpica para siempre causana bendicionda chasquishca gentecunaca ‘paicunapaj espadacunataca, yapuna rejacunamanmi tigrachinga. Lanzacunatapash, hocescunamanmi tigrachinga’. “Macanajunata yachajunapash, na ashtahuan tiangachu”. “Caitaca, tucuita Mandaj Diosllatami villarca” (Isa 2:4; Miq 4:3, 4).
Bibliapa Valishca Yuyaicunata Mascashunchi
Diospa Reino mandajpica ¿imacunallata ñana tianga?
9 Nali organizacionguna tucuchi tucujpica ¿imata tianga? Armagedón jipaca, ¿maijanbash organización cai Alpapi tiangachu? Bibliapica ninmi: “Ñucanchica, jahua pachatapash, cai pachatapash mushujtami rurasha nishcatami shuyanajunchi. Chaipimi, imatapash cashcatapacha ruranaca causajun” nishpa (2 Pedro 3:13). Punda jahua pacha nishpaca nali gobiernocunamandami parlajun. Cutin, punda cai pacha nishpaca nali gobiernocuna mandajuj tucuilla gentecunamandami parlajun. Punda jahua pachapa, punda cai pachapa randica ¿imata tianga? Bibliapi nishca shinaca, Jehová Diosca jahua pachatapash, cai pachatapash mushujtami ruranga. Jahua pachatapash mushujtami rurasha nishpaca, shuj mushuj gobiernomandami parlajun. Chai gobiernoca Diospa Reinomi can. Chaipica Jesusmi 144 mil gentecunahuan mandanga. Mushuj Alpatami rurasha nishpaca, Diospa Reino mandajpi causana gentecunamandami parlajun. Jesuspash 144 mil gentecunapash mandashpaca, Jehová Diospa ejemplota catishpami, cai Alpapi causaj gentecuna aliguta organizashca cachun ricurianga (1 Corintios 14:33, NM). Cai Alpapi ñaupajman pushajcunapash alicunami canga. Paicunaca Jesuspash, 144 mil ungidocunapash imata nishcatami catinga (Salmo 45:16). Pensaripashunchi, tucuilla nali organizacionguna tucurishca punllacunapica ¿imashinashi causashun? Chai punllacunapica shujlla ali organizacionmi tianga. Tucuicunatami cuidanga. Siempremi ali canga.
10-16 DE JUNIO
BIBLIAPA VALISHCA YUYAICUNA | SALMOS 48-50
Taitamamacuna, quiquingunapa huahuacuna Jehovapa organizacionbi ashtahuan confiachun ayudapaichi
Jehová Diosta ali adoranami ñucanchitaca cushichinga
11 Jehová Diosta adoranajushcataca Bibliata estudiashpa, Jehovamanda ñucanchi huahuacunaman yachachishpami ricuchita ushapanchi. Israelitacunapa tiempopica sábado punllami paicunaca tucuita imata ruranatapash saquishpa Jehová Diosmanda ashtahuan yachajushpa, paihuan ali amigo tucungapaj tiempota llujchin carian (Éx. 31:16, 17) Tucui shunguhuan Jehová Diosta sirvij israelitacunaca paicunapa huahuacunamanga Jehová Dios shuj juyaj ali Dios cashcatami yachachin carian. Cunanbica ñucanchicunapashmi Bibliata liingapaca tiempoguta llujchina capanchi. Cashna rurashpami paita ali adoranajushcata ricuchishpa paihuanbash ali amigo tucupashun (Sal. 73:28). Tucuilla familia Bibliamanda yachajushpaca taitacunaca huahuacunataca Jehová Dioshuan ali amigo cachunmi ayudaita ushan (Deuteronomio 6:6, 7ta liipangui).
w11-S 15/3 19 párrs. 5-7
Ashtaca cosascunamandami contento caita ushapanchi
“Sion pueblo muyundita purigrichi, mashna torrecuna tiashcata cuentaichi. Canllaman pircacunatapash, aliguta ricuichi. Mandashpa tiajuna huasicunatapash ricuichi. Chaicunataca, cangunapaj jipa miraicunaman villangapajmi ricuna canguichi” (Sal. 48:12, 13). Cai shimicunahuanga salmista runaguca israelitacunataca Jerusalén llactaman rishpa, chai llactata paicunallata ricugrichunmi animarca. Israelitacunaca Jehová Diosta adorangapaj fiestacunata rurangapami cada huata Jerusalén llactaman rin carca. Chaipica jatun, juyailla templota ricuna oportunidadtami charirca. Chaicunata ricushpami ‘paicunapaj jipa miraicunaman villangapaj’ munashcanga.
Seba llactamanda reinapi pensaripashun. Paica rey Salomón ali yachaita charishcata, alipacha mandaj cashcataca callaripica na crircachu. Salomonmanda nishcacunata crichunga ¿imata ayudarca? Paillatami: “Ashtahuangarin ñuca caiman nara shamushpaca, paicuna parlashcataca na crijurcanichu. Cunan ñuca ñavihuambacha ricushpami crini” nirca (2 Cró. 9:6). Shinaca ñucanchi ñavihuan imatapash ricushpapachami ashtahuanbachaca crinchi.
Taitamamacuna, quiquingunapa huahuacuna Jehovapa organización alipacha cajta paicunapa ñavihuanbacha ricuchunga ¿imashinata ayudaita ushapanguichi? Quiquinba llacta ladopi Betel huasi tiajpica chaita rijsingapaj tiempota llujchishpa rinaca alimi canman. Mandy y Bethany panigucunapa ejemplota ricupashunchi. Paicunaca paicunapa llactapa sucursalmandaca más o menos mil 500 kilometrocunata carupimi causarca. Shina cajpipash paicunapa taitacunaca paicunataca seguidomi Betelta visitachun pushan carca. Paicunaca: “Betelta nara rijsishpaca chaipica imatapash rurangapaj tucui yapa estricto cashcata y mayorlla huauquipanigucunalla chaipi trabajan cashcatami pensarcanchi” ninmi. “Shinapash Betelpi ashtaca jovenguna Jehová Diosta cushilla sirvinajushcatami ricuparcanchi. Shinami Jehová Diospa organizacionbi mundo enteromanda huauquipanigucuna ayudanajushcata cuenta japircanchi. Sucursalman rishpaca siempremi ninanda animarishpa tigramun carcanchi” ninmi. Mandy y Bethany panigucuna Jehovapa organizacionda paicunapa ñavihuanbacha ricui ushashcamandami precursoracuna canata decidirca. Jipamanga voluntaria temporal shina sirvichunmi paicunataca Betelman invitarca.
w12-S 15/8 12 párr. 5
Diospa Gobiernopi causajujcunashna portaripashunchi
5 Llactapa historiata yachajuna. Pipash shuj llactaman pertinicingapaj munashpaca talvezpashmi chai llactapa historiata yachajuna tucunga. Shina cuendami Taita Diospa Gobiernopi mandajujpi causangapaj munajcunaca chai Gobiernomanda yachajuna can. Israelitacunapa tiempopi pensaripashun. Coré runapa jipa familiacunaca Jerusalén llactata y chaipi templo huasigutaca ninandami juyarca. ¿Imamandata shina juyan carca? Jerusalén llactaca jatun rumicunahuan, alipacha rurashcami carca. Shinapash cai llactaca Jehová Diosta adorana pushtu cashcamandami ashtahuanbachaca alipacha carca. Chaimandami paicunaca ninanda alicachin carca. Ashtahuanbash Jerusalenbi imacunalla pasashcata parlanataca ninandami gushtan carca. Shinallata Jerusalén llactaca “Jatun Mandajpaj” o Jehová Diospa pueblomi carca. Chaipimi Jehová Diospa leytaca yachachin carca. Ashtahuangarin Jehová Dios Jerusalenba Rey cashcamandami israelitacunata aliguta mandashpa paicunata juyashcata ricuchirca (Salmo 48:1, 2, 9, 12, 13ta liipangui). ¿Quiquinbashchu paicunashna Jehová Diospa cai alpapi tiashca organizacionmanda ashtahuan yachajushpa, chai organizacionmanda shujcunaman parlangapaj munapangui? Jehová Diospa organizacionmanda y Jehová Dios paita sirvijcunata ayudangapaj imacunatalla rurashcamanda yachajushpaca Taita Diospa Gobierno ciertopacha tiajtaca ashtahuanmi cripangui. Shinallata Taita Diospa Gobiernomanda ali villaigucunataca ashtahuanmi predicangapaj munapangui (Jer. 9:24; Luc. 4:43).
Bibliapa Valishca Yuyaicunata Mascashunchi
it-2-S 857 párr. 7
Charijyana
Jehová Diosca israelitacuna shinllita trabajashcamandaca ali causaiguta charichunmi munarca (Pr 6:6-11; 20:13; 24:33, 34huan chimbapurashpa ricupangui). Shinapash israelitacunaca Jehová Dios bendiciajpilla charij tucuita ushashcataca na cunganachu carca. Shinallata Jehová Diosca paicunataca culquipi, paicunapa cosascunapi ama confiachunmi advirtirca (Dt 8:7-17; Sl 49:6-9; Pr 11:4; 18:10, 11; Jer 9:23, 24).
17-23 DE JUNIO
BIBLIAPA VALISHCA YUYAICUNA | SALMOS 51-53
Jatun juchapi ama urmangapaca ¿imatata rurana capanchi?
Shungutaca ¿imashinata cuidai ushapanchi?
4 Proverbios 4:23pi ‘shungu’ nishpaca ñucanchi pensamientocunata, ñucanchi imashina sintirinata, ñucanchi munaicunata, ima munaihuan imatapash ruranatami shungu nin. Shinaca ñucanchi shungu ucupipacha ima tiajtaca ni pipash na yachai ushanllu.
5 Ñucanchi saludta cuidanshnami ñucanchi shunguta cuidana capanchi. Por ejemplo, sano cangapaca ali micuna, ejerciciotapashmi rurana capanchi. Shinallatami espiritualmente shinlli cangapaca Jehová Diospi tucui shunguhuan cringapaj esforzarina capanchi. Chaipaca Bibliamanda yachachishcacunata ñucanchi causaipi pactachina capanchi. Shinallata ñucanchi crishcacunamanda shujcunaman parlanami capanchi (Rom. 10:8-10; Sant. 2:26). Huaquinbica ñavi ricuipica sano sano ricurishpapash ungushcami caita ushapanchi. Shina cuendami Diospi tucui shunguhuan crishcata yaita ushapanchi. Shinapash ñucanchi shungu ucupica nali munaicunata chari ushapanchi (1 Cor. 10:12; Sant. 1:14, 15). Diabloca paishna pensachunmi munan. Shinaca ¿imacunahuanda Diabloca ñucanchi shunguta pandachin? ¿Imashinata ñucanchi shunguta cuidashun?
Nali pensamientocunata mishashunchi
5 Mapa, nali pensamientocunata mishangapaj munashpaca, Jehová Diostapashmi mañana canchi. Mañashpa paipaman quimirijpica paipashmi ñucanchiman quimirishpa paipa espíritu santota caranga. Shinami mapa pensamientocunamanda jarcari ushashpa limpio caita ushashun. Mañashpaca nipashun, quiquin alicachishca cosascunapillami pensaringapaj munani nishpa (Sal. 19:14). Shinallata Jehová Diostaca mañai ushanchimi, imapash nalita rurana ñanda rijujpica cuenta japichihuangui nishpa (Sal. 139:23, 24). Shinallata nali munaipi ama urmangapaj ayudahuai nishpapash Jehovataca mañanallami canchi (Mat. 6:13).
6 Huaquinbica Jehová Diosta na rijsishpa viñaimandami Testigo tucushpapash Jehová Dios nalicachishcatara cutin rurangapaj munanchi. Shinapash Jehová Diospa ayudahuanga chai nali munaicunataca mishai ushashunmi. Rey Davidpa ejemplota ricupashun. Paica Bat-seba shuti huarmihuan juchapi urmashca jipami Jehová Diostaca cashna nishpa mañarca: “Taita Dioslla, ñucapica ima mapapash illaj shunguta rurahuayari. Aligutalla ruraj espirituta, ñucapica cutin churahuayari” nishpa (Sal. 51:10, 12). Nali munaicuna mishangapaj munajpica Jehovata mañapai. Paimi quiquinmanga paita cazuna munaita cunga. Limpio pensamientocunata charichunbash, alita rurachunbash ayudangami (Sal. 119:133).
Bibliapa Valishca Yuyaicunata Mascashunchi
it-1-S 716
Doeg
Doeg shuti runaca Saulpa llamacunata michijcunata mandaj Edom llactamandami carca. Shinaca paica tucuita ricujuna responsabilidadtami charirca (1Sa 21:7; 22:9). Paica judío tucushcami cashcanga. Doeg runaca, imashina sacerdote principal Ahimélec Diosman separashca tandata y Goliatpa espadata Davidman cujujtami ricurca. Jipamanga rey Saúl paipa sirvijcunata ñucatami traicionahuashcanguichi nijpimi Doeg runaca Nob llactapi imata ricushcata rey Saulmanga villarca. Chaimi rey Saulca sacerdote principal Ahimelecta y Nob llactamanda shuj sacerdotecunatapash paipacha tapuchingapaj cayarca. Chai jipaca rey Saulca chai sacerdotecunata huañuchichunmi guardiacunataca mandarca. Chai guardiacuna na huañuchingapaj munajpimi rey Saulca Doeg runata mandarca. Chaimi paica 85 sacerdotecunata huañuchirca. Chai jatun nalita rurashca jipaca Doeg runaca Nob llactamanda jovengunata, mayorcunata, animalcunatapash huañuchishpami llacta enterota tucuchirca (1Sa 22:6-20).
Davidca Salmo 52pa callari partepi Doeg runamanda parlashpaca: “Cambaj jalluca, llaquipi churanatallami rimajun. Umachingapaca, navajata filo filota rurashcashnami. Alita juyangapaj randica, nalitarami ashtahuan juyarcangui. Na llullaj cangapaj randica, llulla canatarami ashtahuan juyarcangui. Llaquichij shimicunatalla rimanatami juyangui, umachijlla jallutami charingui” nircami (Sl 52:2-4).
24-30 DE JUNIO
BIBLIAPA VALISHCA YUYAICUNA | SALMOS 54-56
Taita Diosca ñucanchihuanmi can
w06-S 1/8 22 párrs. 10, 11
Ali yachaita charishcata ricuchingapaca Taita Diostami manllana capanchi
10 Shuj viajeca Davidca rey Akís mandajushca llactapimi pacajurca. Chai llactaca filisteocunapa Gat shuti llactami carca. Goliat shuti runaca chai llactapimi nacirishca carca (1 Samuel 21:10-15). Chaimi Akispa sirvijcunaca Davidtaca ñucanchipa contrami cangui nishpa culparca. Davidca huañuna peligropi cashcata cuenta japishpami Jehová Diostaca tucui shunguhuan ninanda mañarca (Salmo 56:1-4, 11-13). Chai peligromanda escaparingapaca Davidca locoshnami tucurca. Shina rurashpapash Jehová Diosllata paita salvashcataca alimi yacharca. Davidca Jehová Diospi tucui shunguhuan confiashpami Jehová Diosta manllashcata ricuchirca (Salmo 34:4-6, 9-11).
11 Ñucanchicunapash Davidshna Jehová Diosta manllashcataca ¿imashinata ricuchita ushapanchi? Chaipaca Jehová Dios, ñucanchicuna llaquicunahuan cajpi ñucanchita ayudanapimi confiana capanchi. Chaimandami Davidca: “Cambaj causaitaca, Mandaj Diosman mingai. Paitalla yariashpa causai. Paica, imata cashpapash rurangallami” nishpa escribirca (Salmo 37:5). Shinapash problemacunahuan cashpa imatapash na rurashpa tucuita Jehovapa maquipi saquinataca na nijunllu. Por ejemplo, Davidca Jehová Diospa ayudatami mañarca. Chai jipaca Jehová Dios ali yuyaita cujpimi na maqui cruzashca quidashpa chai problemata chimbapurarca. Davidca paimandallata imatapash na rurai ushashcataca alimi yacharca. Ñucanchipash chashnallata pensangapami esforzarina capanchi. Shinaca problemacunata chimbapurangapaj tucui ñucanchi usharishcata rurashca jipaca, chai problemacunata Jehová Dios ayudachunmi paipa maquipi saquina capanchi. Huaquinbica problemacunahuan cashpaca imatapash na rurai usharingachu. Jehová Diospi confianallami ricuringa. Shina pasajpimi Jehová Diosta manllana o pai munashcashna imatapash rurana alipacha cashcata ashtahuanbachaca cuenta japipanchi. David escribishca shimicunami ñucanchitaca ayudaita ushan. Paica: “Mandaj Diosca, paita manllajcunahuanmi alipacha cumba tucun. Paicunamanmi, paihuan ari ninajushcatapash pactachishpa ricuchinga” nircami (Salmo 25:14).
cl-S 243 párr. 9
“Taita Diospa [...] juyaimandaca [nima] na separaita ushangachu”
9 Jehová Diosca paita sirvishpa catishcamandaca ñucanchitaca ninandami valichin (Mateo 24:13). Diabloca Jehová Diosta ama sirvishpa catichunmi munan. Shinaca Jehová Diosta cada punlla cazushpaca Diablo llulla cashcatami ricuchipanchi (Proverbios 27:11). Huaquinbica ungushca caimanda, culqui faltalla caimanda, llaquilla sintirijushcamanda o shuj shuj llaquicunata charimandami cada punlla aguantanaca difícil can. Ashtahuanbachaca ñucanchi munashca cosascuna na ucha pactarijpimi desanimarita ushapanchi (Proverbios 13:12). Jehová Diosca, ñucanchicuna chashna llaquicunata charishpapash paita sirvishpa catishcamandaca ninandami cushijun. Chaimandami Davidca Jehová Diostaca: “Ñuca viquitaca, cara muchilapimi tandachishpa charijupangui. Chaicunataca, ¿nachu cambaj libropi escribishca?” nirca (Salmo 56:8). Jehová Diosca paita tucuipi cazungapaj llaquicunahuan sufrishpa huacashpa aguantajujtaca alimi ricujun. Chaimandami ñucanchitaca ninanda juyan.
Jehová Dios ñucanchita juyajta yachanami ama manllachun ayudanga
16 Diabloca ñucanchicuna, ñucanchi causaita ninanda valichijtaca alimi yachan. Chaimandami paica ñucanchi causaita salvangapaj munaimandalla Jehovapa amigo canatapash saquinchimanmi nin (Job 2:4, 5). Pero pai nishcaca na cierto canllu. Diabloca “gentecunata huañuchita ushaj” caimandami ñucanchicuna huañunata manllajta yachashpa, ñucanchita Jehovamanda caruyachingapaj aprovecharin (Heb. 2:14, 15). Huaquinbica Diabloca testigo de Jehová canata na saquijpica huañuchishunmi nishpa amenazachunmi shuj gentecunata utilizan. Na cashpaca ñucanchi salud grave cashcamanda Jehová Diosta ama cazuchunmi imacunatapash ruran. Por ejemplo doctorcuna o ñucanchi na testigo familiacunami yahuarta churarichun o Jehovapa mandashcacunata ama cazuchun atichita ushan. O quizás shujcunaca Jehovapa ñaupapi nali ricurij tratamientocunata catichunmi atichita ushan.
17 Pipash huañungapaimanga na munanchichu pero talvez si huañunchica, Jehová Diosca ñucanchitaca juyashpami catinga (Romanos 8:37-39ta liipangui). Jehová Diospa amigocunaca huañushpapash paipa memoriapica causashpami catin (Luc. 20:37, 38). Jehová Diosca paipa huañushca amigocunataca causachingapami munan (Job 14:15). Paica gentecuna para siempre causaiguta chari ushachunga shuj valishca preciotami pagashca (Juan 3:16). Jehová Diosca ñucanchitaca ninanda juyashpami cuidan. Chaimandami ñucanchi salud nali cajpi o shujcuna ñucanchita huañuchingapaj amenazajpipash Jehová Diostaca cazushpa catingapaj munanchi. Paitaca ñucanchita consolachun, sabiduriata cuchun, fuerzata cuchunmi mañai ushapanchi. Justo chaitallatami panigu Valeria y paipa cusagupash rurarca (Sal. 41:3).
Bibliapa Valishca Yuyaicunata Mascashunchi
it-2-S 707, 708
Pundamandapacha imatapash yachana, destinana
Judas Iscariote, Jesusta traicionajpimi Bibliapi shuj profecía pactarirca. Y chaihuanga Jehová Dios, Jesuspash imatapash pundamandapacha yachai ushashcatami cuenta japipanchi (Sl 41:9; 55:12, 13; 109:8; Hch 1:16-20). Shinapash Judas runa Jesusta traicionachun Jehová Dios paita destinashcataca na nita ushapanchichu. Porque Bibliapa profeciacuna Jesushuan purijcunamanda shuj paita traicionana nishca cashpapash pipacha canataca na villajurcachu. Shinallata Bibliapa yachachishcacunapashmi Jehová Dios Judas runata na destinashcataca ricuchin. Por ejemplo, apóstol Pabloca: “Shuj jarimanga na jaicata shuj nombramientota cunachu cangui. Shujcuna rurashca pecadocunapipash, na chapurinachu cangui. Limpio causaitami charishpa catina cangui” nircami (1Ti 5:22; 1Ti 3:6huan chimbapurashpa ricupangui). Chaita pactachingapaca Jesusca 12 apostolcunata aliguta pensarishpa agllangapami tucui tuta Jehová Diostaca mañarca (Lu 6:12-16). Shinaca Judas runa Jesusta traicionachun destinashca cashca cajpica Jehová Diosca 12 apostolcunata Jesús agllachunga na ayudanmanllu carca. Shina cashcajpica Jehová Diospashmi Judaspa pecadocunamandaca culpable canman carca.
Judasta apóstol cachun agllashca tiempopica paipa shungupica Jesusta traicionana munaica nara tiarcachu. Shinapash jipamanga “venenohuan imapash sapi viñanshnami” paipa shungupi nali munaicuna viñai callarirca. Chaimi Diospa voluntadta ruranapa randica Diablopa munaitara rurai callarirca. Chaimandami paica shuhuai callarishpa jipamanga Jesusta traicionarca (Heb 12:14, 15; Jn 13:2; Hch 1:24, 25; Snt 1:14, 15; JUDAS nishca temapi núm. 4ta ricupangui). Judas runa ña nalicunata rurajujpimi Jesusca Judas paipa shungupi imata pensajujta yachai usharca. Chaimi Judas paita traicionanatapash yachaj chayarca (Jn 13:10, 11).