RESÖN 5 5

Hạia‘leleiạg ma ‘Ou Kạinaga

‘‘Ạu la fȧl‘ȧk se ‘ạusa . . . huạg mäeavhanisi, huạg vạivại, ag figalelei, ma huạg lala.’—Kolosa 3:12

‘Inoso kamatan ta kạunohoag fo‘out. Aier ‘äe la nōnō ‘e‘ȧk ma hanis ma ‘e ‘ou ö‘rua ka ‘ou sạu ta, iạ ta famör pumuet se ‘äea ‘e rȧn te‘. Kop ma kal vavhiạn ra la ‘ou kạinaga la räe tape‘. Muạ‘ạkiag ne Puk Ha‘a la pō la hạiasoagan ‘äe la noh hạia‘leleiag ma kạinaga ka garue fe‘en la putua hạikạinagag ne ‘ou kạunohoag ta.

1 MATẠ‘ ‘OU RÄE SE ‘OU KẠINAGA LA NOJ

TĒ NE PUK HA‘A ‘EA: “‘Äe la gagaj se ‘ou ö‘fā ma ‘ou o‘honi.” (‘Efeso 6:2) ‘Inea ne tese se ‘ou mafua, ‘äe kop la nōnō ‘e‘ȧk ma fakte‘ȧk ma ‘ou ö‘rua. A‘häe‘ȧk ne ‘ou sạu ta, noj la kokon‘ȧk tape‘ma ‘on ö‘rua. “Hanisi kat fua‘ ra,” ma se a‘häe ne ‘on hạikạinagaga ma ‘on ö‘rua la mane‘ȧk ‘omuạr ‘inos ta.—1 Korinita 13:4, NW; Kalatia 5:26.

TĒ NE ‘ÄE LA PŌ LA RĒ: Se fäeag ofrạu la fak se “‘Ou o‘o‘i kat ‘ea‘ea ra ta tē leleit ‘e goua” ne “‘Ou ö‘hön ta kat räeräe‘ia ra garue lelei ne gou rē”

Nā vahiạ la ‘es ‘e räe het ne täe ‘e ‘ou sạu ta

2 FŪ MOU ‘E AV HET NE NOJO

TĒ NE PUK HA‘A ‘EA: “Fāat la fue‘i e ‘on ö‘fā ta ma ‘on ö‘hön ta, ma iạ la hạimouag ma ‘on hạina, ma iria rua la hele‘ la famör ‘eseat ma.” (Kamataga 2:24) ‘Äe ‘inos vȧh ka ‘ou örua kop ma la a‘häe ne mou se iriạ la matạ‘ se ‘äe ma pa laloag‘ia ‘ou ‘inos ta ‘e tē ne kat mou ra se iria.

Täe kikia ‘e ‘äe ma ‘ou sạu ta la rak‘ȧk a‘lelei se iria tohiget ne ‘ạuạr fū‘ȧk vȧh se tē ne iriạ la pō la laloag sin. ‘Äe la fäeag taf la fak ma se puer‘ȧk tē ne rē vạhia. (Fäeag ‘Es Fuạga 15:1) Huạg vạivại, ag figalelei, ma huạg lala la pō la hạiasoagan ‘ou hạikạinagaga ma ‘ou kạinaga la la‘ lelei ka ‘ạus la rē ma kikia ‘e ‘hạiröt‘ạkiga ma ‘e mäeavhanisi.’—Efeso 4:2.

TĒ NE ‘ÄE LA PŌ LA RĒ:

Kepoi ka ‘äe räe ne ‘ou kạinaga laloag sirien ‘ou mạuri ma hạifäegag ma ‘ou sạu ta ‘e ta av lelei het

Hugag ‘esea ‘e tē ne ‘ạuạr a‘fūmou‘ȧk vȧh la rē

[Kes ‘e rạupeap tä ‘on 17]

FE‘EN LA A‘HÄE TAF

Lelei la ‘äe la taf se a‘häe ma räe ne ‘ou ö‘rua. Iriạ pa kat hö‘ noanoa ra ‘e tē ne iriạ pa ‘ese se ‘äea. Iriạ hanis aier ‘e ‘äea. Iạ kat vavhiạn ra la ‘ou örua la ‘es ‘e räe het ne ‘äe ma ‘ou sạu ta kamat vạhia ta ‘omuạr kạunohogat. Kop ma iriạ la a‘häe ‘äe roua iriạ. Tạupir se muạ‘ạkiag ne Puk Ha‘a, fäeag taf ma ‘äe la pō pạu la fakte‘ȧk ‘ou ö‘rua ma ȧf‘ạkia ‘ou ‘inos ta.

[Kes ‘e rạupeap tä ‘on 17]

SẠIO‘ SE ‘ÄEA . . .

Ka pō ‘e tes tä ö‘ruạ ne ‘otou sạu ta kokon‘ȧk ‘otomiar ‘inos ta?

Ka gou la pō tapen la nā ‘otou sạu ta la muạ ka tape‘ma la fakte‘ȧk ‘otou ö‘rua?