RESÖN 6

Lele‘a Furia Mȧür ne ‘Inoso

“‘Ot lele‘a ‘ot koroa ne pōom ke ‘e Jihova.”—Salamo 127:3

‘E av ne ta le‘ mea‘me‘at a‘sūum, iạ pō la tē a‘rirife ka tē ne häeag ‘e noat se ‘inos ta. ‘Äe kop ma la ferehit ‘e ti‘ ne ‘ou ava ma vahia ne ‘es‘ao‘ȧk la matạ‘ua ‘ou le‘ ta. Peak ‘e mose ka tape‘ma se a‘häe rue la pō la hö‘ noanoa se ‘ou hạikạinagaga. ‘Äe ma ‘ou sạu ta kop la für tē ‘e ‘on rerege la matạ‘ua le‘ mea‘mea‘ ta ma ȧf‘ạkia ‘omuạr ‘inos ta. Muạ‘ạkiag ne Puk Ha‘a la pō tapen la hạiasoagan ‘äe la a‘leleia noanoa?

1 LE‘ MEA‘MEA‘ HETA FÜR TAPEN ‘OU MẠURI

TĒ NE PUK HA‘A ‘EA: “Hanisi huạg lal ka ag figalelei.” Tape‘ma, hanisi “kat ao tē ra la ‘on‘on, kat fekfek ra.” (1 Korinita 13:4, 5) ‘E rēko ‘äe o‘honit ‘e ‘on ‘i‘i, ‘äe a‘sokoa ag ‘on o‘honit ma ag pạua ‘ou le‘ ta. Se mao‘ạkia la ‘io se ‘ou vävän ta la pō la iạ se ‘ahäe ne ‘äe kat faliạg ra se ia. ‘Ou ag mäeavhanisi ma huạg lala la pō la hạiasoagan iạ la ‘es väeag ‘e matạ‘ ne ‘omuar le‘ ta.

“‘Ạus väväne tape‘ma . . . ‘omus noh ma ‘omus hạina kop la rē ‘e ‘inea.” (1 Pita 3:7) ‘Äe kop la a‘häe taf ‘e rēko vahia ne ‘ou hạina la vil ti‘ se ‘omuạr le‘ ta. ‘E rēko garue ne iạ rē kop ma iạ fạiȧk, parpar ne a‘häe kokon. ‘E av ‘e ‘on rerege kop ma iạ la fek se ‘äea ka fe‘en la a‘häe totoak ‘e rēko “lelei ke le‘et ne fek fepi ‘e le‘ to‘at.” (Fäeag ‘es Fuạga 16:32) A‘häe ‘atmại ma hạiasoag se ia ‘e tē ne iạ pa ‘es hạiasoaga. —Fäeag ‘Es Fuạga14:29.

TĒ NE ‘ÄE LA PŌ LA RĒ:

Se ö‘fā ta: Hạiasoag se ‘ou hạina la matạ‘ le‘ mea‘mea‘ heta ‘e pög ‘i tape‘ma. A‘mea‘mea‘ av ne ‘äe nā se tē ‘e ‘on rerege la pō la ‘äe la tē ag‘esea ma ‘ou hạina ma ‘ou le‘ ta

Se ö‘hön ta: Tȧr hạiasoag ne ‘ou vavän ta ‘e av ne iạ pa hạiasoag se ‘äe ma ‘ou le‘ ta. Kepoi ka ‘on garue la ökök se fakmerea iạ ka kel‘ȧk a‘figalelei se iạ ‘on la a‘sok ne garue

2 A‘NE‘NE‘ȦK ‘OU HẠIKẠINAGAGA

NE PUK HA‘A ‘EA: “Iriạ la hele‘ la famör ‘eseat ma.” (Kamataga 2:24) Aier ‘ạuar ma le‘ mea‘me‘at ‘e kạunohoag ta ka se mao‘ạkia ne ‘äe ma ‘ou sạu ta “famör ‘eseat ma.” Nā vahiạ la a‘fūmou‘ȧk ma kikia ‘ạmuạr hạikạinagaga.

Lelei la hȧn ta la ‘uạ‘uạ‘ȧk ‘e rēko garue ma hạiasoag ne ‘on vävän ta. ‘Ou fäeag voivoi‘ạki la pō la tē “hö‘ mȧür lelei.” (Fäeag ‘Es Fuạga 12:18) Lelei la vävän ta la rak‘ȧk se ‘on hạina fuạmamạu ne ‘on hanisi ma ‘on a‘ti‘ȧk ne iạ. Voi‘ȧk iạ ‘e ‘on vahiạ garue ma ‘on kokon‘ȧk ne kạunohoag ta.—Fäeag ‘Es Fuạga 31:10, 28.

“Ta le‘ la se ao tē la ‘es‘ao ma se ia, iạ la ao tē la ‘es‘ao se ta le‘ tū.” (1 Korinita 10:24) A‘sok hạisokoag tē ne pumua se ‘ou sạu ta. ‘Ạuạr la nā av la hạifäegag, ‘uạ‘uạ‘ȧk ma hạia‘fạiag le‘et se le‘et. Se a‘häea ma ‘äe ‘e tē ne mou se ag ne ‘inoso. A‘häe‘ȧk pa ‘es ne ‘ou sạu ta. Puk Ha‘a ‘ea: “‘Ạu se a‘mou hạimäteag ‘ạus: la rē ma ke ‘e hugag ‘esea.” (1 Korinita 7:3-5) ‘Ạuạr la hạifäegag ‘e aier ne ‘omuạr huga hün se tē ‘i. ‘Ou huạg röt‘ạki ma a‘häe tafa la a‘ne‘ne‘ȧk ma kikia ‘omuạr hạikạinagaga.

TĒ NE ‘ÄE LA PŌ LA RĒ:

Se mao‘ạkia la väe ta av la mou se ‘ạuar ‘esea

A‘sok ag hanis se iạ ne ‘äe ‘inos ma ‘e tē riri‘ fak se, fạ‘ia ta puk luạk het se iạ ne nā ta tē fakhanis mea‘mea‘ het

3 MUẠ‘ẠKIAG NE ‘OU LE‘ TA

TĒ NE PUK HA‘A ‘EA: “Ma ‘e ‘ou mea‘me‘a ka hoa‘ho‘am ‘äe ‘inea Puk Ha‘a, puk ne pō la rē ‘äe la pō‘ia mạuri.” (2 Timoti 3:15) Fūfū‘ȧk tē ne ‘äe la rak‘ȧk se ‘ou le‘ ta. Iạ pō la rak tē mumuạ la iạ la a‘sūum. ‘E avat ne iạ ‘e laloag ne ‘ou ‘efe, ‘ou le‘ ta pō la ‘inea ‘ou lio ma av ne ‘äe ‘ofa ne feke. Hata puku se ia ‘e av ne iạ mea‘mea‘ pạu. Kop ma iạ kal ‘inea‘ia ra fuạg ne tē ne ‘äe hata, ka rērē hete‘ la pō la hạisoagan iạ la ‘oaf se hat puku ‘e avat ne iạ la ‘ut se muạ ‘on mafua.

‘Ou le‘ ta kat mea‘mea‘ sir ra la a‘fại se fäeag ne ‘äe ‘ea ‘e rēko ‘Ạitu. Ro‘ạit se Jihova la iạ la a‘fại. (Nā Hoi‘ạkiag ne Foho 11:19) ‘Ea se iạ tē ne ‘Ạitu fup‘ạki ‘e av ne ‘äe manea‘ ma iạ. (Salamo 78:3, 4) ‘E avat ne ‘ou le‘ ta la fupfupu, iạ la pō la ‘inea ‘ou hanisi se Jihova ma iạ la rak la hanis se Jihova tape‘ma.

TĒ NE ‘ÄE LA PŌ LA RĒ:

Ro‘ạit ma far‘ia poto la muạ‘ạkia ‘ou le‘ ta

Rạu hö‘ȧk fäeaga ma muạ‘ạkiga se ‘ou le‘ ta la iạ la kamat rak tē ka iạ mea‘mea‘ la mo

[Kes ‘e rạupeap tä ‘on 21]

LE‘ MEA‘MEA‘ TA LA PŌ LA HÖ‘ LELEI SE ‘INOS TA

Roa ma ‘ạuạr täla fürmariạ‘ia ka majạu‘ia ‘e väeag garuet ne mou se o‘o‘i. Putuag ne le‘ mea‘me‘at la pō la ‘ut‘ạkia se muạ ‘ou ag figalelei, huạg röt‘ạki ma mäeavhanisi. Kepoi ka ‘ạuạr la hugag ‘esea ka hạigarueag ma le‘et ne ‘ạuạr ‘ese täla a‘ne‘ne‘ạkia ‘omuạr hạikạinagaga. Fäeag ne ‘ea ‘e Salamo 127:3 la pō la sok aier se ‘äea: “Iris ne a‘sūume, iris ‘on nā tē se ‘ita.”

[Kes ‘e rạupeap tä ‘on 21]

SẠIO‘ SE ‘ÄEA . . .

Tes ta gou rē ‘e gasavat ne öf se‘ la kel‘ạkia ‘otou ‘uạ‘uạ‘ạki se ‘otou hạina ne ‘otou vävän ta ‘e tē ne iạ a‘sok se kạunohoag ta?

Av hes ta gou fäeag fakmür se ‘otou sạu ta ‘e rēko ‘ạmira ka kat fäeag ra hün se ‘otomiar le‘ ta ‘esea?