Woba uvyibuka?
Woba warinovoye ugusoma inomero z’Umunara w’Inderetsi za vuba? Raba rero nimba ushobora kwishura ibibazo bikurikira:
• Ni igiki cerekana ko Yezu yari afise benewabo na bashikiwe?
Ivyo Bibiliya irabivuga muri Matayo 13:55, 56 no muri Mariko 6:3. Ijambo ry’ikigiriki (adelphos) dusanga muri ivyo vyanditswe, rikoreshwa mu kudoma urutoke ku “bucuti kanaka bwo ku mubiri canke bushingiye ku mategeko, [kandi] nta kindi riba rishaka kuvuga atari umuvukanyi musangiye abavyeyi bompi canke uwo musangiye umuvyeyi umwe” (Ikinyamakuru The Catholic Biblical Quarterly, co muri Nzero 1992).—15/12, urupapuro rwa 3.
• Mu bijanye n’intambara ni ihinduka irihe ryigaragaje, kandi kenshi ni igiki cagiye kirabitera?
Muri iyi myaka iheze, intambara zatikije abantu usanga ahanini ari intambara z’abanyagihugu, ni ukuvuga intambara ziba hagati y’imigwi y’abanyagihugu batavuga rumwe bo mu gihugu kimwe. Urwanko rushingiye ku bwoko no ku muryango, ukudahuza mu vy’idini, akarenganyo, uruhagarara rwo mu vya politike, ivyo ni ibintu biri mu vyabitera. Ikindi kintu cabitera ni umwina wo gutwara n’uw’amahera.—1/1, urupapuro rwa 3-4.
• Tumenya gute ko Yezu atashaka kuvuga ko abakirisu basubiramwo ijambo ku rindi ya majambo ari mw’isengesho ry’akarorero?
Yezu yatanze ako karorero k’isengesho muri ya Nsiguro yiwe yo ku Musozi. Haciye nk’amezi 18, yarasubiyemwo ivyiyumviro nyamukuru biri mu nyigisho yabahaye mu bijanye n’isengesho (Matayo 6:9-13; Luka 11:1-4). Icibonekeje co ni uko atarisubiyemwo ijambo ku rindi, bikaba vyerekana yuko atariko atanga isengesho risubirwamwo ku mutwe mu bihe vyo gusenga, ata kwiyumvira.—1/2, urupapuro rwa 8.
• Inyuma y’Umwuzure, ni hehe ya numa yakuye akababi k’umwelayo yazanye mu bwato?
Ntituzi ukuntu umunyu wari mu mazi y’umwuzure wangana canke urugero rw’ubukanye canke urw’ubushuhe bwayo. Vyaramenyekanye ko no mu gihe ibiti vy’imyelayo vyiciwe, bisubira kunaga. Ku bw’ivyo rero, ibiti bimwebimwe bishobora kuba vyararokotse amazi y’umwuzure, maze birasubira kunaga.—15/2, urupapuro rwa 31.
• Mu gihe ca ya ntambara y’abanyagihugu yo muri Nijeriya, Leta ya Biafra imaze gufatirwa ibihano ku buryo ata cinjira canke ngo gisohoke muri yo, Ivyabona vya Yehova bo muri ako karere baronka gute imfungurwa zo mu vy’impwemu?
Hari umukozi wa Leta yashinzwe gukorera i Buraya, uwundi na we ashingwa gukorera ku kibuga c’indege c’i Biafra. Bompi bari Ivyabona. Baremeye gukora igikorwa kirimwo akaga co gushikana imfungurwa zo mu vy’impwemu i Biafra, gutyo abavukanyi benshi barahungukira gushika intambara iheze mu 1970.—1/3 urupapuro rwa 27.
• Ni igiki ya masezerano y’amahoro y’i Westphalie yashitseko, kandi yari yerekeye idini mu buryo ubuhe?
Kwa Gutunganya ivy’idini bushasha kwatumye Inganji nganzabami nyeranda y’Uburoma yigaburamwo amadini atatu, ari yo Ekeleziya Gatolika, idini y’abaluteri be n’idini y’abakaluvinisite. Mu ntango z’ikinjana ca 17, haravutse Ubumwe bw’abaporotisanti be n’Urunani rw’abagatolika. Mu nyuma intambara y’amadini yaradutse i Boheme, ibintu birayangara gushika n’aho icika indyane zo kurwanira gutegeka amahanga. Abategetsi b’abagatolika be n’ab’abaporotisanti barakoze uko bashoboye kwose kugira ngo baganze mu vya politike bongere baronke inyungu zo mu vy’ubudandaji. Amaherezo, ibiganiro vy’amahoro vyabereye mu Budagi mu ntara ya Westphalie. Haciye nk’imyaka itanu, Amasezerano y’i Westphalie yarateweko umukono mu 1648, bituma ya Ntambara y’imyaka mirongo itatu irangira, kandi aba ari na ho Uburaya butangura kuba bugizwe n’ibihugu vyigenga nk’uko biri muri kino gihe.—15/3, urupapuro rwa 20-23.
• Ca kimenyetso ca “ca gikoko”, ari ryo zina ryaco, kikaba ari igitigiri 666, gisobanura iki?
Ico kimenyetso kivugwa mu Vyahishuwe 13:16-18. Ico gikoko kigereranya ubutegetsi bw’abantu, kandi kuba ico gikoko gifise “igitigiri c’umuntu” vyerekana ko intwaro zigaragaza ukuntu abantu ari abanyagasembwa. Igiharuro 6 kwongerako 60 kwongerako 600, vyerekana ko kidakwiye na buhorobuhoro mu nyonga z’Imana. Abariko ico kimenyetso baha icubahiro ugusenga ivya politike, canke ni vyo bazeyemwo ubukiriro.—1/4, urupapuro rwa 4-7.