Ni akosho nyabaki Yezu Kirisitu agira kuri wewe?

TURAVYE ivyo twarimbuye mu kiganiro c’imbere y’iki, hari uwoba agikekeranya ku vy’uko inyigisho za Yezu zagize ico zihinduye kw’isi yose? Ariko ikibazo gihambaye umuntu akwiye kwibaza ni iki: “Inyigisho za Yezu zihindura iki kuri jewe ubwanje?”.

Inyigisho za Yezu zaraba ibibazo vy’ubwoko bwinshi. Ivyigwa bihambaye biri muri zo birashobora kugira ico bihinduye ku muce uwo ari wo wose w’ubuzima bwawe. Reka twibande ku vyo Yezu yigishije ku bijanye n’ukwishingira ibija imbere y’ibindi mu buzima, ukwunga ubucuti n’Imana, ukugiranira imigenderanire myiza n’abandi, ugutorera umuti ingorane be n’ibijanye n’ukwirinda gukora ibiranga ubukazi.

Niwishingire ibija imbere y’ibindi mu buzima

Isi ya none aho usanga ibintu vyose vyihuta, iraturya umwanya mwinshi n’inguvu nyinshi ku buryo ivy’Imana usanga kenshi binyohwa mu buzima bwacu. Rimbura ibijanye n’umugabo afise imyaka 20 n’iyindi, uwo dutaziriye Gasupari. Naho Gasupari akunda cane ibiyago bijanye n’ivy’Imana akaba kandi aha agaciro ivyo yigira kuri ivyo biyago, yidoga ati: “Mbabazwa n’uko ntaronka umwanya wo kwama ndabijamwo. Nkora imisi itandatu mu ndwi. Umusi w’iyinga ni wo musi wonyene ntakora. Kandi mba numva ndushe cane igihe mpejeje gukora ivyo ntegerezwa gukora”. Nimba ivyawe vyifashe nk’ukwo nyene, urashobora kwungukira ku vyo Yezu yigishije muri ya Nsiguro yo ku Musozi.

Yezu yabwiye isinzi ry’abantu bari bakoranye kugira bamwumve ati: “Ntimukaganyire amagara yanyu ku vyo muzorya canke ku vyo muzonywa, cank’umubiri wanyu ku vyo muzokwambara. Mbeg’amagara ntaruta ivyo kurya, cank’umubiri nturuta ivyambarwa? Ni murābe ibiguruka vyo mu kirēre, ntibibiba, ntibishwabura, kandi ntivyimburira mu bigega, ariko So wo mw ijuru arabitunga; mbega mwebge ntimubiruta cane? . . . Nuko ntimukiganyire, ngo Tuzorya iki? canke Tuzonywa iki? canke Tuzokwambara iki? Kukw ivyo vyose abanyamahanga ari vyo bitwaririka; ariko So wo mw ijuru arazi kw ivyo vyose mubikena. Ariko mubanze mwitwaririke ubgami bg’Imana n’ukugororoka kwayo, ni ho ivyo vyose muzovyongerwa” (Matayo 6:25-33). Aho tuhigiye iki?

Yezu ntiyashaka kuvuga ko dukwiye gufata minenegwe ukwironsa ivyo twebwe n’abo mu muryango wacu dukenera mu vy’umubiri. Bibiliya ivuga iti: “Umuntu n’atātunga abo mu nzu y’i wabo, cane-cane abiwe, azoba yihakanye ukwizera, kand’azoba abaye hanyuma y’ūtizera” (1 Timoteyo 5:8). Ariko rero, Yezu yadusezeraniye yuko nitwashira imbere ibikwiye kuja mu kibanza ca mbere mu gushira imbere ivy’Imana, Imana izokwitwararika kuturonsa ibindi dukenera. Icigwa dukura ngaha ni icerekeye ukwishingira ibija imbere y’ibindi. Gukurikiza iyo mpanuro birazana agahimbare kuko “hahirwa abazi ko bakeneye ivy’impwemu”.​—Matayo 5:3, NW.

Niwunge ubucuti n’Imana

Abazi ko bakeneye ivy’impwemu barabona ko bakeneye kwunga ubucuti bwiza n’Imana. Twunga gute ubucuti bwiza n’umuntu? None si mu kugerageza kumumenya neza gusumba uko dusanzwe tumuzi? Dutegerezwa gufata umwanya wo kumenya ivyiyumviro vyiwe, inyifato yiwe, ivyo ashoboye, ivyo yashitseko, ivyo akunda be n’ivyo yanka. Ni ukwo nyene umuntu abigenza mu kwunga ubucuti n’Imana. Ni ngombwa ko ayimenya neza. Igihe Yezu yariko asabira abigishwa biwe, yavuze ati: “Ubu ni bgo bu[zima] budashira, ko bamenya wewe, Imana yonyene y’ukuri, n’uwo watumye, Yesu Kristo” (Yohana 17:3). Ni vyo, kugira tugiranire ubucuti bwa somambike n’Imana bisaba ko tuyimenya. Isôko rudende dushobora kuronkamwo ubwo bumenyi ni Ijambo ry’Imana ryahumetswe, ari ryo Bibiliya (2 Timoteyo 3:16). Dutegerezwa gutegekanya umwanya wo kwiga Ivyanditswe.

Ariko rero, ubumenyi bwonyene ntibuhagije. Muri rya sengesho nyene, Yezu yavuze ati: “[Abigishwa] bitondeye ijambo ryawe” (Yohana 17:6). Ntidukwiye gusa kwironsa ubumenyi bwerekeye Imana, ariko kandi dutegerezwa kwisunga ubwo bumenyi mu vyo dukora. Ahandi ho wumva twocika gute abakunzi b’Imana? Vy’ukuri, twoba twoshobora kwitega ko ubucuti dufitaniye n’umuntu bukomera mu gihe twoba n’ibigirankana dukora ibintu mu buryo buteye kubiri n’ivyiyumviro vy’uwo muntu be n’ingingo ngenderwako yisunga? Ingene Imana ibona ibintu be n’ingingo ngenderwako zayo ni vyo bikwiye kuyobora intambuko zacu zose mu buzima. Raba ingene zibiri mu ngingo ngenderwako zayo zikora ku bijanye n’imigenderanire tugiranira n’abandi bantu.

Nugiranire imigenderanire myiza n’abandi

Igihe kimwe Yezu yariganye inkuru ngufi kugira ngo atange icigwa gihambaye kijanye n’imigenderanire abantu bagiriranira. Yiganye ivyerekeye umwami yashatse kwishuza abasuku biwe. Ariko hari umwe muri bo yari afise ideni rinini cane kandi nta buryo yari afise bwo kuryishura. Shebuja yaciye ategeka ko uwo mugabo hamwe n’umugore wiwe n’abana biwe bagurishwa kugira ngo nya deni ryishurwe. Nyene guherana yikubita hasi yinginga ati: “Mwami, nyihanganir[e], nzokwishura vyose”. Shebuja atewe n’akagongwe, amuhebera ideni ryiwe. Mugabo uwo mushumba yaciye ahafata, arondera umushumba mugenziwe yari amuheraniye amahera makeyi, aca amubwiriza kuyamuriha. Naho uwo mushumba mugenziwe yasavye ikigongwe, wa mushumba wa mbere yaciye amushirisha mw’ibohero gushika arishe ivyo yari aheranye vyose. Umwami ngo avyumve, arashavura. Yabajije uwari yataye mugenziwe mw’ibohero ati: “Ntiwar’ukwiye kugirira imbabazi mugenzawe, nk’uko nanje nazikugiriye?”. Uwo mwami yaciye ategeka ko uwo mushumba w’imburakigongwe atabwa mw’ibohero gushika yishuye ivyo yari aheranye vyose. Yezu yaciye agobotora icigwa muri iyo nkuru mu kuvuga ati: “Na Data wo mw ijuru ni kw azobagirira, ni mutāharirana, umuntu wese ngw aharire mugenzi we bivuye mu mutima”.​—Matayo 18:23-35.

Kubera ko turi abanyagasembwa, dufise amakosa menshi. Ntitwokwigera twishura Imana ideni rinini cane tuyifitiye ryagiye rirarundana uko tuza turayicumurako. Nta kindi twokora atari ukurondera ko itugirira ikigongwe. Kandi Yehova Imana yiteguriye kuduharira amakosa yacu yose, dukire gusa guharira abavukanyi bacu ivyo baducumuyeko vyose. Mbega icigwa gikomeye! Yezu yigishije abigishwa biwe gusenga bati: “Uduhebere imyenda yacu, nk’uko natwe twahebeye abari mu myenda yacu”.​—Matayo 6:12.

Nutorere umuti ingorane uyihereye ku muzi

Ku bijanye n’ugutegera ukuntu abantu bameze, Yezu yari umuhinga. Impanuro yatanga ku bijanye n’ugutorera umuti ingorane zinaka, zahera ku muzi nyezina w’izo ngorane. Rimbura uturorero tubiri dukurikira.

Yezu yavuze ati: “Mwarumvise kw aba kera bābgiwe, ngo Ntukice: uwica aba ashikiwe no gutsindwa n’urubanza. Ariko jeho ndababgira yuk’umuntu wese [“abandanya kurakira”, NW] mugenzi we azoba ashikiwe no gutsindwa n’urubanza” (Matayo 5:21, 22). Aha Yezu yerekanye yuko umuzi w’ingorane y’ubwicanyi ushika kure y’ico gikorwa c’ubukazi ubwaco. Umuzi w’iyo ngorane uri mu gatima kagenda karatsimbatara mu mutima w’uwuruhira kwica uwundi. Iyo abantu baba batareka ngo umujinya canke ishavu bibatsimbataremwo, ubugizi bwa nabi bugirwa n’ibigirankana bwovuyeho. Ese ingene amaraso menshi atosheshwe iyo iyo nyigisho iza kuba ikurikizwa!

Raba ingene Yezu yinjiye mu mizi iyindi ngorane iteza intuntu nyinshi. Yabwiye isinzi ry’abantu ati: “Mwarumvise ko vyāvuzwe, ngo Ntugasambane. Ariko jeho ndababgira yuk’umuntu wese arāba umugore akamwifuza, aba amaze gusambana na we mu mutima wiwe. Ijisho ryawe ry’i buryo ni ryagutsitaza, urinogore, urite kure” (Matayo 5:27-29). Yezu yigishije yuko iyo nyifato iranga ubushegabo atari yo gusa iba iteye ingorane. Umuzi w’ingorane uba uri mu biza imbere y’iyo nyifato y’ubushegabo, ivyo bikaba ari ivyipfuzo vy’ubushegabo. Igihe umuntu yihatiye kutagumiza umutima ku vyipfuzo bitabereye, ‘akabinogora’, azotsinda ingorane ishobora kuva kuri ivyo vyipfuzo bibi, ni ukuvuga inyifato y’ubushegabo.

“Subiza inkota yawe ahayo”

Mw’ijoro Yezu yagurishwa akongera agafatwa, umwe mu bigishwa biwe yarasokoroye inkota yiwe kugira amurwanire. Yezu yamutegetse ati: “Subiza inkota yawe ahayo; kukw ababanguye inkota bose bazokwicwa n’inkota” (Matayo 26:52). Bukeye mu gatondo, Yezu yabwiye Ponsiyo Pilato ati: “Ubgami bganje s’ubgo mur’iyi si; iyaba ubgami bganje bgar’ubgo mur’iyi si, abagendanyi banje baba bārwanye, ngo simpabge Abayuda. Ariko noneh’ubgami bganje s’ubg’ino” (Yohana 18:36). Iyo nyigisho yoba ata co imaze?

Abakirisu bo mu ntango bakiriye gute ivyo Yezu yigishije ku bijanye n’ukudakoresha ubukazi? Igitabu kimwe (The Early Christian Attitude to War) kivuga giti: “Kuba [inyigisho za Yezu] zariyamiriza ivy’ugukoresha ubukazi be n’ukugirira abandi nabi zikerekana ko bitemewe, vyashaka kwerekana neza yuko ukugira uruhara mu ndwano [bitari] birekuwe. . . . Abakirisu ba mbere bakurikiza amajambo ya Yezu nk’uko yayavuze, kandi ivyo yigishije bijanye n’ubugwaneza be n’ukwirwanira babifata nk’uko Yezu yabivuze. Baragize uko bashoboye kugira ngo idini ryabo ribe rizwi ko rirangwamwo amahoro; bariyamiriza intambara bivuye inyuma kubera ko zarimwo ivy’ugusesa amaraso”. Ese ingene kahise kaba karabaye ukundi iyo abavuga bose ko ari abakirisu baba barakurikije iyo nyigisho!

Urashobora kwungukira ku nyigisho za Yezu zose

Inyigisho za Yezu twihweje ni nziza cane, ziroroshe kandi zirakomeye. Umuryango w’abantu urashobora kwungukira ku kumenya no ku gushira mu ngiro inyigisho ziwea.

Ivyabona vya Yehova b’aho uba bazohimbarwa no kugufasha kubona ingene ushobora kwungukira ku nyigisho ziranga ubukerebutsi kuruta izindi zose zigeze gutangwa n’abantu. Turagutumiye n’igishika cinshi ngo ubonane na bo canke ubandikire ukoresheje aderese iri ku rupapuro rwa 2 rw’iki kinyamakuru.

[Akajambo k’epfo]

[Ifoto ku rup. 5]

“So wo mw ijuru arabitunga”

[Ifoto ku rup. 7]

Inyigisho za Yezu zirashobora kugira akosho keza ku buzima bwawe