“Ubona wodufasha ukadufotora?”

Inyuma ya porogarama yo ku musi ugira kabiri w’ihwaniro ry’intara rimwe, uwitwa Josué, akaba ari umunyabeteli wo muri Megizike, yariko aratembera mu gisagara ca Querétaro. Javier na Maru, bano bakaba ari abubakanye bakaba kandi bari ba mukerarugendo b’Abanyakolombiya, barasavye Josué ngo abafotore. Kubera ko we hamwe n’abagenzi biwe b’Ivyabona bari bambaye neza bakaba kandi bari bambaye udukarata karanzi tw’ihwaniro, uwo mugabo n’umugore barababajije nimba bari baje mu birori vyo gutanga impapuro z’umutsindo canke mu rundi rubanza rudasanzwe. Josué yasiguye yuko bari baje kw’itaba ihwaniro ry’Ivyabona vya Yehova maze arabatumira ngo bazoze kwitaba ikiringo co ku w’iyinga.

Uwo mugabo n’umugore biyumvisemwo ko kwitaba iryo hwaniro vyobateye ubuyega cane kubera yuko ata mpuzu zijanye n’urwo rubanza bari bafise. Naho vyari ukwo, Josué yarabahaye izina ryiwe be n’inomero za telefone z’ibiro vy’ishami yakorerako.

Haciye amezi ane, Josué yararonse amakuru avuye kuri Javier atari avyiteze. Uwo mugabo n’umugore bari baritavye rya hwaniro, ico gihe na ho bakaba bipfuza ko Ivyabona vya Yehova babagendera mu gisagara ca Megizike, aho baba. Bidatevye Javier na Maru baratanguye kwiga Bibiliya, baca batangura no kwitaba amakoraniro. Haciye amezi cumi, bari basigaye ari abamamaji. Naho vyabaye ngombwa ko uwo mugabo n’umugore bimukira i Toronto muri Kanada, barabandanije gutera imbere mu vy’impwemu maze barabatizwa.

Mu nyuma, Josué yararonse ikete yandikiwe na Javier ryasigura icari caratumye yemera ukuri. Yanditse ati: “Imbere y’uko twe n’umukenyezi wanje twitaba rya hwaniro, twari twarayaze ibijanye n’uko dukeneye ubuyobozi bwo mu vy’impwemu. Igihe twabona ukuntu mwari mwambaye neza, twiyumviriye yuko mutegerezwa kuba mwari kw’ikoraniro ridasanzwe. Igihe twari kuri iryo hwaniro, twarakozwe ku mutima n’ukuntu batweretse aho twicara babigiranye urukundo, ukuntu badufashije gukurikira muri Bibiliya be n’inyifato y’abari ng’aho. Kuba twari twambaye nka ba mukerarugendo, vyasa n’uko ata co bibatwaye.”

Ese ukuntu amajambo ya wa mwami w’inkerebutsi Salomo yarangutse ku bijanye na Josué! Salomo yanditse ati: “Mu gitondo, biba imbuto yawe, kandi gushika ku mugoroba ntureke ukuboko kwawe ngo kuruhuke; kuko utazi aho bizokunda, ko ari aha canke hariya, canke nimba hompi hazoba heza cokimwe.” (Umus. 11:6) Woba ushobora kubiba imbuto mu kutagisha akaryo ko kubwira abandi ivyerekeye ihwaniro canke insiguro y’icese vyimirije? Yehova yoshobora kugukoresha mu gukwegera abashonje n’abanyotewe ubuyobozi bwo mu vy’impwemu, nk’uko vyari biri kuri Javier na Maru.​—Yes. 55:1.

[Ifoto ku rup. 32]

Uhereye ibubamfu uja iburyo: Alejandro Voeguelin, Maru Pineda, Alejandro Pineda, Javier Pineda hamwe na Josué Ramírez bari kw’ishami ryo muri Megizike