Kodi Ici Ndi Cifuniro Ca Mulungu?

MUNGALERI matsamba a mphangwa, mungaona televizau, peno mungabvesera radyo, munadzagumana kuti pyadzala na pyakucitika pya uphanga, nkhondo, na upandu. Nyerezerani pinentso pyanu. Panango utenda peno kufa kwa nyakufunika wanu pisakubwereserani nyatwa zizinji. Panango munapibva ninga mamuna wadidi Yobe, ule adalonga kuti akhali ‘ntcerengi peno akhali na nyatwa zizinji.’—Yobe 10:15.

Bvundzikani:

• Kodi ici ndi cifuniro ca Mulungu kwa ine na kwa anthu onsene?

• Ndinagumana kupi ciphedzo toera kuthimbana na nyatwa zanga?

• Pana cidikhiro cakuti tinadzaona ntendere pa dziko yapantsi?

Bhibhlya isapereka matawiro akutsandzayisa ku mibvundzo ineyi.

‘Anapukuta misozi yonsene m’maso mwawo. Kufa hakunadzakhalapo pontho tayu, nee kutsukwala, nee kulira, nee nyatwa, thangwi pya kale pyamala.’​—Apokalipse 21:4

“Anyanfutete anadzafamba mbanumpha ninga mbawala.”​—Izaiya 35:6

“Aboliboli anadzaona pontho.”​—Izaiya 35:5

“Anthu onsene anagona mu nthumbi . . . anadzalamukambo.”​—Jwau 5:28, 29

‘Nee m’bodzi anakhala mu dziko yathu anadzadwala.’​—Izaiya 33:24

‘Dziko yonsene inadzakhala na utende, utende wa mapira na pa mapiri ene.’​—Masalmo 72:16

Lekani kukhonda mwakucimbiza pidadinga ife nduli ninga pyakukhonda kwanirisika. Mulungu apikira kubweresa pinthu pyenepi, pontho Bhibhlya isafokotoza kuti iye anadzacita tani pyenepi.

Mbwenye Bhibhlya isalonga pizinji kupiringana pyenepi. Iyo isapereka njira toera mukhale na umaso wakutsandzayisa ngakhale cincino. Nyerezerani pang’ono thangwi ya pinentso na nyatwa zanu. Panango pinaphataniza kusowa kobiri, nyatwa za m’banja, utenda, peno kufa kwa munthu wakufunika. Bhibhlya inakwanisa kukuphedzani kuthimbana na nyatwa lero, na kubweresa cisudzulo mu kutawira mibvundzo ninga iyi:

• Thangwi yanji tisanentseka?

• Tinathimbana tani na pinentso pya umaso?

• Tinacita tani kuti umaso wa banja yathu ukhale wakutsandzaya?

• Ninji pinacitika kwa ife tingafa?

• Kodi tinadzaona pontho anyakufunika athu adafa?

• Tinakhala tani na cinyindiro kuti Mulungu anadzakwanirisa mapikiro ace thangwi ya ntsogolo?

Kuleri kwanu bukhu ino kusapangiza kuti musafuna kudziwa pinapfundzisa Bhibhlya. Bukhu ino inadzakuphedzani. Onani kuti ndima ibodzi na ibodzi iri na mbvundzo. Anthu azinji asakomerwa kuphatisira mibvundzo na matawiro munapfundza iwo Bhibhlya na Mboni za Yahova. Tisadikhira kuti munakomerwambo. Mulungu mbakupaseni nkhombo thangwi yakupfundza kwanu mwakukomerwa pinapfundzisadi Bhibhlya!