Mareferensya a Umaso Wathu Wacikristu na Utumiki — BHIBHLIYOTEKA MU INTERNETI ya Torre de Vigia

Mareferensya a Umaso Wathu Wacikristu na Utumiki

SUMANA 4-10 YA NOVEMBRO

MPFUMA ZA MAFALA A MULUNGU | MASALMO 105

“Iye Asakumbuka Cibverano Cace Cakukhonda Mala”

Tinawangisa Tani Cikhulupiro Cathu ku Mapikiro a Yahova a Dziko Ipswa?

Onani pinthu pingasi pidapikira Yahova atumiki ace pyakuti pikhaoneka ninga pyakukhonda kwanisika. Iye apanga Abhrahamu na Sara kuti mbadabala mwana mu ndzidzi ukhali iwo ankhalamba. (Gen. 17:15-17) Pontho apanga Abhrahamu kuti dzindza yace mbidapaswa dziko ya Kanani. Mu pyaka pizinji, Aizraeli akuti akhali a dzindza ya Abhrahamu akhala ninga mabitcu ku Ejitu, pontho pikhaoneka ninga pikiro ya Mulungu nee mbidakwanirisika. Mbwenye pikiro ineyi yakwanirisika. Mukupita kwa ndzidzi, Yahova alonga kuti Elizabheti wakuti akhadakalamba mbadabala mwana. Iye apangambo Mariya wakuti akhali mwali kuti mbadabala Mwana wa Yahova. Pontho pyenepi mbapidakwanirisa pikiro idacita Yahova pyaka pizinji kakamwe nduli m’munda wa Edheni!—Gen. 3:15.

Tinganyerezera mapikiro onsene adacita Yahova na njira idakwanirisika iwo, tinabvesesa kuti iye ndi wamphambvu kakamwe. Pontho pyenepi pinawangisa cikhulupiro cathu ku pikiro idacita iye yakubweresa dziko ipswa. (Lerini Yoswa 23:14; Izaiya 55:10, 11.) Pyenepi pisaticitisa kukhala akukhunganyika toera kuphedza anango kubvesesa kuti pikiro ya dziko ipswa ndi yandimomwene. Yahova alonga tenepa thangwi ya kudzulu kupswa na dziko yapantsi ipswa: “Mafala anewa ndi akunyindirika na andimomwene.”—Apok. 21:1, 5.

Perspicaz vol. 2 tsa. 563 ndima 3

Fala

Pinthu pyonsene pidacita Yahova, pya umaso na pyakusowa umaso, pisabvera fala yace, pontho iye anakwanisa kupiphatisira toera kucita pinafuna iye. (Mas. 103:20; 148:8) Mafalace ndi akunyindirika, pontho pyonsene pinapikira iye pisakwanirisika. (Dheu. 9:5; Mas. 105:42-45) Ninga pidalonga iye, mafalace “asakhala kwenda na kwenda,” pontho nee anabwerera kuna iye mbadzati kukwanirisa cifuniro cawo.—Iza. 40:8; 55:10, 11; 1 Ped. 1:25.

Mpfuma Zauzimu

Sentinela 1/11/86 tsa. 19 ndima 15

Pinthu Pinafunika Kucita Aphale na Atsikana Toera Banja Ikhale Yakuphatana na Yakutsandzaya

‘Iwo amanga miyendo ya Zuze na unyolo, aikha utale n’khosi mwace; mpaka mu ndzidzi udakwanirisika mafalace, pidancitisa kukhala wakucena ndi mafala adalonga Yahova.’ (Mas. 105:17-19) Mu pyaka 13 Zuze athabuka ninga bitcu, pontho afungirwa nkaidi, mpaka kukwanirisika kwa pikiro ya Yahova. Iye apfundza pinthu pizinji na nyatwa zidatamba iye. Maseze nee ndi Yahova adacitisa nyatwa zenezi, mbwenye iye azitawirisa toera zikwanirise cifuniro cace. Kodi Zuze mbadapitiriza kudikhira kukwanirisika kwa “mafala adalonga Yahova” maseze akhathimbana na nyatwa zizinji? Kodi iye mbadakulisa makhaliro ninga kupirira, kucepeseka, kuwanga mwauzimu na kukhala dzololo toera kuthimbana na pinentso? Zuze adzakhala wakufunika kakamwe kuna Mulungu ninga ouro yakubuluka pa moto. Na thangwi ineyi iye aphatisirwa kakamwe na Mulungu.—Genesi 41:14, 38-41, 46; 42:6, 9.

SUMANA 11-17 YA NOVEMBRO

MPFUMA ZA MAFALA A MULUNGU | MASALMO 106

“Iwo Aduwala Mulungu Wakuti Ndi Mpulumusi Wawo”

Ncenjezi 07.18 tsa. 18 ndima 13

‘Mbani Ali Kukhundu ya Yahova?’

Aizraeli adzumatirwa na mphambvu ya Mulungu, mbwenye Mose aenda pa Phiri ya Sinai mbalonga mafala a mbumba kuna Yahova. (Eksodo 20:18-21) Mbwenye pakhadapita ndzidzi ungasi, Mose mbadzati bwerera kuna mbumba. Pikhaoneka ninga mbumba nee ikhali na ntsogoleri n’thando. Kodi iwo acitanji? Panango Aizraeli akhanyindira kakamwe ntsogoleri wawo Mose. Iwo atoma kudzudzumika mbapanga Aroni: ‘Ticitire mulungu toera atitsogolere, thangwi ife nee tisadziwa pidacitikira Mose, mamuna adatibulusa mu dziko ya Ejito.’—Eksodo 32:1, 2.

Mpfuma Zauzimu

Sentinela 15/7/06 tsa. 13 ndima 9

Ntsonga Zikulu za Bukhu Yacitatu na Yacinai ya Masalmo

Mas. 106:36, 37. Mavesi anewa asapangiza kuti kulambira madzimunthu kusabverana na kupereka ntsembe kuna madimonyo. Pyenepi pisapangiza kuti munthu analambira madzimunthu anakwanisa kucita pinthu mukutsogolerwa na madimonyo. Na thangwi ineyi, Bhibhlya isalonga: “Calirani madzimunthu.”—1 Juw. 5:21.

SUMANA 18-24 YA NOVEMBRO

MPFUMA ZA MAFALA A MULUNGU MASALMO 107-108

“Perekani Takhuta Kuna Yahova, Thangwi Iye Ndi Wadidi”

Sentinela 15/4/07 tsa. 20 ndima 2

Mpingo Usasimba Yahova

Mpingo nee ndi basi ene nsoka wa anthu anagumanyikana toera kucita masendzekero, kucedza peno anthu akuti ali na misambo ibodzi ene. Mbwenye cifuniro ca mpingo ndi toera kusimba Yahova. Pyenepi pisacitika kutomera kale kakamwe ninga pinalonga bukhu ya Masalmo 35:18. Iyo isalonga: “Ine ndinadzapereka takhuta kuna imwe pa mpingo ukulu; ndinadzakusimbani pakati pa misoka mikulu ya anthu.” Pontho bukhu ya Masalmo 107:31, 32 isalonga: “Anthu mbapereke takhuta kuna Yahova thangwi ya ufuni wace wakukhonda mala, pontho thangwi ya mabasace akudzumisa adacitira iye anthu. Mpaseni mbiri anthu angagumanyikana.”

Ncenjezi 15/1/15 tsa. 9 ndima 4

Perekani Takhuta Kuna Yahova Mbamutambira Nkhombo

Khala tisafuna kukulisa nzimu wakupereka takhuta na kupitiriza kuupangiza, tisafunika kudzindikira mbatinyerezera mwacidikhodikho nkhombo zinatipasa Yahova, mbatinyerezera mwakukwana macitiro ace aufuni. Nyamasalmo acita pyenepi, natenepa, iye adzumatirwa na pinthu pizinji pyakudzumatirisa pidancitira Yahova.—Lerini Masalmo 40:5; 107:43.

Mpfuma Zauzimu

Perspicaz vol. 2 tsa. 396 ndima 6

Moabhe

Mu ndzidzi ukhatonga Dhavidhi, Izraeli akhamenyana na Moabhe. Amoabhe akundwa mbakakamizwa toera kulipa misonkho kuna Dhavidhi. Pisaoneka kuti pakumala kwa nkhondo ineyi, misoka miwiri ya anyankhondo a Moabhe aphiwa. Pontho pisaoneka kuti toera kupha misoka ineyi, Dhavidhi aapanga toera agone pantsi m’misoka mitatu, mbapha misoka miwiri, mbasiya nsoka ubodzi. (2 Sam. 8:2, 11, 12; 1 Kro. 18:2, 11) Panango ndi mu ndzidzi unoyu wakuti Bhenaya, mwana wa Yeoyadha “apha ana awiri a Ariyeli wa ku Moabhe.” (2 Sam. 23:20; 1 Kro. 11:22) Kuwina kudacita Dhavidhi Amoabhe kwakwanirisa mafala adalonga mprofeta Bhalamu pyaka pyakupiringana 400 nduli kuti: “Nyenyezi inadzabuluka mu dzindza ya Yakobe, ndodo ya umambo inadzalamuka kuna Izraeli. Iye anadzapandula nkhope ya Moabhe, anadzapandula madudu a misolo ya anyankhondo onsene aukali.” (Num. 24:17) Pontho pisaoneka kuti ndi kuwina kweneku kudalonga nyamasalmo kuti Moabhe ndi ‘basiya inatsukira’ Mulungu miyendo yace.—Mas. 60:8; 108:9.

SUMANA 25 YA NOVEMBRO–1 YA DEZEMBRO

MPFUMA ZA MAFALA A MULUNGU | MASALMO 109-112

Phedzerani Mambo Yezu!

Sentinela 1/9/06 tsa. 13 ndima 6

Ntsonga Zikulu za Bukhu Yacixanu ya Masalmo

Mas. 110:1, 2—Kodi ‘Mbuya wa Dhavidhi,’ Yezu Kristu acitanji mu ndzidzi ukhali iye kunkono wamadyo wa Mulungu? Pidalamuswa iye muli akufa, Yezu aenda kudzulu mbadikhira kunkono wamadyo wa Mulungu mpaka caka ca 1914 toera atome kutonga. Mu ndzidzi unoyu, Yezu akhatonga atowereri ace akudzodzwa mbaatsogolera m’basa yakumwaza mphangwa na kucita anyakupfundza na kuakhunganya toera atonge na iye mu Umambo wace.—Mateu 24:14; 28:18-20; Luka 22:28-30.

Sentinela 1/4/00 tsa. 18 ndima 3

Ale Anamenyana na Mulungu Anakundwa

Atumiki a Yahova asatcingwa kutomera mu seklu 20. M’madziko mazinji, anthu akuipa mitima asayesera kumalisa basa yakumwaza mphangwa zadidi za Umambo wa Mulungu. Iwo asakulumizwa na nyamalwa wathu, Dyabo wakuti “asafamba-famba ninga nkhalamu yakulira, inasaka munthu toera kumudya.” (1 Ped. 5:8) Pakumala “kwa ndzidzi udakhazikiswa kwa anthu a madzindza anango,” Mulungu akhazikisa Yezu ninga Mambo mupswa mbampanga: “Pita pakati pa anyamalwa ako mbuakunda.” (Luka 21:24; Masalmo 110:2) Na mphambvu zace, Kristu athamangisa Sathani kudzulu mbamponya pa dziko yapantsi. Nakuti Dyabo asadziwa kuti asala na ndzidzi wakucepa, iye asapangiza kuipirwa kwace kuna Akristu akudzodzwa na Akristu anango. (Apokalipse 12:9, 17) Ndi pinthu pipi pidacitika thangwi ya anthu anayesera kumenyana na Mulungu mwakubwereza-bwereza?

Tsandzayani na Umaso Kwenda na Kwenda! nsolo 55 khundu 1

Phedzerani Mpingo Wanu

Ife tonsene tinakwanisa kuphedza mpingo munjira zakusiyana-siyana. Mwacitsandzo, kodi mu mpingo mwanu muli na abale na alongo akukalamba peno akubva kupha? Kodi imwe munakwanisa kuaphedza toera agumanike pa misonkhano? Peno munakwanisa kuaphedza na pinthu pinango ninga kugula pinthu na kucita mabasa anango a panyumba? (Lerini Tiyago 1:27.) Kusiyapo pyenepi, ife tinakwanisambo kuperekeka toera kucenesa na kusasanyira Nyumba yathu ya Umambo. Ife nee tisakakamizwa toera kucita pyenepi, mbwenye nakuti tisafuna Mulungu na abale na alongo athu, ife ‘tisaperekeka tekhene.’—Masalmo 110:3.

Mboni za Yahova zakubatizwa zinakwanisa kuphedza mpingo munjira zinango. Abale akuti ndi akuthema anakwanisa kutumikira ninga atumiki akutumikira, pontho mukupita kwa ndzidzi ninga akulu a mpingo. Abale na alongo anango anakwanisambo kutumikira ninga apainiya toera kuphedzera basa yakumwaza mphangwa. Kusiyapo pyenepi, anango anakwanisa kuphedzera basa yakumanga nyumba zinaphatisira ife toera kulambira Yahova peno kuenda katumikira ku mpingo wakuti usafuna ciphedzo.

Mpfuma Zauzimu

Perspicaz vol. 2 tsa. 559 ndima 4

Cibverano

Cibverano Toera Kukhala Nyantsembe Ninga Melekizedheki. Cibverano ceneci cisagumanika pa Masalmo 110:4, pontho Paulu asaphatisira mafala anewa toera kulonga pya Kristu pa Ahebheri 7:1-3, 15-17. Cibverano ceneci ndi ca Yahova na Yezu Kristu basi. Pisaoneka kuti Yezu alonga pya cibverano ceneci mu ndzidzi ukhacita iye cibverano ca Umambo na atowereri ace. (Luka 22:29) Kubulukira mu pikiro idacita Yahova, Yezu Kristu, Mwana wa Mulungu wakudzulu mbadakhala nyantsembe ninga Melekizedheki. Melekizedheki akhali mambo na nyantsembe wa Mulungu pa dziko yapantsi. Yezu mbadakhala Mambo na nyantsembe kudzulu, tayu pa dziko yapantsi. Iye apaswa mabasa anewa pidaenda iye kudzulu. (Aheb. 6:20; 7:26, 28; 8:1) Cibverano ceneci cinadzakhala kwenda na kwenda, thangwi Yezu anadzacita basa yace ninga Mambo na Nyantsembe mukutsogolerwa na Mulungu.—Aheb. 7:3.

SUMANA 2-8 YA DEZEMBRO

MPFUMA ZA MAFALA A MULUNGU | MASALMO 113-118

Tinapangiza Tani Kuti Tisapereka Takhuta Kuna Yahova?

Sentinela 1/1/01 tsa. 11 ndima 13

Thimizirani Ufuni Wanu

Mafala a Yezu asapangiza kuti pakutoma tisafunika kufuna Yahova. Mbwenye ife nee tabalwa na ufuni wakukwana kuna Yahova. Ife tisafunika kukulisa ufuni. Tingatoma kupfundza thangwi ya Yahova, ife tisatoma kunfuna. Mwapang’ono na pang’ono, ife tisadziwa kuti iye acita tani dziko yapantsi toera anthu akhalemo. (Genesi 2:5-23) Ife tisapfundza kuti iye asatsalakana tani anthu, pontho kuti nee atisiya pa ulendo wakutoma udacita anthu madawo, mbwenye acita pinthu toera kutiombola. (Genesi 3:1-5, 15) Iye atsalakana atumiki ace akukhulupirika mwaufuni, pontho apereka Mwanace m’bodzi ekha, toera tilekererwe madawo athu. (Juwau 3:16, 36) Kudziwa pyenepi kwathimizira kupereka kwathu takhuta kuna Yahova. (Izaiya 25:1) Mambo Dhavidhi alonga kuti akhafuna Yahova thangwi ya njira ikhantsalakana Yahova mwaufuni. (Masalmo 116:1-9) Lero, Yahova asatitsalakana, asatitsogolera, pontho asatipasa mphambvu. Natenepa, tingapfundza pizinji thangwi ya iye, ufuni wathu kuna iye unathimizirikambo kakamwe.—Masalmo 31:23; Sofoniya 3:17; Aroma 8:28.

Sentinela 15/7/09 tsa. 29 ndima 4-5

Perekani Takhuta Mungatambira, Pontho Pasani na Ntima Onsene

Nyamasalmo abvundza: “Ninji pinafuna ine kupasa Yahova thangwi ya pinthu pyonsene pyadidi pinandicitira iye?” (Mas. 116:12) Ndi pinthu pipi pyadidi pidacitirwa Nyamasalmo unoyu? Yahova antsalakana m’midzidzi ya “nyatwa,” pontho ‘ampulumusa toera akhonde kuphiwa.’ Natenepa nyamasalmo akhafuna “kupasa” pinthu Yahova thangwi ya pidancitira iye. Mphapo iye mbadacitanji? Iye alonga: “Ndinadzakwanirisa mapikiro anga kuna Yahova.” (Mas. 116:3, 4, 8, 10-14) Iye asankhula kukwanirisa mapikiro onsene adacita iye kuna Yahova na kucita pinthu pikhafuna Yahova kuna iye.

Imwe munakwanisambo kucita pibodzi pyene. Munjira ipi? Mungabvera mitemo ya Mulungu na midida yace ndzidzi onsene. Na thangwi ineyi, citani pyonsene toera kulambira Yahova kukhale cinthu cakufunika kakamwe kuna imwe, pontho tawirisani kuti nzimu wa Mulungu ukutsogolereni mu pinthu pyonsene pinacita imwe. (Ekle. 12:13; Agal. 5:16-18) Ndimomwene kuti imwe nee munakwanisa kupasa Yahova mwakukwana thangwi ya pinthu pyonsene pidakucitirani iye. Mbwenye mungawangisira na ntima onsene m’basa ya Yahova, imwe ‘munakomeresa ntima wace.’ (Mis. 27:11) Ndi mwai ukulu kakamwe kuna ife kutsandzayisa Yahova munjira ineyi.

Ncenjezi 11.19 tsa. 22-23 ndima 9-11

Pinthu Pinafuna Ife Kupfundza M’bukhu ya Levitiko

Cinthu caciwiri: Ife tisatumikira Yahova thangwi tisapereka takhuta kuna iye. Toera kubvesesa mwadidi, tendeni tidinge pya ntsembe zakukhazikisa ntendere, ntsembe zenezi zikhali zakufunika kakamwe mu ulambiri wandimomwene kuna Aizraeli. M’bukhu ya Levitiko, tinapfundza kuti Muizraeli m’bodzi na m’bodzi mbadakwanisa kupereka ntsembe ninga njira ‘yakupangiza kupereka kwace takhuta.’ (Lev. 7:11-13, 16-18) Iwo nee akhapereka ntsembe zenezi mwakukakamizwa, mbwenye mwakufuna. Zenezi zikhali ntsembe zakuperekwa mwakufuna, thangwi munthu akhacita pyenepi thangwi yakufuna kwace Yahova Mulungu. Munthu akhapereka ntsembe, banja yace pabodzi na anyantsembe akhadya nyama ya cinyama cidaperekwa ntsembe. Mbwenye makhundu anango a cinyama akhaperekwa ntsembe kuna Yahova. Ndi makhundu api?

Cinthu cacitatu: Tisacita pyonsene pinakwanisa ife thangwi tisafuna Yahova. Yahova akhaona mafuta ninga khundu yakufunika kakamwe ya cinyama. Iye alongambo kuti makhundu anango a pinyama kuphatanizambo mpswiyo, akhali akupambulika. (Lerini Levitiko 3:6, 12, 14-16.) Natenepa, Yahova akhatsandzaya kakamwe Muizraeli angapereka na ntima wace onsene mafuta na makhundu anango akufunika a pinyama kuna iye. Muizraeli angacita pyenepi, akhapangiza kuti akhafuna kucita pinakwanisa iye kuna Mulungu. Munjira ibodzi ene, Yezu akhali dzololo toera kucita pyonsene pikhakwanisa iye toera kutumikira Yahova na kunfuna. (Juw. 14:31) Kucita cifuniro ca Mulungu kwa Yezu cikhali cinthu cakufunika kakamwe, pontho akhafuna kakamwe mwambo wa Mulungu. (Masal. 40:8) Mwakukhonda penula, Yahova atsandzaya kakamwe pidaona iye Yezu mbantumikira na ntimace onsene!

Basa yathu kuna Yahova ndi ninga ntsembe zakukhazikisa ntendere thangwi ndi njira inapangiza ife mabvero athu kuna Yahova. Ife tisacita pyonsene pinakwanisa ife kuna Yahova thangwi tisanfuna na ntimathu onsene. Yahova asakomerwa kakamwe angaona pikwi na pikwi pya anthu mbantumikira mwakuperekeka thangwi asanfuna, pontho asafuna mitemo yace. Yahova asaona, pontho asapasa ntengo tayu basi pinacita ife, mbwenye mathangwi anaticitisa kucita pyenepi. Mwacitsandzo, khala ndimwe wakugwesera, pontho nee musakwanisa kucita pizinji ninga munafunira imwe, khalani na cinyindiro cakuti Yahova asaona pinakwanisa imwe kucita na pinacimwana imwe. Panango musapibva kuti nee musakwanisa kucita pizinji kuna Yahova, mbwenye iye asaona ufuni unakukulumizani toera kucita pinakwanisa imwe. Iye asakomerwa na pinthu pyadidi pinampasa imwe.

Mpfuma Zauzimu

Sentinela 15/5/12 tsa. 22 ndima 1-2

Mibvundzo Inacitwa na Anyakuleri

Nyamasalmo alonga: “Yahova asabva kupha kakamwe atumiki ace akukhulupirika angafa.” (Mas. 116:15) Umaso wa m’bodzi na m’bodzi wa alambiri andimomwene a Yahova ndi wakufunika kakamwe kuna iye. Mbwenye mafala anagumanika pa Masalmo 116 nee asalonga basi ene pya kufa kwa munthu m’bodzi.

Natenepa pakucita nkhani yaciliro nee ndi pyakuthema kuleri lemba ya Masalmo 116:15, ngakhale kuti munthu afa mwakukhulupirika kuna Yahova. Thangwi yanji? Thangwi mafala a nyamasalmo nee asalonga pya kufa kwa munthu m’bodzi. Iwo asabveka kuti kufa kwa atumiki ace onsene akukhulupirika ndi kwakunentsa kakamwe kuna iye toera atawirise kuti pyenepi picitike.—Onani Masalmo 72:14; 116:8.

SUMANA 9-15 YA DEZEMBRO

MPFUMA ZA MAFALA A MULUNGU | MASALMO 119:1-56

“M’phale Peno Ntsikana Anakwanisa Tani Kupitiriza na Makhaliro Akucena?”

Sentinela 1/11/87 tsa. 18 ndima 10

Kodi Muli Kupitiriza Kukhala Akucena m’Makhundu Onsene?

Pa lemba ya Aefesi 5:5, Paulu alonga: “Thangwi imwe musadziwa, mbamudzindikira mwekhene kuti: Munthu waulukwali, peno munthu anacita pinthu pyakunyanyasa, peno nyakusirira, pyakuti pisabveka kulambira madzimunthu, nkhabe kudzapita mu Umambo wa Kristu na wa Mulungu.” Ngakhale tenepo, pyaka pyonsene, pikwi na pikwi pya anthu asabuluswa mu mpingo thangwi ya ulukwali, kwakuti ndi ‘kudawira manungo.’ (1 Akorinto 6:18) Kazinji kene pyenepi pisacitika munthu angakhonda ‘kukhala m’maso mwakubverana na mafala a Mulungu.’ (Masalmo 119:9) Mwacitsandzo, abale na alongo azinji asasiya kucita pinthu pyauzimu mu ndzidzi wa maferya. Iwo asasiya kusonkhana na abale na alongo awo, pontho asacita uxamwali na anthu anango ali m’maferya akuti nee ndi Mboni za Yahova. Thangwi yakunyerezera kuti ‘anthu anewa ndi adidi,’ Akristu anango atoma kucita nawo pinthu pyakukhonda thema kuna Akristu. Munjira ibodzi ene, anango asacita uxamwali wa ponda ndipondembo na andzawo akubasa. Nkulu wa mpingo unango acita uxamwali na nkazi akhaphata na iye basa, natenepa iye asiya banja yace mbakhala na nkazi unoyu. Na thangwi ineyi, iye abuluswa mu mpingo. Pyenepi pisapangiza undimomwene unalonga Bhibhlya kuti: “Kucita uxamwali na anthu akuipa kusafudza makhaliro adidi.”—1 Akorinto 15:33.

Sentinela 15/6/06 tsa. 25 ndima 1

“Ndisakomerwa Kakamwe na Macenjezo Anu”

YAHOVA asacenjeza atumiki ace toera akwanise kuthimbana na mikakamizo ntsiku zino zakunentsa. Anango mwa macenjezo anewa tisaagumana pakuleri Bhibhlya, pontho anango tisaatambira ninga mphangwa peno mitawiro pa misonkhano Yacikristu. Pizinji mwa pinthu pinaleri ife na pinabva ife m’midzidzi ineyi nee ndi pipswa kuna ife. Panango tapfundza kale pinthu ninga pyenepi. Mbwenye nakuti tiri na cipendamiro ca kuduwala pinapfundza ife, ndzidzi onsene tisafunika kukumbuswa cifuniro ca Yahova, mitemo yace na pitsogolero pyace. Ife tisafunika kupereka takhuta thangwi ya macenjezo a Mulungu. Thangwi iwo asatibalangaza, pontho asatiphedza toera tipitirize kunyerezera mathangwi anaticitisa kugopa Mulungu. Natenepa, nyamasalmo aimbira Yahova: “Ndisakomerwa kakamwe na macenjezo anu.”—Masalmo 119:24.

Sentinela 15/4/10 tsa. 20 ndima 2

Thawisani Maso Anu ku Pinthu Pyakusowa Basa!

Pinthu pinaona ife pinakwanisambo kutibweresera nyatwa. Maso na manyerezero athu asaphata basa munjira yakuti pinthu pinaona ife pinakwanisa kuticitisa kukhala na cifuno peno kuthimizira pifuno pyathu. Ife tiri kukhala mu dziko yakuipa inatongwa na Sathani Dyabo yakuti athu asakomerwa basi ene na pinthu pinafuna iwo. Natenepa, tisaona mafoto na pinthu pinango pyakuti pinakwanisa kuticitisa kusiya kucita pinthu pyadidi, ngakhale tipione mu ndzidzi wakucepa. (1 Juwau 5:19) Na thangwi ineyi, nyamasalmo adembetera Mulungu kuti: “Peusani maso anga toera akhonde kuona pinthu pyakusowa basa; ndicitiseni kufamba munjira zanu toera ndipitirize kukhala m’maso.”—Masalmo 119:37.

Mpfuma Zauzimu

Sentinela 15/4/05 tsa. 10 ndima 2

Nyindirani Mafala a Yahova

Masalmo kapitulu 119 isalonga kakamwe kufunika kwa mphangwa peno Mafala a Mulungu. Panango toera kuphedza anyakuleri kukumbuka mwakukhonda nentsa mphangwa zenezi, nyakulemba kapitulu ineyi alemba mavesi 176 mukutowezera njira idalembwa alufabhetu Wacihebheri. Mu Cihebheri, kapitulu ineyi iri na makhundu 22, pontho khundu ibodzi na ibodzi iri na mizera 8 yakuti isatoma na letra ibodzi ene. Kapitulu ineyi isalonga thangwi ya Mulungu, mafalace, mitemo yace, macenjezo ace, njira inacita iye pinthu na matongero ace. Kunyerezera umaso wa atumiki a Yahova akale na acincino kunatiphedza toera kuthimizira kupereka kwathu takhuta, thangwi yakukhala na kapitulu ineyi yakuti yalembwa mukutsogolerwa na Mulungu.

SUMANA 16-22 YA DEZEMBRO

MPFUMA ZA MAFALA A MULUNGU | MASALMO 119:57-120

Munakwanisa Tani Kupirira Nyatwa?

Sentinela 15/6/06 tsa. 20 ndima 2

“Ine Ndisakomerwa Kakamwe na Mwambo Wanu!”

Panango munabvundzika: “Mwambo wa Mulungu wabalangaza tani nyamasalmo?” Pidam’balangaza ndi kunyindira kuti Yahova akhantsalakana. Kudziwa mwadidi kufunika kwa kubvera mwambo unoyu, kwaphedza nyamasalmo toera kukhala wakutsandzaya mwakukhonda tsalakana nyatwa zikham’bweresera anyamalwa ace. Iye akhadziwa kuti Yahova ancitira pinthu pyadidi. Kusiyapo pyenepi, kubvera mwambo wa Mulungu kwacitisa nyamasalmo kukhala waudziwisi kupiringana anyamalwa ace, kwamphedza toera kupulumusa umaso wace, pontho kwampasa ntendere na cikumbuntima cakucena.—Masalmo 119:1, 9, 65, 93, 98, 165.

Sentinela 1/12/00 tsa. 14 ndima 3

Kodi Imwe Musafuna Kakamwe Macenjezo a Yahova?

Macenjezo a Mulungu akhali akufunika kakamwe kuna nyamasalmo adalonga: “Ine ndisacimbiza, pontho nkhabe dembuka na kubvera matongero anu. Nkhambala za anyakucita pyakuipa zandizungulira, mbwenye mwambo wanu, ine nkhabe kuuduwala.” (Masalmo 119:60, 61) Macenjezo a Yahova asatiphedza toera kupirira kutcingwa thangwi tisanyindira kuti Yahova anakwanisa kugwanda nkhambala zinatimanga na anyamalwa athu. Pa ndzidzi wakuthema, iye anadzamalisa pinthu pyenepi pyonsene toera timwaze mphangwa za Umambo.—Marko 13:10.

Sentinela 1/9/06 tsa. 14 ndima 4

Ntsonga Zikulu za Bukhu Yacixanu ya Masalmo

Mas. 119:71—Ndi pinthu pipi pyadidi pinafuna kucitika tingatamba nyatwa? Nyatwa zinakwanisa kutiphedza toera tinyindire kakamwe Yahova, kucita phembero kuna iye na ntima onsene, kupfundza mwadidi Bhibhlya na kuphatisira pinalonga iyo. Kusiyapo pyenepi, pinthu pinacita ife tingatamba nyatwa, panango pinapangiza makhaliro akuipa akuti tinakwanisa kuacinja. Nyatwa nee zinaticitisa kuipirwa kakamwe tingatawirisa kuti zitiphedze toera kukhala na makhaliro adidi.

Ncenjezi 07.17 tsa. 10 ndima 3, 5

‘Lirani na Ale Analira’

Babathu wacitsalakano Yahova, ndiye basi asatipasa cibalangazo cinafuna ife. (Lerini 2 Akorinto 1:3, 4.) Iye ndi citsandzo cikulu cakupangiza ntsisi, pontho apikira atumiki ace: ‘Ine ndine Ule anakubalangaza.’—Izaiya 51:12; Masalmo 119:50, 52, 76.

Ife tinakwanisa kukhala na cinyindiro consene cakuti Yahova anatiphedza. Natenepa, tisafunika kukhala akusudzuka toera kucita phembero mbatimpanga nyatwa zathu. Ndi pyakubalangaza kakamwe kudziwa kuti Yahova asabvesesa mabvero athu pontho asapereka cibalangazo cinafuna ife! Mphapo iye asacita tani pyenepi?

Mpfuma Zauzimu

Ncenjezi 05.17 tsa. 18 ndima 11,12

Lekani Tawirisa Ufuni Wanu Kuthowa

Ninga Akristu, ife tisafuna undimomwene. Undimomwene unoyu tisaugumana m’Mafala a Mulungu. Yezu alonga kuna Babace: ‘Mafala anu ndi undimomwene.’ (Jwau 17:17) Natenepa, toera kufuna undimomwene, tisafunika kudziwa mwadidi pinalonga Bhibhlya. (Akolose 1:10) Mbwenye pana pinthu pizinji. Onani kuti mulembi wa Masalmo kapitulu 119 anatiphedza tani toera kubvesesa pinafunika ife kucita. (Lerini Masalmo 119:97-100.) Ntsiku zonsene, tisafunika kunyerezera mwacidikhodikho pinaleri ife m’Bhibhlya. Tinganyerezera mwacidikhodikho nkhombo zinakhala na ife thangwi yakuphatisira undimomwene wa Bhibhlya mu umaso wathu, tinadzaufuna kakamwe.

Nyamasalmo alongambo: ‘Mafala anu asadzipa nkanwa mwanga, asadzipa kakamwe kupiringana uci!’ (Masalmo 119:103) Mabukhu akubuluswa m’Bhibhlya anabuluswa na gulu ya Mulungu asakhunganywa ninga cakudya cakukoma. Tingadya cakudya cinakomerwa na ife, tisacidya kazinji kene. Munjira ibodzi ene, tisafunika kukhala na ndzidzi wakupfundza. Buluka penepo tinadzakomerwa kakamwe na “mafala akukoma” a undimomwene, pontho pinadzakhala pyakukhonda nentsa kukumbuka pidaleri ife na kupiphatisira toera kuphedza anango.—Koelete 12:10.

SUMANA 23-29 YA DEZEMBRO

MPFUMA ZA MAFALA A MULUNGU | MASALMO 119:121-176

Munacalira Tani Kuthabuka na Nyatwa Zakusowa Mathangwi?

Ncenjezi 06.18 tsa. 16 ndima 5-6

Pfundzisani Cikumbuntima Canu Mukuphatisira Mitemo na Midida ya Mulungu

Tingafuna kuphedzwa na mitemo ya Mulungu, tisafunika kucita pizinji kupiringana kuileri peno kuidziwa. Tisafunika kuifuna na kuilemedza. Bhibhlya isalonga: ‘Idani pinthu pyakuipa mbamufuna pinthu pyadidi.’ (Amosi 5:15) Mphapo tinacita tani pyenepi? Tisafunika kupfundza kuona pinthu ninga munapiona Yahova. Mwacitsandzo, nyerezerani kuti nee musaphatwa na citulo mungafuna kugona, dotoro wanu akupangani kuti musafunika kudya cakudya cakupasa ungumi, kudzongola manungo (exercicio) na kucita macinjo anango mu umaso wanu. Imwe mwabvera uphungu unoyu, pontho musakwanisa kugona mwadidi. Munaona tani pitsogolero pya dotoro?

Munjira ibodzi ene, Nciti wathu atipasa mitemo toera kutitsidzikiza mu nyatwa zinaoneka thangwi ya madawo mbitikhala na umaso wadidi. Mwacitsandzo, Bhibhlya isatipfundzisa kuti nee tisafunika kulonga uthambi, kuba, kucita ulukwali, kucita uphanga, peno kucita cinthu consene cinaphataniza pyakukhulupira mizimu. (Lerini Misangani 6:16-19; Apokalipse 21:8) Tingaona maphindu anakhala na ife thangwi yakubvera Yahova, ufuni wathu kuna iye na kuna mitemo yace usathimizirika kakamwe.

Sentinela 15/4/93 tsa. 17 ndima 12

Aphale na Atsikana, Ndi Pinthu Pipi Pinasaka Imwe?

Kusiyapo pyonsene, musafunika kuida pinthu pyakuipa. (Masalmo 97:10) Tinakwanisa tani kuida pinthu pyakuti pakutoma panango pisaoneka ninga pyakutsandzayisa? Tinganyerezera nyatwa zinafuna kuoneka thangwi yakucita pinthu pyenepi. Bhibhlya isalonga: “Lekani kunyengezwa: Mulungu nkhabe kusingirirwa. Thangwi cinabzwala munthu, ndico cinafuna kudzabvuna iye; thangwi ule anabzwala mukutsogolerwa na pifuno pyace pyaunyama, anadzabvuna kufa thangwi ya pifuno pyace pyaunyama.” (Agalata 6:7, 8) Mungaona kuti mukutoma kusirira munthu, nyerezerani kuti uxamwali wanu na Yahova unakhala tani. (Onani Masalmo 78:41.) Pontho nyerezerani kuti munakwanisa kukhala na mimba mwakukhonda funa peno kuthapula utenda, ninga SIDA. Nyerezeranimbo kutsukwala kunafuna kukhala na imwe na kukhonda kulemedzeka. Kusiyapo pyenepi, panaonekambo nyatwa za ndzidzi uzinji. Mulongo unango alonga: “Ine na mamunanga tikhapita m’mabonde na anthu anango mbatidzati kudziwana. Maseze cincino ndife Akristu, pinthu pyenepi pikhacita ife kale, pisaticitisa kucitirana ntcanje m’banja mwathu. Kusiyapo pyenepi, munakwanisambo kuluza miyai yakutumikira peno kubuluswa mu mpingo. (1 Akorinto 5:9-13) Kodi pyathema kuona nyatwa zenezi zonsene basi ene thangwi yakutsandzaya kwa ndzidzi wakucepa?

Mpfuma Zauzimu

Ncenjezi 01.23 tsa. 2 ndima 2

Khalani na Cinyindiro Cakuti ‘Mafala a Mulungu Ndi Undimomwene’

Atumiki a Yahova ali na cinyindiro cakuti iye ndi “Mulungu analonga undimomwene,” pontho kuti ndzidzi onsene asafuna pinthu pyadidi kuna ife. (Mas. 31:5; Iza. 48:17) Ife tisadziwa kuti tinakwanisa kunyindira pinaleri ife m’Bhibhlya thangwi ‘mafala onsene a Mulungu ndi undimomwene.’ (Lerini Masalmo 119:160.) Ife tisatawira pidalonga nyakupfundza Bhibhlya m’bodzi kuti: “Mafala onsene adalonga Mulungu ndi andimomwene, pontho anadzakwanirisika.” Atumiki a Mulungu anakwanisa kunyindira pinalonga iye thangwi iwo asanyindira Mulungu adalonga pyenepi.

SUMANA 30 YA DEZEMBRO–5 YA JANEIRO

MPFUMA ZA MAFALA A MULUNGU MASALMO 120-126

Iwo Abzwala Mbakalira, Mbwenye Abvuna Mwakutsandzaya

Sentinela 1/6/04 tsa. 16 ndima 10

Ale Anapasa Mbiri Mulungu Anapaswa Nkhombo

Pidatawira ife kukhala atowereri a Yezu, ife tisathimbana na Sathani. Lemba ya Tiyago 4:7 isalonga: “Idani Dyabo, penepo iye anadzakuthawani.” Pyenepi nee pisabveka kuti kucita pyenepi ndi pyakukhonda nentsa. Tisafunika kuwangisira kakamwe toera kutumikira Mulungu. (Luka 13:24) Mbwenye Bhibhlya isalonga tenepa pa Masalmo 126:5: “Ale anabzwala mbakalira Anadzabvuna na mikhuwo yakutsandzaya.” Ife nee tisatumikira Mulungu wakukhonda pereka takhuta. Iye “asapasa nkhombo ale anansaka na ntima onsene” na ale anampasa mbiri.—Aheb. 11:6.

Ncenjezi 11.21 tsa. 24 ndima 17

Musafunika Kucitanji Toera Kuwangisa Cikhulupiro Canu?

Kodi imwe muli wakutsukwala thangwi yakuferwa na nyakufunika wanu? Wangisani cikhulupiro canu ku cidikhiro cakulamuswa muli akufa mukuleri mphangwa za m’Bhibhlya zinalonga pya anthu adalamuswa muli akufa. Kodi imwe muli wakutsukwala thangwi m’bodzi wa pabanja panu abuluswa mu mpingo? Pfundzani toera mukhale na cinyindiro cakuti Yahova ndzidzi onsene asalanga mwadidi kakamwe. Mwakukhonda tsalakana nyatwa zinathimbana na imwe, phatisirani ndzidzi unoyu wa nyatwa toera kuwangisa cikhulupiro canu. Pangani Yahova pinthu pyonsene piri muntima mwanu. Lekani kukhala mwekhene, mbwenye khalani cifupi na abale na alongo anu. (Mis. 18:1) Citani mabasa akuti anakuphedzani toera kupirira, maseze imwe musakumbuka pinthu pyakutsukwalisa pidakucitikirani. (Masal. 126:5, 6) Pitirizani kuenda ku misonkhano, kumwaza mphangwa na kuleri Bhibhlya. Pontho nyerezerani pinthu pyadidi kakamwe pidapikira Yahova toera kukupasani ntsogolo. Mungaona njira inakuphedzani Yahova cincino, cikhulupiro canu cinakhala cakuwanga kakamwe.

Sentinela 15/7/01 tsa. 18-19 ndima 13-14

Pitirizani Kubvuna

Mafala anagumanika pa Masalmo 126:5, 6 ndi akubalangaza kakamwe kuna anyakuphata basa yakubvuna, makamaka ale anathabuka thangwi yakutcingwa. Lemba ineyi isalonga: “Ale anabzwala mbakalira anadzabvuna na mikhuwo yakutsandzaya. Ule anaenda kumunda, maseze ali kulira uku athukula budu yace ya mbeu, mwandimomwene, anadzabwerera na mikhuwo yakutsandzaya uku mbadathuka pidabvuna iye.” Mafala a nyamasalmo asapangiza njira idatsalakana Yahova na kupasa nkhombo Aizraeli adabuluka mu ubitcu ku Bhabhilonya. Iwo atsandzaya kakamwe thangwi yakusudzulwa kwawo, mbwenye panango alira mu ndzidzi ukhabzwala iwo mbeu m’mataka akuti nee akhalimwa mu pyaka 70 pidakhala iwo mu ubitcu. Ngakhale tenepo, ale akhapitiriza kubzwala na kumanga akhaphindula na basa yawo.

Panango tinalira tingathimbana na mayesero peno abale na alongo athu angathabuka thangwi yakutsalakanwa mwakusowa ulungami. (1 Pedhru 3:14) Pakutoma, basa yathu yakubvuna panango inakhala yakunentsa thangwi nee tiri kuona maphindu akuwangisira kwathu mu utumiki. Mbwenye tingapitiriza kubzwala na kuthirira, Mulungu anakulisa pidabzwala ife, pontho kazinji kene iye asacita pyenepi munjira yakuti nee tikhaidikhira. (1 Akorinto 3:6) Ife tisakwanisa kuona pyenepi thangwi yakugawira kwathu Mabhibhlya na mabukhu akubuluswa m’Bhibhlya.

Mpfuma Zauzimu

Ncenjezi 07.18 tsa. 9 ndima 1, 2

IFE tikukhala ‘m’midzidzi yakugopswa’ yakuti ndi ‘yakunentsa kupirira.’ (2 Timoti 3:1) Pontho umaso unapitiriza kukhala wakunentsa kakamwe mpaka Yahova kufudza dziko ino yakuipa mbabweresa ntendere wandimomwene pa dziko yapantsi. Na thangwi ineyi, tisafunika kubvundzika: ‘Ndisafunika kuyang’ana kuna ani toera kutsogolerwa?’ Panango tinalonga kuti “Kuna Yahova,” mwandimomwene unoyu ndi ntawiro wadidi.

Pisabvekanji kuyang’ana Yahova? Tinakhala tani na cinyindiro cakuti tikupitiriza kuyang’ana iye mu ndzidzi unathimbana ife na nyatwa? Mu ndzidzi wakale, nyakulemba Bhibhlya m’bodzi afokotoza kuti tisafunika kuyang’ana kakamwe Yahova tingafuna ciphedzo. (Lerini Masalmo 123:1-4.) Iye alonga kuti tingayang’ana Yahova, tisakhala ninga nyabasa anayang’ana patrau wace. Munjira ipi? Nyabasa asayang’ana, peno asanyindira patrau wace toera ampase cakudya na kuntsidzikiza. Mbwenye iye asafunikambo kuyang’na patrau wace ndzidzi onsene toera kubvesesa pinafuna patrau wace kuti iye acite, buluka penepo mbacita. Munjira ibodzi ene, ife tisafunika kupfundza Bhibhlya mwacidikhodikho ntsiku zonsene toera kubvesesa pinafuna Yahova kuti ticite, buluka penepo mbaticita. Buluka penepo tinakhala na cinyindiro cakuti Yahova anakwanisa kutiphedza tingafuna ciphedzo.—Aefesi 5:17.