දානියෙල්
1 යූදාහි රජු වූ යෙහෝයාකිම්+ රජකම් කළ තුන්වන අවුරුද්දේදී බැබිලෝනියේ රජු වන නෙබුකද්නෙෂර් යෙරුසලම් නුවරට පැමිණ එය වැටලුවේය.+ 2 පසුව යෙහෝවා දෙවි යූදාහි රජු වූ යෙහෝයාකිම්ව ඔහුගේ අතට හසු කර දුන්නේය.+ සැබෑ දෙවි තම ගෘහයේ තිබූ භාණ්ඩ සමහරක්+ රැගෙන යෑමටද ඔහුට ඉඩහැරියේය. ඔහු එම භාණ්ඩ ෂීනාර් දේශයේ+ පිහිටි තමන් නමස්කාර කළ දෙවියන්ගේ දේවාලයට රැගෙන ගොස් එහි භාණ්ඩාගාරයේ තැන්පත් කළේය.+
3 දිනක් රජ තම ප්‍රධාන නිලධාරියා+ වන අෂ්පෙනස්ට කතා කළේය. ඊශ්‍රායෙල් සෙනඟගෙන්ද රජ පවුලට අයත් තරුණයන්ගෙන්ද වංශවත් පවුල්වලට අයත් තරුණයන්ගෙන්ද කිහිපදෙනෙකුව තෝරා තමා වෙතට ගෙන එන ලෙස රජ ඔහුට අණ කළේය.+ 4 රජුගේ අණ පරිදි කඩවසම් පෙනුමකින් යුත්, නිරෝගී ශරීරයක් ඇති,+ සියලුම ශිල්ප ශාස්ත්‍රයන්හි දක්ෂ වූ,+ දැනුම් තේරුම් ඇති,+ රජමාලිගාවේ සේවය කිරීමට හැකියාවක් ඇති+ තරුණයන්ව තෝරාගන්නා ලදි. රජ ඒ අයට කල්දිවරුන්ගේ සියලු ශාස්ත්‍ර හා භාෂා ඉගැන්වීමට අෂ්පෙනස්ට පැවරුවේය. 5 තමා වෙනුවෙන් පිළියෙල කළ භෝජනයෙන් හා වයින්වලින් කොටසක් දිනපතාම එම තරුණයන්ට දෙන ලෙසද රජ අණ කළේය.+ අවුරුදු තුනක් ඔවුන්ව එලෙස පුහුණු කළ පසු ඔවුන් තමා ඉදිරියට පැමිණ සේවය කළ යුතු බවට රජ නියම කළේය.
6 ඔවුන් අතරේ යූදා ගෝත්‍රයට අයත් තරුණයෝ කිහිපදෙනෙක්ද සිටියෝය. ඔවුන්ගේ නම් දානියෙල්,+ හනනියා, මිෂායෙල් සහ අෂරියාය.+ 7 රජුගේ ප්‍රධාන නිලධාරියා ඔවුන්ට අලුත් නම් දුන්නේය.+ දානියෙල්ට බෙල්ටෂසර්+ කියාද හනනියාට ෂද්‍රක් කියාද මිෂායෙල්ට මේෂක් කියාද අෂරියාට අබෙද්නෙගෝ+ කියාද ඔහු නම් තැබුවේය.
8 රජු ඔවුන්ට නියම කළ කෑමවලින් හෝ වයින්වලින් අපවිත්‍ර නොවී සිටීමට දානියෙල් තම හදවතින්ම අදිටන් කරගත්තේය.+ ඒ නිසා අපවිත්‍ර දේවල් ආහාරයට නොගෙන සිටීමට තමාට අවසර දෙන ලෙස රජුගේ ප්‍රධාන නිලධාරියාගෙන් නිතර නිතර ඔහු ඉල්ලා සිටියේය.+ 9 සැබෑ දෙවි දානියෙල්ට ආශීර්වාද කළ නිසා රජුගේ ප්‍රධාන නිලධාරියා ඔහුට අනුකම්පා කර ඉතා කාරුණිකව* සැලකුවේය.+ 10 පසුව ඔහු දානියෙල්ට මෙසේ කීවේය. “ඔබට ඒ කෑම බීම දෙන්න නියම කළේ මගේ ස්වාමියයි. ඔහුගේ අණට විරුද්ධව යමක් කරන්න මට බයයි.+ ඔබේම වයසේ අනික් තරුණයන් හොඳින් සිටියදී ඔබේ මුහුණ විතරක් මැලවිලා තියෙනවා දැක්කොත් ඔහු මගේ හිස ගසා දමයි!” 11 පසුව රජුගේ ප්‍රධාන නිලධාරියා+ දානියෙල්වද හනනියාවද මිෂායෙල්වද අෂරියාවද බලාගැනීම සඳහා වෙනත් නිලධාරියෙකුව පත් කළේය. දානියෙල් ඔහු වෙතටද ගොස් මෙසේ කීවේය. 12 “ඔබේ සේවකයන් වන අපි කරන මේ ඉල්ලීම අහක දාන්න එපා. අපිට දවස් දහයක් එළවුළු විතරක් කන්න දෙන්න.+ වතුර විතරක් බොන්න දෙන්න. 13 දවස් දහය ඉවර වුණාම රජුගේ කෑම කන තරුණයන්ගේ පෙනුමයි අපේ පෙනුමයි අතර වෙනසක් තියෙනවාද කියා බලන්න. ඊටපස්සේ ඔබට අප ගැන තීරණයක් ගන්න පුළුවන්.”
14 අන්තිමේදී ඔහු ඔවුන්ගේ ඉල්ලීමට එකඟ විය. 15 දවස් දහයෙන් පසු රජුගේ කෑම කන තරුණයන්ට වඩා හැඩිදැඩි පෙනුමක් ඔවුන් හතරදෙනාට තිබුණු බව ඔහුට පෙනී ගියේය.+ 16 එමනිසා ඔවුන් භාරව සිටි නිලධාරියා රජු නියම කළ කෑම හා වයින් කොටස වෙනුවට දිගටම ඔවුන්ට කෑමට එළවුළු දුන්නේය.+ 17 සැබෑ දෙවි ඔවුන් හතරදෙනාට ප්‍රඥාව දුන්නේය. සියලු ලියකියවිලි ගැනද ශිල්ප ශාස්ත්‍ර ගැනද මනා දැනුමක් හා අවබෝධයක් ලබා දුන්නේය.+ ඕනෑම දර්ශනයක් හෝ සිහිනයක් හෝ තෝරා දීමේ හැකියාවද දානියෙල්ට තිබිණ.+
18 නෙබුකද්නෙෂර් රජු තරුණයන්ව පුහුණු කිරීමට නියම කළ කාලය අවසන් වූ පසු, රජුගේ ප්‍රධාන නිලධාරියා ඔවුන්ව රජු ඉදිරියට ගෙන ආවේය.+ 19 තරුණයන් සමඟ කතා කළ පසු දානියෙල්, හනනියා, මිෂායෙල් සහ අෂරියා+ තරම් දක්ෂ වෙන කිසිවෙකු ඔවුන් අතරේ නොසිටි බව රජ තේරුම්ගත්තේය. ඔවුහු දිගටම රජුට සේවය කළෝය.+ 20 ඉතා ගැඹුරු කාරණා ගැන විමසන විටත් ඔවුන් ප්‍රඥාවෙන් හා අවබෝධයෙන් යුක්තව+ පිළිතුරු දුන් බව රජ තේරුම්ගත්තේය. ඇත්තෙන්ම ඔවුහු මුළු රාජධානියේම සිටි මන්තර ගුරුකම් කරන පූජකයන්ට+ හා පේන කියන්නන්ට+ වඩා දහස් ගුණයකින් දක්ෂ වූහ. 21 සයිරස් රජුගේ පළමුවන අවුරුද්ද දක්වාම දානියෙල් එහි සිටියේය.+