2 සාමුවෙල්
නැතහොත් ග්‍රීක සෙප්ටුඅජින්ට් පරිවර්තනයට අනුව දෙවෙනි රාජාවලිය
1 දාවිත් අමලෙක්වරුන්ට පහර දී+ ආපසු ෂික්ලග්+ වෙත හැරී ආවේය. ඒ වන විට සාවුල් රජ ජීවතුන් අතර සිටියේ නැත. දාවිත් දවස් දෙකක් ෂික්ලග්හි නැවතී සිටියේය. 2 තුන්වන දවසේදී සාවුල් රජුගේ කඳවුරේ සිට එක්තරා මිනිසෙක්+ දාවිත් ළඟට දුවගෙන ඇවිත් ඔහු ඉදිරියේ දණින් වැටී+ පොළොව දෙසට හිස පහත් කළේය. ඒ මිනිසා තම වස්ත්‍ර ඉරාගෙන+ හිස මත දූවිලි දමාගෙන+ සිටියේය.
3 “ඔබ කොහේ ඉඳන්ද ආවේ” කියා දාවිත් ඒ මිනිසාගෙන් ඇසුවේය. “මම ඊශ්‍රායෙල්වරුන්ගේ කඳවුරෙන් පැනලා ආවා” කියා ඔහු කීවේය. 4 එවිට දාවිත්, “ඇයි, එහේ මොනවද සිද්ධ වුණේ” කියා ඔහුගෙන් ඇසුවේය. එවිට ඔහු මෙසේ පැවසුවේය. “ඊශ්‍රායෙල් සෙනඟ යුධ පිටියෙන් පලා ගියා. හුඟදෙනෙක් මැරුණා.+ සාවුල් රජුත්+ ඔහුගේ පුත් යොනාතානුත්+ මැරුණා.” 5 එවිට දාවිත් ඒ තරුණයාගෙන් මෙසේ ඇසුවේය. “සාවුල් රජුයි යොනාතානුයි මැරුණා කියලා ඔබ කොහොමද දන්නේ?”+ 6 තරුණයා මෙසේ උත්තර දුන්නේය. “මම අහම්බෙන් වගේ ගිල්බෝවා කන්දට+ ආවා. එතකොට සාවුල් රජ ඔහුගේ හෙල්ලය අල්ලගෙන+ අමාරුවෙන් ඉන්නවා මම දැක්කා. අශ්ව රථ පදවන අයයි අසරුවනුයි ඔහු ළඟටම ඇවිත් හිටියා.+ 7 සාවුල් රජ පිටුපස හැරී බලද්දී මාව දැකලා මට හඬගැසුවා. එතකොට මම, ‘ඇයි මගේ ස්වාමීනි’ කියලා ඔහුගෙන් අහද්දී, 8 ‘ඔබ කවුද’ කියලා ඔහු මගෙන් ඇහුවා. ‘මම අමලෙක්වරයෙක්’+ කියලා ඔහුට කිව්වා. 9 ඒ අවස්ථාවේදී ඔහු මට මෙහෙම කිව්වා. ‘මට තවම පණ+ තිබුණත් කිසිම දෙයක් කරගන්න බැරි වේදනාවකිනුයි මම ඉන්නේ. මගේ ළඟට ඇවිත් මාව මරලා දාන්න.’ 10 ඔහු දරුණු විදිහට තුවාල වෙලා හිටිය නිසා ඔහු ජීවත් වෙන එකක් නැහැයි කියලා මම දැනගත්තා. ඒ නිසා මම ඔහු ළඟට ගිහින් ඔහුව මරලා දැම්මා.+ ඊටපස්සේ ඔහුගේ ඔටුන්නයි+ ඔහුගේ අතේ තිබුණ වළල්ලයි ගලවගෙන ආවා. මගේ ස්වාමීනි, මම ඒවා ගෙනාවේ ඔබට භාර දෙන්න.”
11 එවිට දාවිත්ද ඔහු සමඟ සිටි සියලුදෙනාද ඔවුන්ගේ වස්ත්‍ර ඉරාගත්තෝය.+ 12 සාවුල් රජු සහ ඔහුගේ පුත් යොනාතාන්ද යෙහෝවා දෙවිගේ සෙනඟද ඊශ්‍රායෙලිතයන්ද යුද්ධයේදී මිය ගිය බැවින්+ ඔවුහු සවස් වන තුරු නිරාහාරව+ සිට හඬා වැලපුණෝය.+
13 පසුව ඒ ආරංචිය ගෙනා තරුණයාගෙන් දාවිත් මෙසේ ඇසුවේය. “ඔබ කාගේ කවුද?” තරුණයාද, “මගේ පියා අමලෙක් ජාතිකයෙක්.+ ඔහු විදේශිකයෙක්” කියා කීවේය. 14 එවිට දාවිත්, “යෙහෝවා දෙවිගේ අභිෂේක ලත් තැනැත්තාව+ ඔබ මරා දැමුවේ ඇයි? ඔබට ඒ වගේ දෙයක් කරන්න භය හිතුණේ නැද්ද”+ කියා ඔහුගෙන් ඇසුවේය. 15 ඉන්පසු දාවිත්, “මේ මනුෂ්‍යයාව මරලා දාන්න” කියා ඔහු ළඟ සිටි තරුණයෙකුට කීවේය. ඔහුද එසේ කළේය.+ 16 දාවිත් ඒ අවස්ථාවේදී මෙසේ කීවේය. “ඔබේ මරණයට වග කිව යුත්තේ ඔබමයි.+ ‘යෙහෝවා දෙවිගේ අභිෂේක ලත් තැනැත්තාව මැරුවේ මමයි’+ කියලා කිව්වේ ඔබමයි. ඔබ ඔබටම විරුද්ධව සාක්ෂි දුන්නා.”+
17 පසුව සාවුල් රජු හා ඔහුගේ පුත් යොනාතාන් වෙනුවෙන්+ දාවිත් විලාප ගීයක්+ ගායනා කළේය. 18 “දුන්න”+ ලෙස හැඳින්වූ එම ගීය යූදා+ ජනයාට උගන්වන ලෙස දාවිත් නියම කළේය. ඒ ගීය යාෂාර් නම් ලියවිල්ලෙහිද+ සටහන් කර තිබේ.
19 “අනේ ඊශ්‍රායෙල්, ඔබේ තේජස කඳු මුදුනෙහි පහව ගියේය.+
ඔබේ තේජවත් බලවතුන් වැටී ගිය හැටි බලන්න!
20 පිලිස්තිවරුන්ගේ දූවරු ප්‍රීති නොවන පිණිස
ඒ පුවත ගාත්හි ප්‍රසිද්ධ නොකරන්න.+
අචර්මච්ඡේදිතයන්ගේ දූවරු ප්‍රීති ඝෝෂා නොනඟන පිණිස+
ඒ ගැන අෂ්කෙලොන්හි+ මාවත්වල දැනුම් නොදෙන්න.
21 ගිල්බෝවා කඳුකරයට+ පිනිවත් වර්ෂාවවත් නොවැටේවා! දෙවිට ඔප්පු කරන පිණිස+ එහි කෙත්වතුවලින් කිසි පලදාවක් නොලැබේවා!
මන්ද බලවතුන්ගේ පලිස් පාගා දැමුවේ එතැනය.
සාවුල් රජුගේ පලිහ පාගා දැමුවේද එතැනය. තෙලින් ආලේප කළ එක් පලිහක්වත් ඉතුරු නොවීය.+
22 යොනාතාන්ගේ ඊතල කිසිවිටකවත් සතුරන්ගේ ලේ නොවගුරුවා හැරී ආවේ නැත.+
බලවතුන්ගේ මාංස තුවාල නොකර හැරී ආවේ නැත.
එසේම සාවුල් රජුගේ කඩුව ජය නොලබා කිසිවිටකවත් හැරී ආවේ නැත.+
23 සැමගේ සිත් දිනාගත්, බොහෝ ප්‍රේම ලත් අය වූ සාවුල් හා යොනාතාන්+
මරණයේදීවත් වෙන් වූයේ නැත.+
රාජාලීන්ටත් වඩා වේගයෙන්+ ගමන් කළ ඔවුහු
සිංහයන්ටත් වඩා බලවත්+ වුණෝය.
24 ඊශ්‍රායෙල් දියණියෙනි, ඔබට අලංකාර රතු වස්ත්‍ර අන්දවා
ඔබව රන් ආභරණවලින් සැරසූ+
සාවුල් රජු වෙනුවෙන් හඬා වැලපෙන්න.