යොෂුවා
7 යූදා ගෝත්‍රයට අයත් ආකාන්*+ නම් තැනැත්තා දෙවි විනාශ කිරීමට නියම කළ දේවලින් සමහරක් සොරකම් කළේය.+ ආකාන්, සේරාගේ පුත්‍රයා වූ සබ්දීගේ පුත් කාමීගේ පුත්‍රයා විය. ආකාන්ගේ අවකල් ක්‍රියාව නිසා යෙහෝවා දෙවි ඊශ්‍රායෙල්වරුන් සමඟ බොහෝ සෙයින් උදහස් විය.+ මන්ද ඔවුහු දෙවි දුන් ආඥාවක් කඩ කරමින් දෙවිට අවිශ්වාසවන්ත වූහ.
2 යෙරිකෝව අල්ලාගත් පසු යොෂුවා එතැන සිට බෙතෙල් නගරයට+ නැඟෙනහිරෙන් පිහිටි බෙත්-ආවෙන්+ නගරය අසල තිබෙන ආයි නගරයට+ කිහිපදෙනෙකුව යැව්වේය. ඔවුන්ව පිටත් කර යැවීමට පෙර යොෂුවා මෙසේ කීවේය. “රහසින් ගොස් ඒ නගරය ගැන තොරතුරු සොයාගෙන එන්න.” එවිට ඔවුහු ආයි නගරයට ගොස් තොරතුරු සොයා බැලුවෝය.+ 3 ඉන්පසු ඔවුහු යොෂුවා වෙතට පැමිණ මෙසේ දැන්වූවෝය. “ඒ නගරයේ ඉන්නේ ටිකදෙනයි. ඒ නිසා ලොකු හමුදාවක් එතැනට යන්න අවශ්‍ය නැහැ. මිනිස්සු තුන්දහසක් විතර ගියොත් ඇති. මුළු හමුදාවම එහි යවා සියලුදෙනාවම මහන්සි කරවන්න අවශ්‍ය නැහැ.”
4 එහෙයින් තුන්දහස්දෙනෙකුගෙන් පමණ සමන්විත හමුදාවක් ආයි නගරය අල්ලාගැනීමට ගියෝය. නමුත් ආයි නගරයේ වැසියෝ ඔවුන් පසුපස පන්නාගෙන ආවෝය.+ 5 ඔවුහු ඊශ්‍රායෙල්වරුන් තිස්හයදෙනෙකුව පමණ මරා දැමූහ. ඔවුහු ඉතුරු අයව නුවර දොරටුවේ සිට කඳු බෑවුම දිගේ ලුහුබැඳගෙන ආවෝය.+ ෂෙබාරීම්* දක්වාම ඔවුන් පසුපස ලුහුබැඳ ඇවිත් ඔවුන්ට පහර දුන්නෝය. එහෙයින් ඊශ්‍රායෙල්වරු හොඳටම භය වී අධෛර්යයට පත් වූහ.+
6 එය ඇසූ යොෂුවා තම වස්ත්‍ර ඉරාගෙන ඊශ්‍රායෙල්හි වැඩිමහල්ලන් සමඟ යෙහෝවා දෙවිගේ ගිවිසුම් පෙට්ටිය ඉදිරියේ හවස් වන තුරුම මුණින් අතට බිම වැටී සිටියේය.+ ඔවුහු තම හිස් මත දූවිලි දමාගත්තෝය.+ 7 යොෂුවා මෙසේ කීවේය. “විශ්වයේ පාලකයාණන් වන යෙහෝවා දෙවියනි, ඔබ මේ සෙනඟව යොර්දාන් ගඟ හරහා ගෙනැවිත් මෙපමණ දුරක් එන්න සැලැස්සුවේ අමෝරිවරුන් අතින් මැරුම් කන්නද? අපි යොර්දාන් ගඟෙන් එගොඩ නොවී එහිම සිටියා නම් මීට වඩා හොඳයි.+ 8 අනේ, යෙහෝවා දෙවියනි, මම මෙහෙම කතා කරනවාට සමාවෙන්න. ඊශ්‍රායෙල්වරුන් ඔවුන්ගේ සතුරන් ඉදිරියෙන් පලා යද්දී මම මේ විදිහට කතා නොකර වෙන කුමක් කරන්නද? 9 කානානිවරුන්ටත් මේ දේශයේ සිටින අනිකුත් සියලු වැසියන්ටත් මේ ගැන අහන්න ලැබුණාම ඔවුන් අපිව වටලා, අපිව නැත්තටම නැති කර දමයි. අපේ ජාතියේ නාමය මේ පොළොවෙන් තුරන් වෙලා යයි.+ එහෙමවුණොත් ඔබේ ශ්‍රේෂ්ඨ නාමයට ඉන් සිදු වන අගෞරවය මොන තරම්ද!”+
10 එවිට යෙහෝවා දෙවි යොෂුවාට මෙසේ කීවේය. “ඔබ මෙලෙස බිම වැතිර සිටින්නේ ඇයි? දැන් නැඟිටින්න! 11 ඊශ්‍රායෙල් සෙනඟ මා ඉදිරියේ පාපයක් කළෝය. ඔවුහු මාගේ අණට අකීකරු වී මාගේ ගිවිසුම කඩ කළෝය.+ මා විනාශ කිරීමට නියම කළ+ දේවල්වලින් සමහරක් ඔවුහු සොරකම් කර+ ඒවා ඔවුන්ගේ බඩු අතරේ+ සඟවාගෙන සිටිති.+ 12 ඒ නිසා දැන් මා ඊශ්‍රායෙල් සෙනඟවත් විනාශයට නියම කර තිබේ. ඊශ්‍රායෙල්වරුන්ට ඔවුන්ගේ සතුරන්ට විරුද්ධව නැඟී සිටින්න ලැබෙන්නේ නැත.+ ඔවුන්ට සිදු වන්නේ සතුරන් වෙතින් පලා දුවන්නයි. විනාශ කිරීමට නියම කළ දේ ඔබ අතරෙන් ඉවත් කළේ නැත්නම් මාගේ උපකාරය නැවත ඔබට නොලැබේ.+ 13 එහෙයින් දැන් නැඟිට, සෙනඟව පවිත්‍ර තත්වයකට ගෙනෙන පිණිස ඔවුන්ව සූදානම් කරන්න.+ ඔබ ඔවුන්ට මෙසේ පවසන්න. ‘හෙට දෙවි ඉදිරියේ ඔබ පවිත්‍රව සිටිය යුතුයි. මන්ද ඊශ්‍රායෙල්හි දෙවි වන යෙහෝවා මෙසේ පැවසුවා. “ඊශ්‍රායෙල්වරුනි, මා විනාශ කිරීමට නියම කළ දේ තවමත් ඔබේ කඳවුරේ තිබේ.+ ඔබ ඒ දේ විනාශ කළේ නැත්නම් ඔබට නැවතත් ඔබේ සතුරන්ට විරුද්ධව නැඟී සිටීමට නොලැබෙන්නේය. 14 හෙට උදෑසන මුළු ඊශ්‍රායෙල් සෙනඟ ගෝත්‍රවලට අනුව රැස් විය යුතුයි. එවිට යෙහෝවා දෙවි වන මම ඒ ගෝත්‍ර අතරින් එක ගෝත්‍රයක් වෙන් කරන්නෙමි.+ ඒ ගෝත්‍රයට අයිති සෙනඟ තමන්ගේ පෙළපත්වලට අනුව බෙදී ඉදිරියට පැමිණිය යුතුයි. යෙහෝවා දෙවි වන මම ඒ පෙළපත් අතරින් එක පෙළපතක් වෙන් කරන්නෙමි. ඒ පෙළපතට අයිති අය පවුල් වශයෙන් බෙදී ඉදිරියට පැමිණිය යුතුයි. යෙහෝවා දෙවි වෙන් කරන පවුලේ එක් එක් සාමාජිකයා ඉදිරියට පැමිණිය යුතුයි. 15 එවිට විනාශයට නියම කළ දේවල් සොරකම් කළ තැනැත්තා කවුද කියා ඔබට හඳුනාගැනීමට හැකි වන්නේය. ඔහු යෙහෝවා දෙවි වන මාගේ අණට අකීකරු වී+ මාගේ ගිවිසුම කඩ කර මුළු ඊශ්‍රායෙල් ජාතියටම මහත් නින්දාවක් ගෙනා නිසා+ ඔබ ඔහුවත් ඔහුගේ පවුලේ සියලුදෙනාවත් මරා ඔහුට අයිති සියල්ල සමඟ ඔවුන්ව ගින්නෙන් දවා දැමිය යුතුයි.”’”+
16 යොෂුවා පසුවදා උදෑසනින්ම අවදි වී මුළු ඊශ්‍රායෙල් සෙනඟව ගෝත්‍රවලට අනුව රැස් කළේය. එවිට රැස් වූ ගෝත්‍ර අතරින් යූදා ගෝත්‍රය වෙන් කරනු ලැබීය. 17 ඉන්පසු තම තමන්ගේ පෙළපතට අනුව බෙදී ඉදිරියට එන්න කියා යොෂුවා යූදා ගෝත්‍රයේ අයට කීවේය. ඔවුන් අතරින් සේරාගේ පෙළපතට+ අයිති අයව වෙන් කරනු ලැබීය. ඉන්පසු ඔහු ඒ පෙළපතට අයිති සියලු පවුල් මූලිකයන්ව වෙන වෙනම කැඳෙව්වේය. ඔවුන් අතරින් සබ්දීව කැඳෙව්වේය. 18 ඉන්පසු යොෂුවා සබ්දීගේ පවුලේ සියලු සාමාජිකයන්ට ඉදිරියට එන්න කියා කීවේය. ඔවුන් අතරින් කාමීගේ පුත්‍රයා වන ආකාන්ව තෝරාගනු ලැබීය.+ කාමී යූදා ගෝත්‍රයට අයිති සේරාගේ පුත් සබ්දීගේ පුත්‍රයා විය. 19 එවිට යොෂුවා ආකාන්ට මෙසේ කීවේය. “මගේ පුත්‍රය, ඊශ්‍රායෙල්හි දෙවි වන යෙහෝවාට නිසි ගෞරවය දී+ ඔබේ වරද පිළිගන්න.+ ඔබ කළ සියල්ල දැන් මට කියන්න.+ කිසිවක් මගෙන් සඟවන්න එපා.”+
20 එවිට ආකාන් යොෂුවාට මෙසේ පිළිතුරු දුන්නේය. “මම ඊශ්‍රායෙල්හි දෙවි වන යෙහෝවාට විරුද්ධව පව් කළා.+ කළ හැම දෙයක්ම මම ඔබට කියන්නම්. 21 අපි යටත් කරගත්ත දේශයේ තිබූ වටිනා දේවල් එකතු කරගනිද්දී ෂීනාර් දේශයේ+ සෑදූ වටිනා, ලස්සන ඇඳුමක්ද රිදී ෂෙකෙල්* දෙසීයක්ද ෂෙකෙල් පනහක් බර රත්තරන් පොල්ලක්ද තිබුණා. මට ඒවා දැක්කාම+ ආස හිතුණා.+ ඒ නිසා මම ඒවා අරගෙන+ මගේ කූඩාරම ඇතුළේ වළක් හාරා සඟවා තැබුවා. බඩුවලට යටින් මම මුදල් සැඟෙව්වා.”+
22 යොෂුවා එය ඇසූ වහාම ආකාන්ගේ කූඩාරම පරීක්ෂා කර බැලීමට කිහිපදෙනෙකුව යැව්වේය. ඔවුන් කූඩාරමට දුව ගොස් බැලූ විට මුදල් සමඟ සඟවා තිබුණු සියල්ල ඔවුන්ට සම්බ විය. 23 ඔවුහු ඒ බඩු එතැනින් ගෙන යොෂුවා සහ සියලු ඊශ්‍රායෙල්වරුන්ට පෙනෙන සේ යෙහෝවා දෙවි ඉදිරියේ තැබුවෝය. 24 එවිට යොෂුවා සහ මුළු ඊශ්‍රායෙල් සෙනඟ, සේරාගේ පුත් ආකාන්වද+ ඔහු සඟවාගත් රිදීද ඇඳුමද රත්තරන් පොල්ලද+ ඔහුගේ දූදරුවන්වද ඔහුගේ ගොනුන්වද බූරුවන්වද බැටළුවන්වද කූඩාරමද ඔහුට අයිති සියල්ලද ආකොර් තැනිතලාවට+ ගෙන ගියෝය. 25 ඉන්පසු යොෂුවා මෙසේ කීවේය. “අප සියලුදෙනා පිටට ඔබ ශාපයක් ගෙනා නිසා+ යෙහෝවා දෙවි අද ඔබව ප්‍රතික්ෂේප කළා.” එවිට මුළු ඊශ්‍රායෙල් සෙනඟ ඔවුන්ට ගල් ගසා ඔවුන්ව මරා,+ ගින්නෙන් දවා දැමුවෝය.+ 26 ඉන්පසු ඔවුහු ආකාන්ගේ මළ සිරුරට උඩින් ගල් ගොඩගැසුවෝය. එය අද දක්වාම පවතියි.+ මෙය සිදු වූ පසු යෙහෝවා දෙවිගේ කෝපය පහ විය.+ අද දක්වාම ඒ ස්ථානය ආකොර්* තැනිතලාව+ ලෙස හඳුන්වන්නේ එම සිද්ධිය නිසාය.