ක්‍රියා

14 ඉකෝනියට+ පැමිණි පාවුල් සහ බානබස් යුදෙව්වරුන්ගේ සිනගෝගයට ඇතුල් වී+ රැස්ව සිටි අයට ඉගැන්වූහ. ඔවුන් කොතරම් හොඳින් ඉගැන්නුවාද කිවහොත් යුදෙව්වරුන් සහ ග්‍රීකවරුන් විශාල පිරිසක්+ යේසුස්ගේ අනුගාමිකයෝ බවට පත් වූහ. 2 නමුත් ඔවුන් පැවසූ දේවල් විශ්වාස නොකළ යුදෙව්වරු, වෙනත් ජාතීන්ට අයත් අයව උසිගන්වා+ ඔවුන්ගේ මනස් තුළට වැරදි අදහස් දමා ඔවුන් ගැන වැරදි වැටහීමක් ඇති කළෝය.+ 3 එහෙයින් ඔවුහු එහි සෑහෙන කාලයක් නැවතී සිටියෝය. දේශනා කිරීමට යෙහෝවා දෙවිගෙන් තමන්ට අවසර ලැබී ඇති බව සිහියේ තබාගනිමින් ඔවුහු නිර්භීතව කතා කළෝය. ඔවුන් දෙවිගේ මහත් කරුණාව පිළිබඳ පණිවිඩය ගැන කතා කරද්දී දෙවිත් ඒ සඳහා සාක්ෂි ලබා දුන්නේය. ඔහු එසේ කළේ ඔවුන්ට පුදුමසහගත දේවල් හා ආශ්චර්යයන් සිදු කිරීමට බලය ලබා දීමෙනි.+ 4 කෙසේනමුත් නුවරේ වැසියන් අතර භේදයක් ඇති විය. සමහරුන් යුදෙව්වන්ගේ පැත්ත ගත් අතර තවත් සමහරුන් සිටියේ යේසුස්ගේ නියෝජිතයන්ට* පක්ෂවය. 5 මේ අතර වෙනත් ජාතීන්ට අයත් කිහිපදෙනෙක් යුදෙව්වන් සහ ඔවුන්ගේ පාලකයන් සමඟ එකතු වී පාවුල්ට හා බානබස්ට හිරිහැර කර ගල් ගැසීමට සූදානම් වූහ.+ 6 ඔවුන්ට ඒ දේ ගැන ආරංචි වූ විට ඔවුහු ලිකෝනිය, ලිස්ත්‍රාව සහ දර්බය යන නුවරවලටද ඒ අවට පිහිටි ප්‍රදේශයටද පලා ගොස්,+ 7 එහි ශුභාරංචිය නොකඩවා ප්‍රකාශ කළෝය.+

8 ලිස්ත්‍රාවේ එක්තරා කොර මිනිසෙක් සිටියේය. උපන් දා සිට ඔහු ඒ ආබාධයෙන් පෙළුණු නිසා+ ඔහු කවදාවත් ඇවිද තිබුණේ නැත. 9 ඒ මිනිසා පාවුල් පැවසූ දේවලට මහත් උනන්දුවකින් සවන් දෙමින් සිටියේය. ඔහු දෙස හොඳින් බැලූ පාවුල්ට තේරුම් ගියේ සුවය ලැබීමට තරම් විශ්වාසයක්+ ඒ මිනිසාට තිබෙන බවය. 10 එමනිසා, “නැඟිට කෙළින් සිටගන්න” කියා පාවුල් මහත් හඬින් ඔහුට කීවේය. ඔහු එකවරම නැඟිට, ඇවිදින්න පටන්ගත්තේය.+ 11 පාවුල් සිදු කළ දේ දුටු සමූහයා මහත් හඬින් කෑගසා, “දෙවිවරුන්+ මිනිසුන්ගේ වෙස් අරගෙන අප අතරට ඇවිත්” කියා ලිකෝනියේ බසින් කියන්න පටන්ගත්තෝය. 12 ඔවුන් බානබස්ව හැඳින්වූයේ සියුස් ලෙසය. කතා කිරීමට පාවුල් පෙරමුණ ගත් නිසා ඔවුහු ඔහුව හර්මීස් ලෙස හැඳින්වූහ. 13 නුවර අසලම සියුස්ගේ දේවස්ථානයක් පිහිටා තිබුණු අතර එහි පූජකයා ගොනුන්ද මල් මාලාද රැගෙන නුවරේ දොරටුව අසලට පැමිණියේය. ඔහුට අවශ්‍ය වූයේ රැස්ව සිටි සමූහයා සමඟ එක් වී බානබස්ට සහ පාවුල්ට පූජා ඔප්පු කිරීමටය.+

14 යේසුස්ගේ නියෝජිතයන් වන බානබස් සහ පාවුල් ඒ දේ ගැන දැනගත් විට ඔවුහු තම වස්ත්‍ර ඉරාගෙන සමූහයා මැදට දිව ගොස් හඬ නඟා, 15 මෙසේ කීවෝය. “මිත්‍රයෙනි, ඔබ මේ දේවල් කරන්නේ ඇයි? අපත් ඔබ හා සමාන දුර්වලකම් ඇති+ මිනිස්සු.+ අප ඔබට ශුභාරංචිය ප්‍රකාශ කරන්නේ, ඔබ මේ වගේ නිෂ්ඵල දේවලින් ඉවත් වී+ ජීවමාන දෙවි වෙතට හැරීම සඳහායි.+ අහසත් පොළොවත් මුහුදත් ඒවායේ තිබෙන සියල්ලත් සෑදුවේ ඔහුයි.+ 16 අතීතයේ නම් දෙවි සෑම ජාතියකටම තමන්ට කැමති දේ කරන්න ඉඩ දුන්නා.+ 17 ඒ වුණත් ඒ කාලයේදීත් ඔහු බොහෝ යහපත් දේවල් කරමින්+ තමා සිටින බවට සාක්ෂි ලබා දුන්නා. ඔහු එසේ කළේ ඔබට වැසි ලබා දීමෙන්,+ සරු අස්වනු ලබා දීමෙන්, කෑමට අවශ්‍ය තරම් ආහාර ලබා දීමෙන් සහ ඔබේ සිතට සතුට ගෙන දෙන දේවල් ලබා දීමෙනුයි.”+ 18 ඔවුන් ඒ දේවල් සමූහයාට පැවසුවත් ඔවුන්ට පූජා ඔප්පු කිරීමට සමූහයා ගත් උත්සාහය නතර කිරීම පහසු දෙයක් වූයේ නැත. ඒ සඳහා ඔවුන්ට මහත් වෙහෙසක් දැරීමට සිදු විය.

19 නමුත් පසුව අන්තියෝකියෙන්ද ඉකෝනියෙන්ද යුදෙව්වරුන් පිරිසක් ඇවිත් එම සමූහයාව තමන්ගේ පැත්තට නම්මාගත්තෝය.+ එහෙයින් ඔවුහු පාවුල්ට ගල් ගසා ඔහු මිය ගොස් ඇති බව සිතා නුවරින් පිටතට ඇද දැමුවෝය.+ 20 නමුත් ගෝලයන් ඇවිත් ඔහු වටා එකතු වූ විට ඔහු නැඟිට්ටේය. ඉන්පසු ඔහු නුවරට ඇතුල් විය. පසුවදා ඔහු බානබස් සමඟ දර්බය බලා පිටත්ව ගියේය.+ 21 ඔවුන් ඒ නුවරෙහි දේශනා කළ විට සෑහෙන පිරිසක් යේසුස්ගේ ගෝලයන් බවට පත් වූහ.+ ඉන්පසු ඔවුහු ලිස්ත්‍රාවටද ඉකෝනියටද අන්තියෝකියටද නැවත ගියෝය. 22 එහිදී ඔවුහු, “දෙවිගේ රාජ්‍යයට ඇතුල් වෙන්න නම් අපි බොහෝ පීඩාවලට මුහුණ දෙන්න අවශ්‍යයි”+ කියා පවසමින් ගෝලයන්ට තම විශ්වාසය දුර්වල කරගන්නේ නැතුව එය ශක්තිමත්ව තබාගැනීමට දිරිගැන්වූහ.+ 23 මීට අමතරව සෑම සභාවකම සිටින ගෝලයන්ට උපකාර කිරීම සඳහා ඔවුහු වැඩිමහල්ලන්ව පත් කළෝය.+ නිරාහාරව සිටිමින් යාච්ඤා කළ ඔවුහු,+ යෙහෝවා දෙවි කෙරෙහි විශ්වාසය තැබූ වැඩිමහල්ලන්ව දෙවිගේ රැකවරණය යටතට භාර කළෝය.+

24 ඊළඟට ඔවුහු පිසිදිය ප්‍රදේශය මැදින් ගොස් පම්ෆිලිය පළාතට පැමිණ,+ 25 පර්ගාහිදී දෙවිගේ පණිවිඩය ගැන කතා කළ පසු අත්තලීය නම් නුවරට ගියෝය. 26 ඔවුහු එතැනින් නැවතත් අන්තියෝකිය බලා යාත්‍රා කළෝය.+ දෙවි තම මහත් කරුණාවෙන් ඔවුන්ට මේ සේවය මුලින්ම භාර දී තිබුණේ එහිදීය. එහෙයින් ඔවුන් නැවත එතැනට ගියේ තම සේවය සම්පූර්ණයෙන්ම ඉටු කළ පසුවය.+

27 ඔවුහු එතැනට ගිය විට සභාවේ සියලුදෙනාව රැස් කරවා, දෙවි ඔවුන් මාර්ගයෙන් සිදු කළ බොහෝ දේවල් ගැනත් දෙවි වෙනත් ජාතීන්ට අයත් අයට පවා සත්‍ය ඉගැන්වීම් පිළිගැනීමට මඟ විවෘත කර ඇති බවත්+ පැවසුවෝය.+ 28 ඔවුහු එම ගෝලයන් සමඟ සෑහෙන කාලයක් එහි නැවතී සිටියෝය.