මාක්
15 එළිය වැටීගෙන එද්දීම නායක පූජකයන්, වැඩිමහල්ලන් සහ නීතිය පිටපත් කරන අය ඒ කියන්නේ මුළු මන්ත්‍රණ සභාවම එකට රැස් වෙලා යේසුස්ට කරන්න ඕනෙ මොනවාද කියලා සාකච්ඡා කළා. ඊටපස්සේ එයාලා යේසුස්ව බැඳලා පිලාත් ළඟට අරගෙන ගිහින් එයාට භාර දුන්නා.+ 2 එතකොට පිලාත් “ඔයා යුදෙව්වන්ගේ රජද” කියලා යේසුස්ගෙන් ඇහුවා.+ යේසුස් එයාට මෙහෙම උත්තර දුන්නා. “ඔව්, ඒක හරි.”*+ 3 ඒත් නායක පූජකයෝ යේසුස්ට විරුද්ධව ගොඩක් චෝදනා එල්ල කළා. 4 ඉතින් පිලාත් ආපහු යේසුස්ගෙන් ප්‍රශ්න කරන්න පටන්ගත්තා. එයා මෙහෙම ඇහුවා. “මේ අය ඔයාට විරුද්ධව කරන චෝදනා ඔයාට ඇහෙන්නේ නැද්ද?+ ඔයාට ඒ ගැන කියන්න මුකුත් නැද්ද?”+ 5 ඒත් යේසුස් කිසිම උත්තරයක් දුන්නේ නැහැ. ඒ ගැන පිලාත් පුදුම වුණා.+
6 පිලාත් සිරිතක් විදිහට හැම පාස්කු උත්සවයකදීම සෙනඟ නිදහස් කරන්න කියලා ඉල්ලන හිරකරුවෙක්ව නිදහස් කරනවා.+ 7 ඒ කාලේ බරබ්බස් කියලා මනුස්සයෙක් හිරේ හිටියා. එයාව තවත් කට්ටියක් එක්ක හිරේ දාලා තිබුණේ එයාලා ආණ්ඩුවට විරුද්ධව කැරලිගහලා මිනී මරපු නිසයි. 8 ඉතින් සෙනඟ පිලාත් ළඟට ගිහින් එයා සිරිතක් විදිහට එයාලා වෙනුවෙන් කරන දේ කරන්න කියලා ඉල්ලුවා. 9 එතකොට පිලාත් එයාලාගෙන් මෙහෙම ඇහුවා. “මං යුදෙව්වන්ගේ රජව නිදහස් කරනවාට ඔයාලා කැමතිද?”+ 10 පිලාත් දැනගෙන හිටියා නායක පූජකයන් යේසුස්ව තමන්ට භාර දුන්නේ එයාලා යේසුස්ට ඊර්ෂ්‍යා කරපු නිසයි කියලා.+ 11 ඒත් නායක පූජකයන් යේසුස් වෙනුවට බරබ්බස්ව නිදහස් කරලා දෙන්න කියලා පිලාත්ගෙන් ඉල්ලන්න සෙනඟව උසිගැන්නුවා.+ 12 ඉතින් පිලාත් ආපහු සැරයක් එයාලාගෙන් මෙහෙම ඇහුවා. “එතකොට යුදෙව්වන්ගේ රජ කියලා ඔයාලා කියන මේ කෙනාට මං මොනවාද කරන්නේ?”+ 13 සෙනඟ ආපහු කෑගහලා මෙහෙම කිව්වා. “එයාව කණුවක ඇණ ගහලා මරන්න!”+ 14 ඒත් පිලාත් “ඇයි ඔයාලා එහෙම කියන්නේ? මොකක්ද එයා කරපු වරද” කියලා ඇහුවා. එතකොට එයාලා තවත් හයියෙන් “එයාව කණුවක ඇණ ගහලා මරන්න” කියලා කෑගැහුවා.+ 15 ඉතින් සෙනඟව සතුටු කරන්න ඕනෙ නිසා පිලාත්, බරබ්බස්ව නිදහස් කරලා යේසුස්ට කසයෙන් ගහන්න+ කියලා අණ කළා. ඊටපස්සේ ඔහුව කණුවක ඇණ ගහලා මරලා දාන්න+ සෙබළුන්ට භාර දුන්නා.
16 සෙබළු ඔහුව ආණ්ඩුකාරයාගේ නිවසේ තිබුණ මළුවට අරන් ගිහින් අනිත් සෙබළු හැමෝවම එතනට රැස් කළා.+ 17 එයාලා දම් පාට සළුවක් යේසුස්ට අන්දවලා කටු අතුවලින් ඔටුන්නක් හදලා ඒක ඔහුගේ ඔළුවට දැම්මා. 18 ඊටපස්සේ එයාලා “යුදෙව්වන්ගේ රජ්ජුරුවෙනි, අපි ඔබට සුබ පතනවා”* කියලා ඔහුට කියන්න පටන්ගත්තා.+ 19 සෙබළු බට දණ්ඩකින් ඔහුගේ ඔළුවට කීප සැරයක්ම ගහලා ඔහුට කෙළ ගැහුවා. එයාලා ඔහු ඉස්සරහා දණගහලා එයාලාගේ ඔළුව පහත් කළා. 20 ඒ විදිහට ඔහුට ගොඩක් සමච්චල් කළාට පස්සේ එයාලා ඔහුට අන්දවපු දම් පාට සළුව ගලවලා ඔහුගේ පිට වස්ත්‍ර ආයෙත් ඔහුට ඇන්දුවා. ඊටපස්සේ ඔහුව කණුවක ඇණ ගහන්න එයාලා අරගෙන ගියා.+ 21 එයාලා එහෙම යද්දී මඟදී හම්බ වුණ මනුස්සයෙක්ට බල කරලා කිව්වා යේසුස්ගේ වධකණුව* උස්සගෙන යන්න කියලා. ඇලෙක්සැන්ඩර්ගේ සහ රූෆස්ගේ තාත්තා වුණ සීමොන් කියන ඒ කෙනා සිරේනිය නගරයේ වැසියෙක්. එයා පිටිසර පැත්තක ඉඳන් එන ගමනුයි හිටියේ.+
22 සෙබළු යේසුස්ව ගොල්ගොතා කියන තැනට අරගෙන ආවා. ඒ වචනයේ තේරුම “හිස්කබල.”+ 23 එතනදී එයාලා ඔහුට බොන්න වයින් දෙන්න හැදුවත් ඔහු ඒක බිව්වේ නැහැ. ඒ වයින්වලට මත් ගතියක් ඇති කරන සුවඳ ලාටු+ වර්ගයක් මිශ්‍ර කරලයි තිබුණේ. 24 ඊටපස්සේ එයාලා යේසුස්ව කණුවේ ඇණ ගහලා ඔහුගේ පිට වස්ත්‍ර එයාලා අතරේ බෙදාගන්නේ කොහොමද කියලා තීරණය කරන්න දාදු දැම්මා. දාදු වැටුණ විදිහට අනුව එයාලා ඒවා බෙදාගත්තා.+ 25 එයාලා ඔහුව කණුවේ ඇණ ගැහුවේ තුන්වෙනි පැයේදී.* 26 ඔහුට දඬුවම් කරපු හේතුව සඳහන් වුණ ලියවිල්ලක් ඔහුගේ ඔළුවට උඩින් එල්ලලා තිබුණා. ඒකේ ලියලා තිබුණේ “යුදෙව්වන්ගේ රජ” කියලයි.+ 27 එයාලා ඔහුගේ කණුවට දෙපැත්තෙන් හොරු දෙන්නෙක්වත් කණුවල එල්ලුවා.+ 28* —— 29 ඒ ස්ථානය පහු කරගෙන යන එන අය තමන්ගේ ඔළුව වනවන+ ඔහුට මෙහෙම නින්දා කළා. “ඔයා මහ ලොකුවට කිව්වේ දේවමාලිගාව කඩලා දාලා දවස් තුනකින් ඒක ආපහු හදනවා කියලා.+ 30 දැන් ඉතින් ඔයාට පුළුවන්නේ ඔය වධකණුවෙන්* බැහැලා එන්න.” 31 ඒ විදිහටම නායක පූජකයෝයි, නීතිය පිටපත් කරන අයයි ඔහුට නින්දා කරකර එයාලා අතරේ මෙහෙම කතා වුණා. “අනිත් අයව නම් එයා බේරගත්තා. හැබැයි එයාට එයාවම බේරගන්න බැහැ.+ 32 එයා ඊශ්‍රායෙල්වරුන්ගේ රජ වන ක්‍රිස්තුස්නේ. දැන් එයා වධකණුවෙන්* බැහැලා ආවොත් අපි අනිවාර්යයෙන්ම එයාව විශ්වාස කරනවා.”+ යේසුස්ට දෙපැත්තෙන් කණුවල එල්ලලා හිටපු දෙන්නාත් ඔහුට අපහාස කළා.+
33 හයවෙනි පැයේදී* මුළු පළාතම අන්ධකාරයෙන් වැහිලා ගියා. ඒ අන්ධකාරය නමවෙනි පැය* වෙන කල්ම තිබුණා.+ 34 නමවෙනි පැයේදී යේසුස් හයියෙන් කෑගහලා මෙහෙම කිව්වා. “ඒලී, ඒලී, ලාමා සබක්තානි?” ඒකේ තේරුම “මගේ දෙවියනි, මගේ දෙවියනි, ඇයි ඔයා මාව අතහැරියේ” කියන එකයි.+ 35 ළඟ හිටගෙන හිටපු සමහරුන්ට ඒක ඇහිලා එයාලා මෙහෙම කියන්න පටන්ගත්තා. “අර, එයා එලියාට අඬගහනවා.” 36 එතකොට කෙනෙක් දුවගෙන ගිහින් ස්පොන්ජියක් වගේ දෙයක් අරගෙන ඒක ඇඹුල් වයින්වල පොඟවලා බට දණ්ඩක ගහලා යේසුස්ට බොන්න දෙන ගමන්+ මෙහෙම කිව්වා. “එයාට ඔහොම ඉන්න දෙන්න! එයාව කණුවෙන් පහතට ගන්න එලියා එයිද කියලා අපි බලමු.” 37 යේසුස් හයියෙන් කෑගහලා අවසන් හුස්ම හෙළුවා.+ 38 එතකොටම ශුද්ධස්ථානයේ තිරය+ උඩ ඉඳන් පහළට ඉරිලා+ දෙකට වෙන් වුණා. 39 යේසුස් මැරෙන වෙලාවේ හමුදා නිලධාරියෙක් ඔහු ඉස්සරහා හිටගෙන හිටියා. වෙච්ච ඒ හැම දෙයක්ම දැක්ක එයා මෙහෙම කිව්වා. “මේ මනුස්සයා දෙවියන්ගෙම පුතා තමයි.”+
40 දුරක ඉඳන් ස්ත්‍රීන් පිරිසකුත් බලාගෙනයි හිටියේ. එයාලා අතරේ මරියා මග්දලේනායි, පොඩි* යාකොබ්ගේ සහ යෝසෙස්ගේ අම්මා වුණ මරියායි, සලෝමියි හිටියා.+ 41 ඒ ස්ත්‍රීන් තමයි යේසුස් ගලීලයේ ඉද්දී ඔහුත් එක්ක තැනින් තැනට ගිහින් ඔහුට උදව් උපකාර කළේ.+ එයාලට අමතරව යේසුස් එක්ක යෙරුසලමට ආපු ගොඩක් ස්ත්‍රීනුත් එතනට ඇවිත් හිටියා.
42 එදා සූදානම් වෙන දවස ඒ කියන්නේ සබත් දවසට කලින් දවස නිසාත් හවස් වෙන්න ළං වෙලා තිබුණ නිසාත් 43 මන්ත්‍රණ සභාවේ ප්‍රසිද්ධ සාමාජිකයෙක් වුණ යෝසෙප් ධෛර්යය අරන් පිලාත් ඉස්සරහට ගිහින් යේසුස්ගේ දේහය තැන්පත් කරන්න අවසර ඉල්ලුවා. අරිමාතිය නගරයේ වැසියෙක් වුණ යෝසෙප් දෙවියන්ගේ රාජ්‍යය ගැන බලාපොරොත්තුවෙන් හිටපු කෙනෙක්.+ 44 ඒත් ඒ වෙද්දීත් යේසුස් මැරිලාද කියලා දැනගන්න පිලාත්ට ඕනෙ වුණා. ඉතින් එයා හමුදා නිලධාරියෙක්ව කැඳවලා යේසුස් ඒ වෙද්දී මැරිලාද කියලා ඒ නිලධාරියාගෙන් ඇහුවා. 45 යේසුස් මැරිලා කියලා ඒ හමුදා නිලධාරියාගෙන් ස්ථිර කරගත්තාට පස්සේ පිලාත් යෝසෙප්ට යේසුස්ගේ දේහය භාරගන්න අවසර දුන්නා. 46 යෝසෙප් හොඳම ලිනන් රෙදි මිල දීලා ගත්තාට පස්සේ යේසුස්ගේ දේහය කණුවෙන් පහතට අරගෙන ඒ රෙදිවලින් දේහය එතුවා. ඊටපස්සේ පර්වතයක් කපලා හදලා තිබුණ සොහොන් ගෙයක*+ දේහය තැන්පත් කරලා එයා සොහොන් ගෙට ඇතුල් වෙන තැනට ගලක් පෙරළලා තිබ්බා.+ 47 මරියා මග්දලේනායි, යෝසෙස්ගේ අම්මා වුණ මරියායි එතනට වෙලා යේසුස්ව තැන්පත් කරපු සොහොන් ගේ දිහා දිගටම බලාගෙන හිටියා.+