Jobho

13 “Tarirai! Ziso rangu rakaona zvinhu zvose izvi,

Nzeve yangu yakazvinzwa uye inozvifungisisa.

 2 Zvamunoziva imi ndinonyatsozvizivawo;

Handisi munhu akaderera panemi.+

 3 Zvisinei, ini ndaizoda kutaura noWemasimbaose,+

Uye ndaizofara kuitirana nharo naMwari.

 4 Asi imi muri vanhu vanodzurura nenhema;+

Mose muri vanachiremba vasina zvavanobatsira.+

 5 Kudai maingoramba makanyarara henyu,

Kuti munzi makachenjera!+

 6 Ndapota, inzwai kupikisa kwangu,+

Uye teererai kuteterera kwemiromo yangu.

 7 Mucharwira Mwari muchitaura zvisina kururama here,

Uye muchamurwira muchitaura zvokunyengera here?+

 8 Muchaita zvechizivano naye here,+

Kana kuti mucharwira Mwari pakutongwa here?

 9 Zvingakunakirai kana akakuongororai here?+

Kana kuti muchamunyengedza sokunyengedzwa kunoitwa munhuwo zvake here?

10 Chokwadi achakutsiurai+

Kana mukaedza kuita zvechizivano pachivande;+

11 Kukudzwa kwake hakuzoiti kuti mutange kutya,

Mobatwa nokumutya here?+

12 Mashoko enyu asingakanganwiki zvirevo zvemadota;

Nhoo dzenyu inhoo dzevhu.+

13 Rambai makanyarara pamberi pangu, kuti ini nditaure.

Chero chipi zvacho chinenge chauya pandiri ngachiuye!

14 Ndinotakurireiko nyama yangu nemazino angu

Uye ndinoisirei mweya wangu muchanza changu?+

15 Kunyange kudai aizondiuraya, ndaisazomirira here?+

Ndaizongoitirana nharo naye nokuda kwenzira dzangu.

16 Aizovawo ruponeso rwangu,+

Nokuti hapana mutsauki achauya pamberi pake.+

17 Nyatsonzwai shoko rangu,+

Uye inzwai zvandinozivisa.

18 Ndapota, tarirai! ndaunza mhosva inofanira kutongwa;+

Ndinonyatsoziva kuti ini ndakarurama.

19 Ndiani achakakavadzana neni?+

Nokuti zvino kunyange ndikanyarara ndichangofa!

20 Musangondiitira zvinhu zviviri;

Ipapo handizovandi nemhosva yenyu;+

21 Isai ruoko rwenyu kure neni,

Uye kutyisa kwenyu—ngakurege kundityisa.+

22 Shevedzai kuti ini ndipindure;

Kana kuti regai nditaure, imi mundipindure.

23 Ndine zvikanganiso nezvivi pakudini?

Itai kuti ndizive kumukira kwangu nechivi changu.

24 Munovanzirei chiso chenyu,+

Mondiona somuvengi wenyu?+

25 Muchaita kuti shizhawo zvaro rinopeperetswa nemhepo rivhunduke here?

Kana kuti mucharamba muchidzingirira mashangawo zvawo akaoma here?

26 Nokuti munoramba muchindinyorera zvinhu zvinovava+

Uye munondigarisa nhaka yemigumisiro yokukanganisa kwandakaita ndichiri muduku.+

27 Munoramba makaisa tsoka dzangu mumatanda,+

Uye munotarira makwara angu ose;

Munotara mutsara wenyu nokuda kwetsoka dzangu.

28 Iye akafanana nechimwe chinhu chakaora chinoparara;+

Senguo inodyiwa nechitemamachira.+