Jeremiya

39 Mugore rechi9 raMambo Zedhekiya weJudha, mumwedzi wechi10, Mambo Nebhukadhinezari* weBhabhironi neuto rake rese vakasvika kuJerusarema, vakarikomba.+

2 Mugore rechi11 raZedhekiya, mumwedzi wechina, pazuva rechi9 remwedzi wacho, vakaputsa rusvingo rweguta racho.+ 3 Uye machinda ese amambo weBhabhironi, aiti, Nerigari-sharezeri muSamgari, Nebho-sasekimu muRabsarisi,* Nerigari-sharezeri muRabmagi,* nemamwe machinda ese amambo weBhabhironi akapinda, akagara paGedhi Repakati.+

4 Mambo Zedhekiya weJudha nevarwi vese pavakavaona, vakatiza+ vakabuda muguta usiku nenzira yekumunda wamambo, nepagedhi raiva pakati pemasvingo maviri, uye vakaramba vachienda nenzira yekuArabha.+ 5 Asi uto revaKadheya rakavadzingirira, uye vakabatira Zedhekiya murenje riri pedyo neJeriko.+ Vakamutora vakaenda naye kuna Mambo Nebhukadhinezari* weBhabhironi kuRibra+ munyika yeHamati,+ uko kwaakamupa mutongo wake. 6 Mambo weBhabhironi akaita kuti vanakomana vaZedhekiya vaurayiwe kuRibra ikoko iye akatarisa, uye mambo weBhabhironi akaita kuti vakuru vakuru vese veJudha vaurayiwe.+ 7 Akabva apofumadza maziso aZedhekiya, achibva amusunga nezvisungo zvemumakumbo zvemhangura, kuti amuendese kuBhabhironi.+

8 VaKadheya vakabva vapisa imba yamambo* nedzimba dzevanhu,+ uye vakaputsa masvingo eJerusarema.+ 9 Nebhuzaradhani+ mukuru wevarindi akatapa vamwe vanhu vese vakanga vasara muguta, nevakanga vatizira kwaari, nevese vakanga vasara, akavaendesa kuBhabhironi.

10 Asi Nebhuzaradhani mukuru wevarindi akasiya vamwe vanhu vaiva varombo vekupedzisira munyika yeJudha, vaya vakanga vasina kana chinhu. Pazuva iroro akavapawo minda yemizambiringa neminda yembesa yekuti vashande mairi.*+

11 Zvino Mambo Nebhukadhinezari* weBhabhironi akapa Nebhuzaradhani mukuru wevarindi mirayiro iyi pamusoro paJeremiya: 12 “Mutore umuchengete; usamuitira zvakaipa uye mupe zvese zvaanokukumbira.”+

13 Saka Nebhuzaradhani mukuru wevarindi, Nebhushazibhani muRabsarisi,* Nerigari-sharezeri muRabmagi,* nevarume vakuru vese vamambo weBhabhironi vakatumira shoko, 14 vakaita kuti Jeremiya abudiswe muChivanze cheVarindi,+ vakamuisa mumaoko aGedhariya+ mwanakomana waAhikamu+ mwanakomana waShafani,+ kuti aunzwe kumba kwake. Saka akatanga kugara pakati pevanhu.

15 Jeremiya paakanga akavharirwa muChivanze cheVarindi,+ shoko raJehovha rakauya kwaari richiti: 16 “Enda unoudza Ebhedhi-mereki+ muItiopiya kuti, ‘Zvanzi naJehovha wemauto, Mwari waIsraeri: “Ndiri kuzadzisa mashoko angu pamusoro peguta rino ndichiunza dambudziko, kwete zvakanaka, uye pazuva iroro iwe uchazviona zvichiitika.”’

17 “‘Asi ndichakununura pazuva iroro,’ ndizvo zvinotaurwa naJehovha, ‘uye hauzoiswi mumaoko evarume vaunotya.’

18 “‘Nekuti chokwadi ndichakupukunyutsa, uye hauzourayiwi nebakatwa. Uchava neupenyu hwako* sechinhu chawapamba,*+ nekuti wakavimba neni,’+ ndizvo zvinotaurwa naJehovha.”