Rufu rwaJesu Rwunotiponesa Sei?

Tinotadza, tinotambura, uye tinofa nekuti vanhu vaviri vekutanga Adhamu naEvha havana kuteerera. Asi hazvirevi kuti hapana tariro. Jehovha akaita urongwa hwekutinunura pachivia nerufu, achishandisa Mwanakomana wake Jesu Kristu. Bhaibheri rinodzidzisa kuti Jesu paakafa, akatidzikinura. Rudzikinuro mubhadharo unobviswa kuti mumwe munhu asunungurwe. Jesu akapa upenyu hwake semunhu asina chivi kuti uve mubhadharo wacho. (Verengai Mateu 20:28.) Jesu paakazvipira kurasikirwa nemukana wekurarama nekusingaperi pasi pano, akativhurira mukana wekuwana zvese zvainge zvaraswa naAdhamu naEvha. Jesu akaratidzawo kuti iye naJehovha vanotida zvakadii. Chidzidzo chino chichatibatsira kuti tikoshese rufu rwaJesu.

1. Tingabatsirwa sei nerufu rwaJesu iye zvino?

Sezvo tiri vatadzi, tinoita zvinhu zvakawanda zvisingafadzi Mwari. Asi kana tichinzwa urombo nezvatinenge takanganisa, tokumbira Jehovha kuti atiregerere muzita raJesu Kristu uye toita zvese zvatinokwanisa kuti tisazvidzokorore, tinogona kuramba tiri shamwari dzaMwari dzepedyo. (1 Johani 2:1) Bhaibheri rinoti: “Kristu akafira zvivi kamwe chete zvikabva zvakwana, iye munhu akarurama achiitira vasina kururama, kuti akutungamirirei kuna Mwari.”—1 Petro 3:18.

2. Mune ramangwana tichabatsirwa sei nerufu rwaJesu?

Jehovha akatuma Jesu kuti ape upenyu hwake husina chivi, “kuti munhu wese anotenda maari arege kuparadzwa asi ave neupenyu husingaperi.” (Johani 3:16) Nekuda kwezvatakaitirwa naJesu, munguva pfupi iri kutevera Jehovha achabvisa zvakaipa zvese zvakakonzerwa nekusateerera kwaAdhamu. Izvi zvinoreva kuti kana tikatenda muchibayiro chaJesu, tichawana mukana wekurarama nekusingaperi pasi pano tichifara!—Isaya 65:21-23.

WEDZERA KUONGORORA

3. Rufu rwaJesu runotisunungura pachivi nerufu

VHIDHIYO: Jesu Akafirei?—Chikamu 1 (2:01)

• Adhamu paasina kuteerera Mwari akarasikirwa nemukana wei?

Verengai VaRoma 5:12, mobva makurukura muchishandisa mubvunzo unotevera:

• Chivi chakaitwa naAdhamu chakakanganisa sei upenyu hwako?

Verengai Johani 3:16, mobva makurukura muchishandisa mubvunzo unotevera:

• Nei Jehovha akatuma Mwanakomana wake panyika?

1. Adhamu akasikwa asina chivi asi kusateerera kwaakazoita kwakaita kuti vanhu vese vave nechivi uye vafe

2. Jesu aivawo munhu asina chivi asi akaramba achiteerera Mwari uye zvaakaita zvakapa vanhu mukana wekurarama nekusingaperi vasina chivi

4. Rufu rwaJesu runogona kubatsira munhu wese

VHIDHIYO: Jesu Akafirei?—Chikamu 2 (2:00)

• Zvingakwanisika sei kuti rufu rwemunhu mumwe chete rubatsire vanhu vese?

Verengai 1 Timoti 2:5, 6, mobva makurukura muchishandisa mubvunzo unotevera:

• Adhamu aiva munhu asina chivi asi zvaakazoita zvakaita kuti vanhu vese vave nechivi uye vafe. Jesu aivawo munhu asina chivi. Jesu akapa sei “rudzikinuro runoenzanirana nevanhu vese”?

5. Rudzikinuro chipo chawakapiwa naJehovha

Kana uri shamwari yaJehovha unoona rudzikinuro sechipo chawakapiwa iwe pachako. Kuti uone mumwe aiona rudzikinuro sechipo chaakapiwa iye pachake, verengai VaGaratiya 2:20, mobva makurukura muchishandisa mubvunzo unotevera:

• Chii chinoratidza kuti muapostora Pauro aiona rudzikinuro sechipo chaakapiwa iye pachake?

Adhamu paakatadza iye nevana vake vakatongerwa rufu. Asi Jehovha akatuma Mwanakomana wake kuzokufira kuti uwane mukana wekurarama upenyu husingaperi.

Paunenge uchiverenga mavhesi anotevera, fungidzira kuti Jehovha ainzwa sei paaiona Mwanakomana wake achitambura. Verengai Johani 19:1-7, 16-18, mobva makurukura muchishandisa mubvunzo unotevera:

• Unonzwa sei nezvawakaitirwa naJehovha naJesu?

PFUPISO

Kufa kwakaita Jesu kwakavhura mukana wekuti vanhu varegererwe zvivi zvavo uye kuti vazorarama vachifara nekusingaperi.

Kudzokorora

• Nei Jesu akafa?

• Upenyu hwaJesu hwaakapa hwakava sei “rudzikinuro runoenzanirana nevanhu vese”?

• Rufu rwaJesu rwungakubatsira sei?

WEDZERA PANE ZVAWADZIDZA

Dzidza kuti sei upenyu hwaJesu hwaakapa huchinzi rudzikinuro.

“Chibayiro chaJesu ‘Chinodzikinura Sei Vazhinji’?” (Nyaya iri paIndaneti)

Verenga unzwe zvatinofanira kuita kuti tiponeswe.

“Jesu Anoponesa Sei?” (Nyaya iri paIndaneti)

Jehovha anoregerera kunyange zvivi zvakakura here?

“Mibvunzo yeBhaibheri Inopindurwa” (Nharireyomurindi, May 1, 2013)

Ona kuti kudzidza nezvechibayiro chaKristu kwakabatsira sei mumwe murume kuti achinje unhu hwake.

“Handichafariri Zvekurwa” (Nyaya iri paIndaneti)