Nzwisiso Panhau
Kuparidzirei Evhangeri?
Kushaikwa kwokuparidzira evhangeri kuvaendi kuchechi kwakadudzwa nezvimwe zviremera sokune chokuita nederero muumutezo hwechechi pakati pamarudzidziso makuru. Kuitira hanya pamusoro peichi chinetso muna 1988 kwakasunda United Church of Christ kugamuchira sechokutanga chamakore mana nhau yo“kuparidzira evhangeri nokukura kwoumutezo.”
St. Petersburg Times inoshuma kuti mamwe masangano makuru muU.S.A., kubatanidza Presbyterian Church neEpiscopal Church, akaita nenzira yakafanana. Zvisinei, kunzverwa kwemisi ichangobva kupfuura iyi kweungano dzinopfuura 200 dzeU.S. dzeUnited Church of Christ kwakazivisa kuti vazhinji vemitezo yadzo ine mamirioni 1,6 vanoratidzira fariro shomanene mukutaura kuvamwe pakumusoro pokutenda kwavo. Mumwe mutezo wakabvunza, kuti: “Neiko tichifanira kutaura kuvamwe kana tiri kuita zvakanaka?” Mumwe akati: “Kana uchirarama mukuwirirana nokutenda kwako, haufaniri kutaura pamusoro pako.”
Bva, mubhuku rake American Mainline Religion, munyori biyake Wade Clark Roof akabvuma kuti “nzira inotaura nayo vanhu pamusoro poupenyu hwavo hworudzidziso nohwomudzimu ine chokuita zvikuru nepukunyuko yokutenda kumene.”
Kana “kuita zvakanaka” uye kuva no“kutenda” kwakakwana kufadza Mwari, neiko muapostora Pauro akanyora, kuti: “Ndine nhamo kana ndisingazivisi mashoko akanaka!”? Iye akatsanangurira vatendi biyake muRoma, kuti: “Kana ukazivisa pachena ‘shoko [iroro] riri mumuromo mako umene,’ kuti Jesu ndiye Ishe, uye ukashandisa kutenda mumwoyo mako kuti Mwari akamumutsa muna vakafa, uchaponeswa. Nokuti nomwoyo munhu anoshandisa kutenda nokuda kwokururama, asi nomuromo munhu anoita ziviso yapachena nokuda kworuponeso.”—1 VaKorinte 9:16; VaRoma 10:9, 10, NW.
Kushandisa Vatano Zvisakafanira
Inopfuura hafu yenhau dzekomiki dzine 1 100 idzo dzakaoneka muzvinyorwa zvakasiana-siana zveJapan, kubatanidza izvo zvavana, zvakaratidzira zviito zvevatano, akadaro Purofesa Mamoru Fukutomi. Iye akatungamirira imwe nzvero muTokyo yaanopfuura magazini 390 nezvimwe zvinyorwa zvakatengwa mumwedzi mumwe.
“Mifananidzo mizhinjisa yechiito chevatano,” anodaro Purofesa Fukutomi, “inotevera muenzaniso wavarume vanomanikidzira vakadzi vasingadi [kupinda muvatano] uye vakadzi pakupedzisira vanobvuma nokushingaira.” Inodokusvika 80 muzana yemifananidzo 6 861 yomumagazini akakurumbira eJapan yakakamuraniswa “yakaratidzira vakadzi vari mumutoo unonyandura vatano,” inoshuma kudaro The Daily Yomiuri. Nepo vazhinjisa vavakadzi vari mumifananidzo vakanga “vakapfeka zvipfeko zvomukati, sutu dzokushambira nadzo kana kuti vari mushutu” uye 40 muzana bedzi yakanga yakapfeka, 75 muzana yavanhurume vomumifananidzo yakanzverwa yakanga yakapfeka.
Kushandiswa kwevatano kusakafanira kwakadaro kuchatapura sei vaduku? Bhuku reBhaibheri raZvirevo rinorondedzera zvakajeka jaya “risina vavariro yakanaka” richikwezverwa kuimba yechifeve. Uye chifeve chacho? “Zvino iye ari panze, zvino iye ari munzvimbo dzavose, uye anorindira ari pedyo nekona riri rose. Uye iye amubata.” (Zvirevo 7:7-13, mashoko omuzasi eReference Bible) Munguva dzazvino uno kunyange peji yakatsikirirwa ‘inomirira kubata’ pwere. Zvisinei, Bhaibheri rinopa zano, kuti: “Mwoyo wako ngaurege kutsaukira kunzira dzake; usafamba-famba mumakwara ake.”—Zvirevo 7:25.
Ndiani Ari muKristu “Ari Nani”?
“Pasinei zvapo nechisarudzo muKristu anoita, kungava kuva murwi kana kuti kuva murambi anotungamirirwa nehana, kwaizova kuva kusina kururama kuti iye ati ane mwero wakakwirira zvikuru wechiKristu nokuda kwake amene kupfuura nokuda kwavamwe, kana kuti kunyange kupanikira, nokuda kwokutsigira chimiro chakasiana nechake amene, kuva kwomumwe muKristu.”
Uku kutaura kwakabudiswa neEvangelical Lutheran Church Council yeGermany muna July 1989. Neiko? Vakuru vakuru vakataura kuti kwakanga kuri kukurira chimiro chakatorwa navamwe vomuchechi chokuti kuramba kwokutungamirirwa nehana “chiratidzo chakananga” zvikuru chokuva muKristu kupfuura zvakaita basa rehondo. Nepo yakabvuma kuti maKristu angagona kubvisa hondo kupfurikidza no“kurega somunhu oga masimba masimba,” Church Council yakataura kuti ikoku kungagonawo kuitwa kupfurikidza nokurwisa masimba masimba esimba rehondo nokuda kwokudzivirira rugare.
Mubhuku rake History of Christianity, Edward Gibbon akanyora kuti maKristu omuzana ramakore rokutanga “akaramba kutora rutivi rupi norupi rwokushingaira mukudzora kwehurumende kana kuti kudzivirirwa nehondo kwoumambo,” uye kuti “kwakanga kusingabviri kuti maKristu, pasina kuramba basa rinoyera zvikuru, aigona kutora basa ravarwi, ravatongi, kana kuti ramachinda.”
Mubvunzo, naizvozvo, hausi wokuti ndiani ari muKristu “ari nani,” asi kana munhu anoronda nzira yakapesana neyechiKristu chapakuvamba achitongova zvamazvirokwazvo muKristu. Pauro akanyora, kuti: “Kunyange zvazvo tichifamba munyama, hatirwi hondo mukuwirirana nezvatiri munyama. Nokuti zvombo zvehondo yedu hazvisi zvenyama.”—2 VaKorinte 10:3, 4, NW.