Isa Mwari Pakutanga Muupenyu Hwenyu Hwemhuri!

BOB NAJEAN—varoorani vasumwa munyaya yapfuura—havana kuwana chatanuro. Panzvimbo pezvo, vakakurukura zvinetso zvavo nomushumiri wechiKristu. Iye akakurumidza kunzwisisa kuti zvitambudzo zvavo zvikurukuru zvakabva mumigariro yavo yekare yakasiana.

Somuenzaniso, sezvo Bob akabva mumhuri yavatengesi navashandi vanogadzira zvinhu ndokuita basa ramaoko iye amene, aida chisvusvuro chakawanda mangwanani ari ose. Jean, uyo akabva mumhuri yavashandi vomuhofisi, aingomupa bedzi kofi netositi. Naizvozvo kwakadaro kuti kupopotedzana pamusoro pechisvusvuro kwakapinda mukuva hondo yachose chose!

Bob naJean vaifanira kuvandudza kurukurirano yavo. Zvisinei, chisakiso chaichoicho chenhamo yavo chakadzika zvikuru. “Munorangarirana here nebetsero ya 1 VaKorinte 13:4?” akabvunza kudaro mushumiri wacho. Rugwaro irworwo rweBhaibheri runorava, kuti: “Rudo runo mwoyo murefu, runo mwoyo munyoro; rudo harune godo; rudo haruna manyawi, haruzvikudzi.” Ndima inotevera inotaura kuti rudo “haruiti zvisingafaniri, haruzvitsvakiri zvarwo; harutsamwi, harune zvishura.” Vose vari vaviri Jean naBob vakanga vachidisa kushandisa aya mashoko kuukama hwavo.

Zvinetso zvaava varoorani zvaida zvikurukuru mushonga womudzimu. Sezvo Bob naJean vaishuva kuchengeta ukama hwakanaka naMwari, kupfuura zvose vaifanira kushandisa nheyo dzeBhaibheri ndokuziva kuti “kana Jehovha asingavaki imba, vavaki vayo vanobata pasina.” (Pisarema 127:1) Pis 127 Ndima 3 kusvikira ku 5 dzine chokuita nokuvaka mhuri. Uye budiriro hurusa mukusimudzira mufarwa womumba inobva mukuisa Mwari pakutanga muupenyu hwemhuri.—VaEfeso 3:14, 15.

Chinobatanidza Kuisa Mwari Pakutanga

Kuisa Mwari pakutanga muupenyu hwenyu hwemhuri kunopfuura zvikuru kutaura kwokuti, “Mhuri inonyengetera pamwe chete inoramba iri pamwe chete.” Mukuwirirana nemagazini inonzi Family Relations, vazhinji vanodavira kuti “rudzidziso runoyamura kushandirana pamwe kwakananga nokwakanaka kwemhuri uye kunowedzera gutsikano youpenyu yemitezo yayo.” Asi kungoshandisa chete rudzidziso hakusi kumwe cheteko nokuisa Mwari pakutanga. Vazhinji vanonamatira nenzira yomuitiro kurudzidziso nemhaka bedzi yetsika, gamuchidzanwa remhuri, kana kuti betsero yenzanga. Mwari ane pesvedzero duku muupenyu hwavo hwezuva nezuva. Zvinokosha zvikuru, harusati ruri rudzidziso rwose rwuri “chimiro chokunamata chakachena nechisina kusvibiswa mumurangariro waMwari wedu.”—Jakobho 1:27, NW.

Kuti tiise Mwari pakutanga muupenyu hwedu hwemhuri, isu navadiwa vedu tinofanira kunamata Jehovha, “Wokumusorosoro kumusoro kwapasi pose,” mukuwirirana nezvinodikanwa zvake. (Pisarema 83:18) Mwanakomana waMwari, Jesu Kristu, akati: “Nguva iri kuuya, uye yatovapo, apo vanamati vechokwadi vachanamata Baba nomudzimu nezvokwadi, nokuti, zvamazvirokwazvo, Baba vanotsvaka vakafanana navakadaro kuvanamata. Mwari Mudzimu, uye avo vanomunamata vanofanira kunamata nomudzimu nezvokwadi.” (Johane 4:23, 24, NW) Kuti tinamate Jehovha Mwari “nomudzimu,” basa redu rinoyera kwaari rinofanira kusundwa nomwoyo wakazadzwa norudo nokutenda. (Marko 12:28-31; VaGaratia 2:16) Kunamata Jehovha ne“zvokwadi” kunoda kuti tirambe nhema dzorudzidziso ndokuwirirana zvizere nokuda kwake sokunoziviswa muBhaibheri. Hatigoni kuisa Jehovha Mwari pakutanga kutoti rudzidziso rwedu ruchiwirirana nemipimo yake.a Ndeipi iri mimwe yaiyoyi? Uye kuishandisa kunogona sei kubetsera mhuri yenyu?

Kuisa Mwari Pakutanga Somurume

Pana 1 VaKorinte 11:3, Bhaibheri rinoti: “Musoro womumwe nomumwe ndiye Kristu; uye musoro womukadzi ndiye murume; uye musoro waKristu ndiye Mwari.” Kana iwe uri murume, une mutoro wakapiwa naMwari wokuva muiti mukuru wezvisarudzo mumhuri mako. Asi ikoku hakusati kuchipa murume upi noupi mvumo yokuva anodzvinyirira kana kuti anoshusha.

Bhaibheri rinokurudzira varume kurangarira mirangariro yavadzimai vavo pakuita zvisarudzo zvinovatapura. (Enzanisa naGenesi 21:9-14.) Zvamazvirokwazvo, Magwaro anokurudzira tose zvedu ku‘ngwarira, kwete fariro yomunhu oga pazvinhu zvedu timene chete, asiwo fariro yomunhu oga paizvo zvavamwe.’ (VaFiripi 2:2-4) Apo pasina nheyo yeBhaibheri inobatanidzwa, murume wechiKristu kazhinji kazhinji achatera kuchido chomudzimai wake. Zvaane fariro yomunhu oga maari, iye achavawo nechokwadi chokuti haasati achinyanyoremerwa nemitoro. Somuenzaniso, iye angamubetsera namabasa omumba, zvikurukuru kana ane basa rokunyika.

Muapostora Pauro akanyora, kuti: “Varume vanofanira kuda vakadzi vavo semiviri yavo. Unoda mukadzi wake, unozvida; nokuti hakuno munhu wakatongovenga nyama yake; asi unoipa zvokudya nokuichengeta, Kristu sezvaanoitira kereke.” (VaEfeso 5:28, 29) Jesu Kristu anobata nemitezo yeungano nomutoo worudo.

Rinokoshawo izano romuapostora Petro, rinoti: “Saizvozvo imi varume, garai na[vadzimai venyu] nokuziva, muchikudza mukadzi muchiti ndiye mudziyo une simba duku kwamuri, zvavari vadyi venhaka dzenyasha dzoupenyu pamwe chete nemi; kuti minyengetero yenyu irege kudziviswa.” (1 Petro 3:7) Hakusati kwakakomba here kuziva kuti kubata mudzimai wako nomutoo usina rudo kunogona kudzivisa minyengetero yomurume? Hungu, murume anofanira kubata nomudzimai wake nomutoo une rudo kana Mwari achizonzwa ndokupindura minyengetero yake.

Kuisa Mwari pakutanga kunotapurawo ukama hwababa navana vake. Iye anofanira kuitira hanya zvikuru garikano yavo yomudzimu. Bva, munzvero huru yeU.S., hafu bedzi yavarume yakataura kuti “kutora rutivi mufundo yoRugwaro kana kuti mapoka ekurukurirano” kwakanga ‘kuchikosha zvikurusa mukukura mumudzimu kwemhuri yavo.’ Vasara vakadudza zvinhu zvakadai so“kutarira kana kuti kuteerera minamato yorudzidziso inotepfenyurwa” kana kuti ‘kurangarira revo youpenyu.’

Zvisinei, Bhaibheri rinoudza madzibaba, kuti: “Musatsamwisa vana venyu, asi pfuurirai kuvarera muchirango nokutungamirira ndangariro kwaJehovha.” (VaEfeso 6:4, NW) Pakati peZvapupu zvaJehovha, madzibaba anokarirwa kutungamirira mukunamata kwemhuri. Kupfurikidza nokuitisa fundo dzeBhaibheri dzemhuri nguva dzose, kupinda misangano yechiKristu, uye kuwirirana nezvimwe zvinodikanwa zvapaMagwaro, varume vakadaro vanoisa Mwari pakutanga muupenyu hwemhuri.

Kuisa Mwari Pakutanga Somudzimai

Kana iwe uri mudzimai, unogona kuisa Mwari pakutanga kupfurikidza nokutsigira murume wako mubasa rake somusoro wemhuri. Bhaibheri rinoti: “Imi vadzimai, ivai pasi pavarume venyu, sezvakwakafanira munaShe.” (VaKorose 3:18, NW) Ikoku kungava kwakaoma chose kana murume asingakurukuri kana kuti asingakendengi pamusoro pokutungamirira mukunamata kwemhuri. Muchinoitika chipi nechipi, kuonesa nguva dzose zvikanganiso zvake kana kuti, zvakatoipa zvikuru, kumuzvidza kwaizowedzera bedzi nhamo yemhuri.

Zvirevo 14:1 inoti: “Mukadzi mumwe nomumwe wakachenjera unovaka imba yake; asi benzi rinoiputsa namaoko aro.” Nzira imwe iyo mukadzi akaroorwa akachenjera zvirokwazvo anogona kuisa nayo Mwari pakutanga ndo‘kuvaka imba yake’ iri kupfurikidza nokuva pasi pomurume wake. (1 VaKorinte 11:3) No‘mutemo womutsa worudo parurimi rwake,’ iye anodzivisa kuva anotsoropodza zvisiri madikanwa murume wake. (Zvirevo 31:26) Iye anoshandawo zvakaoma kuita kuti zvisarudzo zvake zvibudirire.

Imwe nzira yokuti mukadzi akaroorwa aise nayo Mwari pakutanga kuva mudzimai anobishaira. Chokwadika, kana iye achifanira kushanda kunyika, angasava nenguva kana kuti simba zvinodikanwa kuchengeta musha wake sezvaanoshuva. Iye anogona kungovavarira kuva akafanana no“mukadzi unoita zvakanaka” uyo Bhaibheri rinoti nezvake: “Unotarira zvakanaka kufamba kwemhuri yake, asingadyi zvokudya zvousimbe.”—Zvirevo 31:10, 27.

Kupfuura zvose, mudzimai anofanira kuchengeta kunamatwa kwaMwari pakutanga muupenyu hwake. Vazhinji vanoshanyira Horo yoUmambo yeZvapupu zvaJehovha kwenguva yokutanga vanotsinhira pamusoro pechitarisiko chakatsvinda chavana. Basa romudzimai muna ikoku rinokosha. Asi anofanirawo kushanda kuchengeta umudzimu hwake kupfurikidza nomunyengetero, fundo, uye basa kuna Mwari.

Kuisa Mwari Pakutanga Sepwere

Imwe nyaya iri muAdolescent Counselor inoti: “Vana vakakombamira kutanga zvimiro nouzivi izvo zvakavabvumira kudzora vabereki vavo. . . . Zvavakaratidzirwa kuchaunga chinosimbisa uye chinorumbidza kugutswa kwokukurumidza nepfuma yokunyama, vayaruki vanotanga chimiro chokuti ‘Ndinochida zvino.’” Kana iwe uri pwere, ichocho ndicho chimiro chako here?

VaKorose 3:20 inoti: “Vana, teererai vabereki venyu pazvinhu zvose, nokuti ndizvo zvakanaka munaShe.” Munhu muduku anorangarira teerero yakadaro sechinodikanwa choumwari achabatira pamwe navabereki vake. Somuenzaniso, iye haasati achizovazvidza pachivande kupfurikidza nokusonganirana nevekuchikoro biyake avo vavasingatenderi; uyewo haasati achizoedza nenzira yokunyengera kushandisa mubereki upi noupi kuti awane nzira yake amene. (Zvirevo 3:32) Panzvimbo pezvo, munhu muduku upi noupi anoisa Mwari pakutanga muupenyu achazviisa pasi penhungamiro ine rudo yavabereki.

Chengeta Mwari Ari Pakutanga!

Hazvinei hazvo nenzvimbo yatingava nayo muboka remhuri, tinofanira kuisa Mwari pakutanga muupenyu ndokusakurira ukama hwapedyo naye. Ko iwe nemhuri yako muri kuita ikoko here?

Muaya “mazuva okupedzisira,” tose zvedu tinotarisana ne“nguva dzinotambudza.” (2 Timotio 3:1-5, NW) Kunyanguvezvo, kunobvira kubudirira mumudzimu ndokupukunyuka mugumo wetsika ino yezvinhu. (Mateo 24:3-14) Kupfurikidza nokuita mutsinhirano nezivo yakarurama yeBhaibheri, iwe nemhuri yako munogona kuva netariro youpenyu husingagumi muparadhiso yapasi. (Ruka 23:43; Johane 17:3; Zvakazarurwa 21:3, 4) Hungu, ikoko kunogona kuva kwakadaro kana ukaisa Mwari pakutanga muupenyu hwenyu hwemhuri.

[Mashoko Omuzasi]

[Mufananidzo uri papeji 5]

Mudzimai anoita zvakanaka anoongwa zvikuru kwazvo

[Mufananidzo uri papeji 7]

Bhaibheri rinokurudzira varume kutungamirira mukunamata kwemhuri