Kupenya Kwechiedza Munguva Dzavaapostora

“Chiedza chimene chakapenyera akarurama, nokufara kunyange nokuda kwavakarurama mumwoyo.”—PISAREMA 97:11, NW.

 1. Zvapupu zvaJehovha nhasi zvakafanana sei navaKristu vapakuvamba?

ISU, savaKristu vechokwadi, tinonzwisisa sei mashoko ePisarema 97:11! ‘Chiedza chakatipenyera chatipenyerazve.’ Zvirokwazvo, vamwe vedu takaona kuvhenekera kunopenya kwaJehovha kwamakumi amakore. Zvose izvozvi zvinotiyeuchidza Zvirevo 4:18, iyo inorava, kuti: “Gwara ravakarurama rakaita sechiedza chamambakwedza, chinoramba chichiwedzera kubwinya kusvikira pamasikati makuru.” Mukukoshesa kwedu Magwaro panzvimbo pegamuchidzanwa, isu Zvapupu zvaJehovha takafanana navaKristu vapakuvamba. Chimiro chavo chendangariro chinogona kuonwa zvakajeka mumabhuku enhau eMagwaro echiKristu echiGiriki nomutsamba dzawo, dzakanyorwa mukufuridzirwa kwoumwari.

 2. Chii chakanga chiri pakati pokupenya kwokutanga kwechiedza icho vateveri vaJesu vakagamuchira?

² Pakati pokupenya kwokutanga kwechiedza uko vateveri vapakuvamba vaJesu Kristu vakagamuchira kwakanga kuri uko kwaiva nechokuita naMesiya. Andreasi akaudza mukoma wake Simoni Petro, kuti: “Tawana Mesiasi.” (Johane 1:41) Nguva yakati gare gare, Baba vari kudenga vakagonesa muapostora Petro kupupurira murangariro iwoyo apo akati kuna Jesu Kristu: “Ndimi Kristu Mwanakomana waMwari mupenyu.”—Mateo 16:16, 17; Johane 6:68, 69.

Chiedza Pamusoro Pebasa Ravo Rokuparidza

 3, 4. Pashure pokumutswa kwake, ivhenekeroi iyo Jesu akapa vateveri vake pamusoro pomubato wavo womunguva yemberi?

³ Pashure porumuko rwake, Jesu Kristu akajekesa musengwa waiva pavateveri vake vose. Sezvingabvira zvikurusa kwakanga kuri kuvadzidzi 500 vakaungana muGarireya kwaakati: “Endai naizvozvo, mudzidzise marudzi ose, muvabhapatidze muzita raBaba, neroMwanakomana, neroMweya Mutsvene; muvadzidzise kuchengeta zvose zvandakakurayirai imi; tarirai, ndinemi mazuva ose, kusvikira pakuguma kwenyika.” (Mateo 28:19, 20; 1 VaKorinte 15:6) Pashure paikoko, vateveri vose vaKristu vaifanira kuva vaparidzi, uye basa ravo rokuparidza raisafanira kuganhurirwa ku“makwai akarashika eimba yavaIsraeri.” (Mateo 10:6) Uyewo vaisafanira kuita rubhapatidzo rwaJohane muchiratidzo chorupfidzo rwokukanganwirwa zvivi. Panzvimbo pezvo, vaifanira kubhapatidza vanhu “muzita raBaba, neroMwanakomana, neroMweya Mutsvene.”

⁴ Nokukurumidza Jesu asati akwira kudenga, vaapostora vake 11 vakatendeka vakabvunza, kuti: “Ishe, modzosera ushe kuna vaIsraeri nenguva ino here?” Panzvimbo pokupindura mubvunzo iwoyo, Jesu akapa mimwe mirayiridzo pamusoro pebasa ravo rokuparidza, achiti: “Muchapiwa simba, kana Mweya Mutsvene wauya pamusoro penyu; ipapo muchava zvapupu zvangu paJerusarema, napaJudhea rose, napaSamaria, nokusvikira kumugumo wenyika.” Kusvikira panguva iyeyo, vakanga vave vari zvapupu zvaJehovha oga, asi zvino vaizovawo zvapupu zvaKristu.—Mabasa 1:6-8.

 5, 6. Kupenyai uko vadzidzi vaJesu vakagamuchira paPentekosta?

⁵ Mazuva gumi chete gare gare, kupenya kwechiedza kwakajeka zvakadini uko vateveri vaJesu vakagamuchira! Pazuva rePentekosta ra 33 C.E., kwenguva yokutanga, vakanzwisisa revo yaJoere 2:28, 29, inoti: “[Ini Jehovha] ndichadurura Mweya wangu pamusoro penyama yose; vanakomana venyu navanasikana venyu vachaporofita, vatana venyu vacharota hope, namajaya enyu achaona zviratidzo; ndichadururawo Mweya wangu pamusoro pavaranda napamusoro pavashandiri namazuva iwayo.” Vadzidzi vaJesu vakaona mudzimu mutsvene, muchimiro chemarimi akaita seemoto, wakagara pamisoro yavo vose—vanenge varume navakadzi vane 120—vakaungana muJerusarema.—Mabasa 1:12-15; 2:1-4.

⁶ Uyewo pazuva rePentekosta, vadzidzi vakatanga kunzwisisa kuti mashoko ePisarema 16:10 aishanda kuna Jesu Kristu akamutswa. Wezvamapisarema akanga ati: “[Jehovha Mwari] hamungasiyi mweya wangu muSheori; hamungatenderi mutsvene wenyu kuti aone kuora.” Vadzidzi vakaziva kuti mashoko iwayo aisagona kuve akashanda kuna Mambo Dhavhidhi, nokuti guva rake vakanga vanaro kusvikira kuzuva iroro. Hakushamisi kuti vanenge 3 000 vaavo vakanzwa ichi chiedza chitsva chichitsanangurwa vakapwiswa kwazvo zvokuti vakabhapatidzwa zuva iroro rimene!—Mabasa 2:14-41.

 7. Chiedzai chakajeka icho muapostora Petro akagamuchira mukati meshanyo yake kumukuru mukuru weuto reRoma Kornerio?

⁷ Kwamazana amakore akawanda, vaIsraeri vakanzwisisa izvo Mwari akanga ataura pamusoro pavo, kuti: “Ndimi moga vandakaziva pakati pamarudzi ose enyika.” (Amosi 3:2) Naizvozvo zvirokwazvo kwakanga kuri kupenya kwakajeka kwechiedza uko muapostora Petro naavo vakamukumbanira kumba kwemukuru wehondo weRoma Kornerio vakagamuchira apo mudzimu mutsvene kwenguva yokutanga wakaburukira pavadaviri Vamarudzi vasina kudzingiswa. Kunokosha kucherekedza kuti iyi ndiyo yakanga iri nguva bedzi iyo mudzimu mutsvene wakapiwa rubhapatidzo rusati rwaitika. Asi kwaifanira kuva kwakadaro. Nezvisizvo, Petro angadai asina kuziva kuti ava Vamarudzi vasina kudzingiswa vaikwaniriswa nokuda kworubhapatidzo. Achinzwisisa zvizere revo yeichi chiitiko, Petro akabvunza, kuti: “Kune munhu here ungadzivisa mvura, kuti ava [Vamarudzi], vakapiwa Mweya Mutsvene sesu, varege kubhapatidzwa?” Chokwadika, hapana munhu aivapo aigona kuramba zvakarurama, naizvozvo rubhapatidzo rwaava Vamarudzi rwakaitika.—Mabasa 10:44-48; enzanisa naMabasa 8:14-17.

Hapachinazve Kudzingiswa

 8. Neiko vamwe vaKristu vapakuvamba vakakuwana kwakaoma kurega kudzingiswa?

⁸ Kupenyazve kwakajeka kwezvokwadi kwakaoneka maererano nomubvunzo wokudzingiswa. Muitiro wokudzingiswa wakava namavambo awo muna 1919 B.C.E. nesungano yaJehovha naAbrahama. Mwari panguva iyeyo akarayira Abrahama kuti iye navamwe vanhurume vose veimba yake vaifanira kudzingiswa. (Genesi 17:9-14, 23-27) Naizvozvo kudzingiswa kwakava chiratidzo chinozivisa chavazukuru vaAbrahama. Uye vaidada sei nouyu muitiro! Somugumisiro, “usina kudzingiswa” kwakava kutaura kwokuzvidza. (Isaya 52:1; 1 Samueri 17:26, 27) Kuri nyore kuona chikonzero nei vaKristu vechiJudha vapakuvamba vakati vaida kuchengeta ichi chiratidzo. Vamwe vavo vakava nekurukurirano huru nomuapostora Pauro naBharnabhasi pamusoro peiyi nhau. Kuti vaigadzikise, Pauro navamwe vakaenda kuJerusarema kunobvunza mutumbi unodzora wechiKristu.—Mabasa 15:1, 2.

 9. Kupenyai kwechiedza kwakaziviswa kumutumbi unodzora wapakuvamba, sezvakanyorwa muna Mabasa ganhuro 15?

⁹ Panguva ino, vaKristu ivavo vapakuvamba havana kugamuchira chiedza chokuti kudzingiswa kwakanga kuchisiri chinodikanwa nokuda kwavabatiri vaJehovha kupfurikidza nechishamiso chiri pachena. Panzvimbo pezvo, vakagamuchira chiedza chakawedzerwa kupfurikidza nokunzvera Magwaro, vachitsamira pamudzimu mutsvene nokuda kwenhungamiro, uye vachinzwa zviitiko zvaPetro naPauro pamusoro pekutendeutswa kwaVamarudzi vasina kudzingiswa. (Mabasa 15:6-21) Chisarudzo chacho chakapiwa mutsamba iyo yairava murutivi, kuti: “Mweya Mutsvene nesu takati zvakanaka, kuti tirege kukutakudzai mutoro mukuru kune zvinhu izvi zvakafanira, zvinoti: Regai zvakabayirwa zvifananidzo, neropa, nezvakadzipwa, noupombwe.” (Mabasa 15:28, 29) VaKristu vapakuvamba nokudaro vakasunungurwa pamurayiro wokudzingisa uye pazvimwe zvinodikanwa zvoMutemo waMosesi. Nokudaro, Pauro aigona kuudza vaKristu veGaratia, kuti: “Kristu wakatisunungura kuti tive vakasununguka.”—VaGaratia 5:1.

Chiedza Muevhangeri

10. Ndokupi kwaiva kumwe kupenya kwechiedza kwakaziviswa muEvhangeri yaMateo?

¹⁰ Hapana kupokana kuti Evhangeri yaMateo, yakanyorwa munenge muna 41 C.E., ine kupenya kwechiedza kwakawanda nokuda kwokubetserwa kwavaravi vayo. Vashomanene zvikuru vevaKristu vomuzana rokutanga ramakore vakanga vanzwa vamene Jesu achitsanangura dzidziso dzake. Zvikurukuru, Evhangeri yaMateo yakasimbisa kuti musoro wokudzidzisa kwaJesu wakanga uri Umambo. Uye Jesu akanga asimbisa zvakasimba sei ukoshi hwokuva nevavariro yakarurama! Kupenya kukuru kwakadini kwechiedza kwakanga kuri muMharidzo yake yapaGomo, mumifananidzo yake (yakadai seiyo yakanyorwa Mat. muganhuro 13), uye muuporofita hwake hukuru muMat. maganhuro 24 ne 25! Zvose izvozvi zvakaunzwa kungwariro yavaKristu vapakuvamba munhoroondo yeEvhangeri yaMateo yakanyorwa anenge makore masere bedzi pashure pePentekosta ya 33 C.E.

11. Chii chinogona kutaurwa pamusoro pezviri mukati meEvhangeri dzaRuka naMarko?

¹¹ Anenge makore 15 gare gare, Ruka akanyora Evhangeri yake. Nepo yakawanda yayo yakafanana nenhoroondo yaMateo, 59 muzana ndeyokuwedzera. Ruka akanyora zvitanhatu zvezvishamiso zvaJesu zvinowanwa bedzi mubhuku rake uye kakawanda kanopeta kaviri mienzaniso Yake isina kududzwa navamwe vanyori veEvhangeri. Sezviri pachena makore mashomanene chete gare gare, Marko akanyora Evhangeri yake, achiisa simbiso pana Jesu Kristu somunhu wechiito, muiti wezvishamiso. Nepo Marko akarondedzera zvikurukuru zviitiko zvakafukidzwa kare naMateo naRuka, akanyora mufananidzo mumwe uyo ivo vasina. Mumuenzaniso iwoyo, Jesu akafananidza Umambo hwaMwari netsanga inomera, ndokureba, uye inobereka michero zvishoma nezvishoma.a—Marko 4:26-29.

12. Evhangeri yaJohane yakagovera imwezve vhenekero kusvikira kutambanukoi?

¹² Ipapo kwaiva neEvhangeri yaJohane, yakanyorwa anopfuura makore 30 pashure pokunge Marko anyora nhoroondo yake. Johane akajekesa zvakadini ushumiri hwaJesu, zvikurukuru kupfurikidza nenongedzero dzakawanda pakuvapo Kwake asati ava munhu! Johane bedzi ndiye anogovera nhoroondo yorumuko rwaRazaro, uye iye oga ndiye anotipa dzakawanda dzetsinhiro dzakaisvonaka dzaJesu kuvaapostora vake vakatendeka pamwe chete nemunyengetero wake unofadza pausiku hwokutengeswa kwake, sezvakanyorwa muJoh maganhuro 13 kusvika ku 17. Kutaura idi, kunotaurwa kuti 92 muzana yeEvhangeri yaJohane inowanwa mairi bedzi.

Kupenya Kwechiedza Mutsamba dzaPauro

13. Neiko vamwe vakarangarira tsamba yaPauro kuvaRoma sokunge kuti yaiva Evhangeri?

¹³ Muapostora Pauro akashandiswa zvikuru kujekesa zvokwadi kuvaKristu vairarama munguva dzavaapostora. Somuenzaniso, pane tsamba yaPauro kuvaRoma, yakanyorwa munenge muna 56 C.E.—inenge nguva imwe cheteyo iyo Ruka akanyora Evhangeri yake. Mutsamba iyoyi Pauro anosimbisa idi rokuti kururama kunopiwa somugumisiro wemutsa usakafanirwa waMwari uye kupfurikidza nokutenda muna Jesu Kristu. Kusimbisa kwaPauro urwu rutivi rwamashoko akanaka kwakaparira vamwe kurangarira tsamba yake kuvaRoma sokunge kuti yaiva Evhangeri yechishanu.

14-16. (a) Mutsamba yake yokutanga kuvaKristu muKorinte, Pauro akajekesei pamusoro pedikanwo yechinzwano? (b) Chiedzai chimwe pamusoro pomufambiro icho VaKorinte Wokutanga inacho?

¹⁴ Pauro akanyora pamusoro pedzimwe nhau idzo dzainetsa vaKristu vaiva muKorinte. Tsamba yake kuvaKorinte inobatanidza zano rakawanda rakafuridzirwa iro rakabetsera vaKristu kuburukira kuzuva redu. Kutanga, aifanira kuvhenekera vaKorinte pamusoro pechikanganiso chavakanga vari kuita mukuumba masekete akanangidzirwa pavanhu vamwe navamwe vakati. Muapostora akavaruramisa, achivaudza noushingi, kuti: “Zvino ndinokumbira zvikuru kwamuri, hama dzangu, nezita raShe wedu, Jesu Kristu, kuti imi mose mutaure chinhu chimwe, kuti pakati penyu kurege kuva nokupesana; asi kuti musonganiswe zvakanaka pamurangariro mumwe nokufunga kumwe.”—1 VaKorinte 1:10-15.

¹⁵ Unzenza hwakakomba hwakanga huri kuregererwa muungano yechiKristu kuKorinte. Mumwe murume imomo akanga atora mudzimai wababa vake, nokudaro achiita ‘ufeve hwakadaro husina kutowanwa kunyange pakati pamarudzi.’ Nenzira yakajeka, Pauro akanyora, kuti: “Bvisai pakati penyu munhu uyo wakaipa.” (1 VaKorinte 5:1, 11-13) Ichocho chakanga chiri chimwe chinhu chitsva nokuda kweungano yechiKristu—kudzinga. Imwe nhau iyo ungano yeKorinte yaida vhenekero pairi yaiva nechokuita neidi rokuti vamwe vemitezo yayo vakanga vachiendesa hama dzavo dzomudzimu kumatare okunyika kuti vagadzikise nyunyuto. Pauro akavatsiura zvakasimba nokuda kwokuita ikoku.—1 VaKorinte 6:5-8.

¹⁶ Imwezve nhau iyo yakatambudza ungano muKorinte yaiva nechokuita nokuvatana. Muna 1 VaKorinte ganhuro 7, Pauro akaratidza kuti nemhaka yokupararira kwounzenza hwevatano, kwaizova kwakanaka kuti murume mumwe nomumwe ave nemudzimai wake amene uye mudzimai mumwe nomumwe murume wake amene. Pauro akaratidzawo kuti nepo vanhu vasina kuroora vachikwanisa kubatira Jehovha nokutsauswa kushomanene, havasi vose vaiva nechipo chokusaroora. Uye kana murume womukadzi akafa, aizosununguka kuroorwa zvakare “asi ngazviitwe munaShe.”—1 VaKorinte 7:39.

17. Pauro akajekesei pamusoro pedzidziso yorumuko?

¹⁷ Kupenya kwechiedza kwakadini uko Ishe akashandisa Pauro kujekesa pamusoro porumuko! VaKristu vakazodzwa vachamutswa nomuviri worudzii? “Unodzvarwa uri muviri wokuberekwa, unomutswa uri muviri womweya,” akanyora kudaro Pauro. Hakuna muviri wenyama uchaendeswa kudenga, nokuti “nyama neropa hazvingagari nhaka youshe hwaMwari.” Pauro akawedzera kuti havasi vose vakazodzwa vacharara murufu asi kuti mukati mokuvapo kwaJesu vamwe vachamutsirwa kuupenyu husingafi pakare pakarepo parufu.—1 VaKorinte 15:43-53.

18. Tsamba yaPauro yokutanga kuvaTesaronika yaiva nechiedzai pamusoro penguva yemberi?

¹⁸ Mutsamba yake kuvaKristu vaiva muTesaronika, Pauro akashandiswa kujekesa nguva yemberi. Zuva raJehovha raizouya sembavha usiku. Pauro akatsanangurawo, kuti: “Kana vachiti, Rugare nokugarika—ipapo kuparadzwa kuchakurumidza kuvawira, sokurwadzwa kwomukadzi une mimba; havangatongopukunyuki.”—1 VaTesaronika 5:2, 3.

19, 20. VaKristu vaiva muJerusarema neJudhea vakagamuchira kupenyai kwechiedza mutsamba yaPauro kuvaHebheru?

¹⁹ Kupfurikidza nokunyora tsamba yake kuvaHebheru, Pauro akajekesera vaKristu vapakuvamba vaiva muJerusarema neJudhea. Akaratidza ukuru hwetsika yechiKristu yokunamata nenzira ine simba sei pamusoro petsika yaMosesi yokunamata! Panzvimbo pokutevera Mutemo wakapiwa kupfurikidza nengirozi, vaKristu vane kutenda muruponeso rwakatanga kutaurwa neMwanakomana waMwari, uyo ari mukuru zvikuru kunhume dzengirozi dzakadaro. (VaHebheru 2:2-4) Mosesi akanga achingovawo zvake murindiri muimba yaMwari. Zvisinei, Jesu Kristu anotungamirira imba yose. Kristu ndiye muprista mukuru nomutoo waMerekizedheki, zvaane nzvimbo yakakwirira kupfuura youprista hwaAroni. Pauro akaonesawo kuti vaIsraeri vaisakwanisa kupinda muzuva raMwari rokuzorora nemhaka yokushayiwa kutenda nokuteerera, asi vaKristu vanopinda mariri nemhaka yokutendeka kwavo nokuteerera.—VaHebheru 3:1–4:11.

²⁰ Ipapowo, sungano itsva ihuru zvikuru kusungano yomutemo. Sezvakaporofitwa kuchine makore 600 mberi pana Jeremia 31:31-34, avo vari musungano itsva vane mutemo waMwari wakanyorwa mumwoyo yavo uye vanofarikanya kukanganwirwa kwechokwadi kwezvivi. Panzvimbo pokuva nomuprista mukuru aifanira kupa zvibayiro gore negore nokuda kwezvivi zvake amene uye izvo zvavanhu, vaKristu vane soMuprista wavo Mukuru Jesu Kristu, uyo asina chivi uye akapa kamwe nokusingaperi chibayiro chezvivi. Panzvimbo pokupinda nzvimbo tsvene yakaitwa namaoko kuti ape chibayiro chake, akapinda mudenga rimene, ikoko kuti aoneke pamberi paJehovha amene. Uyezve, zvibayiro zvemhuka muMutemo wesungano waMosesi zvaisagona kubvisa zvivi chose chose, kana kuti zvaisazopiwa gore negore. Asi chibayiro chaKristu, chakapiwa kwenguva yose, chinobvisa zvivi. Zvose izvozvi zvinojekesa tembere huru yomudzimu, muvazhe madziri vakasarira vakazodzwa ne“mamwe makwai” vanobatira nhasi.—Johane 10:16; VaHebheru 9:24-28.

21. Iyi kurukurirano yaratidzei pamusoro pokuzadzikwa kwaPisarema 97:11 naZvirevo 4:18 munguva dzavaapostora?

²¹ Nzvimbo haibvumiri kupa mimwe mienzaniso, yakadai sokupenya kwechiedza kunowanika mutsamba dzomuapostora Petro neidzo dzavadzidzi Jakobho naJudha. Asi zvichangobva kududzwa zvinofanira kuringana kuratidza kuti Pisarema 97:11 naZvirevo 4:18 akava nokuzadzikwa kunoshamisa munguva dzavaapostora. Zvokwadi yakavamba kufambira mberi kubva pamifananidzo nemimvuri kuenda kukuzadzikwa nezvokwadi.—VaGaratia 3:23-25; 4:21-26.

22. Chii chakaitika pashure porufu rwavaapostora, uye nyaya inotevera icharatidzei?

²² Pashure perufu rwavaapostora vaJesu uye kutanga kwokuramba kutenda kwakafanotaurwa, chiedza chezvokwadi chakapfuta zvishomanene zvikuru. (2 VaTesaronika 2:1-11) Maererano nekupikira kwaJesu, zvisinei, pashure pamazana amakore akawanda Tenzi akadzoka ndokuwana “muranda wakatendeka, wakangwara” achipa ve“imba” zvokudya zvavo panguva yakafanira. Somugumisiro, Jesu Kristu akagadza muranda iyeyo kuva “mutarisiri wezvose zvaanazvo.” (Mateo 24:45-47) Kupenya kwakadini kwechiedza kwakatevera? Ikoku kuchakurukurwa munyaya inotevera.

[Mashoko Omuzasi]

Kupenya Kwechiedza—Chikuru Nechiduku Rutivi Rwokutanga

“Gwara ravakarurama rakaita sechiedza chamambakwedza, chinoramba chichiwedzera kubwinya kusvikira pamasikati makuru.”—ZVIREVO 4:18.

 1. Neiko zvokwadi yakaziviswa zvishoma nezvishoma?

CHIBVUMIKISO chouchenjeri hwoumwari kuti maererano naZvirevo 4:18, kuziviswa kwezvokwadi dzomudzimu kwakaitika zvishoma nezvishoma kupfurikidza nokupenya kwechiedza. Munyaya inotangireyi, takaona kuti urwu rugwaro rwakazadzikwa sei munguva dzavaapostora. Kudai zvokwadi yose yaMagwaro yakanga yaziviswa yose panguva imwe chete, ingadai yakava zvose zviri zviviri inopofumadza neinovhiringidza—zvikuru sokutapura kwokubuda mubako rine rima ndokupinda muchiedza chezuva chakajeka. Uyezve, zvokwadi inoziviswa zvishoma nezvishoma inosimbisa kutenda kwavaKristu nenzira inopfuurira. Inojekesa zvikuru nguva dzose tariro yavo ndokujekesa nguva dzose gwara ravanofanira kufamba naro.

“Muranda Wakatendeka, Wakangwara”

 2. Jesu akaratidzira kuti aizoshandisa ani kuunza chiedza chomudzimu kuvateveri vake, uye chishandiso ichocho chinoumbwa navanaani?

² Munguva dzavaapostora Jesu Kristu akaona kwakakodzera kushandisa mitoo inopfuura yomuzvarirwo kupa vateveri vake kupenya kwechiedza kwapakuvamba zvikurusa. Tine mienzaniso miviri yaikoku: Pentekosta ya 33 C.E. uye kutendeutswa kwaKornerio muna 36 C.E. Pakugumisira, Kristu akaona kwakakodzera kushandisa chishandiso chounhu, kunyange sezvo akafanotaura, kuti: “Ndianiko muranda wakatendeka, wakangwara, wakagadzwa nashe wake ave mutariri weimba yake, kuti avape zvokudya nenguva yakafanira? Wakaropafadzwa muranda uyo, unoti kana ishe wake achisvika, akamuwana achiita saizvozvo. Zvirokwazvo ndinoti kwamuri, uchamugadza ave mutariri wezvose zvaanazvo.” (Mateo 24:45-47) Uyu muranda aisagona kuve munhu mumwe chete nemhaka yokuti aifanira kugovera zvokudya zvomudzimu kuvambira apo ungano yechiKristu yakavamba paPentekosta kusvikira Tenzi, Jesu Kristu, auya kuzoita kuti vazvidavirire. Maidi anoratidzira kuti iri boka remuranda akatendeka neakachenjera rinobatanidza vaKristu vose vakazodzwa seboka vari pasi pano panguva ipi neipi.

 3. Ndivanaani vakabatanidzwa pakati pemitezo yokutanga yeboka remuranda?

³ Ndivanaani vaibatanidzwa pakati pemitezo yapakutanga yemuranda akatendeka neakachenjera? Mumwe akanga ari muapostora Petro, uyo akateerera murayiro waJesu, wokuti: “Fudza makwai angu.” (Johane 21:17) Mimwe mitezo yapakuvamba yeboka remuranda yaibatanidza Mateo, uyo akanyora Evhangeri ine zita rake, uye Pauro, Jakobho, uye Judha, avo vakanyora tsamba dzakafuridzirwa. Muapostora Johane, uyo akanyora bhuku raZvakazarurwa, Evhangeri yake, uye tsamba dzake, aivawo mutezo weboka remuranda akatendeka neakachenjera. Ava varume vakanyora maererano nebasa raJesu.

 4. Ndivanaani vari ve“imba”?

⁴ Kana vakazodzwa vose seboka, pasinei zvapo nekwavanogara pasi pano, vari mitezo yeboka remuranda, ndivanaani vari ve“imba”? Vamwe chetevo vakazodzwa asi vachirangarirwa mumurangariro wakasiyana—savanhu vamwe navamwe. Hungu, savanhu vamwe navamwe vaizova ve“muranda” kana kuti vaizova ve“imba,” zvichitsamira pakuti vaiparadzira zvokudya zvomudzimu here kana kuti kuzvidya. Kuenzanisira: Sezvakanyorwa pana 2 Petro 3:15, 16, muapostora Petro anoita nongedzero kutsamba dzaPauro. Pakudzirava, Petro aizova somumwe weveimba ari kudya zvokudya zvomudzimu zvakagoverwa naPauro somumiriri weboka remuranda.

 5. (a) Chii chakaitika kumuranda mukati memazana amakore pashure pavaapostora? (b) Ndizvinoitikai zvakaitika muhafu yokupedzisira yezana ramakore rechi 19?

⁵ Muna ikoku, bhuku rinonzi God’s Kingdom of a Thousand Years Has Approached rakati: “Kuti boka re‘muranda akatendeka neakachenjera’ raivapo sei ndokubatira kuburukira nomumazana ose amakore pashure pokufa kwavaapostora vaTenzi Jesu Kristu, hatina chinyorwa chenhau chakajeka. Sezviri pachena chizvarwa chimwe cheboka re‘muranda’ chakadyisa chizvarwa chinotsiva chinotevera charo. (2 Timotio 2:2) Asi muhafu yokupedzisira yezana ramakore rechigumi nemapfumbamwe pakanga pane vanhu vaitya Mwari vaida zvokudya zvomudzimu zveBhaibheri Dzvene uye vaishuva kuzvidya . . . Makirasi efundo yeBhaibheri . . . akaumbwa uye akafambira mberi mukunzwisiswa kwezvokwadi dzehwaro dzaMagwaro Anoyera. Vanhu vapachokwadi vasina udyire vaiva pakati paava vadzidzi veBhaibheri vaidisa kugoverana izvi zvikamu zvinokosha zvezvokudya zvomudzimu navamwe. Vaiva nomudzimu wokutendeka we‘muranda’ akagadzwa kuti ape ‘veimba’ ‘zvokudya’ zvomudzimu zvaidikanwa ‘panguva yakafanira.’ Vaiva vaka‘chenjera’ mukunzwisisa kuti panguva iyeyo yakanga iri nguva yakarurama neyakakodzera uye kuti ndeipi yaiva mitoo yakanakisisa yokugovera zvokudya. Vakavavarira kuzvigovera.”—Mapeji 344-5.a

Kupenya Kwechiedza Kwapakuvamba Munguva Dzazvino Uno

 6. Iidii rakatanhamara zvikuru pamusoro pokuziviswa kwapashoma napashoma kwezvokwadi?

⁶ Idi rimwe rakatanhamara zvikuru pamusoro peavo Jehovha akashandisa kuunza iyi wedzero yapashoma napashoma yechiedza chomudzimu nderokuti havana kuzviwanira vamene mbiri. Chimiro chendangariro chaC. T. Russell, purezidhendi wokutanga weWatch Tower Society, chakanga chiri chokuti Ishe akafara kushandisa manowo zvawo avo. Pamusoro pemazita ayo vavengi vavo vaiwanzoshandisa, Hama Russell vakakuzivisa zvakasimba kuti vakanga vasina kumbosangana nomu“Russell” uye kuti kwakanga kusina chinhu chakadai se“chiRussell.” Mbiri yose yakaenda kuna Mwari.

 7. Hama Russell navashandi biyavo vakapa ufakazii hwokuti zvirokwazvo vakanga vachisonganira nemuranda akatendeka neakachenjera?

⁷ Tichirangarira migumisiro, hapagoni kuva nokupokana kuti mudzimu mutsvene waJehovha wakanga uchitungamirira kuedza kwaHama Russell naavo vakabatanidzwa navo. Vakapa ufakazi hwokuzivikanwa nemuranda akatendeka neakachenjera. Kunyange zvazvo vafundisi vakawanda venguva yacho vaitaura kuti vanodavira kuti Bhaibheri rakanga riri Shoko raMwari rakafuridzirwa uye kuti Jesu akanga ari Mwanakomana waMwari, vakatsigira dzidziso dzenhema, dzechiBhabhironi, dzakadai soUtatu, kusafa kwomweya womunhu, uye kutambudzwa kusingagumi. Maererano nechipikirwa chaJesu, zvirokwazvo yakanga iri nemhaka yomudzimu mutsvene kuti nhamburiko dzokuzvininipisa dzaHama Russell navasonganiri vake dzakaparira zvokwadi kupenya kupfuura nakare kose. (Johane 16:13) Vadzidzi veBhaibheri ivavo vakazodzwa vakapa chibvumikiso chokuti vaiva zvirokwazvo rutivi rweboka remuranda akatendeka neakachenjera, ane basa rokugovera zvokudya zvomudzimu nokuda kweveimba yaTenzi. Nhamburiko dzavo dzaiva yamuro huru mukuunganidzwa kwevakazodzwa.

 8. Maidii ehwaro pamusoro paJehovha, Bhaibheri, Jesu Kristu, uye mudzimu mutsvene ayo Vadzidzi veBhaibheri vakanzwisisa zvakajeka?

⁸ Kunoshamisa kuona kuti Jehovha kupfurikidza nomudzimu mutsvene, akayamura zvikuru sei ava Vadzidzi veBhaibheri vapakuvamba nokupenya kwechiedza. Kutanga, vakabvumikisa zvakasimba kuti Musiki aripo uye kuti ane zita rechienzi rokuti Jehovha. (Pisarema 83:18; VaRoma 1:20) Vakaona kuti Jehovha ane mavara makuru mana—simba, ruramisiro, uchenjeri, uye rudo. (Genesi 17:1; Dheuteronomio 32:4; VaRoma 11:33; 1 Johane 4:8) Ava vaKristu vakazodzwa vakasimbisa zvakajeka kuti Bhaibheri iShoko raMwari rakafuridzirwa uye izvokwadi. (Johane 17:17; 2 Timotio 3:16, 17) Uyezve, vaidavira kuti Mwanakomana waMwari, Jesu Kristu, akasikwa uye kuti akapa upenyu hwake sorudzikinuro nokuda kworudzi rwose rwomunhu. (Mateo 20:28; VaKorose 1:15) Mudzimu mutsvene, usitongori munhu wechitatu woUtatu, wakaonekwa kuva simba raMwari rinobata basa.—Mabasa 2:17.

 9. (a) Vadzidzi veBhaibheri vakajekerwa nezvokwadii pamusoro pechimiro chomunhu uye migumo inooneswa muBhaibheri? (b) Vabatiri vaJehovha vakaona zvakajeka dzimwe zvokwadii?

⁹ Vadzidzi veBhaibheri vakaona zvakajeka kuti munhu haana mweya usingafi asi iye mweya unofa. Vakaziva kuti “mubayiro wezvivi ndirwo rufu,” kwete kutambudzwa kusingagumi, zvakusina nzvimbo yakadai sehero inobvira. (VaRoma 5:12; 6:23; Genesi 2:7; Ezekieri 18:4) Uyezve, vakaona zvakajeka kuti rondedzero yemhindumupindu haisati ichingova bedzi isiri yapamagwaro asi haina hwaro hune maidi chose chose. (Genesi, maganhuro 1 ne 2) Vakanzwisisawo kuti Bhaibheri rinopa nguva dzemberi mbiri—yokudenga nokuda kwavateveri vetsoka dzaKristu vakazodzwa vane 144 000 uye paradhiso yapasi nokuda kwe“vazhinji-zhinji” vasingaverengeki ve“mamwe makwai.” (Zvakazarurwa 7:9; 14:1; Johane 10:16) Vadzidzi veBhaibheri ivavo vapakuvamba vakaziva kuti pasi rinogara nokusingaperi uye harisati richizopiswa, sezvinodzidziswa namarudzidziso akawanda. (Muparidzi 1:4; Ruka 23:43) Vakadzidzawo kuti kudzoka kwaKristu kwaizova kusingaoneki uye kuti panguva iyeyo aizoita rutongeso pamarudzi ndokupinza paradhiso yapasi.—Mabasa 10:42; VaRoma 8:19-21; 1 Petro 3:18.

10. Vadzidzi veBhaibheri vakadzidza zvokwadii pamusoro porubhapatidzo, mutsaukano wavafundisi nevanhuwo zvavo, uye Chirangaridzo chorufu rwaKristu?

¹⁰ Vadzidzi veBhaibheri vakadzidza kuti rubhapatidzo rwapaMagwaro harusati rwuri nhau yokusasa vacheche asi kuti maererano nomurayiro waJesu uri pana Mateo 28:19, 20, ndiko kunyudzwa kwavadaviri vakadzidziswa. Ivo vakasvika pakuona kuti hapana hwaro hwapaMagwaro hwomutsaukano pakati pavafundisi nevanhuwo zvavo. (Mateo 23:8-10) Mukupesana, vaKristu vose vanofanira kuva vaparidzi vamashoko akanaka. (Mabasa 1:8) Vadzidzi veBhaibheri vakanzwisisa kuti Chirangaridzo chorufu rwaKristu chinofanira kuchengetwa kamwe chete gore rimwe nerimwe, pana Nisani 14. Uyezve, vakaona kuti Isita izororo rechihedheni. Mukuwedzera, vakazodzwa ivavo vakanga vane chivimbo kwazvo kuti Mwari akanga achitsigira basa ravo zvokuti havana kutongounganidza mipiro. (Mateo 10:8) Kubva panguva dzapakuvamba zvikurusa, vakanzwisisa kuti vaKristu vanofanira kurarama maererano nenheyo dzeBhaibheri, uko kwakabatanidza kusakurira zvibereko zvomudzimu mutsvene waMwari.—VaGaratia 5:22, 23.

Kupenya Kwechiedza Kunowedzera

11. Chiedzai chakapenya pamusoro pebasa romuKristu uye pamusoro pemufananidzo waJesu wemakwai nembudzi?

¹¹ Vabatiri vaJehovha vakakomborerwa nokupenya kwechiedza kunowedzera zvikurukuru kuvambira muna 1919. Kupenya kwechiedza kwakajeka zvakadini kwakapenya pakokorodzano yomuna 1922 paCedar Point sezvo J. F. Rutherford, purezidhendi wechipiri weWatch Tower Society, akasimbisa kuti musengwa mukuru wavabatiri vaJehovha ndewoku“zivisa, zivisa, zivisa, Mambo noumambo hwake”! Gore rakatevera rimene, chiedza chakajeka chakapenya pamufananidzo wamakwai nembudzi. Kwakaonekwa kuti uhwu uporofita hwaifanira kuzadzikwa muzuva raShe razvino uno, kwete munguva yemberi mukati meMireniyumu sezvaifungwa kare. Mukati meMireniyumu, hama dzaKristu dzaisazorwara, uyewo dzaisazoiswa mutorongo. Kunze kwezvo, pamugumo weMireniyumu, Jehovha Mwari, kwete Jesu Kristu, achatonga.—Mateo 25:31-46.

12. Kupenyai kwechiedza kwakavapo pamusoro peArmagedhoni?

¹² Muna 1926 kumwe kupenya kwechiedza kwakajeka kwakazivisa kuti hondo yeArmagedhoni yakanga isingazovi kumukira kwenzanga, seizvo Vadzidzi veBhaibheri vakambofunga. Panzvimbo pezvo, yaizova hondo mairi Jehovha acharatidzira simba rake zvakajeka kwazvo zvokuti vanhu vose vachapwiswa kuti iye ndiye Mwari.—Zvakazarurwa 16:14-16; 19:17-21.

Kirisimasi—Zororo Rerudzidziso

13. (a) Kujekeswai kwakaitwa pamusoro pokuchengeta Kirisimasi? (b) Neiko mazuva okuberekwa akanga asingachachengetwi? (Batanidza mashoko omuzasi.)

¹³ Nokukurumidza pashure paikoko, kupenya kwechiedza kwakaparira Vadzidzi veBhaibheri kurega kuchengeta Kirisimasi. Nguva iyoyo isati yasvika Kirisimasi yakange yave ichichengetwa nguva dzose naVadzidzi veBhaibheri munyika yose, uye kuchengetwa kwayo padzimbahwe reBrooklyn kwakanga kuri nhambo inofadza zvikuru. Asi ipapo kwakanzwisiswa kuti kuchengetwa kwaDecember 25 kwakanga kuri chaizvoizvo kwechihedheni uye kwakasarudzwa nechiKristudhomu chakaramba kutenda kukuita kuve nyore zvikuru kutendeutsa vahedheni. Uyezve, kwakawanwa kuti Jesu aisagona kuve akaberekwa muchando, sezvo panguva yokuberekwa kwake, vafudzi vaifurisa mapoka avo muminda—chimwe chinhu chavaisazodai vakanga vachiita muna December. (Ruka 2:8) Panzvimbo pezvo, Magwaro anoratidzira kuti Jesu akaberekwa panenge pana October 1. Vadzidzi veBhaibheri vakazivawo kuti vanonzi varume vakachenjera vakashanyira Jesu anenge makore maviri pashure pokuberekwa kwake vakanga vari vamagi vechihedheni.b

Zita Idzva

14. Neiko zita rokuti Vadzidzi veBhaibheri risina kunakira vanhu vaJehovha?

¹⁴ Muna 1931 kupenya kwakajeka kwezvokwadi kwakazivisa kuVadzidzi ivavo veBhaibheri zita rakakodzera rapaMagwaro. Vanhu vaJehovha vakanga vanzwisisa kuti vaisagona kugamuchira mazita amadunhurirwa api naapi ayo vamwe vakanga vavapa, akadai savaRussell, vaMillennial Dawn, uye “vanoti hakuna hero.”c Asi vakavambawo kunzwisisa kuti zita iro ivo vamene vakanga vatora—International Bible Students—harina kuvanakira. Vakanga vari zvinopfuura zvikuru kungova vadzidzi veBhaibheri. Kunze kwezvo, nguva dzose kwakanga kune vamwe vakawanda kwazvo vakanga vari vadzidzi veBhaibheri asi vakanga vasina kufanana naVadzidzi veBhaibheri.

15. Vadzidzi veBhaibheri vakagamuchira zita rokutii muna 1931, uye nei rakakodzera?

¹⁵ Vadzidzi veBhaibheri vakasvika sei pakuva nezita idzva? Kwamakore akati Nharireyomurindi yakanga yave ichitanhamarisa zita raJehovha. Naizvozvo, kwakanga kwakakodzera zvikurusa kuti Vadzidzi veBhaibheri vanofanira kugamuchira zita rinowanwa pana Isaya 43:10: “Zvanzi naJehovha: Ndimi zvapupu zvangu, nomuranda wangu, wandakasanangura; kuti muzive, mugonditenda, munzwisise kuti ndini iye; hakuno mumwe mwari wakanditangira pakuumbwa, shure kwangu hakungazovipo nomumwe.”

Revererwo uye “Vazhinji-zhinji”

16. Neiko uporofita hwedzorerwo hwaisagona kushanda kukudzokera kuParestina kwavaJudha vokunyama, asi hunoshanda kuna vanaani?

¹⁶ Muvhoriyamu yechipiri yeVindication, rakabudiswa neWatch Tower Society muna 1932, kupenya kwechiedza kwakazivisa kuti uporofita hwedzorerwo hwakanyorwa naIsaya, Jeremia, Ezekieri, uye navamwe vaporofita hahuna kushanda (sezvaimbofungwa) kuvaJudha vokunyama, avo vakanga vachidzokera kuParestina mukusadavira uye vane sundo dzezvamatongerwo enyika. Panzvimbo pezvo, uhwu uporofita hwedzorerwo, uhwo hwakava nezadziko duku apo vaJudha vakadzoka kubva muutapwa hweBhabhironi muna 537 B.C.E., hwakava nezadziko yahwo huru mukununurwa kwaIsraeri womudzimu nedzorerwo ichivamba muna 1919 uye mubudiriro yakavapo somugumisiro muparadhiso yomudzimu inofarikanywa navabatiri vechokwadi vaJehovha nhasi.

17, 18. (a) Pashure penguva yakati, kupfurikidza nokupenya kwechiedza, chii chakaratidzwa kuva chinangwa chikuru chaJehovha? (b) Kupenyai kwechiedza pamusoro paZvakazarurwa 7:9-17 kwakaitika muna 1935?

¹⁷ Pashure penguva yakati, kupenya kwechiedza kwakazivisa kuti chinangwa chikuru chaJehovha chakanga chiri, kwete kuponeswa kwezvisikwa, asi kurevererwa kwouchangamire hwake. Musoro unokosha zvikurusa weBhaibheri wakaonekwa kuva, kwete rudzikinuro, asi Umambo, nokuti huchareverera uchangamire hwaJehovha. Ikoko kwakanga kuri kupenya kwechiedza kwakadini! VaKristu vakazvitsaurira vakanga vasingachaitiri hanya zvikuru kuenda kwavo kudenga.

¹⁸ Muna 1935 kupenya kwakajeka kwechiedza kwakazivisa kuti boka guru rinodudzwa pana Zvakazarurwa 7:9-17 rakanga risiri boka rechipiri rokudenga. Kwakanga kuchifungwa kuti avo vanodudzwa mundima idzodzo vakanga vari vamwe vevakazodzwa vakanga vasina kuva vakatendeka zvizere uye naizvozvo vakanga vamire pamberi pechigaro choumambo panzvimbo pokugara pazvigaro zvoumambo vachitonga samadzimambo navaprista naJesu Kristu. Asi hapatongorina chinhu chakadai sokuva akatendeka zvishoma. Munhu akatendeka kana kuti zvimwe haana kutendeka. Naizvozvo kwakaonekwa kuti uhwu uporofita hwakanongedzera kuboka guru risingaverengeki rinobva mumarudzi ose avo zvino vari kuunganidzwa uye vane tariro yapasi. Ivo ndivo “makwai” aMateo 25:31-46 uye “mamwe makwai” aJohane 10:16.

Muchinjikwa—Hachisi Chiratidzo chechiKristu

19, 20. Neiko muchinjikwa usingagoni kuva chiratidzo chechiKristu chechokwadi?

¹⁹ Kwamakore akawanda Vadzidzi veBhaibheri vakatanhamarisa muchinjikwa sechiratidzo chechiKristu. Vaitova nepini ye“chipiyaniso nekorona.” Maererano neKing James Version, Jesu akakumbira vateveri vake kusimudza “muchinjikwa” wavo, uye vakawanda vakasvika pakudavira kuti akaurayirwa pamuchinjikwa. (Mateo 16:24; 27:32) Kwamakumi amakore ichi chiratidzo chakaonekwawo pabutiro remagazini yeWatch Tower.

²⁰ Bhuku rinonzi Riches, rakabudiswa neSosaiti muna 1936, rakajekesa kuti Jesu Kristu akaurayirwa, kwete pamuchinjikwa, asi padanda rakatwasuka, kana kuti muti. Maererano nechimwe chiremera, shoko rechiGiriki (stau·rosʹ) rinoshandurwa kuti “muchinjikwa” muKing James Version “rinoreva, zvikurukuru, danda rakatwasuka kana kuti muti. [Iro] rinofanira kutsaurwa nechimiro chorudzidziso chemuchinjikwa une matanda maviri maviri. . . . Chapashure chakava namavambo acho muKardhea yakare, uye chakashandiswa sechiratidzo chamwari Tammuz.” Chisingambonamatwi sechidhori, chinhu icho Jesu akaroverwa pachiri chinofanira kurangarirwa nokunyangadza.

21. Chii chicharangarirwa munyaya inotevera?

²¹ Pane mimwe mienzaniso yekwose kuri kuviri kupenya kwechiedza kukuru nouko kungarangarirwa sokuduku. Nokuda kwekurukurirano yaiyoyi, tapota ona nyaya inotevera.

[Mashoko Omuzasi]