Bhaibheri

Zvikonzero zvokuongorora Bhaibheri

Bhaibheri pacharo rinoti rinobva kuna Mwari, Musiki wevanhu

2 Tim. 3:16, 17: “Rugwaro rwose rwakafuridzirwa naMwari uye runobatsira pakudzidzisa, pakutsiura, pakururamisa zvinhu, pakuranga nokururama, kuti munhu waMwari akwanise zvizere, akashongedzerwa zvakakwana kuita mabasa ose akanaka.”

Zvak. 1:1: “Zvakazarurwa naJesu Kristu, zvaakapiwa naMwari, kuti aratidze varanda vake zvinhu zvinofanira kukurumidza kuitika.”

2 Sam. 23:1, 2: “Zvakataurwa naDhavhidhi mwanakomana waJese . . . Mudzimu waJehovha ndiwo wakataura uchindishandisa, Shoko rake raiva parurimi rwangu.”

Isa. 22:15: “Zvanzi naChangamire Ishe, Jehovha wemauto.”

Taizotarisira kuti mashoko aMwari kuvanhu vose awanike munyika yose. Bhaibheri, rose zvaro kana kuti chikamu charo, rakashandurwa mumitauro inenge 2 400. Mabhiriyoni aro akaparadzirwa. The World Book Encyclopedia inoti: “Bhaibheri ndiro bhuku rave richiverengwa zvikuru kubva kare. Pamwe ndirowo rine simba zvikuru. Bhaibheri rakaparadzirwa kupfuura bhuku chero ripi zvaro. Rakashandurwawo kakawanda mumitauro yakawanda kupfuura bhuku chero ripi zvaro.”—(1984), Vol. 2, peji 219.

Uprofita hweBhaibheri hunotsanangura kuti zviri kuitika munyika zvinorevei

Vatungamiriri vakawanda venyika vanobvuma kuti vanhu vatarisana nengozi. Bhaibheri rakafanotaura nezvazvo kare kare; rinotsanangura zvazvinoreva uye kuti zvichaguma nei. (2 Tim. 3:1-5; Ruka 21:10, 11, 31) Rinotaura zvatinofanira kuita kuti tipone pakuparadzwa kwenyika kuri kuuya, tova nomukana wokuwana upenyu husingaperi mumamiriro ezvinhu akarurama pasi pano.—Zef. 2:3; Joh. 17:3; Pis. 37:10, 11, 29.

Bhaibheri rinoita kuti tinzwisise chinangwa choupenyu

Rinopindura mibvunzo yakadai seyokuti: Upenyu hwakabva kupi? (Mab. 17:24-26) Nei tiri pano? Kuti tingorarama makore mashomanana, towana zvatingagona muupenyu, tobva tafa here?—Gen. 1:27, 28; VaR. 5:12; Joh. 17:3; Pis. 37:11; Pis. 40:8.

Bhaibheri rinoratidza kuti tingawana sei zvinhu chaizvo zvinonyanya kudiwa nevanoda kururama

Rinotiudza kwatinowana shamwari dzakanaka dzinodanana zvechokwadi (Joh. 13:35), kuti chii chinotipa chivimbo chokuti tichava nezvokudya zvinotikwanira isu nemhuri dzedu (Mat. 6:31-33; Zvir. 19:15; VaEf. 4:28), kufara kwatingaita pasinei nemamiriro ezvinhu akatipoteredza.—Pis. 1:1, 2; 34:8; Ruka 11:28; Mab. 20:35.

Rinotsanangura kuti Umambo hwaMwari, hurumende yake, huchabvisa mamiriro ezvinhu akaipa epanguva ino (Dhan. 2:44), uye kuti pahuchatonga vanhu vachakwanisa kuva noutano hwakakwana uye upenyu husingaperi.—Zvak. 21:3, 4; enzanisa naIsaya 33:24.

Chokwadi zvakakodzera kuti tiongorore bhuku rinotaura kuti rinobva kuna Mwari, rinotsanangura kuti zviri kuitika munyika zvinorevei uye chinangwa choupenyu uye rinoratidza kuti matambudziko edu achagadziriswa sei.

Uchapupu hwokuti rakafuridzirwa

Rakazara nouprofita hunodonongodza zvichaitika mune ramangwana—chinhu chisingakwanisi kuitwa nevanhu

2 Pet. 1:20, 21: “Hakuna uprofita hwoRugwaro hunobva chero mukududzirwa kwezvinhu chero kupi zvako kwakazvimirira. Nokuti uprofita hahuna kumbounzwa chero panguva ipi zvayo nevanhu, asi vanhu vakataura zvichibva kuna Mwari sezvavaitungamirirwa nomudzimu mutsvene.”

◼ Uprofita: Isa. 44:24, 27, 28; 45:1-4: “Jehovha . . . Iye ari kuti kumvura yakadzika, ‘Ipwa; ndichaomesa nzizi dzako dzose’; Iye ari kuti nezvaKoreshi, ‘Ndiye mufudzi wangu, zvose zvandinofarira achazviita chose’; kunyange pakutaura kwangu nezveJerusarema kuti, ‘Richavakwazve,’ uye nezvetemberi, ‘Nheyo yako ichavakwa.’ Zvanzi naJehovha kumuzodziwa wake, kuna Koreshi, wandakabata ruoko rwake rworudyi, kuti ndikunde marudzi pamberi pake, kuti ndisunungure hudyu dzemadzimambo; kuti ndimuvhurire masuo ane madhoo maviri, zvokuti kunyange magedhi haazovharwi: ‘Ini ndichakutungamirira, uye ndichaenzanisa nzvimbo dzisina kuenzana dzenyika. Ndichatyora-tyora masuo emhangura, uye ndichagura mizariro yesimbi. . . . Nokuda kwomushumiri wangu Jakobho uye nokuda kwaIsraeri wandakasarudza, ndakakushevedza nezita rako.’” (Isaya akapedza kunyora munenge muna 732 B.C.E.)

◻ Kuzadzika: Koreshi akanga asati aberekwa pakanyorwa uprofita hwacho. VaJudha havana kutorwa senhapwa kuenda kuBhabhironi kutozosvikira muna 617-607 B.C.E., uye Jerusarema netemberi yaro hazvina kuparadzwa kutozosvikira muna 607 B.C.E. Chaizvoizvo, uprofita hwacho hwakazadzika kutanga muna 539 B.C.E. Koreshi akatsaudzira mvura yoRwizi rwaYufratesi mudhamu rakagadzirwa nevanhu, magedhi aiva parwizi rweBhabhironi akangosiyiwa zvawo akavhurika paiitwa mutambo muguta, uye Bhabhironi yakakurirwa nevaMedhiya nevaPezhiya vachitungamirirwa naKoreshi. Zvadaro, Koreshi akasunungura nhapwa dzechiJudha uye akadzidzosera kuJerusarema achidzirayira kuti dzinovakazve temberi yaJehovha ikoko.—The Encyclopedia Americana (1956), Vol. III, peji 9; Light From the Ancient Past (Princeton, 1959), Jack Finegan, mapeji 227-229; “All Scripture Is Inspired of God and Beneficial” (New York, 1983), mapeji 282, 284, 295.

◼ Uprofita: Jer. 49:17, 18: “‘Edhomu ichava chinhu chinokatyamadza. Munhu wose anenge achipfuura nomairi acharamba akatarira achikatyamara, oridza muridzo nokuda kwematambudziko ayo ose. Hapana munhu achagara imomo,’ . . . ndizvo zvataura Jehovha, ‘sezvazvakanga zvakaita pakaparadzwa Sodhoma neGomora nemataundi aiva pedyo naro.’” (Jeremiya akapedza kunyora uprofita hwake pakazosvika 580 B.C.E.)

◻ Kuzadzika: “Ivo [vaEdhomu] vakabudiswa muParestina muzana remakore rechipiri B.C. naJudas Maccabæus, uye muna 109 B.C. John Hyrcanus, mutungamiriri wavanaMakabhii, akawedzera chikamu chokumadokero kwenyika yeEdhomu paumambo hweJudha. Muzana remakore rokutanga B.C. Umambo hweRoma hwakatsvaira kachisaririra kokupedzisira kokuzvitonga kweEdhomu . . . Pashure pokuparadzwa kweJerusarema nevaRoma muna 70 A.D. . . . zita rokuti Idhumeya [Edhomu] rakanga risisazivikanwi.” (The New Funk & Wagnalls Encyclopedia, 1952, Vol. 11, peji 4114) Cherechedza kuti kuzadzika kwacho kunosvika muzuva redu. Hapana angapokana kuti uprofita uhwu hwakanyorwa pashure pokunge zvinhu zvacho zvatoitika.

◼ Uprofita: Ruka 19:41-44; 21:20, 21: “[Jesu Kristu] akaona guta [Jerusarema], akasvimha misodzi pamusoro paro, achiti: . . . ‘Mazuva achauya pauri apo vavengi vako vachakupoteredza norusvingo rwakavakwa nemapango akapinza uye vachakukomberedza nokukutambudza kumativi ose, uye vachakurovera pasi iwe nevana vako vari mukati mako, uye havazosiyi dombo riri pamusoro perimwe dombo mauri, nokuti hauna kunzwisisa nguva yokuongororwa kwako.’” Papera mazuva maviri, akapa vadzidzi vake zano achiti: “Pamunoona Jerusarema rakombwa nemauto akadzika misasa, panguva iyoyo zivai kuti rava kuda kuitwa dongo. Panguva iyoyo vari muJudhiya ngavatange kutizira kumakomo, nevaya vari mukati maro ngavabude.” (Uprofita hwakataurwa naJesu Kristu muna 33 C.E.)

◻ Kuzadzika: Jerusarema rakapandukira Roma, uye muna 66 C.E. uto reRoma richitungamirirwa naCestius Gallus rakarwisa guta racho. Asi sezvakataurwa nomunyori wenhau dzakaitika kare wechiJudha Josephus, mukuru weuto reRoma “akangoerekana adana varume vake kuti varege kurwisa, asisina tariro kunyange zvazvo akanga asina kukurirwa, achiratidza kusachenjera akatiza achibva muGuta racho.” (Josephus, the Jewish War, Penguin Classics, 1969, peji 167) Maererano nezvakanyorwa naEusebius Pamphilus mubhuku rake rinonzi Ecclesiastical History, izvi zvakapa vaKristu mukana wokuti vatize kubva muguta racho, uye vakadaro vachienda kuPera, mhiri kwaJodhani. (Rakashandurwa naC. F. Crusé, London, 1894, peji 75) Munenge munguva yePaseka yegore ra70 C.E. Mukuru weuto Titus akakomba guta racho, nokuvaka rusvingo rwaiva rwakareba makiromita 7,2 mumazuva matatu chete, uye pashure pemwedzi mishanu Jerusarema rakaparadzwa. “Jerusarema pacharo rakaparadzwa uye Temberi yacho yakasiyiwa yava dongo. Nhasi sayenzi yezvinocherwa mumatongo inotiratidza kuti kuparadzwa kwezvivako zvechiJudha munyika yose kwakabudirira sei.”—The Bible and Archaeology (Grand Rapids, Mich.; 1962), J. A. Thompson, peji 299.

Zviri mariri zvinoratidza kuti zvinoenderana nesayenzi pane zvakazowanikwa nevanoongorora

Mavambo Ezvinhu Zvose: Gen. 1:1: “Pakutanga Mwari akasika matenga nenyika.” Muna 1978, nyanzvi inodzidza zvomuchadenga Robert Jastrow akanyora kuti: “Iye zvino tava kuona kuti uchapupu hwokuongorora zvomuchadenga hunowirirana sei nezvinotaurwa neBhaibheri nezvemavambo enyika. Mashoko akawanda anosiyana, asi zvinhu zvinokosha munhoroondo yokuongorora zvomuchadenga neyomuBhaibheri yaGenesisi zvakafanana: zviitiko zvinotevedzana kusvika pakasikwa munhu zvakaerekana zvatanga uye panguva chaiyoiyo.”—God and the Astronomers (New York, 1978), peji 14.

Zvakaita Nyika: Isa. 40:22: “Kune Uya agere pamusoro pedenderedzwa renyika.” Munguva dzekare vanhu vakawanda vaifunga kuti nyika yakati sandarara. Papera makore anopfuura 200 pashure pokunyorwa kwendima iyi yeBhaibheri boka revazivi vechiGiriki rakafunga kuti nyika ingangodaro yakaurungana, uye papera mamwe makore 300 nyanzvi yechiGiriki yaiongorora zvomuchadenga yakaita masvomhu ikaona urefu hwenyika kubva pamusoro kusvika pakati-kati payo. Asi kunyange panguva iyoyo vakawanda vakanga vasingafungi kuti nyika yakaurungana. Vanhu vakatozotanga kufamba nendege muzana remakore rechi20, uye pave paya muchadenga uye kunyange kusvika kumwedzi, zvichiita kuti vanyatsoona “denderedzwa” renyika.

Upenyu Hwemhuka: Revh. 11:6: “Tsuro . . . inodzeya.” Kunyange zvazvo izvi zvakarambwa nevatsoropodzi kwenguva refu, kudzeya kwetsuro kwakazoonekwa naWilliam Cowper wokuEngland muzana remakore rechi18. Kudzeya kwacho uko kwakasiyana nokunoitwa nedzimwe mhuka kwakatsanangurwa muna 1940 muProceedings of the Zoological Society of London, Vol. 110, Series A, mapeji 159-163.

Kupindirana kunoita ndima dzaro kunokosha

Izvi zvakadaro sezvo mabhuku eBhaibheri akanyorwa nevarume 40 uye pakati pavo paiva namambo, muprofita, mufudzi, muteresi uye chiremba. Vakanyora mumakore anopfuura 1 610; saka pakanga pasina mukana wokurangana. Asi zvavakanyora zvinopindirana kunyange muzvinhu zvidukuduku. Kuti unzwisise kupindirana kunoita zvikamu zvakasiyana-siyana zveBhaibheri, unofanira kuriverenga uye kuridzidza uri woga.

Tingava sei nechokwadi chokuti Bhaibheri harina kuchinjwa?

“Mumanyoro ekare anopupurira zvakanyorwa, uye mumakore akanga adarika kubva pamanyoro okutanga kusvika pane anopupurirwa, Bhaibheri riri nani pane zvinyorwa [zvaHomer, Plato, nevamwe]. . . . Zvinyorwa zvose izvi zvinongova hazvo zvishomanana kana zvichienzaniswa nezveBhaibheri. Hapana rimwe bhuku rekare rinopupurirwa zvakadaro seBhaibheri.”—The Bible From the Beginning (New York, 1929), P. Marion Simms, mapeji 74, 76.

Mushumo wakabudiswa muna 1971 unoratidza kuti pane makopi akanyorwa nemaoko angangosvika 6 000 ane Magwaro ose echiHebheru kana kuti chikamu chawo; kopi yokutangatanga yacho yakanyorwa muzana remakore rechitatu B.C.E. NezveMagwaro echiKristu echiGiriki, pane makopi 5 000 echiGiriki, yokutangatanga yacho yakanyorwa pakatanga zana remakore rechipiri C.E. Panewo makopi akawanda epakutanga akashandurirwa mune mimwe mitauro.

Mumashoko ake okutanga mumabhuku ake manomwe eThe Chester Beatty Biblical Papyri, Sir Frederic Kenyon akanyora kuti: “Mhedziso yokutanga uye inonyanya kukosha yakabva pakuaongorora [papyri] ndiyo inogutsa inoratidza kuti anopupurira chokwadi chinokosha chemagwaro aripo. Hapana musiyano wakanyanya kukura kana kuti unokosha unoratidzwa muTestamende Yekare kana kuti Itsva. Hapana ndima dzinokosha dzakasiyiwa kana kuti dzakawedzerwa uye misiyano inochinja chokwadi chinokosha kana kuti dzidziso. Misiyano yendima inochinja zvinhu zviduku, zvakadai semarongerwo emashoko kana kuti mashoko chaiwo akashandiswa . . . Asi kukosha kwawo kukuru ndiko kupupurira kutendeka kwemagwaro atiinawo panguva ino kunoratidzwa neuchapupu hwekare kupfuura huripo iye zvino.”—(London, 1933), peji 15.

Ichokwadi kuti dzimwe shanduro dzeBhaibheri dzinonyanya kuomerera pane zviri mumitauro yepakutanga kupfuura zvinoita dzimwe. Vamwe vashanduri vemaBhaibheri emazuva ano vakaita zvavanoda zvikaita kuti dzimwe nguva zvairehwa pakutanga zvichinje. Vamwe vakashandura maererano nezvavaidavira. Asi izvi zvinogona kuoneka nokuenzanisa shanduro dzakasiyana-siyana.

‘Handitendi Bhaibheri’

Ungapindura kuti: ‘Asi munotenda kuti kuna Mwari, handizvo here? . . . Ndingambokubvunzai kuti chii chiri muBhaibheri chamunoona chakaoma kubvuma?’

Kana kuti ungati: ‘Magara muchifunga saizvozvo here? . . . Ndakanzwa vamwe vachitaura izvozvo, kunyange zvazvo vasina kumbonyatsoongorora Bhaibheri. Asi sezvo Bhaibheri racho richinyatsotaura kuti ishoko rinobva kuna Mwari pachake uye kuti anotipa upenyu husingaperi kana tikatenda zvarinotaura torarama maererano nazvo, hamubvumi here kuti zvaizova zvakanaka kuti muriongorore moona kana zvarinotaura zviri zvechokwadi kana kuti kwete? (Shandisa mashoko ari pamapeji 39-42.)’

‘Bhaibheri rinozvipokanidza’

Ungapindura kuti: ‘Vamwe vanhu vakandiudza izvozvo, asi hapana akambokwanisa kundiratidza kuzvipokanidza kwacho. Uye pakuverenga kwandinoita Bhaibheri handisati ndambozviona. Mungandipa muenzaniso here?’ Ungawedzerawo kuti: ‘Zvandakaona ndezvokuti vanhu vakawanda havana kumbowana mhinduro dzemibvunzo iyo Bhaibheri rakaita kuti vafunge nezvayo. Somuenzaniso, Kaini akawana kupi mudzimai wake? (Shandisa mashoko ari pamapeji 210, 211.)’

‘Bhaibheri rakanyorwa nevanhu’

Ungapindura kuti: ‘Ichokwadi. Rakanyorwa nevanhu vanenge 40. Asi rakafuridzirwa naMwari.’ Ungawedzerawo kuti: (1) ‘Izvozvo zvinorevei? Mwari ndiye akatungamirira kunyorwa kwaro sezvinongoita muzvinabhizimisi anoshandisa mabharani kunyora tsamba dzake.’ (2) ‘Hatifaniri kushamiswa nepfungwa yokugamuchira mashoko anobva kune mumwe munhu ari muchadenga. Kunyange vanhu vakatumira mashoko uye mifananidzo vari kumwedzi. Vakazviita sei? Vakashandisa mitemo yakaitwa naMwari kare kare.’ (3) ‘Asi tingava sei nechokwadi chokuti zviri muBhaibheri zvinobva kuna Mwari chaizvoizvo? Rine mashoko aisagona kubva kuvanhu. Akaita sei? Mashoko pamusoro peramangwana; uye nguva dzose ave achiratidza kuti akanyatsorurama. (Kuti uone mienzaniso, ona mapeji 39-41, uyewo mapeji 222-226, pasi pomusoro unoti “Mazuva Okupedzisira.”)’

‘Mumwe nomumwe ane matsananguriro aanoita Bhaibheri’

Ungapindura kuti: ‘Uye zviri pachena kuti haasi munhu wose anotaura zvakarurama.’ Ungawedzerawo kuti: (1) ‘Kumonyorora Magwaro kuti aenderane nezvatinofunga kunogona kutikuvadza zvechigarire. (2 Pet. 3:15, 16)’ (2) ‘Pane zvinhu zviviri zvinogona kutibatsira kunzwisisa Bhaibheri zvakarurama. Kutanga, ongorora ndima dzakapoteredza chero mashoko api arimo. Wadaro, enzanisa mashoko acho nemamwe ari muBhaibheri anotaura nezvenyaya yakafanana. Nokuita izvi tinenge tichirega Shoko raMwari richitungamirira zvatinofunga, uye kududzira hakusi kwedu asi ndekwake. Izvi ndizvo zvinoitwa mumabhuku eWatch Tower.’(Ona mapeji 418, 419, pasi pemusoro unoti “Zvapupu zvaJehovha.”)

‘Harishandi mazuva ano’

Ungapindura kuti: ‘Uye tinofarira zvinhu zvinotibatsira munguva yedu, handizvo here?’ Ungawedzerawo kuti: (1) ‘Munobvuma here kuti zvinoita kugumisa hondo? . . . Hamubvumi here kuti kana vanhu vakadzidza kugarisana murugare nemamwe marudzi, izvi zvaizova mavambo akanaka? . . . Bhaibheri rakafanotaura izvozvo chaizvo. (Isa. 2:2, 3) Pamusana pokudzidza Bhaibheri, nhasi izvi zviri kuitika pakati peZvapupu zvaJehovha.’ (2) Chimwezve chinhu chinodiwa—kubviswa kwevanhu vose vanokonzera hondo. Chinhu chakadaro chichazomboitika here? Hungu, uye Bhaibheri rinotsanangura kuti zvichaitika sei. (Dhan. 2:44; Pis. 37:10, 11)’

Kana kuti ungati: ‘Ndinonzwisisa zvinokunetsai. Kana bhuku remirayiridzo risingabatsiri, hwaizova upenzi kuti tirishandise, handizvo here?’ Ungawedzerawo kuti: ‘Munobvuma here kuti bhuku rinopa mazano akanaka angaita kuti tifare mumhuri rinobatsira? . . . Dzidziso uye tsika dzine chokuita noupenyu hwemhuri zvakachinja kakawanda, uye migumisiro yatinoona nhasi haina kunaka. Asi vaya vanoziva uye vanoshandisa zvinotaurwa neBhaibheri vane mhuri dzinofara uye dzakasimba. (VaK. 3:12-14, 18-21)’

‘Bhaibheri ibhuku rakanaka, asi hapana chinhu chinonzi chokwadi chaicho’

Ungapindura kuti: ‘Ichokwadi kuti munhu wose anoita seane maonero akasiyana. Uye kunyange mumwe achifunga kuti ane chimwe chinhu chaawana, kazhinji anenge aine chimwe chinhu chaanenge asina kufunga nezvacho. Asi pane mumwe munhu asingapererwi zvakadaro. Angava ani iyeye? . . . Ndiye Musiki wezvinhu zvose.’ Ungawedzerawo kuti: (1) ‘Ndosaka Jesu Kristu akati kwaari: “Shoko renyu ichokwadi.” (Joh. 17:17) Chokwadi ichocho chiri muBhaibheri. (2 Tim. 3:16, 17)’ (2) ‘Mwari haadi kuti tigare tiri mukusaziva; akati anoda kuti tisvike pakuva nezivo yakarurama yechokwadi. (1 Tim. 2:3, 4) Nenzira inogutsa zvikuru Bhaibheri rinopindura mibvunzo yakadai sokuti . . . ’ (Kuti ubatsire vamwe vanhu, ungafanira kutanga kukurukura uchapupu hwokuti Mwari ariko. Ona mapeji 258-264, pasi pemusoro unoti “Mwari.”)

‘Bhaibheri ibhuku revarungu’

Ungapindura kuti: ‘Ichokwadi kuti vakadhinda maBhaibheri akawanda. Asi Bhaibheri haritauri kuti rumwe rudzi ruri nani kupfuura rumwe.’ Ungawedzerawo kuti: (1) ‘Bhaibheri rakabva kuMusiki wedu, uye haasaruri. (Mab. 10:34, 35)’ (2) ‘Shoko raMwari rinopa vanhu vemarudzi nemadzinza ose mukana wokurarama nokusingaperi panyika pano pasi poUmambo hwake. (Zvak. 7:9, 10, 17)’

Kana kuti ungati: ‘Kana! Musiki wevanhu ndiye akasarudza varume vaakafuridzira kuti vanyore mabhuku 66 eBhaibheri. Uye kana akasarudza vanhu vatsvuku, izvozvo zvaiva kwaari. Asi shoko romuBhaibheri raisazova revarungu chete.’ Ungawedzerawo kuti: (1) ‘Onai zvakataurwa naJesu . . . (Joh. 3:16) “Munhu wose” zvinoreva vanhu vane rudzi chero rupi rweganda. Uyewo, asati akwira kudenga, Jesu akataura mashoko aya okuoneka kuvadzidzi vake . . . (Mat. 28:19)’ (2) ‘Mabasa 13:1 inotaura nezvemumwe murume anonzi Nigeri, zita rinoreva kuti “mutema.” Aiva mumwe wevaprofita uye vadzidzisi veungano yeAndiyoki, kuSiriya.’

‘Ndinotenda zvinotaurwa neKing James Version chete’

Ungapindura kuti: ‘Kana muinaro, ndingada kukurukura nemi chimwe chinhu chandakaona chichikurudzira zvikuru.’

Kana kuti ungati: ‘Vanhu vakawanda vanoshandisa Bhaibheri iroro, uye ini ndinarowo kumba.’ Ungawedzerawo kuti: (1) ‘Maiziva here kuti Bhaibheri rakatanga kunyorwa muchiHebheru, chiAramaiki uye chiGiriki? . . . Munoverenga mitauro iyoyo here? . . . Saka tinoonga kuti Bhaibheri rakanyorwa muShona.’ (2) ‘Chati ino (Kurongwa Kwemabhuku eBhaibheri,” iri muNW) inoratidza kuti Genesisi, bhuku rokutanga reBhaibheri, rakapera kunyorwa muna 1513 B.C.E. Maiziva here kuti, pashure pokunge bhuku raGenesisi ranyorwa, pakapera makore anenge 2 900 Bhaibheri rakazara risati rashandurirwa muChirungu? Uye mamwe makore anopfuura 200 akadarika King James Version isati yapera kunyorwa (1611 C.E.).’ (3) ‘Kubvira muzana remakore rechi17, Chirungu chakachinja kakawanda. Takaona izvozvo kunyange munguva yedu, handizvo here? . . . Saka tinoonga shanduro dzemazuva ano dzinonyatsobudisa chokwadi chepakutanga mumutauro watinotaura mazuva ano.’

‘Mune Bhaibheri renyu mega’

Ona musoro mukuru unoti “Shanduro yeNyika Itsva.”