Ganhuro 11

Aya Mazuva Okupedzisira!

NYIKA yedu yakanyongana yakasvika sei pamwero uno? Takananga kupi? Wati wambobvunza mibvunzo yakadaro here? Vakawanda vanonzwa vati kangaidzwei apo vanotarira mamiriro ezvinhu enyika. Zvinhu chaizvoizvo zvakadai sehondo, hosha, uye utsotsi zvinosiya vanhu vachishamiswa nechine ramangwana. Vatungamiriri vehurumende vanopa tariro duku. Zvisinei, kutsanangurwa kwakavimbika kwaaya mazuva anotambudza kunowanika kuna Mwari muShoko rake. Bhaibheri rinotibetsera nenzira yakavimbika kuona patiri mukufamba kwenguva. Rinotiratidza kuti tiri mu“mazuva okupedzisira” etsika iripo yezvinhu.—2 Timotio 3:1.

2 Rangarira, somuenzaniso, mhinduro iyo Jesu akapa kumibvunzo yakamutswa navadzidzi vake. Mazuva matatu Jesu asati afa, vakamubvunza, kuti: “Chii chichava chiratidzo chokuvapo kwenyu nechemhedziso yetsika yezvinhu?”a (Mateo 24:3, NW) Mumhinduro, Jesu akataura nezvezviitiko chaizvo zvenyika namamiriro ezvinhu zvaizoratidza zvakajeka kuti tsika ino isina umwari yakanga yapinda mumazuva ayo okupedzisira.

3 Sezvakaratidzwa muganhuro rakapfuura, kuverenga nguva kweBhaibheri kunotungamirira kumhedziso yokuti Umambo hwaMwari hwakatovamba kutonga. Asi ikoko kunogona sei kuva kwakadaro? Zvinhu zvava zvakaipa zvikuru, kwete zviri nani. Chaizvoizvo, ichi chiratidzo chakasimba chokuti Umambo hwaMwari hwakavamba kutonga. Nei? Eya, Pisarema 110:2 rinotizivisa kuti kwenguva yakati Jesu aizotonga ‘pakati pavavengi vake.’ Zvirokwazvo, chiito chake chokutanga saMambo wokudenga chakanga chiri chokudzingira Satani nengirozi dzake madhemoni kunharaunda yapasi. (Zvakazarurwa 12:9) Ndoupi wakanga uri mugumisiro wacho? Kwakanga kuri chaizvo Zvakazarurwa 12:12 akafanotaura, kuti: “Mune nhamo imi nyika negungwa, nokuti [Dhiyabhorosi, NW] wakaburukira kwamuri, akatsamwa kwazvo, nokuti unoziva kuti uchine nguva duku.” Zvino tiri kurarama mu“nguva duku” iyoyo.

4 Nenzira isingashamisi, naizvozvo, apo Jesu akabvunzwa chaizova chiratidzo chokuvapo kwake nechemhedziso yetsika yezvinhu, mhinduro yake yakanga ichisuruvarisa. Mativi akasiyana-siyana echiratidzo chacho anowanwa mubhokisi riri papeji 102. Sezvaunogona kuona, vaapostora vechiKristu Pauro, Petro, uye Johane vanotigovera humwe hudzame pamusoro pamazuva okupedzisira. Chokwadi, mativi akawanda zvikurusa echiratidzo chacho neomumazuva okupedzisira anobatanidza mamiriro ezvinhu anotambudza. Bva, zadziko youporofita ihwohwu inofanira kutipwisa kuti tsika ino yakaipa yava pedyo nomugumo wayo. Ngatisanonzverei mamwe amativi makuru amazuva okupedzisira.

MATIVI AMAZUVA OKUPEDZISIRA

5 “Rudzi ruchamukira rudzi noumambo huchamukira umambo.” (Mateo 24:7, NW; Zvakazarurwa 6:4) Munyori Ernest Hemingway akadana Hondo yeNyika I kuti “kuuraya kukuru zvikurusa, kwoumhondi, kwakatungamirirwa zvakaipa uko kusati kwamboitika pasi pano.” Maererano nebhuku rinonzi The World in the Crucible—1914-1919, uhwu hwakanga huri “ukuru hutsva hwehondo, hondo yakakwana yokutanga muchakaitika chorudzi rwomunhu. Urefu hwayo, ukombi, uye ukuru zvakapfuura chinhu chipi nechipi chakazivikanwa kare kana kuti chaiwanzokarirwa.” Ipapo kwakauya Hondo yeNyika II, iyo yakabvumikisa kuva inoparadza zvikuru kwazvo kupfuura Hondo yeNyika I. “Zana ramakore rechimakumi maviri,” anodaro purofesa wenhau Hugh Thomas, “rakatongwa nechigwagwagwa, motokari dzehondo, ndege dzehondo dzeB-52, bhomba renyukireya uye, pakupedzisira, zvombo zvinokandwa. Rakaratidzirwa nehondo dzine chishava zvikuru nedzinoparadza kupfuura idzo dzeimwe nhambo ipi neipi.” Chokwadi, zvakawanda zvakataurwa pamusoro pokukanda zvombo pasi pashure pokunge Rwisano yePfungwa Dzakasiyana yaguma. Zvisinei, mushumo mumwe unokarakadza kuti pashure pederedzo dzakakarakadzwa zvombo zvinoputika 10 000 kusvikira ku 20 000 zvichasara—kupfuura ka 900 zvombo zvakashandiswa mukati meHondo yeNyika II.

6 “Kuchava neperevedzo dzezvokudya.” (Mateo 24:7, NW; Zvakazarurwa 6:5, 6, 8) Kubvira muna 1914 kwave kune nzara huru dzinenge 20. Nharaunda dzinotambudzwa dzinobatanidza Bangladesh, Burundi, Cambodia, China, Ethiopia, Greece, India, Nigeria, Russia, Rwanda, Somalia, uye Sudan. Asi nzara haiparirwi nguva dzose nokushayikwa kwezvokudya. “Zvokudya zvenyika mumakumi amakore achangobva kupfuura zvakawanda nokukurumidza zvikuru kupfuura chiverengero chayo chavagari vemo,” rakagumisa kudaro rimwe boka ravasayendisiti vezvokurima navarongi voupfumi. “Asi nemhaka yokuti vanhu vanenge vane mamiriyoni 800 vanoramba vari muurombo hukuru, . . . havakwanisi kutenga zvakawanda zvakakwana kuti zvivabudise mukushaya zvokudya kunogara nguva refu.” Kupindira mune zvamatongerwe enyika kunobatanidzwa muzvimwe zviitiko. Dr. Abdelgalil Elmekki weUniversity yeToronto anodudza mienzaniso miviri umo zviuru zvakaziya nenzara apo nyika dzavo dzakanga dzichitengesa kune dzimwe nyika zvitsama zvikuru zvezvokudya. Hurumende dzakaratidzika kuva dzaiitira hanya zvikuru kwazvo kuwana mari yokudzimwe nyika kuti dziwanire mari hondo dzadzo kupfuura kupa zvokudya vagari vemo vadzo. Ndeipi iri mhedziso yaDr. Elmekki? Nzara inowanzova “nhau yokuparadzira nomuitiro wehurumende.”

7 “Nhenda.” (Ruka 21:11, NW; Zvakazarurwa 6:8) Furuwenza yeSpain ya 1918-19 yakauraya upenyu hunenge mamiriyoni 21. “Nyika yakanga isina kutongoparadzwa zvakadaro nomuurayi uyo akauraya vanhu vakawanda kwazvo nokukurumidza kwazvo munhau,” anonyora kudaro A. A. Hoehling muThe Great Epidemic. Nhasi, nhenda dzinopfuurira. Gore rimwe nerimwe, gomarara rinouraya vanhu vane mamiriyoni mashanu, hosha dzamanyoka dzinouraya vacheche navana vanopfuura mamiriyoni matatu, uye chikosoro chorurindi chinouraya mamiriyoni matatu. Hosha dzinokanganisa kufema, zvikurukuru mabayo, gore negore dzinouraya vaduku vari pasi pamakore mashanu ezera vane mamiriyoni 3,5. Uye mabhiriyoni anokatyamadza 2,5—hafu yechiverengero chavagari venyika—anotambura nezvirwere zvinoparirwa nokushomeka kwemvura kana kuti yakashatiswa netsvina. AIDS inooneka sechimwe chiyeuchidzo chokuti munhu, pasinei zvapo nezvaakaita zvinokosha mumishonga, haakwanisi kubvisa nhenda.

8 “Vanhu vachava . . . vanoda mari.” (2 Timotio 3:2) Munyika kupota nyika, vanhu vanoratidzika kuva vane chishuvo chisingagutswi choupfumi hwakawanda zvikuru. “Budiriro” inowanzoyerwa nechitsama chomubhadharo womunhu, “chinoitwa” kupfurikidza nokuti munhu ane zvakawanda zvikuru sei. “Kudisa zvenyika kuchapfuurira kuva rimwe ramasimba anosunda munzanga yeAmerica . . . uye simba rinokosha nenzira inowedzera mudzimwewo nzvimbo huru munotengwa zvinhu,” akazivisa kudaro; mutevedzeri wapurezidhendi wesangano rinoshambadzira. Ikoku kuri kuitika maunogara here?

9 “Vasingateereri vabereki.” (2 Timotio 3:2) Vabereki, vadzidzisi, uye vamwe vomuzuva razvino uno vane ufakazi hwakananga hwokuti vana vakawanda vanozvidza uye havateereri. Vamwe vaava vaduku vari kuramba kana kuti zvimwe kutevedzera kusazvibata kwavabereki vavo. Nhamba dzinowedzera dzavana dziri kurasikirwa nechivimbo—uye kupandukira—muchikoro, mumutemo, murudzidziso, uye muvabereki vavo. “Somuitiro,” anodaro mumwe mudzidzisi wapachikoro ane ruzivo rwokuzviwanira rwenguva refu, “vanoratidzika kuva vanoremekedza zviduku zvikuru chinhu chipi nechipi.” Nenzira inofadza, kunyange zvazvo zvakadaro, vana vakawanda vanotya Mwari ndovomuenzaniso mumufambiro.

10 “Vanotyisa.” (2 Timotio 3:3, NW) Shoko rechiGiriki rinoshandurwa kuti “kutyisa” rinoreva kuti ‘asina kupingudzwa, mupengo kushayiwa tsitsi dzomunhu nengoni.’ Ikoku kunosanokodzera sei vaiti vakawanda vamasimba masimba vanhasi! “Upenyu hunonetsa kwazvo, hwakazadzwa kwazvo nechishava norutyo zvokuti kunoda ushingi kurava nhau dzezuva nezuva,” chakadaro chimwe chikamu chepepanhau chinonyorwa nomupepeti wenhau. Mumwe sajeni wamapurisa anochengeta dzimba akataura kuti pwere dzakawanda dzinoratidzika kuva dzinoramba kurangarira migumisiro yezviito zvadzo. Akati: “Kune kurangarira kwokuti, ‘Handizivi nezvamangwana. Ndichawana chandinoda nhasi.’”

11 “Vasino rudo chairwo.” (2 Timotio 3:3) Ichi chitsama chamashoko chinoshandurwa kubva mushoko rechiGiriki rinoreva kuti “vasina tsitsi, vasina ngoni” uye rinoratidzira “kushayikwa kwechidakadaka chomuzvarirwo, chemhuri.” (The New International Dictionary of New Testament Theology) Hungu, chidakadaka chinowanzoshayikwa mumhoteredzo imene umo chinofanira kutekeshera—musha. Mishumo yokutambudzwa kwavakwanyina veroorano, vana, uye kunyange kwavabereki vakwegura kwazova kunozivikanwa navose nenzira inokangaidza. Rimwe boka rinonzvera rakatsinhira, kuti: “Masimba masimba avanhu—ingava mbama kana kuti kusaidzira, kubaya nebanga kana kuti kupfura—anoitika kazhinji kazhinji zvikuru mukati meboka remhuri kupfuura kupi nokupi zvako munzanga medu.”

12 “Vanomufananidzo bedzi wokunamata Mwari, asi vakarasha simba rako.” (2 Timotio 3:5) Bhaibheri rine simba rokuchinja upenyu nokuda kwezviri nani. (VaEfeso 4:22-24) Bva, vakawanda nhasi vanoshandisa rudzidziso rwavo sechifukidziro seri icho kwacho vanopfuuridzira mibato isina kururama inotsamwisa Mwari. Kureva nhema, kuba, uye kusazvibata muvatano zvinowanzofuratirwa navatungamiriri vorudzidziso. Marudzidziso akawanda anoparidza rudo asi anotsigira hondo. “Muzita roMusiki Mukurusa,” chinodaro chimwe chikamu chomupepanhau chinonyorwa nomupepeti wenhau mumagazini yeIndia Today, “vanhu vakaita utsinye hwakaipa zvikurusa pazvisikwa biyavo.” Kutaura idi, hondo mbiri dzaiva nechishava zvikurusa dzenguva ichangobva kupfuura—Hondo dzeNyika I uye II—dzakatanga pakati pechiKristudhomu.

13 “Vanoparadza nyika.” (Zvakazarurwa 11:18) Vasayendisiti vanopfuura 1 600, kubatanidza vawani veNobel Prize 104, vakabva munyika yose vakatsigira nyevero, yakabudiswa neUnion of Concerned Scientists (UCS), iyo yakati: “Vanhu nemhoteredzo zvichabonderana. . . . Mukana wokudzivisa tyisidziro dzacho ucharasika mumakore ane makumi mashomanene.” Mushumo wacho wakataura kuti miitiro yomunhu inotyisidzira upenyu “ingachinja kwazvo nyika zvokuti ichava isingakwanisi kutsigira upenyu nomutoo watinoziva.” Kupera kweozone, kushatiswa kwemvura, kuparadzwa kwamasango, kurasikirwa nevhu rakaorera, uye kutsakatika kwamarudzi akawanda emhuka nemiti zvakadudzwa sezvinetso zvinokosha zvinofanira kutarisirwa. “Kukanganisa kwedu negadziriro yokutsamirana youpenyu,” yakadaro UCS, “kungagona kuvamba migumisiro yakapararira, kubatanidza kupunzika kwegadziriro dzezvinhu zvipenyu dzine chinjo dzatinonzwisisa zvishomanene.”

14 “Aya mashoko akanaka oumambo achaparidzwa mupasi rose rinogarwa.” (Mateo 24:14, NW) Jesu akafanotaura kuti mashoko akanaka oUmambo aizoparidzwa mupasi rose, nokuda kwouchapupu kumarudzi ose. Nebetsero youmwari nechikomborero, mamiriyoni eZvapupu zvaJehovha ari kupedzera mabhiriyoni amaawa kuiri basa rokuparidza nokuita vadzidzi. (Mateo 28:19, 20) Hungu, Zvapupu zvinoziva kuti zvingava nemhaka yeropa kana zvikasazivisa mashoko akanaka. (Ezekieri 3:18, 19) Asi zvinofara kuti gore rimwe nerimwe zviuru zvinogamuchira shoko roUmambo nokuonga ndokumira savaKristu vechokwadi, ndiko kuti, seZvapupu zvaJehovha. Iropafadzo inokosha kubatira Jehovha nokudaro ndokuparadzira kuziva Mwari. Uye pashure pokunge aya mashoko akanaka aparidzwa mupasi rose rinogarwa, mugumo wetsika ino yakaipa uchasvika.

ITA CHIMWE CHINHU KUUFAKAZI

15 Tsika ino ichaguma sei? Bhaibheri rinofanotaura “dambudziko guru” iro richavamba nedenho inoitwa nesangano rezvamatongerwe enyika renyika ino pa“Bhabhironi Guru,” umambo hwenyika hworudzidziso rwenhema. (Mateo 24:21; Zvakazarurwa 17:5, 16, NW) Jesu akataura kuti mukati meiyi nhambo ‘zuva raizosvibiswa, uye mwedzi hausati waizopa chiedza chawo, uye nyeredzi dzaizowa dzichibva kudenga, uye masimba amatenga aizozununguswa.’ (Mateo 24:29) Ikoku kungaratidzira zvinhu chaizvoizvo zvomudenga. Muchiitiko chipi nechipi, vanhu vanokosha vanopenya venyika yorudzidziso vachafumurwa ndokuparadzwa. Ipapo Satani, anonzi “Gogi, wenyika yaMagogi,” achashandisa vanhu vakaipiswa mukuita denho yachose chose pavanhu vaJehovha. Asi Satani haasati achizobudirira, nokuti Mwari achavanunura. (Ezekieri 38:1, 2, 14-23) “Dambudziko guru” richasvika mugumo waro muArmagedhoni, “hondo yezuva guru raMwari Wamasimba ose.” Ichaparadza chisaririra chiri chose chokupedzisira chesangano rapasi raSatani, kuchiita kuti zvikomborero zvisingagumi zviyerere zvichienda kurudzi rwomunhu runopukunyuka.—Zvakazarurwa 7:9, 14; 11:15; 16:14, 16; 21:3, 4.

16 Ari oga, mamwe mativi ouporofita anorondedzera mazuva okupedzisira angaratidzika kuva anoshanda kudzimwe nhambo dzenhau. Asi apo anobatanidzwa, ufakazi hwakaporofitwa hunozivisa zuva redu. Kuenzanisira: Mitsetse inoita fingapirindi yomunhu inoumba mufananidzo usingagoni kuva womumwe munhu upi noupi. Nenzira yakafanana, mazuva okupedzisira ane mufananidzo wawo amene wezviratidzo, kana kuti zviitiko. Izvozvi zvinoumba “fingapirindi” isingagoni kuva yeimwe nhambo ipi neipi yenguva. Apo hunorangarirwa pamwe chete nezviratidzo zveBhaibheri zvokuti Umambo hwokudenga hwaMwari zvino hunotonga, ufakazi hwacho hunogovera hwaro hwakasimba hwokugumisa kuti aya zvirokwazvo mazuva okupedzisira. Uyezve, kune chibvumikiso chapaMagwaro chakajeka chokuti tsika yakaipa iripo ichakurumidza kuparadzwa.

17 Uchaita sei kuufakazi hwokuti aya ndiwo mazuva okupedzisira? Rangarira izvi: Kudai dutu rinoparadza zvinotyisa riri kuswedera pedyo, tinofanoita gadziriro dzokungwarira pasina kunonoka. Eya, icho Bhaibheri rinofanotaura nokuda kwetsika ino iripo chinofanira kutisundira kuchiito. (Mateo 16:1-3) Tinogona kuona zvakajeka kuti tiri kurarama mumazuva okupedzisira etsika yenyika ino. Ikoku kunofanira kutisunda kuita gadziridzo dzipi nedzipi dziri madikanwa kuti tiwane nyasha dzaMwari. (2 Petro 3:3, 10-12) Achinongedzera kwaari amene somuponesi, Jesu anozivisa danidzo inokosha, inoti: “Chenjerai, kuti mwoyo yenyu irege kuremedzwa nokudyisa nokubatwa, nokufunganya pamusoro pezvinhu zvoupenyu huno, kuti zuva iro rirege kukuwirai seriva. Nokuti richawira vose vagere panyika yose. Asi rindai nenguva dzose, mukumbire, kuti mugone kupukunyuka pazvinhu izvi zvose zvinozoitwa, mugomira pamberi poMwanakomana womunhu.”—Ruka 21:34-36.

[Mashoko Omuzasi]

EDZA ZIVO YAKO

Chii chakafanotaura Bhaibheri pamusoro pezviitiko zvenyika pamavambo okutonga kwaKristu?

Ndaapi ari mamwe mativi amazuva okupedzisira?

Chii chinokupwisa kuti aya mazuva okupedzisira?

[Mibvunzo Yechidzidzo]

 1. Nei vakawanda vachinzwa vachiti kangaidzwei pakurangarira mamiriro ezvinhu enyika, asi kutsanangurwa kwakavimbika kwezviitiko zvenyika kunogona kuwanwa kupi?

 2. Mubvunzoi uyo Jesu akabvunzwa navadzidzi vake, uye akapindura sei?

 3. Nei mamiriro ezvinhu pasi pano akaipa zvikuru apo Jesu akavamba kutonga?

 4. Ndaapi ari mamwe mativi amazuva okupedzisira, uye anoratidzirei? (Ona bhokisi.)

 5, 6. Uporofita pamusoro pehondo nenzara huri kuzadzikwa sei?

 7. Ndaapi ari maidi pamusoro penhenda nhasi?

 8. Vanhu vari kubvumikisa sei kuva “vanoda mari”?

 9. Chii chinogona kutaurwa pamusoro pokusateerera vabereki kwakafanotaurwa?

10, 11. Ufakazii huripo hwokuti vanhu vanotyisa uye vanoshayiwa chidakadaka chomuzvarirwo?

12. Nei kuchigona kutaurwa kuti vanhu vanongova bedzi nechimiro chokuzvipira kwoumwari?

13. Ufakazii huripo hwokuti pasi riri kuparadzwa?

14. Ungagona sei kubvumikisa kuti Mateo 24:14 ari kuzadzikwa muzuva redu?

15. Tsika yakaipa iripo ichaguma sei?

16. Tinoziva sei kuti mativi akaporofitwa amazuva okupedzisira anoshanda kunguva yedu?

17. Kuziva kuti aya mazuva okupedzisira kunofanira kutisunda kuitei?

[Bhokisi riri papeji 102]

MAMWE MATIVI AMAZUVA OKUPEDZISIRA

• Hondo isina muenzaniso.—Mateo 24:7; Zvakazarurwa 6:4.

• Nzara.—Mateo 24:7; Zvakazarurwa 6:5, 6, 8.

• Nhenda.—Ruka 21:11; Zvakazarurwa 6:8.

• Kusateerera mutemo kunowedzera.—Mateo 24:12.

• Kuparadzwa kwapasi.—Zvakazarurwa 11:18.

• Kudengenyeka kwapasi.—Mateo 24:7.

• Nguva dzinokosha dzakaoma kubata nadzo.—2 Timotio 3:1.

• Kuda mari kwakanyanya.—2 Timotio 3:2.

• Kusateerera vabereki.—2 Timotio 3:2.

• Kushayikwa kwechidakadaka chomuzvarirwo.—2 Timotio 3:3.

• Kuda mifarwa panzvimbo paMwari.—2 Timotio 3:4.

• Kushayikwa kwokuzvidzora.—2 Timotio 3:3.

• Vasingadi runako.—2 Timotio 3:3.

• Vasingacherekedzi ngozi iri kuswedera pedyo.—Mateo 24:39.

• Vaseki vanoramba chibvumikiso chamazuva okupedzisira.—2 Petro 3:3, 4.

• Kuparidzwa munyika yose kwoUmambo hwaMwari.—Mateo 24:14.

[Mufananidzo unozadza peji yose uri papeji 101]