Pasi rese, vanhu vane maonero akasiyana-siyana panyaya dzekunwa. Vamwe vanofarira zvavo kumbonwira-nwira nehama neshamwari. Vamwe vanosarudza kusatombonwa zvachose. Vamwewo vanobva vadutira zvekusvika pakudhakwa. Bhaibheri rinombotii nenyaya yekunwa?

1. Kunwa kwakaipa here?

Bhaibheri haritauri kuti kunwa kwakaipa. Parinotaura nezvezvipo zvatakapiwa naMwari rinototaura nezvewaini richiti “inoita kuti mwoyo wemunhu ufare.” (Pisarema 104:14, 15) Bhaibheri rinotaura nezvevarume nevakadzi vakatendeka vainwa waini.—1 Timoti 5:23.

2. Bhaibheri rinotii kune vaya vanosarudza kunwa?

Jehovha anoshora kunwisa uye udhakwa. (VaGaratiya 5:21) Shoko rake rinoti: “Usava pakati pevaya vanonwisa waini.” (Zvirevo 23:20) Saka kana tikasarudza kunwa, kunyange patisingaonekwi nevanhu, hatifaniri kunwa zvekuti tinenge tisisafunge zvakanaka, kana kuti tisisagone kudzora mashoko nezviito zvedu kana kukanganisa utano hwedu. Kana tichiona zvichitinetsa kuzvidzora, zviri nani kurega kunwa kwacho.

3. Tingaremekedza sei zvinosarudzwa nevamwe panyaya yekunwa?

Panyaya yekuti munhu onwa here kana kuti orega, mumwe nemumwe anofanira kuzvisarudzira. Hatifaniri kutonga munhu anosarudza kunwa zvake zvine mwero, uye hatifaniri kumanikidza munhu kuti anwe iye asingadi. (VaRoma 14:10) Tinosarudza kusanwa kana kunwa kwedu kuchikanganisa vamwe. (Verengai VaRoma 14:21.) Hatitsvagi “zvinobatsira [isu] chete, asiwo zvinobatsira mumwe.”—Verengai 1 VaKorinde 10:23, 24.

WEDZERA KUONGORORA

4. Sarudza kuti wonwa here kana kuti kwete

Jesu aiona sei nyaya yekunwa? Kuti uwane mhinduro yacho ona kuti chishamiso chake chekutanga chaiva chei. Verengai Johani 2:1-11, mobva makurukura muchishandisa mibvunzo iyi:

• Chishamiso ichi chinoratidza kuti Jesu anoona sei zvinwiwa zvakadai sewaini uye vanhu vanosarudza kuzvinwa?

• Sezvo Jesu asina kuti kunwa kwakaipa, muKristu anofanira kuona sei munhu anosarudza kunwa?

Asi hazvirevi kuti kana doro risingarambidzwi, muKristu anofanira kungonwa. Anofanira kuziva kuti pane pamwe pekuti akanwa, anenge aratidza kusachenjera. Verengai Zvirevo 22:3, mobva makurukura kuti zvingasarudzwa nemunhu panyaya yekunwa zvinobatana papi nemamiriro ezvinhu anotevera:

• Uchada kutyaira motokari kana kushandisa mumwe muchina unogona kukuvadza.

• Wakazvitakura.

• Wakaudzwa nachiremba kuti usanwa.

• Unoona zvichikuomera kuziva pekugumira.

• Mutemo wemunyika maunogara haukubvumiri kunwa.

• Une mumwe munhu asingadi zvake kunwa nekuti anoziva kuti paaimbonwa kare zvaimuomera kuzvidzora.

Ungapa vanhu doro pamuchato pako kana kuti pamabiko pako here? Kuti uone kuti ungazvifambise sei, ngationei VHIDHIYO.

VHIDHIYO: Ndinoda Kuti Pazova Nedoro Here? (2:41)

Verengai VaRoma 13:13 uye 1 VaKorinde 10:31, 32. Verengai rugwaro rumwe chete panguva, mokurukura muchishandisa mubvunzo unotevera:

• Zano iri ringakubatsira sei kusarudza zvinofadza Jehovha?

5. Sarudza kuti uchanwa zvakadii

Kana ukasarudza kuti unoda kunwa yeuka kuti: Kunyange zvazvo Jehovha asingarambidzi kunwa, anorambidza kunwisa. Nei achirambidza? Verengai Hosiya 4:11, 18, mobva makurukura muchishandisa mubvunzo uyu:

• Chii chinogona kuitika kana munhu anwisa?

Tingaita sei kuti tisanwisa? Tinofanira kuva nemwero, kana kuti kuziva pekugumira. Verengai Zvirevo 11:2, mobva makurukura muchishandisa mubvunzo uyu:

• Nei zvakanaka kuti ugare wafunga kuti uri kuda kugumira papi kana wasarudza kunwa?

6. Kurira dambudziko reudhakwa

VHIDHIYO: ‘Ndakatanga Kusemeswa Nemararamiro Andaiita’ (6:32)

• Muvhidhiyo, doro raikanganisa sei Dmitry?

• Akakwanisa kubva angosiya kunwa pakarepo here?

• Akazokwanisa sei kusiya zvachose?

Verengai 1 VaKorinde 6:10, 11, mobva makurukura muchishandisa mibvunzo iyi:

• Chii chinoratidza kuti udhakwa chivi chakakura?

• Chii chinoratidza kuti munhu anogona kuchinja kana anga ari chidhakwa?

Verengai Mateu 5:30, mobva makurukura muchishandisa mubvunzo uyu:

• Kudimbura ruoko kuri kufananidzira kubvuma kurasikirwa nechimwe chinhu chaunoda uchiitira kufadza Jehovha. Ungaite sei kana zviri kukuomera kukunda dambudziko rekudhakwa?a

Verengai 1 VaKorinde 15:33, mobva makurukura muchishandisa mubvunzo uyu:

• Kungwarira shamwari dzaunotamba nadzo kunogona kukubatsira sei kukurira dambudziko rekudhakwa?

PFUPISO

Jehovha ndiye akatipa zvinwiwa zvakadai sewaini kuti tinakidzwe neupenyu, asi anoshora kunwisa uye kudhakwa.

Kudzokorora

• Bhaibheri rinoti chii nezvekunwa?

• Kunwisa kwakaipirei?

• Tingaratidza sei kuti tinoremekedza zvinosarudzwa nevamwe panyaya yekunwa?

WEDZERA PANE ZVAWADZIDZA

Vechidiki vangasarudza sei nekungwarira panyaya yekunwa?

Funga Zvingazoitika Kana Ukanwa Doro (2:31)

Ona matanho aungatora kana uine dambudziko rekunwisa.

“Kunwa Doro Zvine Mwero” (Nharireyomurindi, January 1, 2010)

MuKristu anofanira kurovanisa magirazi nevamwe here?

“Mibvunzo Inobva Kuvaverengi” (Nharireyomurindi, February 15, 2007)

Munyaya inoti, “Ndaiva Dhiramu Risingazari,” ona kuti mumwe murume aiva musiyadzasukwa akarega sei doro.

“Bhaibheri Rinochinja Upenyu” (Nharireyomurindi, May 1, 2012)

Tese tine mapfekero atinofarira. Kana tikatevedzera mazano mashomanana ari muBhaibheri, tinogona kuratidzika sezvatinoda uye zvatinofarira uku tichifadza Jehovha. Ngatikurukurei mamwe mazano acho.

1. Ipfungwa dzipi dziri muBhaibheri dzinogona kutibatsira kusarudza panyaya yemapfekero nekuratidzika kwedu?

Tinofanira kusarudza “zvipfeko zvine mutsigo, zvinoratidza kuva nemwero uye pfungwa dzakanaka,” uye kugara takachena zvinoratidza kuti tiri vanhu “vanozvipira kuna Mwari.” (1 Timoti 2:9, 10) Ngationei zvinhu zvina zvinotaurwa neBhaibheri: (1) Zvipfeko zvedu zvinofanira kuva “zvine mutsigo.” Sezvawakacherechedza pamisangano yechiKristu, vanhu vaJehovha vanofarira kupfeka zvakasiyana-siyana, asi mapfekero edu nemagadzirirwo atinoita bvudzi anoratidza kuti tinoremekedza Mwari watinonamata. (2) Kupfeka “zvinoratidza kuva nemwero” kunoreva kuti hatidi kupfeka zvinosiya vanhu vachifunga nezvebonde kana kuti zvekuti maziso ese anenge achingova patiri. (3) Tinoratidza kuti tine “pfungwa dzakanaka” kana tisingatevedzere mapfekero ese anenge angopinda mufashoni. (4) Zvinofanira kuoneka kune vaya vanotiona kuti tiri vanhu “vakazvipira kuna Mwari,” vanonamata Mwari wechokwadi.—1 VaKorinde 10:31.

2. Nei tichifanira kufunga nezvevamwe vedu vatinonamata navo patinosarudza zvekupfeka?

Kunyange zvazvo takasununguka kusarudza zvatinoda kupfeka, tinofanira kufunga kuti kana vamwe vachitiona vachanzwawo sei. Tinoedza zvese zvatinogona kuti tisakanganisa kutenda kwevamwe, asi kuti ‘tifadze muvakidzani wedu muzvinhu zvakanaka, timuvake.’—Verengai VaRoma 15:1, 2.

3. Mapfekero edu anogona sei kuita kuti vamwe vade kunamata Jehovha?

Tinoedza kupfeka zvine mutsigo nguva dzese, asi kunyanya paya patinenge tiri kumisangano nepatinenge tichiparidza. Hatidi kushoresa shoko rinokosha ratiri kuendesera vanhu. Tinotoda kuti mapfekero edu aite kuti chokwadi chifarirwe nevamwe, zvoita “kuti dzidziso yeMuponesi wedu . . . ioneke kunaka kwayo.”—Tito 2:10.

WEDZERA KUONGORORA

4. Kupfeka zvakanaka kunoratidza kuti tinoremekedza Jehovha

Ndechipi chikonzero chikuru chinoita kuti tingwarire mapfekero edu? Verengai Pisarema 47:2, mobva makurukura muchishandisa mibvunzo iyi:

• Kuziva kuti tiri kumiririra Jehovha kunofanira kuita kuti tipfeke sei?

• Unofunga kuti zvine basa here kuti tingwarire mapfekero edu patinoenda kumisangano kana kuti kunoparidza? Nei uchidaro?

5. Masarudziro aungaite zvekupfeka uye kuti woratidzika sei

Ngationei VHIDHIYO.

VHIDHIYO: “Itai Zvinhu Zvese Kuti Mwari Akudzwe” (10:18)

Hembe dzedu dzingava dzichidhura kana kuti dzisingadhure, dzinofanira kunge dzakachena uye dzichienderana nezvatinenge tichiita panguva yacho. Verengai 1 VaKorinde 10:24 uye 1 Timoti 2:9, 10, mobva makurukura kuti nei tisingafaniri kupfeka . . .

• zveuyanga kana kuti zvachero.

• zvakati mbambamba, zvinosiya muviri uchionekera, kana zvinokwezva vanhu kuti vafunge zvisizvo.

Kunyange zvazvo vaKristu vasiri pasi peMutemo waMozisi, mutemo uyu unotibatsira kuziva mafungiro aJehovha. Verengai Dheuteronomi 22:5, mobva makurukura mubvunzo uyu:

• Nei tisingafaniri kupfeka zvinoita kuti varume vaite sevakadzi uye vakadzi vaite sevarume?

Verengai 1 VaKorinde 10:32, 33 uye 1 Johani 2:15, 16, mobva makurukura mibvunzo iyi:

• Nei tichifanira kungwarira kuti mapfekero edu asakanganise vamwe vari munharaunda yatinogara kana kuti muungano?

• Vanhu vanowanzopfeka sei kwaunogara?

• Unofunga kuti zvimwe zvitayera zvacho hazviiti kuvaKristu here? Nei uchidaro?

PFUPISO

Kana tichisarudza kupfeka zvakanaka tinenge tichiratidza kuti tinoremekedza Jehovha uye tinoremekedzawo vamwe.

Kudzokorora

• Nei Jehovha aine basa nekuti tinoratidzika sei uye tinopfeka sei?

• Ndedzipi dzimwe pfungwa dziri muBhaibheri dzingatibatsira panyaya yezvatinosarudza kupfeka?

• Mapfekero edu anogona kuita kuti vanhu vaone sei kunamata kwedu?

WEDZERA PANE ZVAWADZIDZA

Ona kuti zvipfeko zvako zvinogona kuudza vanhu kutii nezvako.

““Ndinoratidzika Sei?” (Nyaya iri paIndaneti)

Dzidza kuti zvakanakirei kutanga wafunga usati wanyorwa-nyorwa muviri wako.

“Matattoo—Bhaibheri Rinoti Chii Nezvawo?” (Nyaya iri paIndaneti)

Ongorora zvimwe zvinotaurwa neBhaibheri zvinogona kutibatsira pakusarudza mapfekero.

“Mapfekero Ako Anoita Kuti Mwari Akudzwe Here?” (Nharireyomurindi, September 2016)

Mumwe mukadzi akasvika sei pakunzwisisa kuti vamwe vanofarirawo kupfeka zvakasiyana nezvaakajaira iye?

“Ndaigumburwa Nyorenyore Nemapfekero Evamwe” (Awake!, December 22, 2003)