Shandisa Zvakanaka Kuda Kuziva

“Kubvunza mibvunzo ndechimwe chinhu chinoitwa nevanhu. Kubvira panguva yatinoberekwa tinotanga kubvunza mibvunzo . . . Zvingatonzi kubvira kare kubvunza nokupindura ndizvo zvave zvichiitwa nevanhu.”—Octavio Paz, mudetembi wokuMexico.

CHII chinoita kuti mubiki atange mabikiro matsva? Chii chinoita kuti munhu anoda zvokufamba ashanyire nzvimbo dziri kure? Chii chinoita kuti mwana abvunze mibvunzo yakawanda? Kazhinji kacho inyaya yokuda kuziva.

Ko iwe? Unoda kuziva zvinhu zvitsva kana kuti mhinduro dzemibvunzo inonakidza here? Somuenzaniso, Upenyu hunobva kupi? Nei tiri pano? Mwari ariko here? Kubva tichiri vaduku, kune vakawanda vedu kuda kuziva kunoita kuti tibvunze mibvunzo yakaita seiyi uye tide kuziva kuti nei uye sei zvinhu zviri sezvazviri. Kana tichinakidzwa nechimwe chinhu, tinoedza kuziva zvose zvatingakwanisa nezvacho. Saka, kuda kuziva kunogona kuguma nezvakanaka zvakawanda. Zvisinei, kungaitawo kuti pave nezvinetso, kunyange njodzi.

Zvinoda Kungwarira Uye Kunzwisisa

Vamwe vedu takambonzwa tsumo yokuti: Matione akapedzesa mbudzi dzevakare. Chokwadi, kuda kuziva kana kusina kunaka, kunogona kuva nengozi kwatiri. Somuenzaniso, mwana angabata chitofu chinopisa achida kunzwa kuti zvinodini, oguma akuvara. Asiwo kuda kuziva kungaita kuti tiwedzere zvatinoziva, kuti tiwane mhinduro dzemibvunzo yedu. Asi kungava kuchenjera here kuda kungoziva zvose zvose?

Zviri pachena kuti zvimwe zvatingada kuziva hazvina kunaka nokuti zvinotikuvadza. Kuda kuziva nezvezvinonyadzisira, kudavira midzimu, kana kuti dzidziso dzotumapoka twezvitendero kungatiisa pangozi mune zvokunamata. Pazvinhu izvi nezvimwewo, zvakanaka kuti titevedzere munyori wepisarema aiva muHebheru uyo akanyengetera kuti: “Itai kuti maziso angu arege kutarira zvinhu zvisina zvazvinobatsira.”—Pisarema 119:37.

Zvadaro pane zivo isingakuvadzi asi isina zvainoreva uye zvainobatsira. Somuenzaniso, zvinobatsirei kuziva zvose nezvoupenyu hwevatambi vomumafirimu kana kuti vanhu vakakurumbira, kuziva zvose nezvematimu emitambo nevatambi vacho, kana kuti kuziva zvinhu zvichangoburwa kana kuti mhando itsva dzemotokari? Kuvanhu vakawanda, kuva “nyanzvi” dzenyaya idzi hakuna zvakunombobatsira.

Muenzaniso Unokurudzira

Chokwadi, kuda kuziva kune zvakwakanakira. Chimbofunga zvakaitika kuna Alexander von Humboldt, nyanzvi yezvinhu zvakasikwa yokuGermany yomuzana remakore rechi19 uye yaida kuongorora, iyo ine zita rakapiwa mhepo yokumaodzanyemba kweSouth America rokuti Humboldt Current.

Pane imwe nguva muupenyu hwake, Humboldt akati: “Kubva ndiri muduku ndaingonzwa ndichida zvokufamba ndichishanyira nzvimbo dziri kure, dzisina kumbonyanya kushanyirwa nevanhu vokuEurope.” Anoti chido ichi chakatanga paakanzwa “achikwezvwa nepfungwa yokuda kuziva.” Paaiva nemakore 29, akashanyira nzvimbo dzakasiyana-siyana kuCentral neSouth America, kwemakore mashanu. Mashoko aakawana akaita kuti aunganidze mavhoriyumu 30 enhoroondo dzokushanya kwake.

Zvinhu zvose zvakanakidza Humboldt, kubvira kutembiricha yomugungwa, hove dzaigaramo nezvinomera zvaakawana maaifamba. Akakwira makomo, akaongorora nzizi uye akafamba mumakungwa. Kutsvakurudza kwakawanda kuri kuitwa nesayenzi yemazuva ano kwakatangwa naHumboldt. Zvakangotanga nokuda kwake kuziva, uye akaramba aine chido chakadzama chokutsvaka ruzivo kwoupenyu hwake hwose. Munyori wenhoroondo wokuAmerica anonzi Ralph Waldo Emerson akati: “Humboldt ndemumwe wevanhu vanogara vachitishamisa . . . sezvinonzi vanoda kutiratidza zvinogona kuitwa nepfungwa dzomunhu, simba repfungwa uye kusiyana-siyana kwadzakaita.”

Chikamu Chakakodzera Kuongorora

Chokwadi, vashoma vanokwanisa kufamba nyika yose vachiongorora kana kuti kutsvakurudza mune zvesayenzi. Zvisinei, kune imwe zivo yatinogona kuongorora uye kufungisisa towana mibayiro inopfuura yataizowana kubva kune imwewo zivo. Jesu Kristu akataura nezvezivo iyi paainyengetera kuna Baba vake vokudenga achiti: “Kuti vawane upenyu husingaperi, vanofanira kuramba vachiwana zivo pamusoro penyu, imi Mwari wechokwadi chete, uye pamusoro pouya wamakatuma, iye Jesu Kristu.”—Johani 17:3.

Kuziva Mwari wechokwadi, anonzi Jehovha, noMwanakomana wake Jesu Kristu kunogona kubatsira munhu anoda kuziva kupfuura zvingaitwa nemamwe mashoko chero api zvawo. Yeuka mibvunzo ine chokuita noupenyu iri panotangira nyaya ino. Mimwe mibvunzo inokosha ndeyokuti: Nei vanhu vachitambura kudai munyika? Vanhu vachaparadza nyika here? Uye Mwari achaitei kuti ave nechokwadi chokuti vanhu havazotamburi kana nyika yaparadzwa nevamwe vavo? Kuwana mhinduro dzemibvunzo iyi hakuzongoiti kuti tizive chete. Sokutaura kwakaita Jesu, ‘tichawana upenyu husingaperi.’ Nei tingava nechokwadi nazvo?

Bhaibheri iShoko raMwari rakafuridzirwa. Achitaura nezvaro, muapostora wechiKristu Pauro akanyora kuti: “Rugwaro rwose rwakafuridzirwa naMwari uye runobatsira pakudzidzisa, pakutsiura, pakururamisa zvinhu, pakuranga nokururama, kuti munhu waMwari akwanise zvizere, akashongedzerwa zvakakwana kuita mabasa ose akanaka.”—2 Timoti 3:16, 17.

Pafunge! Muapostora wacho akati Bhaibheri rine zivo inogona kutishongedza kana kutibatsira kuita zvose zvakanaka. Rinogona kutibatsira kuona zvinhu semaonero anoita Mwari. Uye tinoziva kuti zivo nouchenjeri hwaMwari zvakakwirira kupfuura zvaani naani hake. Muprofita Isaya akafuridzirwa naMwari kuti anyore mashoko aya, okuti: “‘Nokuti kufunga kwenyu hakusi kufunga kwangu, uyewo nzira dzangu hadzisi nzira dzenyu,’ ndizvo zvinotaura Jehovha. ‘Nokuti sokukwirira kwakaita matenga kupfuura nyika, saizvozvowo nzira dzangu dzakakwirira kupfuura nzira dzenyu, uye kufunga kwangu kupfuura kufunga kwenyu.’”—Isaya 55:8, 9.

Ungada kuziva nezvenzira nemafungiro zvaMwari zvakakwirira here? Kuda kwaunoita kuziva kunoita here kuti utsvake zvinotaurwa neShoko raMwari Bhaibheri nezvenzira uye mafungiro ake? Unoda here kuziva zvichaitwa naMwari kuti agumise kutambura kwose uye zvaachaitira vanhu vanoteerera? Bhaibheri rinokukoka richiti: “Haiwa ravirai henyu muone kuti Jehovha akanaka; anofara murume anopotera kwaari.”—Pisarema 34:8.

Chokwadi chine simba cheShoko raMwari chinogona kunyatsobatsira munhu anoda kuziva nomwoyo wose sezvinoita chiedza pamunhu ari kuona kokutanga. Muapostora Pauro akanzwa achida kuzivisa kuti: “Haiwa, pfuma yaMwari nouchenjeri nezivo zvakadzama sei! Kutonga kwake hakugoni kuongororwa sei uye nzira dzake hadzigoni kurondwa sei!” (VaRoma 11:33) Chokwadi ndechokuti kuti hatizombofi takanyatsonzwisisa pfuma yaMwari nezivo nouchenjeri. Tinotarisira kusazombofinhikana, kugara tichidzidza zvinhu zvitsva.

Ramba Uchida Kuziva!

Chokwadi, vakawanda vedu hatizombofi takava vafambi kana kuti vatsvakurudzi vakakurumbira. Uye zvichida muupenyu hwedu hwose hatizombofi takanzwisisa zvinhu zvose zvatingada kunzwisisa. Zvisinei, usadzimura moto wokuda kuziva. Ramba uine chido chokuda kuziva, nokuti Mwari norudo rwake akatisika tiinacho.

Shandisa zvakanaka chipo ichi chinoshamisa chinobva kuna Mwari, uye nyatsonzwisisa Shoko raMwari rakafuridzirwa, Bhaibheri. Kana ukadaro, uchaziva chinangwa choupenyu iye zvino, uchafara uye unogona kutarisira kuramba uchifara nokusingaperi. Bhaibheri rinoti: “Iye akaita zvinhu zvose zvakanaka panguva yazvo. Akaisawo nguva isingagumi mumwoyo mavo, kuti vanhu varege kumboziva basa rakaitwa naMwari wechokwadi kubvira pakutanga kusvikira pakupedzisira.”—Muparidzi 3:11.

[Bhokisi/Mifananidzo iri papeji 21]

Unoziva Here Kuti . . .

• Pachine mazana emakore Columbus naMagellan vasati vazivisa zvakaita nyika, Bhaibheri rakanga razivisa kuti nyika ino haina kuti sandara, asi idenderedzwa?—Isaya 40:22.

• Vanoenda muchadenga kunoongorora vasati vaona kuti nyika haina payakabatira, Bhaibheri rakanga rataura kuti haina payakaturikwa?—Jobho 26:7.

• William Harvey chiremba wokuEngland akazoziva nezvokutenderera kweropa mumuviri womunhu makore 2 500 pashure pokunge Bhaibheri rataura kuti mwoyo chitubu kana kuti itsime roupenyu?—Zvirevo 4:23.

• Makore anenge 3 000 akapfuura, Bhaibheri rakatsanangura zviri nyore kuti mvura inotenderera panyika inoita kuti zvinhu zvikwanise kurarama panyika?—Muparidzi 1:7.

Hazvishamisi here kuti mashoko aya ezvesayenzi akataurwa kare muBhaibheri vanhu vasati vambozvinzwisisa kana kuzviziva? Kutaura zvazviri, muBhaibheri mune pfuma yemashoko anokosha muupenyu, yakangomirira kuti uitsvake.

[Mufananidzo uri papeji 19]

Alexander von Humboldt