Nga grataçelat e qytetit në shkretëtirën e tundrës: Shkoni te njerëzit

AS SHIU, as bora, as breshëri, as ujqërit, as luanët e maleve, as territori armiqësor, nuk mundi ta pakësonte frymën e tyre të vendosmërisë. Me një shpejtësi të çuditshme, ata kalonin me galop përmes 3.000 kilometrash, duke përshkuar lëndinën e hapur, lumenj të rrëmbyer dhe lugina të thella, për të çuar postën urgjente në Bregun Perëndimor. Kush ishin ata?

Ata ishin kalëruesit e rinj kokëkrisur të ‘pony express’.a Ç’gjë ndizte një intensitet të tillë fryme vendosmërie te këta të rinj? Ndoshta sfida, aventura dhe kënaqësia e dërgimit të postës. Është interesante që çdo kalërues, në hejben e tij mbante bashkë me postën kryesore edhe një Bibël.

Më shumë se një shekull më vonë, një frymë më e madhe vendosmërie, entuziazmi dhe devocioni manifestohet nga mbi 113.000 lajmëtarë të devotshëm të Mbretërisë në mbarë Kanadanë. Cili është motivimi i tyre? Dashuria për Perëndinë dhe për të afërmin i frymëzon që ta shpërndajnë të vërtetën e Mbretërisë me anë të faqeve të shtypura dhe të fjalës së gojës. Kjo e vërtetë jetëdhënëse është shumë më urgjente sesa çdo postë e shpërndarë me anë të ‘pony express’. Po, ajo është mesazhi i çmuar i Mbretërisë i Biblës së Shenjtë, i vetë librit që gjendej në hejbet e kalëruesve të ‘pony express’.​—Fjalët e urta 2:21, 22; Isaia 2:2-4; 61:2; Mateu 22:37-39; 24:14.

Të motivuar nga dashuria për Jehovain dhe për njerëzit

Dëshmitarëve të Jehovait u pëlqen shumë t’u flasin njerëzve për Mbretërinë. Ti do t’i gjesh duke vepruar kështu në grataçelat e qytetit, në fshatrat e thella të tundrës, në aeroporte, në rrugë e në vende të tjera publike, si dhe me telefon. Pse në vende të tilla të ndryshme?

Mënyrat e të jetuarit që ndryshojnë, të imponuara nga kushtet ekonomike dhe demografike, paraqesin një sfidë të madhe për t’i gjetur njerëzit në shtëpi. Në shumë raste, si burri, ashtu edhe gruaja, punojnë që të kujdesen për nevojat materiale bazë të familjes, shpesh në kurriz të nevojave frymore. Mes presionesh dhe stresesh të tilla, ata kanë nevojë të jashtëzakonshme për një mesazh shprese që të ngroh zemrën. Dëshmitarët e Jehovait përgjigjen me gëzim. Duke përdorur maturi dhe mirësjellje, ata krijojnë mundësi për t’ua çuar lajmin e mirë të gjitha llojeve të njerëzve në një mënyrë tërheqëse dhe që të nxit të menduarin.—1. Timoteut 2:3, 4.

Në gjuhë të tjera: Kur Jezui i urdhëroi ithtarët e tij ‘të shkonin dhe të bënin dishepuj’, mori parasysh iniciativën dhe vendosmërinë për t’ua çuar mesazhin e shpresës njerëzve të të gjitha gjuhëve. (Mateu 28:19) Si në shumë vende, Kanadaja është bërë një mozaik kulturash dhe gjuhësh të ndryshme dhe shumë lajmëtarë të Mbretërisë janë përshtatur, duke mësuar gjuhë të reja.

Për shembull, një çift, shërbëtorë në kohë të plotë në Edmonton të Albertës, kuptoi nevojën që ekzistonte në qytetin e tyre për të arritur njerëzit, të cilët flasin gjuhën kineze mandarin. Por së pari, çiftit i duhej të mësonte gjuhën, kështu që u vunë në kontakt me një student që fliste mandarin. Ai ra dakord që t’u mësonte atyre gjuhën dhe që njëkohësisht të mësonte prej tyre të vërtetat biblike. Ç’situatë ideale! Brenda 24 muajsh ata dy lajmëtarë të devotshëm të Mbretërisë ishin të kualifikuar për t’i mësuar të tjerët në gjuhën mandarin. Në të njëjtën kohë, mësuesi/student i tyre u kualifikua për pagëzimin e krishterë.

Përvoja të ngjashme po i gëzojnë edhe në qytete të tjera, ndërsa lajmëtarët e Mbretërisë, të motivuar nga dashuria, mësojnë gjuhë të tilla, si: polonisht, rusisht dhe atë vietnameze.

Në rrugë: Ashtu si kalëruesit e ‘pony express’ të shekullit të kaluar, që kalëronin vetëm, disa lajmëtarë të Mbretërisë në brendësinë e Kolumbisë britanike, janë kalërues të vetmuar. Një pjesë të madhe të kohës së tyre e kalojnë në punën në botë, duke manovruar kamionë të mëdhenj me trungje përmes vendit të pyllëzuar për në uzinat e sharrës. Kjo kërkon kontakt të vazhdueshëm me kamionistët e tjerë me anë të CB (vala e qytetarëve) në radio, duke komunikuar për qarkullimin e trafikut dhe rreziqet e rrugës.

Me krijimtari, këta lajmëtarë të Mbretërisë i përdorin radiot e tyre CB në një mënyrë të pashoqe. Ata i nisin bisedat në CB duke përmendur ngjarjet e fundit. Pastaj, me mjeshtëri i referohen Biblës. Në një rast, një kamionist tjetër iu përgjigj asaj që thotë Bibla në lidhje me shpresën për të vdekurit. (Gjoni 5:28, 29; Veprat 24:15) Vdekja e një shoferi tjetër gjatë një aksidenti në një rrugë kryesore, e kishte shqetësuar së tepërmi atë. Ai pranoi me mirënjohje një studim biblik dhe tani mund të dëgjohet duke u shpallur lajmin e mirë bashkëpunëtorëve dhe miqve. Për më tepër, për gëzimin e tij, u fillua një studim biblik me të venë e mikut të tij të vdekur. Çfarë shpërblimi për marrjen e iniciativës në prezantimin e mesazhit jetëdhënës të së vërtetës, në këtë mënyrë të pazakontë!

Me anë të ajrit: Kur është fjala për shpërndarjen e mesazhit të vyer të së vërtetës, lajmëtarët e zellshëm të Mbretërisë shkojnë atje ku ndodhen njerëzit, ‘duke hyrë nëpër fshatra’ me anë të aeroplanëve të lehtë. (Mateu 10:11, 12) Pak kohë më parë, dy grupe me aeroplanë, të nxitur nga zelli për të deklaruar lajmin e mirë dhe me shpenzimet e tyre, fluturuan për te njerëzit e shpërndarë të hapësirës së gjerë të shkretëtirës së tundrës. Çdo grup aeroplanësh përshkoi rreth 3.000 kilometra dhe u ul në 14 fshatra të ndryshme, duke shkuar deri në 250 kilometra larg Rrethit Arktik. Këta lajmëtarë të palodhur vazhduan për shtatë ditë të plota të arrinin njerëzit e izoluar nga largësitë e mëdha.

Po a ia vlejti kjo? Vetëm mendo për ndikimin pozitiv që pati mesazhi i Biblës në këto fshatra. Shërbëtorët që shkuan atje ndihmuan për të plotësuar një nevojë jetësore frymore, kur paraqitën qëllimin e Jehovait për një tokë parajsore në të ardhmen e afërt. (Mateu 5:3) Shumë kohë pasi sjellësit e mesazhit ishin larguar, njerëzit me zemër të ndershme të këtyre fshatrave do të kishin mundësinë të lexonin nga 542 Biblat e nga literatura ndihmëse për studimin e Biblës, si dhe nga 3.000 revistat që u lanë në duart e tyre.—Krahaso Veprat 12:24.

Me anë të telefonit: Me mijëra banorë të qytetit jetojnë në grataçela që kanë një sigurim të teknologjisë së lartë. Edhe pse është kështu, lajmëtarët e dedikuar të Mbretërisë veprojnë me zell dhe maturi. Si kanë mundësi të shkojnë atje ku ndodhen këta njerëz? Edhe pse ai që preferohet është kontakti ballë për ballë, shpesh përdoret me sukses citofoni. Kur kjo nuk është e mundur, ata lënë që punën e tyre ta bëjnë gishtat, duke i marrë njerëzit në telefon.

Një mëngjes, një e moshuar iu përgjigj telefonatës. Pas një përshëndetjeje të shkurtër dhe të sjellshme ajo u pyet nëse mendonte se do të vinte koha kur njerëzit do të kenë mundësi të ecin të sigurt në rrugë netëve. U lexuan disa shkrime, për ta siguruar se në të ardhmen paqja do të ishte e bollshme. (Psalmi 37:10, 11; Danieli 2:44; Mateu 6:9, 10) Ajo ra dakord për një bisedë telefonike javën e ardhshme në të njëjtën kohë, për të trajtuar se përse mund t’u besojmë premtimeve të Perëndisë. Pas një muaj studimi të Biblës në telefon, duke lexuar paragrafë nga një libër ndihmës për studimin e Biblës dhe duke drejtuar pyetje të përshtatshme, lajmëtari i Mbretërisë mori lavdërime nga ajo grua për trajtimin e kaq shumë argumenteve të ndryshme biblike çdo javë. Kishte ardhur koha për të përshkruar librin e studimit dhe për t’i ofruar një kopje personale. U bënë rregullime që të takoheshin të dy personalisht. Në të vërtetë, Dëshmitarët e Jehovait e kanë demonstruar dashurinë e tyre për njerëzit dhe njerëzit po përgjigjen, duke pranuar se Jehovai është me këta predikues të krishterë.—Krahaso 1. Korintasve 14:25.

Me anë të faqeve të shtypura: Edhe lajmëtarët e Mbretërisë në provincën e Kuebekut, ku kryesisht flitet frëngjisht, po shkojnë atje ku ndodhen njerëzit. Një mbikëqyrës udhëtues vërejti: «Për vite të tëra, vëllezërit mendonin se nuk po bënin përpara, për shkak të kundërshtimit të egër të kishës. Por me anë të punës së palodhur të vëllezërve dhe të vizitave të tyre herë pas here, Bibla, e cila ishte një libër pothuajse i panjohur dhe i lexuar vetëm nga pakica, tani ka vendin e saj në shumicën e familjeve.»

Rezultate emocionuese po sjellin gëzim, ndërsa ungjillëzues të rinj vijnë nga të gjitha shtresat e shoqërisë së Kuebekut, përfshirë edhe ata të fushës së mjekësisë. I tillë është rasti i një mjeku. Gruaja e tij, një lajmëtare e Mbretërisë, bisedonte shpesh me të për shpresën biblike. Një plak kongregacioni i vëmendshëm, mori iniciativën për ta ftuar mjekun në një mbledhje të kongregacionit, në kohën kur po studiohej broshura Si mund ta shpëtojë gjaku jetën tënde? Ai shkoi dhe madje mori pjesë aktivisht. Meqenëse i bëri përshtypje cilësia dhe thellësia frymore e bisedave, pranoi një studim biblik. Tani edhe ai është një lajmëtar i Mbretërisë.

Përdorimi i efektshëm i revistave ka luajtur një rol të rëndësishëm në tërheqjen e njerëzve drejt Biblës. Një person nuk e di kurrë se cili artikull do të jetë katalizatori për ta tërhequr dikë tek e vërteta. Një lajmëtare e Mbretërisë i ofroi një numër të Zgjohuni! fqinjës së saj, e cila nuk dëshironte ta dëgjonte mesazhin, por i interesonte bota e insekteve. Fotografia në artikullin e numrit të 22 nëntorit 1992 të Zgjohuni!, anglisht, «Sëmundja Kagas, një puthje e vdekjes» i ngjalli kureshtjen. Me mbresa nga ajo që kishte lexuar, kërkoi revista të tjera. U fillua një studim biblik dhe brenda gjashtë muajsh ajo u dëshmonte të tjerëve.

Në vendet publike: Ligji kanadez e lejon lirinë e fjalës në vende publike, të tilla si aeroportet. Në aeroportin ndërkombëtar Halifaks, lajmëtarët e Mbretërisë u afrohen me maturi udhëtarëve ndërmjet fluturimeve, duke i përfshirë ata në biseda. Për ta drejtuar bisedën te Bibla, përdoren pyetje sugjestive në lidhje me të rejat e fundit. Meqenëse ata mbajnë Bibël xhepi dhe literaturë, mund t’u përgjigjen nevojave frymore. Kirurgët, shkencëtarët, avokatët, pilotët, klerikët, policët, shoferët e taksive, inxhinierët, mësuesit, personeli ushtarak dhe politikanët nga vendet e huaja, janë mes atyre që e kanë dëgjuar mesazhin e Mbretërisë në këtë mënyrë dhe që i kanë bartur farërat e së vërtetës, për të mbirë në vende shumë të largëta.—Kolosianëve 1:6.

Në aeroport, në mëngjes herët, një burrë pranoi revistat Kulla e Rojës dhe Zgjohuni! Pastaj, me një zë të qetë e të ngadalshëm, tha: «Oh, jo, jo Dëshmitarët e Jehovait!» Pse një reagim i tillë? Ky burrë ishte një mysliman i devotshëm, që sapo ishte lutur në kishën e aeroportit. Ai sapo i kishte kërkuar duke iu lutur Perëndisë, që t’i tregonte mençurinë, mendjehollësinë dhe të vërtetën. Mendimi se Dëshmitarët e Jehovait ishin një përgjigje e menjëhershme për lutjen e tij, thjesht e habiti.

Në të vërtetë, lajmëtarët e guximshëm të Mbretërisë në Kanada nuk lënë asgjë t’u presë rrugën për prezantimin e mesazhit të çmuar të Mbretërisë. Ata nuk lejojnë të sprapsen as nga gjuhët e huaja, as nga rrugët e pashtruara dhe as nga fshatrat e thella apo nga ndërtesat me siguri të lartë. Ata janë të vendosur t’u shpërndajnë mesazhin jetësor të Perëndisë kërkuesve me zemër të ndershme të së vërtetës. Bashkë me vëllazërinë e tyre mbarëbotërore të bashkëpunëtorëve, ata i binden pa egoizëm urdhrit të Jezuit për të ‘shkuar e për të bërë dishepuj’.—Mateu 28:19.

[Shënimi]

[Kutia në faqen 27]

Lajmëtarët e suksesshëm të Mbretërisë përdorin telefonin

Disa kanë thënë: «Mirëdita. Quhem [thonë emrin]. Kam folur shkurtimisht me njerëzit e ndërtesës suaj se si mund të arrihet paqja. A mendoni se do të ketë ndonjëherë paqe në mbarë botën? [E lënë të përgjigjet.] Që të mos ju vë në siklet, nuk jam duke bërë një sondazh apo duke shitur diçka. Përkundrazi, u kam dhënë të tjerëve mendimin nga Shkrimet e Shenjta, se Perëndia do të sjellë me të vërtetë paqen.» Më pas, biseda mund të vazhdojë me një trajtim të shkurtër biblik.

Të tjerë kanë thënë: «Mirëmbrëma. Quhem [thonë emrin]. Jam një vullnetar në zonën tuaj. Kam marrë opinionet e individëve që banojnë në ndërtesën tuaj. Shumë janë të shqetësuar në lidhje me sigurinë personale, duke pasur parasysh dhunën dhe kriminalitetin në rritje në zonën tonë. A është kjo diçka që ju shqetëson? [E lënë të përgjigjet.] A mendoni se do të ekzistojë ndonjëherë koha, kur e gjithë bota do të ndihet e sigurt?» E lënë të përgjigjet dhe vazhdojnë me një mesazh biblik.